انٹرویو

میانۍ لگ بھگ ساری افسانہ چھہِ واحد متکلمس منز یعنی ’’بہ‘‘ پانہ بیان کران: ہردے کول بھارتی


نیب رسالن کوٚر معروف افسانہ نگار ہردے کول بھارتی یس سیتۍ تہنزِ تازہ کہانی "گیس بال” کہ تعلقہ کتھ باتھ یۅس بۅنہ کنہِ پیش چھیہ۔

نیب: کہانی ہند بنیادی اسلوب چھہ بیانیہ مگر عام طور چھہ مکالمہ سیتۍ افسانس منز اکھ ڈرامایت پیدہ گژھان ۔ تہندس افسانس منز کیازِ چھہ نہ مکالمہ آسان؟اتھ متعلق کٔرۍتو رژھ کھنڈ کتھ۔
ہردے کول بھارتی: پزر گوٚو یہ زِ میہ گوٚو نہ ازتام ظۅنے زِ میانین افسانن چھا مکالمہ کِنہ نہ۔ تہندۍ سوالن پووم ظۅن۔ اٹھسٹھ پاٹھۍ پٔرم پننۍ پانژھ افسانہ، مکالمہ چھہِ کم مگر چھہِ ضرور۔ میہ چھہ نہ باسان ویسے مکالمہ چھہِ کانہہ خاص ڈراماییت پیدہ کران۔ نہ چھیہ پریتھ جایہ افسانس ڈراماییت براہ یوان۔ سوالک ٲخری حصہ زِ ’’مکالمہ چھہ نہ آسان‘‘ میانۍ لگ بھگ ساری افسانہ چھہِ واحد متکلمس منز یعنی ’’بہ‘‘ پانہ بیان کران۔ اوہ کنۍ چھیہ نہ توٚت تام مکالمچ نوبت یوان یوٚت تام نہ بہ کتھ دوٚیمس پشراوہ تہ پشرٲوتھ دلیل وننۍ چھہ نہ درست باسان۔ بہ چھُس نہ کمنٹیٹر commentator سندۍ پاٹھۍ اوٚک طرف کھڑا روزِتھ اچھو وچھمت حال بیان کرنک پسند کران تہ نہ مناسب مانان۔ جوابک یہ حصہ چھہ بحث ظلب تہ ای میلس منز چھیہ نہ تیژ گنجایش اس لیے ہیکہ بہ صرف یُتے ؤنتھ زِ یہ چھیہ میہ ذاتی راے، غلط تہِ ہیکہِ ٲستھ۔

نیب: یہ چھیہ حقیقت زِ افسانن ہندۍ کردار چھہِ مصنفن ہندۍ ایجاد آسان مگر تمن ہنز بنیاد چھیہ حقیقتس منز آسان یعنی تم چھہِ اسہِ اندۍ پکھۍ انسانن ہندۍ پاٹھۍ آسان۔ یہے کتھ ہیکو اسۍ واقعاتن متعلق تہِ ؤنتھ۔ یہ کتھ مدنظر ہیکوا اسۍ ؤنتھ زِ یہ افسانہ چھہ کینژھا سوانحی نوعیتک تہ کینژھا سیاسی نوعیتک؟
ہردے کول بھارتی: تہند اندازہ چھہ بالکل درست۔ یہ چھہ کینژھا سوانحی نوعیتک تہ کینژھا سیاسی نوعیتک۔ بس صرف چھہ یہ ذہن نشین کرُن زِ یہ چھہ نہ فردہ سنز نلکہ سماجچ سوانح۔ یہ تہِ ہیکو ؤنتھ زِ ’’جرگچ‘‘ سوانح۔ سٲنس سیاست زدہ سماجس منز ہیکیا کانہہ چیز امہِ لاگہِ نشہِ الگ آسن دعوا کٔرتھ۔ خصوصا کشیرِ ہندس ہمعصر دورس منز۔ دوٚیمہِ سوالک جواب تہِ چھہ بحث طلب۔ ضروری چھہ نہ میٲنس دٔپس ستۍ اتفاق کرُن۔ پزر ( عام پاٹھۍ یتھ پزر ونو) وننہ خاطرہ تہِ چھیہ میانۍ کنۍ اللہ تعالے ہن اکھ ومبر مقرر کرمژ تہ بہ چھُس وۅنۍ ومبرِ ہندس اتھۍ پڑاوس پیٹھ۔ یہ پزر باسیم تی چھُس تہندین سوالن ہندس جوابس منز عرض کران۔

نیب: گیس بال چھیہ علامتی معنی تہ اہمیت رٹان۔ تم افسانہ یمن منز گیس بالہِ ہندۍ پاٹھۍاکھ غالب علامت ورتاونہ یوان چھیہ ، تمن منز چھا افسانہ نگار گۅڈے لیکھنہ برونہہ واقعاتن ہنز ہوم ؤرک ذہنس منز کٔرتھ تھاوان کِنہ یہ علامت چھیہ افسانہ لیکھنس دوران پانے ارتقا لبان تہ پننۍ وتھ تہ واقعات بناوان۔ اتھ کتھہِ پیٹھ کرۍ تو پننہِ فنہ کس گاشس منز کتھ۔
ہردے کول بھارتی: گیس بال اکھ علامت، پزر چھہ یہ تہِ زِ امہِ افسانک ظۅن دیت میہ راجیش کول صابن۔ مگر بنان بنان گوٚو یہ میانہِ ذاتک افسانہ ۔ امہِ علاوہ تہِ سپدۍ کینہہ ’’وٲر دات‘‘ ۔ تم گیہ بییہ کُنہِ ساتہ کھۅکھلنۍ۔ ہرگاہ افسانہ کس تتھ صورتس یۅس ذہنس منزکاغذس پیٹھ وسنہ برونہہ تھنہ چھیہ پیوٚان ییلہ یہ صرف روح چھہ آسان، جسمہ بغیرے۔ ہرگاہ تمہِ وزِ پیٹھہ ٲخری لٲنہِ تام اتھ ستۍ ایمانداری ورتاونہ ییہِ تیلہِ چھہ یہ پننۍ وتھ پانے کڈان تہ خٲتمس پیٹھ واتان تہ یہ پراسیس چھیہ منطقی آسنک باس دوان یعنی کتھ چھیہ مجرد آسنہ باوجود credibly logical ہش باسان تہ یہ عمل چھہ بیانس زیادہ سنہ وُن آسنہ علاوہ پرن وٲلس سوچنس پیٹھ کُنہِ حدس تام آمادہ کران۔ واقعاتن ہنز ’’ہوم ورک‘‘ ذہنس منز گۅڈے سجاونہ ستۍ چھہ یہ یمو لازمی اوصافو نشہِ مچھہِ روزان۔ کتھ زیٹھہِ واریاہ نتہ کرہ ہا بہ گیس بالہِ ہندس پس منظرس منز امہِ بیانچ تفصیلہ سان وضاحت۔

نیب: کاشرس منز کیا چھہ افسانک صورت حال تۅہہ ونکیس باسان؟ یعنی اختر محی الدین، ہری کرشن کول، تۅہہِ تہ رتن لال شانتس پتہ چھا کاشر افسانہ برونہہ پوٚمت، پکان کنہِ یہ ژھۅکیوو؟
ہردے کول بھارتی: واریاہ کال گوٚو کھُلہ ڈُلہ پاٹھۍ کاشر افسانہ پرنس یا بوزنس ۔ اس لیے چھہ امہِ سوالک جواب دیُن مشکل۔ یہ کینژھا پران چھہِ تہِ چھہِ تہندِ رسالہ پیٹھہ پران یا چھہ کُنہِ ساتہ تھپہِ تھۅسہِ اکیڈمی ہند کانہہ شمارہ نظرِ گژھان۔ ویسے لیکھن والۍ آسن لیکھانے۔ برونہہ پوٚکا کِنہ نہ ثیقہ پاٹھۍ ہیکو نہ کینہہ ؤنتھ۔ مگر ییژ ہن ہیکو ؤنتھ زِ وُستہ وار تحریکا چھیہ نہ کنیہہ درینٹھۍ گژھان۔

نیب: کشیرِ نیبر روزنہ ستۍ یا فرق پییہ تہنزِ افسانہ نگاری تہ تہندس فنس؟
ہردے کول بھارتی: ساروے کھۅتہ مشکل تہ عذاب دہ سوال۔ کشیرِ نیبر روزنہ ستۍ یا وطن بدر سپدنہ پتہ پییہ واریاہ فرق۔ ژکہِ پھیُر گوٚۅ سوچس تہ اثر پییہ پانے افسانس پیٹھ تہِ۔ بہ چھُس سوپورک تہ اتہِ کس بابایوسف سولس منز چھہ میہ پوٚرمت۔ میہ چھہ تمہِ وقتہ گذرہ اپارِ نارہ پورِ پیٹھہ بڈِ کدلہ تام دوٚیمہِ اندہ ننگلہِ ہندس وۅلر دٔہس ستۍ لگن وٲلس اندس تام تھری ڈی تہ ستتھ ایم ایم بے شمار رنگین تہ بلیک اینڈ وایٹ فلمن ہند خزانہ اندرہ دفن۔ یم ریٖلہ چھیہ میانہِ شۅنگنہ پتہ تہِ چلان تہ میانہِ بے داری منز تہِ ۔ بعضے شعورکین تمن تہن منز ییتہِ اکثر یمہ اکھ اکس overlap سپدان چھیہ۔ یہ گٔر چھیہ میانہِ خاطرہ سیٹھا مشکل آسان۔ امہِ وزِ چھُس بہ پنن پان گانگلہِ کرنچ وشش کران۔ گرا بلڈ پریشر مشین لٲگتھ پانس پریشر وچھان۔ گرا بلۍ گاڈۍ کٔڈتھ سنسان سڑکن پیٹھ آوارہ پھیران تہ بلۍ فون کران۔ یتھین موقعن پیٹھ چھیہ نہ میہ نندر تہِ یوان۔ لازمی کتھ چھیہ زِ امیک اثر پییہ میانہِ افسانہ نگاری پیٹھ تہِ تہ میٲنس فنس پیٹھ تہِ ۔ امیک اثر چھہ میانین رشتن پیٹھ تہِ بعضے واضح پاٹھۍ درینٹھۍ گژھان۔
ٲخرس پیٹھ کرہ بہ عرض زِ یم سوال چھہ تتھۍ یہند جواب ، مکمل جواب 2+2 آیہ ہیکہِ نہ ٲستھ مگر جواب ہیکہِ نہ ژھوٚٹ تہِ ٲستھ تکیازِ یم چھہِ ساری بحث طلب۔

زمرے:انٹرویو

Tagged as:

جواب دیں

Fill in your details below or click an icon to log in:

WordPress.com Logo

آپ اپنے WordPress.com اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Google+ photo

آپ اپنے Google+ اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Twitter picture

آپ اپنے Twitter اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Facebook photo

آپ اپنے Facebook اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Connecting to %s