ساگر سرفراز

نظمہِ کیا عنوان تھاوو

خونہ دل

خونہ دل تھاوو تہ خونس چھہ نہ وۄں مۄل
خون سے یُس خشمہ ۂژ وٲنج چیواں
خون سے یُس رات کیت ژانگین دزاں
خون ہا سے یُس رگن اندر شٹھیاو
خون سے یتھ از گۆمت رنگے سفید
خون سے یُس تازہ ارمانن سپد
خون ارزاں ییتہ چھہ بازارن اندر
خونہ سیتین تر سپدۍ دامانہ سانۍ
خونہ سرۍ گومت چھہ یودوے خشک و تر
خون ڈیشتھ چھہ نہ وۄں کٲنسے ژس گژھاں
خون وچھۍ وچھۍ لکھ چھہِ بس اسنا کراں

اۆش

اۆش اگر تھاوو تہِ تتھ چھہ نہ کانہہ اثر
اۆش چھہ ییتہ ہاران لکھ شام و سحر
اۆش چھہ رتہ سرۍ دامنس تھاوان تر
اۆش چھہ دلہ کس آستانس چھۄکھ کڈاں
اۆش چھہ ساری داغ گۄنہن ہندۍ چھلاں
اۆش چھہ کنہِ ساتن اچھن اندر دزان
اۆش چھہ ما یمہِ شہرہ وۄنۍ کٲنسی دران۔

دگ

دگ اگر تھاوو تہِ دگ ویتراوِ کُس
دگ چھیہ نا یمہ شہرہ ماجین وچھ ژٹاں
دگ چھیہ نا معصوم شہزادن وداں
دگ چھیہ نا مٲلی وۄں گبرن نکھ دواں
بس یۄہے منظر وچھتھ چھیم دگ وۄتھاں

بے بسی

اتھ اگر عنوان تھاوو بے بسی
بے بسی یس باگہِ آمژ سارنے
بے بسی گیہ میانۍ کنۍ بس زندگی
زندگی عنوانہ رۆستے شاعری ۔۔

___________________________

تریہ غزلہ

(1)

لۆگ نار عقلہِ میانہِ تہ سورے شعور دۆد
تمہِ جلوہ زنتہ میون بدن کوہ طور دۆد

ہمہِ رودہ شرانہِ وٲج یسنزِ ژھیہِ پہر ڈہتھ
یمہِ تیز تاپہ کرایہ تہِ سے پھیکۍ مزور دۆد

نارس اندر یہ کس چھہِ یقینس پھۄلان گل
آبس اندر میہ ونتہ یہ کمۍ سند غرور دۆد

خۄشون یہ روے چون تہ اتھۍ اوس گتھ کران
پومپر بنتھ یہ میون دل نا صبور دۆد

یتھ منز سہ عکس حور میہ تھایاو چھاکرس
سے میون ٲنہ خانہ سپد چور چور، دۆد

ژھیتہ گژھہِ یتھے یہ نار تہ لوکھ لاگنے ونن
مژۍ چون سرفراز دپاں بے قصور دۆد

(2)

کنیو شہرس اندر شیشو بدن ہیتھ دربدر چھس
سیاہی ہند یۄہے سرساوۍ فن ہیتھ دربدر چھس

کٔرتھ تھپھ یتھ دپیوتھم نارہ سدرس تارہ ترۍ زیو
دپیو لل ماجہ وُنہ سے اوم پن ہیتھ دربدر چھس

یمبرزلہِ ہند تمنا شوقہ پٲرٲوتھ اچھن منز
بۄمبر ہیو زن پنن پھلواے من ہیتھ دربدر چھس

چھۄکن ہند معنہ اچھرن آپرٲوتھ از تہِ کن زۆن
بیابانس اندر انہرۍ سخن ہیتھ دربدر چھس

ہجومس منز بہ چھس ازتام پننی لاش ژھانڈاں
بہ یتھ بستی اندر رتہ سرۍ کفن ہیتھ دربدر چھس

سٔرتھ سکھرتھ دٔرتھ بے وایہ دیت امۍ ہردہ واون
بہ ہلمس منز بٔرتھ سے بونہِ پن ہیتھ دربدر چھس

گمانس منز یمن سبزار زانہہ پھیورے نہ ساگر
خیالن ہندۍ تمے سرو و سمن ہیتھ دربدر چھس

(3)

گپتھ اند کن بہتھ  پانس اندر چھس
مۄژیامت اتھۍ میژیو  بانس اندر چھس

شعورس چھیہ نہ پلو تتھ جایہ تامتھ
گمانو ہیۆر بہ امکانس اندر چھس

ژۄواپاسے گژھان چھِم نظرِ کھنڈر
بہ کتھ سا  ملک  ویرانس  اندر چھس

میہ کن چھیہ نہ ساقیس نظرے پلاں زانہہ
توے لب تشنہ مے خانس اندر چھس

یہ گے دیوانگی ننہ وانہ ساگر
شمع زٲلتھ بہ  طوفانس اندر چھس

***