1
دارِ بر تالو تہ پش دیوار لیکھ
یُس شہر گم گوٚو تمکۍ آثار لیکھ
دامنس پیٹھ سونتہ کی سبزار لیکھ
دۅن اچھن منز آبہ کی فموار لیکھ
قٲفلن پیٹھ قٲفلا رۅخصت کرُکھ
گٲمۍ گامس ہجرتک آزار لیکھ
نیر گشتس تیز واوکۍ پاٹھۍ وۅتھ
از نبس پیٹھ گردِ ہندۍ انبار لیکھ
گژھ کرُکھ مسمار مۅغلن ہندۍ قلاے
گیرہ کر شہرس تہ نوۍ کۅہسار لیکھ
دۅن پھیکٮن پیٹھ لیکھ فولادک سپر
دۅن اتھن منز کانہہ پیژو تلوار لیکھ
سوٚن وۅگُن وٲلتھ زمیں ہموار کر
سفرہ باپت وتھ مگر خمدار لیکھ
وۅتھ اچھن ہندۍ ژانگۍ روشن کر شبس
وۅتھ سیہ ورقن رہلۍ اسرار لیکھ
___
2
شب چھہ سیہ، تصویر تہ بہ
نار ژھٹاں چھت گیر تہ بہ
کتھ سہ نشانس کن چھہِ دوان
الماسو اکھ تیر تہ بہ
اکۍ سے پنس چھہِ تٲرتھ اسۍ
لوح و قلم تقدیر تہ بہ
دورِ دٮوارن منز کتہِ تام
شبس وَزاں زنجیر تہ بہ
تنہایی منز جپھۍ ملوان
پرانۍ یہ اکھ تحریر تہ بہ
تتھ وتہِ پیٹھ بس اوس پکان
یوٚدوے کانہہ رہ گیر تہ بہ
لفظن منز فی الحال چھہِ قید
باگہِ بوٚرت تٲثیر تہ بہ
یاد زمانن تھوو مگر
اردو شاعر میر تہ بہ
___
3
ژۅشونۍ طرفن حشرک ہیو میدان تہ بہ
شورِ شرس منز میون یہ کن زوٚن پان تہ بہ
سفرِ عظیمکۍ زے کردار چھہِ لافٲنی
میلہ بدٮن پیٹھ پھہلتھ ریگستان تہ بہ
حدو نٮبر گاہ سون پٮواں ظلماتس منز
شنیا گژھۍ تھے زول کراں امکان تہ بہ
ملک تہ مٲلک گوٚو یکسان تہ تعجب کیا
بہِتھ چھہِ اکۍ سے تختس پیٹھ سلطان تہ بہ
کینہہ نس منز چھُس کینہہ نتہ کینہہ حاصل بہ کران
توسکۍ پاٹھۍ چھہ واوس کانہہ ابسان تہ بہ
میون یہ بہ پریتھ کارس منز نیران چھہ برونہہ
نیم شبس کانہہ ژٲنگس برونہہ لرزان تہ بہ
___
4
ہتھیار وارہ وارہ چھہ تراواں بہار تہِ
ہردک اثر قبول کراں گل عذار تہِ
مشکیں خیال میانۍ چھِہ چینکۍ غزال زن
از میانہِ ڈیڈِ تل چھِہ گدا گر عطار تہِ
یتنس قیام آسہِ فقیرس تتی چھہ گاش
عاشق دپان خستہ مکانس چھہ نار تہِ
بعضے گژھاں چھیہ نالۍ یہ رفتار پانہ سے
بعضے گژھاں چھہ گردِ منزے گم سوار تہِ
بدلاں چھہ میانہِ حکمہ بیک آن موسمے
زرداں چھہ میانہِ بیمہ گہے لالہ زار تہِ
دِژ پوٚت نظر قدم زہ کڈتھ نظرِ گوٚو نہ کانہہ
کینژھا ونل تہِ ٲس تہ کینژھا غبار تہِ
یس گاش بخشہِ خانہ وجٲری اچھن، تمس
باساں چھہ ٲنہ پرانہِ زمانک دیوار تہِ
فرصت لکن حویلہِ بنٲوتھ چھیہ از سٮٹھا
وۅنۍ وۅنۍ چھِہ جایہ جایہ بناواں مزار تہِ
تس نش لگے تمام چھہِ گردن کران خم
تس نش کھٮوان وچھ نہ مٮہ وۅٹھ کانہہ شکار تہِ
غزلک سیحر نگارہ ژیہ ٲخر کری اثر
پانس اندۍ اندۍ ژہ تھاو تہ گنڈۍ گنڈۍ حصار تہِ
___
5
وۅں دس بدس چھِہ شبس سٍتۍ دۅہ گزٲرتھ اسۍ
اگر نہ زیوٗن گژھو کوٚت یہ جنگ ہٲرتھ اسۍ
تھواں چھِہ زور ہواوکۍ ہمیشہ پیشِ نظر
گنڈاں چھِہ خیمہ ونس منز طنابہ چٲرتھ اسۍ
کراں چھِہ قٲتلسے نش پننۍ یہ گردن خم
کلک کران چھِہ سودا وُچھتھ تہ گٲرتھ اسۍ
یلے چھِہ وُنہِ تہِ خبر کٔژ دریچہ اسمانکۍ
امارہ کہندِ زمینس چھِہ توتہِ لٲرتھ اسۍ
کڈنۍ چھیہ راتھ یتٮن دوہ ہتٮن اتر ہے گوٚو
قرار روو پریشاں چھِہ ون وجٲرتھ اسۍ
یہ کیا وۅں آبہ سرس منز چراغ ہوۍ چھہِ یراں
یہ کیا چھِہ نارہ دزاں اشچہِ جویہ ہٲرتھ اسۍ
فقیر اسۍ چھِہ نگارو ہٮموتھ جانہ مۅلس
ژھنڈوکھ ون تہ بیاباں انوتھ ژھٲرتھ اسۍ
غمُک یہ ملبہ چھِہ رژھرتھ تھواں وناں چھِہ غزل
اشیک خزانہ دِواں قطرہ قطرہ دٲرتھ اسۍ
___
6
پرٮزلان کٍتۍ روتلہِ مہتاب آسہ ہن
خیمس اندر نژان تہِ گرداب آسہ ہن
کم پدۍ نشانہ از تہِ چھِہ روشن چراغ ہوۍ
کم تریشہِ ہتۍ یپٲرۍ ژھنڈاں آب آسہ ہن
یوہ راتھ نندرِ زۅل مٮہ اگر پییہ نہ جان گوٚو
ٹارٮن خبر الٲندۍ مٮہ کم خاب آسہ ہن
اکھ آسہِ ہے وساں تہ دوٚیم آسہ ہے کھسان
کوتاہ زبر گیوو زہ افتاب آسہ ہن
آمتۍ وُچھتھ تماشہِ اپٲرم تہِ آسہ ہو
یم یارہ بل اگر ہنا پایاب آسہ ہن
دی ہے نہ یوٚد دلاسہ تہ وتھراوِہے نہ اوٚش
از یم شہر تہ گام تہِ غرقاب آسہ ہن
تلہ ہن نہ شوقہ والۍ اچھی تھوٚد تہِ چھا بنان
بلکٮن نہ تم نظارہ نظر تاب آسہ ہن
ہر گہہ غزل یہ میانۍ کنو بوزہن مٮہ نش
کم سنگ دل تہِ راتھ گمتۍ آب آسہ ہن
___
زمرے:شاعری
کاشر ادبی رسالہ نیب 