رسول میر

انتخاب غزلیات رسول میر


انتخاب: منیب الرحمن
ماخذ: کلیات رسول میر مرتبہ محمد یوسف ٹینگ، کلیات رسول میر شاہ آبادی مرتب غلام محمد شاد

میہ چھیہ رسول میر سنین غزلن ہند انتخاب پیش کرنس منز حدہ روٚس خوشی۔ سورے انتخاب ٹایپ کٔرتھ پیش کرنہ بجایہ روزہ بہ یتھ انتخابس ہُریر کران۔ انشااللہ ییہ ریتس کھنڈس تام سورے انتخاب پیش کرنہ۔ سیتی ییس لفظن ہند معنی تہ تمن ہند پھور تہِ دنہ۔ امہ علاوہ ییہ سورے انتخاب پیش کرنہ پتہ، کلامک جایزہ ہینہ۔ یتین یتین ضروری آسہِ کلامس ییہ تصحیح تہِ کرنہ۔

غزلن ہند پروف چھہ نہ ونہ پرنہ آمت۔

1
کمو شرۍ باشہ مو کر واشہ زلفن پار امشب
کندیو گل والہ واشے لٲجتھے دل دار امشب

نگارا، سرد مہرا جاں دہم از درد عشقت
خدارا پردہ از رخ دلبرا برد دار امشب

باللہ میۍ نازہ تن دز یارہ تن ہاو بہر اللہ
واللہ بو مارکن منز نیرِ دعوادار امشب

چھویومت گل رۅخس پیٹھ بلبل دل مارہ گومت
چھہ نواں ژھالہ دواں نالہ رواں زار امشب

سۅنے چھیم پامہ دواں کامہ دیوو یارہ میانیو
سنے چھم شامہ سۅندر کیا سنا سندارہ امشب

ونہ کس حال دل بو ژالہ کر یُتھ سۅنہ دودے
للے ون بالہِ چھم میہ لولہ عشقن نار امشب

ژہ وۅلو خاصہ تنے طاسہ ولے توسہ وتھرے
یہم نے سوسنکۍ پاٹھۍ رٹیو مزار امشب

کشیدی قوس ابرو تیرِ مژگاں بہر قتلم
نشستی در کمیں اے ترک کماندار امشب

گۅلابکۍ پاٹھۍ ژولم داغ عشقن ہییہ پانس
گۅلابس ونتہ مسول بال چھیس تبدار امشب

گیا دن سیرِ بندرابن کو میرا قند گوپال
آؤ نا ہور ساڈے نال کالی مار امشب

چھہ ٲخر کالۍ مرن بالہ یارس وو٘ن رسولن
چمو مس پیالہ نمو ڈالہ در گلزار امشب
___

2
بہ وندے سر قدمن یارہ وفادار قدس
متیو مشتاق گٲمتۍ چھی درو دیوار قدس

ژہ مژر چشمہ نظر یارہ اکھ کر وارہ بہ من
ژیہ شوبان کارِ تھزر کارِ پتۍ شہمار قدس

مسا کر واشہِ سنبلن آشہِ کم قمری چھیہ گلن
چھہ لو٘گمت بلبلن دل زالہ ہم گلزار قدس

چھہ نوان ژھالہ ونن چھے ونان ونہارِ طوطہ
گژھن نا مۅردہ وچھتھ زندہ اتھ ہشیار قدس

شبان چھے غنچہ دہاں بمہ کمان کاکل جیم
بدن شولان ژندن دار جبیں انوار قدس

گنییم کل میہ چٲنی ونۍ دمے نا لیل نہار
لیے لوسم میہ پراران متیو دلدار قدس

دزان بے چارہ رسول نارہ عشقنہِ یارہ وۅلو
وندے نا ٹوٹھ یاون بہ خۅش رفتار قدس
___

3
گوم ترٲوتھ راحت جاں مو پریشاں یک طرف
گل رۅخن آویزہ تھٲوتھ عشقہ پیچاں یک طرف

شوقہ سان پوشن کریم مالے پنن لالے ییم
گل تہ نرگس یوسمن سنبل تہ ریحاں یک طرف

گرایہ سۅنہ دورن چھہ ماران مست آہوتی وچھان
مس گژھتھ اندر بیاباں ژھالہ ماراں یک طرف

رسہ ییہ نا کھٲسۍ مسہ کی مسہ پٲٹھی چاوہن
خاصہ برۍ برۍ کاسہ تھوہس مے تہ میخواں یک طرف

بمہ کرتل سم سیاہ زلفن صراط المستقیم
عشقہ کافر گے سٔرتھ یکدم مسلماں یک طرف

ہر دِ شے آیس بو پھیرتھ رود ٲخر کس نِشے
وردشے کوٲرنم میہ تمۍ ہارس زمستاں یک طرف

عشقہ ژورن رشکہ دل دیوانہ میونے نیو کٔرتھ
چشکہ یژ مشراونک چھس عہدو پیماں یک طرف

ڈورِ شاہباد ہ ونۍ دواں یارس مدنوارس رسول
میر میدان ژورِ ژو٘ل پوگل پرستاں یک طرف
___

4
زلف زنجیر یارس ونس بو زار کو٘ت گوم
بہ دے دیوانہ کٔرنس پری رخسار کو٘ت گوم

ییم کر سرو قامت گیم برپا قیامت
لبم نو استقامت سہ خۅش رفتار کو٘ت گوم

چھۅکہ لد ہیکہ نہ ژٲلتھ ہیکا بہ پان گٲلتھ
ونہ کس ونہ وٲلتھ میہ زٲلتھ نار کو٘ت گوم

پھٔلتھ زو کس ونے بال گلتھ لٲنس ننان حال
ڈٔلتھ وعدس ولان نال ژٔلتھ شہمار کو٘ت گوم

گلن چھِس ژھایہ سنبل گلن ہمسایہ کنہ پھو٘ل
کتھن دیتنم تغافل کٔرتھ اقرار کو٘ت گوم

ہژیک باوٹ کنک دور دلک محرم شلک ژور
ہٹیک چھم چشم بد دور سہ مۅختے ہار کو٘ت گوم

نگارس چشم کافر اتھس کیتھ ہیتھ چھہ خنجر
ستم گر غمزہ لشکر سپاہ سالار کو٘ت گوم

نظر تس سیحر مٲیل نتہ ما زہر قاتل
کٔرتھ سی پارہ میۍ دل سہ جودوگار کو٘ت گوم

ونہ کس دل دو٘دم اوم ہتے ویسۍ چارہ کرۍ توم
میہ للون لولہ چھۅکھ پیوم چھۅکس بلغار کو٘ت گوم

بہ خواب ناز ہمخواب وچھم بر فرش کم خواب
پییس مہتاب درآب گٔیس بیدار کو٘ت گوم

ونن زیبا نگارس ونن کیا گیہ میہ یارس
ونن منز پان مارس کرس بو مار کو٘ت گوم

بہ دۅن پادن وندس سر مدن پایس پییم کر
ودن چھیس تے ییم کر دیم دیدار کو٘ت گوم

میہ ژھورم ہنہِ ہنے میہ گو٘و بریانہ تنے
تمس کُس میون ونے گٔیس بزگار کو٘ت گوم

رسولن نوش کیا وو٘ن سخن درگوش تھاوُن
وندس نا ٹوٹھ یاون سہ دے لۅکچار کو٘ت گوم
___

5
طفل اشکم را غمت گہوارہ جنباں اے صنم
در کنارم می رود بی تاب و غلطاں اے صنم

کامہ کین گل رۅخ تمنا چون ہیو غنچہ دہن
نارون بالا سمن بر نار پستاں اے صنم

زلف تے رۅخ چون ڈیشتھ پییۍ ۂرتھ گیہ زار زار
پارہ پارہ گل سپد سنبل پریشاں اے صنم

چھی دٔچھنۍ کھوورۍ وچھان مارے متین کیتین بچھان
یارِ ظالم مارونۍ دو مارِ پیچاں اے صنم

جان و دل قربان کرس سر آلوس ییمۍ ژیہ دیتے
نستہ خنجر بمہ ونجر تیر مژگاں اے صنم

سر زند از پائے رنگینت گل عمرِ ابد
گر بہ خاکم بگذری گاہی خرامان اے صنم

پایہ بڈیو پییتہ پایس یہ تہ پیمہ ہے پادنے
سر بہ وندے دست میونے چون داماں اے صنم

کاکل پرچیں پریشاں بر رخ سیمن تو
کیاہ چھہ شوبان حسنس خطِ ریحاں اے صنم

چھے زری طاقنۍ سیاہ مستس نتہ در شب پری
کالہ او٘برس پیٹھ سبان زن ماہ تاباں اے صنم

کش کٔرتھ ابرو کمانے کھش کو٘رتھ زٲگتھ کمن
چھکھ توے لٲگتھ نمن خون شہیداں اے صنم

جان شیریں چانۍ وٹھ یاقوت دل فرہا درا
رشک یاقوت‏ یمن لعل بدخشاں اے صنم

چشم کافر زلف ہندو نا مسلماں خالِ تو
رہزنِ دل کیا بلا غارت گرِ جاں اے صنم

ونۍ دوان ژھاران وتے چھے ژیۍ پتے لاراں رسول
عاشق مشہور در عالم سخن داں اے صنم
___

6
جانانہ وندے جان جگر پارہ دلبرو
دل خواہ دلارامہ ہا دلدارہ دلبرو

شمشاد قامت غنچہ دہن روے چھے گلفام
خۅش خویہ خۅش گفتارہ خۅش رفتارہ دلبرو

پراران دگر گوم جگر گوسہ مسا روش
یکبار یکھنا روشہ وۅنۍ دوبارہ دلبرو

چھے چشمہ آہو بمہ کمان تیر چھی مژگان
آہو شکار ترک کماں دارہ دلبرو

شہمارۍ زلفو نال وو٘لم بالہِ کیا چھم حال
بادام چشمو وچھتہ آدم خوارہ دلبرو

در سحر رمزہ کم زِ سٲمر چھکھ نہ کٔرتھ بند
کم نازنین از غمزہ جودوگارہ دلبرو

چھے حالہ کٔرتھ گردِ جیبں نور علی نور
لو٘گ ہالہ وچھتھ زونہِ چون رخسارہ دلبرو

آں خال سیاہی تو بہ رخسار آتش رنگ
اسپند تہِ ڈیشتھ پان زالان نارہ دلبرو

وٹذ چانۍ وۅزلۍ لعلہ کھۅتے قند زن شیرین
فرہاد بوزِتھ مارہ گو٘و بے چارہ دلبرو

اے حور صورت چانہِ برتل پیوم روان یاد
جنات تجری تحہت الا نہارہ دلبرو

رسول میر ونے سوز کنے بوز شب و روز
مہ پارہ کرتھم لولہ وندس پارہ دلبرو
___

7
دل بندہ دل آوار دل آرام نگارو
گل خندہ گل رخسار گل اندام نگارو

قد چون الف لام زلف میم دہن چھے
پور عقلہِ سبق شکلہِ الف لام نگارو

شمشاد قامت گل بدن لب غنچہ سنبل موے
بادام آہو چشمہ چھے بادام نگارو

وچھ آفتابن چون ژندن مۅکھ تہ ڈو٘لس رنگ
گج کاژہ توے زون چھس سرسام نگارو

سنبل چھہِ ترٲوتھ کٲر لالن بر جگر سے داغ
چھے زال کوکل خال سیاہ فام نگارو

خط کو٘ڈتھہ از خط گیسہ در خط پییہ سہ زلفن منز
یام شام درایس تام ووتم شام نگارو

درجنگ کراں کارِ خنجر دست رنگین چانۍ
ہم پنجہ دستاں چھے نہ رستم سام نگارو

یس کارِ تھزر آسہِ شمع روے آتش خوے
پروانہ تس یو٘د مارِ در احرام نگارو

چیتھ گوکھ پانس پختہ کو٘رتھم یاد فراموش
کس نکتہ ونے بالہِ دیتتھم جام نگارو

زونم نہ ژلہِ ہم یارہ آردمت ژہ پارد زن
آرام نیوتھم زانہہ نہ گوہم رام نگارو

گل زن بہ زیبا جامہ ژٹتھ نیرِ بہ بازار
پدمانۍ عاشق چھس ژیہ پتھ بدنام نگارو

قاصد میہ سوزے جان پرژھ تس حالِ دلِ زار
نے خامہ زانے نامہ نے پیغام نگارو

سیتایہ گتھ کرۍ لولہ نارس بالہ یارس پتھ
کم گیت ونۍ ونۍ رام تمہِ کو٘ر رام نگارو

در گردِ چشمت چشمہ وچھتھ کاسہ گدا چانۍ
خورشید تے جمشید ہیتھ چھی جام نگارو

شمشاد قامت آم ہلان بار عشقن ہیتھ
از تیغ خونین ضرب دو پر آم نگارو

دتھ ڈالہ ژو٘لہم قولہ ڈو٘لہم دولہ وچھتھم نو
لول آم وۅندس ہول کر زانہہ درام نگارو

چھے کارِ تھزر شمع صورت خوے آزر ژے
پروانہ چھے زو جانہ خون آشام نگارو

رسول چھہ زٲنتھ دین و مذہب رخ تہ زلف چانۍ
کیا زانہِ کیا گو٘و کفر تے اسلام نگارو
___

8
عشقہ بومبور تمبلووتھس مشکہ ینبرزلۍ یے لو
کشتہ گٲمتۍ گل چھہِ ژھارن وچھتہ بلبل کلۍ یے لو

نارون تس عشقہ پیچان حسنہ باغس پھو٘لۍ یے لو
سرو قد چون الف زن سیو٘د زلف سنبل ہلۍ یے لو

پان ہاوان مژراوان چھکھے یاون مژۍ یے لو
شاہ تہ سنیاسۍ جوگۍ تپہ ریشۍ اتھہ مورن ژلۍ یے لو

صاف دل نیک شیخ زٲہد رودۍ غارن تہ ونہ نے
چانہِ پژِ تم دور ژلۍ یے لانۍ زالن ولۍ یے لو

پردہ مے تھاو برقہ مژراو مژراو دل عاشقن
نورہ رۅخ ہاو دور الراو پیرۍ تراو چھۅکلۍ یے لو

کاژہ زون زن گٹہِ منرۍ چھکھ روے ہاوان او٘برہ تلۍ
کاژ کو٘رتھم کیا ژیہ دارے ہا ژہ ون ہا ژلۍ یے لو

نالۍ شوبی طاس وردن بالۍ خۅردے سالۍ یے
والۍ کن چھی زالۍ وانکے سالۍ وڑنۍ تلۍ یے لو

اندِ کیا یتھ گوندہ کس بو وۅندہ زولتھم سۅندری
خندہ چانیک بندہ شکر دند چھی قندہ پھلۍ یے لو

اتھہ دل گوم کتھہ بوزۍ بوزۍ چانہِ ملتانۍ ہارۍ یے لو
پوشنول چھی ہوشہِ ڈلۍ متۍ طوطہ لوہورۍ کلۍ یے لو

یارۍ لاگو مارۍ منزۍیے زار بوزتے ہینزیے
نیرِ سنزیے میلہ وچھنے پھیروے تیل بلۍ یے لو

سۅنہ لانکے چانہِ شانکے گیہ عاشق آرہ کٲتۍ
جستہ مے پکھ استہ استے ناو تراو منزۍ ڈلۍ یے لو

شالہ مٲرے لالہ رودے داغِ دل ہیتھ زاگہ یے
باغِ نشاط چانہِ اوشات‏ گل تہ سنبل پھلۍ یے لو

بوزکن تھاو سوزہ چانے چھس بہ رسول دل کباب
کینہ کیا چھے سینہ زولتھم عشقہ منقلۍ یے لو
___

9
جب آیا تو نے گھبرایا ہمارا من الا جانو
دیا دل تو پرا‎ے ساتھ رلائی تن الا جانو

وچھتھ چانۍ مٲنزِ رنگۍ متۍ نم گُلن خون گوو برخ شبنم
زہ کوکل چھی ژیہ خم در خم بلا اندر بلا جانو

زہ رۅخ چھی تازہ پھولۍ متۍ گل وچھتھ آوارہ گے بلبل
زلف چھی کارِ پتۍ سنبل پریشاں از صبا جانو

کران کلہِ چانہِ رٲوم نیہہ دپیومے سانہِ ساتھا بیہہ
وُزاں چھم چانہِ لولک سریہہ ژیہ لوگتھ بے وفا جانو

رنگا رنگ گے میہ پانس رنگ یہ کوتاہ ونتہ لوگتھ سنگ
ژیہ چھے نا الفتچ کانہہ ننگ گواہ چھے کُن اللہ جانو

میہ عشقن چھۅکھ روٹم در دل یہ ژالن پیوم سیٹھا مشکل
میہ از لنۍ لٲنۍ کورنم ژھل بہ تقدیرس ژلا جانو

وُڈنۍ چھے سالۍ نالۍ مخمل کنن والۍ زالۍ وانکن تل
گیم نالۍ چانۍ جادۍ ہانکل بہ کورتھس مبتلا جانو

دزاں چھم نارہ میہ ہن ہن گجم نا لٲو سیمیں تن
لگے قربان رۅپہ دستن، تمن شوبی طلا جانو

بلوریں ساق تن سیمیں سمن سینہ سریں نسریں
جبیں چھے عین ٲینہ عجب تازہ جلا جانو

رسول از حسن تو اے ماہ سپن دیوانہ کیا چھس راہ
وچھی تمۍ مظہرے اللہ یہ ووننے کم صلا جانو
___

10
بہ تہِ نو یہ دوریر چون زرے بال مرایو
کیا کرہ تھوتھم زرہ زرے بال مرایو

دل خستہ کٔرتھس نستہ کیا چھے رۅپہ سنز شمشیر
کم شیر مٲرتھ خنجرے بال مرایو

دلبر ژہ اژتو میانہِ برے دیو برے دین
ژیہ رو٘س گل زن گیسہ برے بال مرایو

شہمارۍ زلفو نال وو٘لہم رود افسانے
وۅنۍ ونتہ کیا افسون پرے بال مرایو

عنبر نٲوتھ پان پراران چھس بہ ینبر زل
بومبور میانے گنبرے بال مرایو

تھرِ چھم میہ ہران ٲینہ صفت حسنہ تھرے گل
دل چھم میہ ہران ہرہ تھرے بال مرایو

شرمندہ کٔرتھس آفتابو کمہ ہارچ زون
کجہ چانہِ گجسو لج سو درے بال مرایو

چھم خفہ لارے پتہ لایے برونٹھ نالس تھپھ
دامانہ رٹے محشرے بال مرایو

شمشاد قامت آم ہلان بار عشقن ہیتھ
خم گوم پشتس لوچرے بال مرایو

انہِ گٹہِ ونہِ نم ننہِ کتھہ امۍ لعل فروشن
کنہِ منز نیران جوہرے بال مرایو

حیسہ ویسہ رٲوتھس عارہ رو٘ستے ویسہ کمو چھے
تم کیا چھیہ میانہِ کھۅتہ سوندرے بال مرایو

یتھ لولہ باغس زخم دل گل سرو میونے آہ
اشہِ وانہِ سیتی جویہ پھرے بال مرایو

زیبا بہ کریشان بوزہ نیباہ چون نگارو
ژیہ پتہ درایس کرانہِ گرے بال مرایو

ہارنچہ بمے چانہ لایان رمہ رمے تیر
وٲنجہ کو٘رتھم پنجرے بال مرایو

بو شرمِ گجس شر میہ گومو کر میہ زونم ہے
از کو٘ر میہ کرمے لون سرے بال مرایو

رےول گولتھس ہولہ حیسہ مولہ مسا ڈل
بو لولہ مسہ کی کھاسۍ برے بال مرایو
___

11
جانانہ کٔرتھ شانہ دے زلف خمن آمے
زنجیر زن دیوانہ دلس ہیتھ بمن آمے

تنہا چھہ ما در زلف گرفتار میونے دل
در حلقہ یۅہےسلسلہ دۅن عالمن آمے

ہر گل سپن افروختہ از پرتو حسنش
دلدار یامت جلوہ کراں در چمن آمے

چھس کعبہ حسنک روے ابرو طاق چھہ بر طاق
در راہ عشق سجدہ روا دین بُمن آمے

در پردہ وزاں سوز عشقن روز دما بوز
از چنگ دلارام صدا مدہمن آمے

از دیدہ ہاریم جویہ اشہِ نے از غم دلدار
میہ سۅرمہ نَشاں وچھتہ عین بادمن آمے

از ناوک مژگان متین پارہ کران دل
سے خون مٔلتھ مٲنزِ بدل دۅن نمن آمے

میہ خون جگر کرایہ تو٘لم مایہ تہنزے
چھس انتظارس سالہ سہ مو٘ت وۅنۍ کمن آمے

گل روے رٹہن نالہ ژلہِ ہم داغ دلس میہ
رسولہ تس رو٘س خار ہر فرش سمن آمے
___

12
شہمارۍ زلفو مارہ کٔرتھس مارہ متیو وے
بیمار چشمو وچھتہ پر خمارہ متیو وے

قد سرو قصب پوش رۅخ چھے ماہ منور
خۅش خندہ خۅش گفتارہ خۅش رفتارہ متیو وے

جانانہ ژیہ تلوار ہ بمو دل میہ کترتھم
جگرس میہ کرۍ تھم پارہ جگر پارہ متیو وے

سیو٘د وچھتہ میہ کن یارہ بہ آوارہ گٔیس بال
ودنس میہ نو چھم وار مدنوارہ متیو وے

بلبل بہ نو زرہ یوت زرے خارہ تھووتھ میہ
گلزارہ ونے زار دل آزارہ متیو وے

چھے یاونن کیا بوش یاون ژورہ مسا روش
شرۍ پانہ ژیہ پیتھ ہور میہ لۅکچار متیو وے

مسول بہ ژٹے کامہ دِوو جامہ گلابکۍ
ہیہِ تن میہ زٲجتھ نارہ گل انارہ متیو وے

مسہ چھِوہ مسا لاے ہسا زورہ موہنۍ کان
رسہ سینہ سپردارہ کماندارہ متیو وے

ژندر بدن چھیس بندرن پراران میہ واتیم یار
کوہ لوگتھم اغیار ژیہ معیارہ ‎ متیو وے

ٲینہ چھہ حیران زِ جاروئے نگاہت
ژیہ نش مدعادارہ بہ کو٘ت لارہ متیو وے

رسول بہ کو٘رتھس مارہ وندے مارہ متیو جان
امارہ چانے پان بہ دو مارہ متیو وے
___

13
دردانہ ٲستھ بے خبر مرجان دپان چھی
خورشید رویس کج نظر پدمان دپان چھی

یم قبہ سینکۍ ڈیشہ ونین دُبہ پھران دل
انارِ شیرین کونہ دپستان دپان چھی

قد چون ڈیشتھ ویر برمان تیر گژھان خم
شمشاد سیمیں سروِ خرامان دپان چھی

مژہ تیرِ ناوک ، بمہ چھے شمشیرِ ایرانی
مستانہ چشمن ترکِ ترکستان دپان چھی

وٹھ چانۍ چھہِ زن لعل یمن نتہ بدخشان
تم پانۍ پانس رتہ رنگمتۍ پان دپان چھی

اے یارِ ظالم آفتِ دل غارتِ ایمان
کینہہ راحتِ جان چھی ژیہ دپان جان دپان چھی

شوبان رۅخ چون قندہ ہارچ زون زن تابان
خوبانِ عالمِ ماہِ مہربان دپان چھی

یم زلف زن چھی مارہ متیو مار بہ گردن
شہمار ٲستھ کاکلِ پیچان دپان چھی

رسولہ یو٘دوے غنچہ لبن پتھ ژہ چھکھ بدنام
خۅش روز عاشق کر ژیہ نا فرمان دپان چھی
___

14
بیداد گرن مٲرنس بے داد ژو٘لومے
فریاد! ہے مشرٲونس از یاد ژو٘لومے

تس جان جانس جان وندس ٹوٹھ چھم از جان
برلب میہ ووتم جان لایس ناد ژو٘لومے

آن خسروِ شرین دہنان سنگ چھہ کراں موم
بر سر میہ ہجرک تیشہ د‏تھ فرہاد ژو٘لومے

تعفوقہ دو٘پنم شوقہ سبق عشقہ سپارے
گوم یاد یُتھے تام سے استاد ژو٘لومے

نخچیر کٔرتھ زلفہ چی زنجیر گنڈتھ گوم
پا بستہ کٔرنس سروِ قد آزاد ژو٘لومے

از دیدہ خونہ چہ جویہ بریم عٲر ییس نا
دُزدیدہ نظر اکھ کٔرتھ شمشاد ژو٘لومے

للون یہ شر اندری د‏لس رودم رسول میر
بر در میہ وٲتتھ بختِ خداداد ژو٘لومے

جواب دیں

Fill in your details below or click an icon to log in:

WordPress.com Logo

آپ اپنے WordPress.com اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Google+ photo

آپ اپنے Google+ اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Twitter picture

آپ اپنے Twitter اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Facebook photo

آپ اپنے Facebook اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Connecting to %s