1
مۆت کُنہِ میلیم نا زارہ پارن تے
ونتے سہ کونے آم
گرِ بالۍ درایس گنبرو
تنہِ ٹۅپھ لٲیتھم بۆمبرو
عشقنہِ نارہ ستیۍ دٔز میانۍ تن تے
ونتے سہ کونے آم

2
تس کیت پٲریام گُر، گۆند، دیروی
ویٖرہ کوَے گٲجنس سہ پھیرِ نا سن
سریہہ اوس ژیہ تہ میہ ہے ہیہِ مٲلی
ییہِ نا وۅندہ شر نیرِ نا سن
یاوُن دور گوم ززر آم نیروی
ویٖرہ کوَے گٲجنس سہ پھیرِ نا سن

3
کوہ ویسۍ زٲجنس عشقنہِ نٲری
لگہ ہس پٲری انتنے
پرزن ستیۍ ہے لٲجنم یٲری
غرض کیا چھُس ؤنۍ تنے
مرض دلہ کی باوس سٲری
لگہ ہس پٲری انتنے

4
سۅرمس تہ چشمن ہوُے رنگ چھے
دمہ دمہ گُمس للہ ون نار
زلفس رخسار وتھرُن پرنگ چھے
کونکل پیچان کیاہ موجدار
مجن تہ خنجرن اموب جنگ چھے
دمہ دمہ گُمس للہ وُ ن نار

5
گندنے درایس تورۍ گٔیسو رٔستھ
دۅہ درِ یامت لوٗسِتھ گوم
وانس اوسم مالا ژیستھ
سورے عالم وچھنے درام
مال ییلہ رووُم مۅل گوم ؤستھ
دۅہ درِ یامت لوٗسِتھ گوم
مالنۍ میٲنی ارباب ٲسی
توے درام حبہ خاتون ناو
کم کم گندر آیے ژیستھ
دۅہ درِ یامت لوٗسِتھ گوم

6
ہاے لتی لولن گیہ مے مورِ تے
امۍ مٔتۍ ترٲو نمے پٲری زان
تس پتہ عاشق کتیۍ گے مٔتی
پرزن ستیۍ چھُم دین کہو راتھ
کہۍ زرہ موہنی پییہ مے زورِ تے
امۍ مٔتۍ ترٲو نمے پٲری زان
ہا ہیکے نو بہ دوریر چونے
یارہ پوشن بہ کریو مالو
رۅپہ بدنس پیمو میہ ہامو
شیہِ آستم پورہ کمالو
روشہ گوشن ویر ہیتھ رودہم
یارہ پوشن بہ کریو مالو

7
یار ژۆلمے واو زن دورے
گرایہ ژۆلمے پھیرِ نایے
لول تہندُے نو زانہہ سورے
ویرِ تہنزے گٔیس بدنام
وۅتھ گژھوس دیوہ یورۍ پھیرے
گرایہ ژۆلمے پھیرِ نایے

8
پدمانۍ زٲجتھس نارو یارو
کوَہ رودہم اند دیشن وے
دپۍ توس بہ بال کہۍ سندارو
کوَہ رودہم اند دیشن وے
آرہی میانہ ینہِ توشہ بومبرو
کوَہ کرِتھم اوباشہ گندرو
تنہِ سور ملے بو دور ژلیو
کوَہ رودہم اند دیشن وے

9
ان چھم نہ پکان تی ونۍ توس
انتن تہ لاگس بہ تنہِ تن
یار دی میونے گیاو تھیٖد برن
وتھرُن کرسے ہی یے پن
تیلہ ژلہِ تمنا ییلہ میلہِ تن
انتن تہ لاگس بہ تنہِ تن

10
ان چھیکھ نہ کھیوان زُوکھ کمہِ واوہ
سۅندری اۆش کوے تراواں چھیکھ
مالنہِ گرِ چھیکھ سنز کرناوان
وٲروۍ گرِ راوراوان چھیکھ
کالۍ ما گژھہ کھے اتھہ زٕے ہاوان
سۅندری اۆش کوے تراوان چھیکھ
ببرے زٕے ڈورۍ چھیکھ سگناوان
اکھ ڈور کس کیت تھاواں چھیکھ
اورہ ییہ اوش تے یورہ نیرِ چھاوان
سۅندری اۆش کوے تراواں چھیکھ
مۅختے پۅکھرے تن چھیکھ ناوان
ناگہ بل ٹیۆک ساز کران چھیکھ
رازِ دل کونہ چھیکھ کٲنسہِ نش باوان
سۅندری اۆش کوے تراوان چھکھ

11
تُلو نار چھم للوُن مورِ
اسہ گژھہِ ژوِر چون دیدار
غافلہ پانو قافلہِ دورِ
تھوونم مورِ للوُن نار
ہٹہِ کے رتھ بو وَندے ٹورِ
اسہ گژھہِ ژوِر چون دیدار
پانے لۆدن تے پانے لہورِ
پانے آشکارا چھے
پانے ہیرہ بۅن دچھنۍ کھوورِ
اسہ گژھہِ ژوِر چون دیدار

12
ویرِ چانہِ ژھنڈِم کوہ تے غارو
کُنہِ نیب لۆبمے نہ یارو وے
دادِ چانہِ پچمو اشہِ نے دارو
یارو مۅختے ہارو وے
پرنگ بو گریو ژندن دارو
رنگ چون گل انارو وے
پرنگس شوبہِ نے پاٹۍ نوارو
یارو مۅختے ہارو وے

13
پورہ دێنہ ژندرہ نہِ کٔرمس سِوے
بہ ونے تہنزے کیا چھے زان
وقتہ اکہِ کھیٲونس جنتک میوے
توے نفی یس گوم اثبات
ہر مۅکھہ ڈیٖنٹھم تہنزے دِوے
بہ ونے تہنزے کیا چھے زان

14
گل پھلۍ باغن پوش پھلۍ ونہ نے
بومبرو کنہ نے گۆے نا ژیہ
غصہ ژلہِ سۅندرن توسہ ویژھناوان
ادہ چھے کھاران ستہ ساسۍ پن
ٲولین زٲولین آمین پنہ نے
بومبرو کنہ نے گۆے نا ژیہ

15
اول صٲحبہ سورے وندے
ویسۍ اسۍ چونے گندنے آے
لۅکچارہ کِس چکہ چاوسے
بُجر لگان کنڈی زال
گژھاں رِیہ پان ہِیہ پانسے
ویسۍ اسۍ چونے گندنے آے
ولنے آیس کنڈۍ زالسَے
ژھلہ نے مۅکلہ کیا میون پاے
ہے ہاے، ہے ہاے، ہے ہاے، ہاے
ویسۍ اسۍ چونے گندنے آے

16
ونہِ ویسۍ کوہ چھہ نہ میہ ستیۍ وٹان
پھٹان چھہ وۅندہ میون لولہ نٕے
راہ کیا لۆدنم تنہ چھیس نٹان
سنہ گوم ون یے قولہ نٕے
سۅنہِ دادِ یارہ دود ٲسس کھٹان
پھٹان چھہ وۅندہ میون لولہ نٕے

17
ہا متہِ مو ہیم دور دور
میہ کلے چانے گومو سور
انگ چھم نہ ہیوان عشقہ ناسور
ننگہ بال ژلہ سے ملہ سے سور
ہنگہ وسہِ ززُر سے چھم قصور
میہ کلے چانے گومو سور
پراران پراران دۆد منصور
سورس تہندس سپنُے نور
دٕے یس گلہِ، سے چھہ منظور
میہ کلے چانے گومو سور

18
روشتھ ژۆلمے ہوش نے تھوونم
گوش کمۍ برۍ سے اپزے
پوشتھ گومے بے ہوش کٔرتھ
پوشتھ تہ توشتھ ییہ نا یے
خۅش دل میٲنس اوشس ون تے
گوش کمۍ برۍ سے اپزے

19
سادہ مالہِ سادو سٲدہ مکارو
راتھ دو لجم چانہ یارہ بل
سمدن کھسۍ تھے سٲلا کرۍ زے
نمدن پیٹھ برۍ زِ دۅہ کہو راتھ
پمدن چھیہ پھلے سون کُن یِزے
راتھ دولجم چانہ یارہ بل

20
اتھ نورہ بتھۍ سے مے دم نۆرے
دۆر نے سۅندری چھے سمسار
وچھتے پانڈون ہند دیدہ دۆرے
تِم تہِ کرالہ گرہ نے چھپنے آے
تمن تہِ اوسے ازلُن ٹھۆرے
دۆر نے سۅندری چھے سمسار

21
عشقن نار کوتاہ چھکہ نے
ونتے ویسی تی ہیکہ نے
راہ کیا لۆدنم ڈیوٹھم مۅکھہ نے
ویسی پرزو برۍ ہس کن
تی ہے بوزم پننے کنے
ونتے ویسی تی ہیکہ نے

22
ہے ہے باغس گل گٲم برو
کینہہ تہِ نو سپدم سرو ہو
دپیام پانس پانے مرو
دپیومس دۅہے، بوزنم نہ زانہہ
یۆدوے مرہ ہا، ادہ نو مرو
کینہہ تہِ نو سپدم سرو ہو
حبیبہ کاستم ارہ تہ سرو
طبیبہ علاج لۆبم نہ کانہہ
لبیبہ دپان وۅلو لوچرو
کینہہ تہِ نو سپدم سرو ہو

23
بالہِ ہے رُمہ رُمے
چھمے بالے تمنا
پشہِ پیٹھۍ وچھنمے
لشہِ نار دٔز میانۍ تن
پشہ پشہ تھوونمے
چھمے بالے تمنا
وۅگہ کنۍ وچھنمے٭
شوگہ لٲگتھ بولنم٭٭
روگہ روگہ گٲم گُمے
چھمے بالے تمنا

٭ وۅگہ پیٹھۍ وچھنمے
٭٭ شوگہ لٲگتھ آنگن ژام

24
وار چھم نہ نیرنس وٲرو چھیس گرے
وۅنۍ پراریو پوشہ تھرے تل
مس کوہ دیتتھم پھۅلونہِ تھرے
امہِ مسہ اموب چھِوییس بال
ذوقہ مژ، شوقہ چانہِ وۅنۍ کیا کرے
وۅنۍ پراریو پوشہ تھرے تل

25
گرہ گرہ ژھانجام سارین گرے
سہ گرے پانس بہت شاہ
ہے ویسۍ ونتے ڈیشن کرے
ہۅنرے ہۅنرے نیونم دل
دوریر ہیکہ نہ تہ مارۍ نم درے
سہ گرے پانس بہت شاہ
وچھام ٲنس چانہ لولرے
عیان سپنم پننے پان
وچھم معشوق پننے گرے
سہ گرے پانس بہت شاہ

26
بٲومس پٔز کتھ ونۍ مس زٲری
ازچ یٲری وچھتھے
کیا سنا ویسۍ یے ییم نایے
دٛرے دِتھ انۍ تون وچھہن بال
پدمانۍ ٲستھ زٲجنس نٲری
ازچ یٲری وچھتھے

27
چھیم تہنزے منہِ کامن
بو کوو پامن لٲجنسے
سۅندرا ڈینٹھم پورِ سامانہ
سِندر چھیہ لٲگتھ نمہ نے
پیرتھ شیہ تہ داہ سامانہ
بو کوو پامن لٲجنسے
تس سیتۍ بال چھیس برٛمٲنی
ییلہ چھیس کریشاں برمٲنی
دۅہہ کھوتہ دوہ چھیس برٛمٲنی
بو کوو پامن لٲجنسے

28
عشقنۍ ہی چھیم مشکنۍ واسن
کینہہ نے چھہ تہ ادہ کیا سنہ بو
جتن جوگین بییہ سنیاسین
متین آیہ معرفت چی بو
یم تور گیہ تہ تم تورۍ آسن
کینہہ نے چھہ تہ ادہ کیا سنہ بو

29
سۅنہ چھیم گیلن کُنہِ چھم نہ میلن
پرزن سیتۍ چھم گندٲنی
مُہہ نارہ سور گۆو پربتہ شیلن
مُہہ نار پھۆر ولہ ویرٲنی
مُہہ نار ہنہِ ہنہِ تنہِ چھم تیلن
پرزن سیتۍ چھم گندٲنی

30
یس چھکھ ژھانڈان سہ چھے نیشو
ریشہ، دِشہ دِشہ مو نشراو پان
پانژن تہ ترین منز مو گژھ ویشو
ستھ زان ششکل تریشہ کنہِ چین
تمہ سیتۍ پرارکھ انتر وشو
ریشہ، دِشہ دِشہ مو نشراو پان

31
دور ڈیونٹھم کامہ دو وزان
بوزیم یۆد میہ دِیہ درشن
شرۍ پان ژۆلمو سہہ زن گریزان
للوُن تھوونم زلوُن نار
تمہِ شرہ کۅہ تے پربت دزان
بوزیم یۆد میہ دِیہ درشن

32
ویر ہیتھ رودہم بۆمبرو
بال مرے تہ کل چھیم چانۍ
ارۍ نہِ رنگ گوم چانہِ امارو
بییہ میلتو پننے شایہ
تیٖر عشقن کہۍ سندارو
بال مرے تہ کل چھیم چانۍ
گیوان درایس منزۍ شہارو
رِواں ژایس ژیہ رۆستے
روزتم دما، بوزتم زارو
بال مرے تہ کل چھیم چانۍ

33
داوہ عشقنہِ لٲگتھ ژۆلمے
تی کسو نِشہ باوے
کاوہ میانے گراوہ ونتس
بالہِ کیا چھم راہ
دورِ روزتھ حور زٲجنس
مُہہ نارہ نہِ تاوے
سۅنہ دادے سور سپدان
ونتہ کرس کیاہ
بالہ پانک چھم دلس سریہہ
تی کِتھو مشراوے
کاوہ میانے گراوہ ونتس
بالہِ کیا چھم راہ

34
ویسۍ یے لولن گیہ مے موٗرے
ونتے بالہِ پوٗریم کر
لولہ مس لدہس بو سۅنہ ٹوٗرے
کرہس سنگار، رنگہ ہس کر
منہ سرہ پھلیا لجم کستوٗرے
ونتے بالہِ پوٗریم کر

35
سۅرہ روزتو ہا مدنو آیہ سیو بو
تمبلٲوتھس ہا یارو مژٲوتھس بو
یوٗت کیا چھکھ مد براں کراں بوبو
بنہِ کسُو ییمہ سمسارہ میون ہیو یارہ دو
ہِتھ مو ہیٚم ہا ہِتلو مۅیہ سیو بو
یانۍ سوٗرم بالہِ لۅکچار تانۍ چھیتوم مو

36
مۆت گومے پرزن مۆتے
میہ مۆت تہندے سوٗرم نہ زاہ
پتہ پتہ لاران گوم دُ وۆتے
اکہ ہِتہ دیدار ہاویم ناہ
روزِمے ییتہ کِنہ لارس تۆتے
میہ مۆت تہندے سوٗرم نہ زاہ