انتخاب: منیب الرحمن
ماخذ: صوفی شاعر مرتب امین کامل، صوفی شاعر مرتب موتی لال ساقی
میہ چھیہ شمس فقیرنہِ کلامک انتخاب پیش کرنس منز حدہ روٚس خوشی۔ سورے انتخاب ٹایپ کٔرتھ پیش کرنہ بجایہ روزہ بہ یتھ انتخابس ہُریر کران۔ انشااللہ ییہ ریتس کھنڈس تام سورے انتخاب پیش کرنہ۔ سیتی ییس لفظن ہند معنی تہ تمن ہند پھور تہِ دنہ۔ امہ علاوہ ییہ سورے انتخاب پیش کرنہ پتہ، کلامک جایزہ ہینہ۔ یتین یتین ضروری آسہِ کلامس ییہ تصحیح تہِ کرنہ۔
کلامک پروف چھہ نہ ونہ پرنہ آمت۔
1
شنیا گژھۍ تھے اوس میون اولے
شنیا گژھۍ تھے اوس میون اولے
امۍ عشقہ نارن زولو یے
گنرس تروونم رۅنہِ منزولے
شرۅنۍ شرۅنۍ بوزان ژاس
کلیتہ نش میہ گلزار چھووم
ہوونم گل شفتو لو یے
ہاتفین ساعتہ اکہ آلو دیتنم
ہیو٘تنم کرن اخلاص
حضرت ہٲدین ٲدی دو٘پنم
دنیا چھہ کاوہ یینہِ وولویے
واوس سیتین ملون تھٲونم
ہوونم عام کہو خاص
کوہ تہ بال ڈینٹھم نارہ سیتۍ دزان
آب میہ درینٹھۍ آم کولویے
زال میہ درینٹھۍ آم سبز درمنا
تتھۍ یارہ ولنے آس
کا گو٘و شیچھ ہیتھ تس راتہ مۅغلس
زالس لو٘گے سۅکھہ سووویے
مۅکھہ ہے ڈیشکھ تہ کتھا بوزکھ
وتھا چھیہ تور نمناس
بوز راتہ مۅغلن کلہ ژھن بۅن کن
پننے روو آسونویے
کاو آو شیچھ ہیتھ تس رازہ ہونزس
کوتاہ تُلن کہۍ کاس
زالس لگتھ بہ حیرتس پیوسے
غیرتس اوسس گاٹولویے
سیرت ترٲوتھ صورتس موزم
دولتس چھہ سپدان ڈاس
تھزرے تھزرے رازاہ اوسس
ازلن دیتنم دولویے
کزلۍ سۅرما چشمن لوگنم
دشمن گوم لتہ داس
تھزرے پیٹھن نظراہ ترٲوم
رووم اکھ مۅختہ پھولویے
سۅختہ یارۍ کو٘رنم اتھ مۅختہ ہارس
نارس کو٘رم اتھہ واس
بادہ فروشن وعدا دیتنم
سادہ ینہ لاگکھ گرہ وولیے
پر تہ پان یو٘دوے ہہے زانکھ
خرچکھ لچھہِ بدۍ ساس
اتھ جایہ وٲتھ ستھ ناگ ڈینٹھم
پتھ ناگ چھے آبہ چھولویے
ژندن ونہ سے چھہ حضرت ادریس
پیوند کراں الیاس
زول میہ دژاو سمندرس
مۅختہ ہار بو٘ٹھ میہ کھولویے
حضرت خضرن امہِ شایہ دو٘پنم
سپدکھ او٘ن مہ واس
شمس فقیرو بنن تہ گدرن
زانہِ سے یمۍ یہ ژولویے
نٔوس تہ پرٲنس قدر زانے
معنی خرقہ پولاس
__
2
غزل
میہ وچھ ہر شایہ سہ یار چھہ نو کانہہ موے تہِ خالی
ونے بہ سیر اسرار ینو آسکھ وبالی
دما اکھ میہ گیم کل میہ بوزم دلہ کین پردن تل
چھہ ساز وناز افضل چھیہ زیرس یم تہ چالی
ژہ لاے منز وحدتس تھاہ گژھی معلوم شہنشاہ
رندے چھکھ زندہ مر با گنداں گژھ خۅردہ سالی
سدر چھے سنہِ کھۅتہ سو٘ن محیط کوہ زانہِ کانہہ او٘ن
سہل چھا معنہ بوزن تہِ بوزن گاٹالی
فنا جامے ژٹتھ تراو أژھ منز دیدنے راو
گژھی معلوم پنن ناو بمع پیمانہ خالی
سجودس منز میہ ڈیونٹھم وجود شہود گو٘و گم
یہ سر موجود روردم چھنا تتھ جامہ نالی
ونے کیا بہ امیک سود مٔرتھ عاشق زندے رود
ژہ کر شمسو یہ کتھ بود چھکھے آمت سوالی
کاشر ادبی رسالہ نیب 
شمس فقیر صأبُن اک کلام چُھ (اللٰہ تہٕ ہوٗ ہوٗ چُھم دَر مَنے…. بہٕ کیاہ وَنے یی گۆ ظہوٗر) اَمِیُک پی ڈی ایف ما چُھ تۄٚہہِ نِش مُوٗجود؟
پسند کریںپسند کریں