شاعری

ٲٹھ غزل – شاہد دلنوی


1
غزالۍ چشمہ یمن نورہ بُتھۍ تہ لب خاموش
یمے چھہِ تم زِ یمن لکھ وناں چھہِ وعدہ فروش

سياہ چھیہ راتھ مگر گونڈ یمو تہِ رختِ سفر
جریو چھہ رود وسان کو٘ت گژھن وۅں خانہ بدوش

ملالہ چھم نہ لگِم چھۅکھ میہ سارۍ سے بدنس
وۅداسۍ چھس زِ لگِم واوہ ہالہ کم اچھہ پوش

شہر سہ چون دزان اوس میہ لو٘گ کان وچھس
ژھٹتھ ژیہ باکھ تہ رودم نہ کانہہ تہِ حال تہ ہوش

دزاں چھہ نارہ تہ باتھا تہِ موکلنچ چھیہ نہ کانہہ
وۅں گو٘و زِ آیہ اگر بارگاہ تسنز برجوش
__

2
دوپمس برہ بُکہ لول چھہ آمت موکھہ پرینہ جلوا ہاو
دوپنم پرۍ یہ حسن ڈیشتھ ون شر اندریم کس دراو

دوپمس بُتھ بدلے دریاوس تارس ترہ کِتھہ پاٹھۍ
دوپنم ہٲنز تہ ناو سہ پانے , پانے آب تہ واو

اوس سیٹھا دشوار تہ کو٘رنم وقتِ سفر اِمداد
تمۍ سنزہ شکلہِ سیہ منز صحراوس خاجہ خضر سمکھیاو

نورکۍ ناگ وُزن پریتھ جایہ تہ زم زم پریڈِ کتھن
شولہِ یہ باغ امارک گل ہیتھ پھیرِ یہ سونتک واو

دوپمس بینادارہ بہ وچھہ ہتھ ژلہِ ہے زونہِ میہ گرون
دوپنم کنڈۍ زالو منزۍ نیرتھ سر ہ کر ستھ صحراو

اکہ اندہ سیکہ صحراو تہ فیہہ فیہہ کرونۍ کینہہ معصوم
بییہ اندہ کینہہ بدبین تہ یمنے قدمن تل دریاو
__

3
دوپن کینہہ تازہ! دوپمس انتظارے
دوپن ادہ پرون ؟ دوپمس لولہ نارے

ہنگس دوپنم ووں آسی زون تاباں
میہ دوپمس کالہ رٲژن چھہ نہ شمارے

دوپن آسکھ شیہل چھاواں أکتھ کن
میہ دوپمس رودۍ کتہِ تم ویرِ وارے

دوپن ژیۍ اوم پن اوسے کو٘رتھ کیا
میہ دوپمس نارہ سدرس لو٘گ نہ تارے

دوپن مژرس اندر ون کور ووتکھ
میہ دوپمس گردِ بزۍ گوو شہسوارے
__

4
اند وٲژ راتھ پھو٘ل نہ مگر نورہ کانہہ ژیوہا
وۅنۍ کتہِ انن بلال سہ کرِ بانگ نٔو ادا

تمہ آستانہ پورہ شبس اسہِ تہِ کرۍ طواف
لو٘ب کٲنسہ کٲنسہ وچھ نہ مگر ساروے خدا

کس اوس گماں ین نہ زنہے پھیرۍ تھے گرن
کمۍ اوس سونچمت زِ گژھیکھ سر زِ تن جدا

ژو٘ل میانہ دارِ تلۍ سہ یہے سونتہ واو ہيو
ہووُن نہ پورہ جلوہ مگر وعدہ گو٘و وفا

ارمان یتے چھم زِ وۅں یتھ کرینہہِ رٲژ منز
گژھہِ ہا نزول نور بہ پرتھ جایہ شولہ ہا
__

5
روے نورہ برتۍ ٲسۍ یمن گل ہراں کتھن
تم بے مثال یار پتو لگی کمن وتن

تھووم دۅہے سہ راز کھٹِتھ دل چہِ وٲج منز
سونچم کرے بہ فاش تہ لوکھ آسمانہ پین

چھس مولہ بے قصور میہ ما کانہہ خطا کو٘رے
یوتے ونن پھو٘رم تہ لو٘گس آزمٲیشن

کمہ نظرِ دٲغۍ سینہ کو٘رکھ کۅس ودل گیکھ
درویش صفت ٲسۍ بو٘رکھ شورہ بستین

پارے دِژکھ زِ یتھ نہ از تہِ راتھ کیُت شو٘نگیو
کم خواب سنان رودۍ شبس نیزہ ہوۍ أچھن
__

6
گٹہ پچھ راتھ تہ توپتہ لاجیم چشمہ درس
ننۍ ما تارکھ درایی کٔھژ ما زون نبس

واوہ لٔتھا اکھ آیہ تہ ہووُن جلوہ پنن
پورہ وجودے بسم کٔرتھ گے تازہ گلس

اسہِ پیٹھ آیہ نہ قدرت تمۍ سنز کینہہ برجوش
یادِ خدا نتہ اسہِ تہ کرے یو پورہ شبس

چانے ناوہ یہ صبحُک نور تہ شامہ شفق
چونے ناو چھہ زیوِ پیٹھ روزاں ذرس ذرس

شنہ ونۍ طرفن راتو راتھ چھہ پہرہ پیو٘مت
کتہِ ین جاناوار تہ تنبلن آبہ سرس
__

7
دۅہے آسمانک تھزر چھس وچھان
تسنز روٹہ گٲمژ نظر چھس وچھان

خبر آیہ سانیو چھہ جنگ ہورمت
گمتۍ گردِ بزۍ شیرِ نر چھس وچھان

یہ ما راتھ کيت بیور پھو٘رمت یمن
ؤٹس منز پیمتۍ کتجہِ پر چھس وچھان

ژھٹاں باکہ مفلس زِ سن ہو لجم
تہ ژورن نمت ہاکہ ژر چھس وچھان

سیکیل سر تہ آبچ ویژھے چارسو
تہ پرتھ کٲنسہ پھو٘رمت مژر چھس وچھان

یپاری گو٘مت آسہِ کانہہ کاروان
غبارس اندر رہ گزر چھس وچھان

خبر کو٘ت گمتۍ میانہ شہرکۍ مکین
وتن پیٹھ بٔرتھ مال و زر چھس وچھان

چھے شووے تسنز واتہ  از یا پگاہ
بے چینی لکن سربسر چھس وچھان
__

8
روے تسند تابان وچھم
خوابا ہيو پرزلان وچھم

آرہ پلن منز ژھایہ کھٹتھ
تارکھ ہیو زوتان وچھم

نظرے تژھ کٔرنم تمۍ راتھ
ستھ گز بۅن اسمان وچھم

دم پھٹۍ ہیو انزٲنیاہ اوس
جاے پناہ ژھاران وچھم

دل کیاہ روزیم پیشاوری
نارہ دزان ملتان وچھم

گو٘برٲوِتھ از کرنم کتھ
او٘برٲوِتھ اسمان وچھم

چرسہ چلم کھنڈ چیتھ درویش
ژھاین پتہ لاران وچھم

اوش پھیریو سیتۍ کو٘رمت صاف
وۅرسہ متیو استان چھم

کاوے یہکہ گمتۍ زن غیب
برمجہ کلاہ سوچان وچھم

زمرے:شاعری

جواب دیں

Fill in your details below or click an icon to log in:

WordPress.com Logo

آپ اپنے WordPress.com اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Google+ photo

آپ اپنے Google+ اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Twitter picture

آپ اپنے Twitter اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Facebook photo

آپ اپنے Facebook اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Connecting to %s