1
در بدر پھیراں سڑک
کیاہ سنا ژھاراں سڑک
ماجہِ ۂندۍ آلو بنِتھ
چھیم پتے لاراں سڑک
رأتۍ راتس کُنۍ تہ زنۍ
آسہِ کیاہ سونچاں سڑک
کور کُن پھِرۍ پھِرۍ وُچھاں
کس سنا پراراں سڑک
گامہ پیٹھ وٲتِتھ شہر
آسہِ پشتاواں سڑک
کُن زونُے وُچھنس اگر
کیازِ گیہ حیراں سڑک
آسماں نٔوۍ نٔوۍ لبو
بییہِ چھِہ لُکھ شیراں سڑک
__
2
ہوا صبحُک پھُلے ہیتھ ژاو چشمن
یہِ کیاہ موسم نوٚوُے از زاو چشمن
نظر یس کُن وُچھتھ شیہلان أسم
سُہ پُشرتھ گوٚو سیکلۍ صحراو چشمن
لِدر بلکُل لِدر ژھٹھ پھیر سوٚدرس
یُتھے واوس اندر پھٔٹ ناو چشمن
گناں روزم میہ ہنہِ ہنہِ پتھ ونٔچ کل
تچھاں رودُم میہ راتس کاو چشمن
ہۅکھن یُدوے میہ سأری کیرۍ اندرم
وُزاں روزن مگر دریاو چشمن
__
3
تھزرس خلاف اوس نہ کاوس خلاف اوس
جنگ میانہِ گانٹہ بیٚارِ تہِ واوس خلاف اوس
ازکل یہ بونۍ تام دِوان چھیم میہ آمہ تاو
لۅکچارہ گرشمہ کال دِواں میوٹھ تاپھ اوس
ریہہ روز تتھ ہُراں وۅں گو٘و بیاکھ کتھ یہ أس
پھۅکھ یُس تہِ تمۍ دِژاو الاوس خلاف اوس
آرام یس نہ آو تہ ژٔج چانہِ شہرہ دور
تس پرۍ یہِ کأیناتھ پنُن کوہِ قاف اوس
یُس رود دولہ سینہ سِپر واوہ ہالہِ راتھ
رأیل سُہ مولہ دراو جُھکاوس خلاف اوس
__
موج
سۅ پریتھ کانہہ شخصاہ زنتہِ لباں
صحراوس منز اکھ ناگہ پوکھٔر
کٹھہ کُش کالس ژیرہ پھُلے
چِلّے کلانس وچھہ وُشنیر
گٹہ کارس منز گاشہ مُنار
گژھنہ گژتھ زنہ نظرہ وژھر
گریشمس اندر واوہ رنگاہ
زنتہ ارامٔچ پِل چھیہ کھیواں
نوسورٔچ دگ
زنتہ کراں
چھیٮس گورہ وچھس منز راتھ رٔٹتھ
زون اناں چھیٮس
سۅنہ تھالین کیتھ مخملۍ خواب
زنتہ کراں چھِٮس
سأری تارکھ
اندۍ اندۍ گتھ…
زنہ پرتھ قدمس
وتہ ہاوُکھ چُھس
خواجہِ خضر
آمہِ پنہ زنہ ناوِ لگاں چُھس
صدرس تار
ییلہ تس شخصس
کلہ پیٹھۍ اتھہ پھِرناواں
موج…
زمرے:شاعری
کاشر ادبی رسالہ نیب 