سخی شاہ عرفان

صوفی غلام محمد اوس تمہِ دورک افسانہ نگار یتھ منز افسانہ پانس اندۍ پکۍ کین حالاتن تہ واقعاتن ہندِ اظہارک وسیلہ ماننہ یوان اوس۔ قۄدرتی کتھا ٲس ز افسانن منز ٲس دلیل تہ یہ دلیل ٲس خارجی واقعاتن ہنز یینۍ ووننہ سیتۍ برونہہ پکان۔ اہنزِ «شیشہ تہ سنگستان» سۄمبرنہِ ہندین بیشتر افسانن منز چھہ دلیلی عنصر یا قصہ غالب ییمہِ سببہ یمن افسانن پلاٹ بند افسانہ ؤنتھ ہیکو۔ یمن افسانن ہند مواد چھہ بیشتر پاٹھۍ گردونواح کہ ماحولہ پیٹھہ نِنہ آمت۔ صوفی غلام محمد چھہ اعتراف کران:

«پریتھ کانہہ ادب چھہ پننہ اندۍ پکۍ کہ ماحولک ٲنہ آسان۔ ادب چھہ سہ ٲنہ ییمہِ منزۍ اکھ انسان وقتکۍ تہ ماحولکۍ عکس چھہ وچھان۔ اکھ افسانہ یوت زیادہ زندگی تہ حقیقتس نزدیک چھہ آسان تیوت چھہ سہ پرن وٲلس زیادہ اثر کران۔» (شیشہ تہ سنگستان، ص 5)

امہ بیانہ تلہ چھیہ نہ صرف صوفی سندین افسانن ہنز خصوصیت واضح سپدان بلکہ تسندین افسانن ہنز پلاٹ نگاری متعلق تہِ چھیہ یہ کتھ برونہہ کُن یوان ز تسندۍ افسانہ چھہِ تسندِ وقتہ کِس خارجی تہ فوری ماحولس سیتۍ وابستہ۔ یمن ہندۍ واقعاتۍ ڈھانچہ چھہِ مانوس آسنہ سببہ ویدۍ تکیاز تمۍ چھہِ پننین افسانن ہندۍ یم واقعاتۍ ڈھانچہ تمن واقعہن تہ گدرنس پیٹھ تیار کرۍ متۍ یم تمۍ پانس اندۍ پکۍ سپدان وچھمتۍ چھہِ۔ قصہ تہ پلاٹ تیار کرنس منز چھیہ تسنز نظر ماحولس کُنے روزمژ۔ صوفی غلام محمد چھہ پانہ تہِ ونان :

«کاشرس افسانہ نگار سندِ خاطرہ چھہ ضروری زِ سہ کرِ زمانچ یہ تراے تہ گراے محسوس۔ تمۍ سنز نظر گژھہِ سماج کین تمن گوشن تام تہِ واتنۍ ییتہ نس از گاش چھہ مگر ییتہ نس پگاہ انہ گٔٹ آسہِ۔» (لوسمتۍ تارکھ، ص 10)

سماجکۍ یم گوشہ تہ سماجچ یہ تراے گراے رژھراونہ خاطرے چھہ صوفی غلام محمد افسانہ تحریر کران۔ اتھ دوران چھیہ اہندین افسانن منز مختلف طریقچ پلاٹ سازی کرنہ آمژ، یتھ پیٹھ اسۍ یتھ مضمونس منز اکھ نظر تراوو۔

کردار محرک مگر وضاحتی پلاٹ
مجید مضمر چھہ صوفی غلام محمد سندس افسانہ فنس متعلق ونان :
«صوفی کے افسانوں میں کردار مرکزی حیثیت اختیار کرلیتے ہیں۔ واقعات ان کے تابع ہیں۔ یہاں تک کہ افسانہ نگار جس تھیم کو ابھارنا چاہتا ہے وہ بھی کرداروں کے عمل سے ہی آگے بڑھتا ہے ۔۔۔ گرد و پیش کے عام لوگ اور انکی چھوٹی موٹی زندگیاں، چھوٹے موٹے غم اور چھوٹی موٹی خوشیاں ۔۔۔ یہ صوفی کے افسانوں کا لب لباب ہے۔» (کشمیری ڈراما اور فکشن)

مجید مضمر سند یہ ونن چھہ صحیح، مگر یمن مختلف کردارن ہندِ خاطرہ چھہ صوفی غلام محمد الگ الگ طریقہ پلاٹک چوکاٹھ تعمیر کران۔ رتن لال تلاشی چھہ صوفی غلام محمد سندین افسانن پیٹھ بحث کران پننس اکس غیر مطبوعہ مضمونس منز تسندین پلاٹن ژورن زمرن منز بٲگران۔اول کردار محرک وضاحتی، دویم کردار محرک انکشافی، ترییم تھیم محرک پلاٹ۔ ژورم قسم چھہ احساس چہ تبدیلی ہندۍ پلاٹ۔ صوفی غلام محمد چھہ پننہ عصری زندگی متبادل اکھ نۆو دنیا تعمیر کران یتھ کُن وچھتھ حقیقتک برونتھ سپدان چھہ۔ یتھہ پاٹھۍ چھہ تسند مقصد یہ تہِ ز پننہ فنہ کہ ذریعہ کرِ سہ پننہ زمانچ تصویر محفوظ، یتھ منز زمانہ کہ پس منظر کِس کنواسس پیٹھ مختلف عصری تصویر بناونہ ین۔ یم تصویر بناونہ باپتھ چھہ سہ امی زمانکۍ کینہہ یادگار کردار نوان۔ سہ چھہ اتھ کتھہِ پانے تصدیق کران۔ ونان چھہ افسانہ نگار

«گژھہِ پننین افسانن منز تمن کردارن جاے دیُن یم از چھہِ پگاہ آسن نہ۔ یم راتھ تام پننہ کُنہِ خاص ادا کنۍ، خاص کردارہ کنۍ، خاص شخصیتہ کنۍ سماجس منز عزتہ چہ نظرِ وچھنہ ٲسۍ یوان مگر از یم امہ کنۍ ژھایہ ہلس کُن گمتۍ چھہِ ز زمانن دیت تہندین نظرین تہ خیالن لرِ پھیرن۔ میانہ یتھ کتابہِ ‹لوسمتۍ تارکھ› منز چھہِ امی قسمکۍ ستھ کردار۔ یم کردار ٲسۍ راتھ تام اسی منز، اسی سیتۍ اسان گندان، سانہِ زندگی تہ سماجس منز اوس یہند دخل تیوتے یوت از سیاسی لیڈرن تہ سماجی کارکنن ہند چھہ۔ ممکن چھہ ونہِ تہِ آسن کُنہِ کُنہِ جایہ یم کردار درینٹھۍ یوان۔ مگر میون خیال چھہ ز داہہِ بہہِ وہرۍ آسن یم سانہِ زندگی منز بلکل غیب گمتۍ۔»

امہ طریقہ کارہ سیتۍ یودوے امۍ سندین افسانن منز خاکہ نگاری ہنز خصوصیت آمژ چھیہ مگر قصہ تہ پلاٹہ رنگۍ چھہِ یمن کردارن ہنزِ زندگی سیتۍ وابستہ مختلف واقعہ بیان کرنہ آمتۍ، ییمہ کنۍ اہندۍ افسانہ کُنہِ پیچیدگی وراے چھہِ تہ قاری یس چھہ پران پران دلیلی لطف یوان۔ مگر امہ سیتۍ چھہِ پلاٹ وضاحتی بنیمتۍ تکیاز صوفی غلام محمد چھہ پانس اندۍ پکھۍ سماج کہ کٲنسہ غیر معمولی فرد سندِ ویوہارہ نش متاثر سپدمت تہ تسنز شخصیت چھیہ خاکہ نما افسانہ ذریعہ برونہہ کُن اننہ آمژ۔ پلاٹ تہِ چھہِ تتھۍ وے واقعاتو سیتۍ گرنہ آمتۍ یم یہ شخصیت نمایاں کران چھہِ۔ سیتی یہ تہِ ز پلاٹس منز تہِ چھہ واقعہ فطری طور برونہہ پکنہ بجایہ کردارس تعبین۔ ییمہِ سببہ اسۍ یمن کردارۍ افسانہ تہِ ؤنتھ ہیکو۔ چناچہ صوفی چھہ کردار برونہہ کُن انان لہذا چھہ نہ پلاٹس منز واقعاتن ہندس منطقی ترتیبس پیٹھ زور بلکہ یم یم واقعہ امس کردار سنز غیر معمولیت برونہہ کُن انن، صوفی چھہ تم تم واقعہ قصس منز شامل کران، بامے تمن درمیان منطقی ربط آسہِ یا نہ۔ اکثر چھہِ یم منقطی ربطہ وراے۔ ‹لوسمتۍ تارکھ› سۄمبرنہِ ہند گۄڈنیکے افسانہ ‹جان دید› نیتون۔ اتھ منز چھہِ جان دیدِ ہنزِ شخصیتکۍ مختلف اوصاف ٹاکارہ کرنہ خاطرہ تہندِ لۄکٹہِ مۄکٹہِ دنیاہکۍ مختلف منظر برونہہ کُن اننہ آمتۍ۔ امۍ سنز شخصیت بارعب ہاونہ خاطرہ چھہ کینژن زنانن ہند یارہ بل دربارک منظر ہاونہ آمت یم گرِ کین ہندِ بلاونہ باوجود کتھن منز مست چھیہ۔ جان دید چھیہ یہ سورے وچھان تہ ٲخرس تمن کریکھ کران۔ تمن چھیہ پنن پنن گرہ کُن چھگ لگان۔ امہ واقعہ سیتۍ چھہ یہ ظاہر ز جانہ دیدِ ہند کوتاہ لحاظہ چھہ۔ تسند کوتاہ اہرہ چھہ۔ جان دیدِ ہندِ شخصیتک یہ پہلو ٹاکارہ کرنہ خاطرہ چھہ دۄن بٲژن، یم کھاندر ژٹنس پیٹھ تہِ واتان چھہِ، ہنزِ لڑایہ ہند منظر۔ جان دید چھیہ یمن دۄشونۍ لیکہ فاش پران تہ تمن سکول شرین ہندۍ پاٹھۍ ماشٹر سند سبق پرناوان۔ یتھہ پاٹھۍ چھیہ دۄن بٲژن ہنز لڑاے ختم گژھان۔ ظاہر چھہ ز گۄڈنکس تہ دویمس واقعس چھہ نہ پانہ وانۍ کانہہ تہِ وجوہی رشتہ یا واٹھ۔ نہ چھہ گۄڈنکہِ واقعہ منزہ دویم واقعہ درامت، تہ نہ چھہ دویم واقعہ گۄڈنکہ واقعک نتیجہ۔ امہ پتہ چھہِ جان دیدِ ہندۍ درویش صفت برونہہ کُن اننہ آمتۍ۔ امہ خاطرہ چھیہ قادر بٹنہِ گٲو ہنز ذکر یۄسہ تمۍ کٕنن والۍ سندس یہ وننس پیٹھ ملۍ ہیژمژ ٲس ز یہ تلہِ مسا تریہ ساڑ تریہ ریتھ۔ جانہ دید چھیہ گٲو نظر تراوان تہ ونان ز یہ پریسہِ ساڑِ پانژِ وہرۍ۔ برابر چھہ یی سپدان۔ امہ پتہ چھہ خاندرک منظر محض یہ ہاونہ خاطرہ ز ہمسایہ گری منز یۆدوے کھاندر آسہِ اتہِ تہِ چھہ جان دیدِ تامے سورے کینہہ آسان۔ یعنی تس گژھہِ وردن پسند یُن۔ سے گۆو یٔزمن بایہ ہند پسند تہِ۔ یتھے پاٹھۍ چھیہ خۄرشہ کاکنہِ تہ نۄشہ ہنزِ لڑایہ منز تہِ جان دید رول ادا کران۔ افسانہ چھہ یمنے واقعہن پیٹھ مشتمل۔ صاف چھہ زِ جان دیدِ ہندین مختلف اوصافن متعلق چھہ اسہِ یہ افسانہ زانکاری دوان مگر یمو بیۆن بیۆن واقعاتو چھا پلاٹچ صورت حاصل کرمژ سہ چھہ بحث طلب۔ بقول انگریزی ناول نگار پیٹر پرنس:

«لۄکٹہِ کھۄتہ لۄکٹ دلیل ہیکہِ کم کھۄتہ کم تتھین ترین واقعہن پیٹھ مشتمل ٲستھ یمن باہم واٹھ آسہِ۔ اتھ دلیلہ منز افسانویتھ پیدہ کرنہ باپتھ چھہِ تریہ چیز ضروری۔ اول گۄڈنیک تہ تریم واقعہ آسن سٲکن تہ دویم آسہِ متحرک۔ بییہ یہ تہِ ز تریم واقعہ آسہِ گۄڈنکہ واقعہک تقلیب یا ضد۔ دویم یہ ز تریشونۍ واقعہن آسہِ تژھ ترتیب زِ گۄڈنیک آسہِ وقتہ حسابہ دویمہ برونہہ تہ دویم ترییمہ برۄنہہ۔ ترییم یہ ز دویم آسہِ گۄڈنکہ واقعہک نتیجہ تہ ترییم دویمہ واقعہک نتیجہ۔» (رتن لال تلاشی، انہار، تنقید، نظریہ تہ نظر، پلاٹ: کینہہ نوینہ ویژھنیہ، ص 123)

ہرگاہ اتھ کہوچہ پیٹھ ‹جان دید› افسانہ کھارون، امہ افسانہ کِس واقعاتۍ تناظرس منز چھہِ یم تریشوے چیز غیر موجود۔ چناچہ روایتی افسانن ہندس پلاٹس منز چھیہ یم تریشوے خصوصژ آسان۔ مثلا اختر محی الدین سند ‹دریایہ ہند ییزارہ› نیتون یا بنسی نردوش سند ‹تلر› یا امین کامل سند ‹کۄکرجنگ›۔ یم افسانہ چھہِ یمن پیمانن پیٹھ پورہ وتران۔ مگر جان دید افسانہ چھہ امہ پلاٹ بندی نش الگ۔ مثلا جان دید یِژھ افسانہ کِس ابتداہس منز اسۍ وچھان چھن تژھے چھیہ سۄ افسانہ کِس ٲخرس منز۔ تسندِ شخصیتک کانہہ نۆو پہلو چھہ نہ افسانوی عملہِ ہندس ارتقاہس دوران برونہہ کُن یوان۔ سۄ چھیہ پننہ بستی منز گاٹج تہ معتبر تہ ٲخرس تہِ چھیہ تی۔ افسانہ چھہ نہ اسہِ کردارس متعلق کانہہ نۆو انکشاف کران بلکہ راوی سندِ طرفہ یہ کینژھا گۄڈے کردارس متعلق وننہ یوان چھہ افسانکۍ منتشر واقعہ چھہِ تی پٔزراوان۔ یتھین افسانن منز چھہ الہ پلہ ہیوے طریقہ۔ مثلا ‹جان دید› تہ ‹پرکاش کول› افسانہ دۄشوے چھہِ واقعہ سیتۍ شروع کرنہ آمتۍ مگر سیتی چھہ یہ واضح سپدان ز یہ ابتدایی واقعہ چھہ محض کردارہ سنز خوبی ہاونہ خاطرہ نہ ز کُنہِ ہموار عملہِ ہند آغاز۔ یتھین افسانن منز اتحاد عمل تلاش کرُن چھہ عبث۔ امہ حسابہ ہیکو ؤنتھ ز یمن افسانن ہند محرک چھہ نہ کانہہ تھیم بلکہ چھہ کردار۔ فردوس فاطمہ منیر چھہ افسانہ نگاری متعلق اکھ حوالہ دوان ۔

«انگریزی مختصر افسانہ نگار اسٹیونسن نے مسٹر گراہم بالفور سے دوران گفتگو مختصر افسانے لکھنے کے مختلف طریقے بتلائے تھے۔ اس نے کہا کہ جہاں تک مجھے معلوم ہے اس کے تین اور صرف تین ہی طریقے ہیں۔ اول یہ کہ پہلے پلاٹ کو سوچ لیا جائے اور پھر اس کے مطابق کرداروں کی تخلیق کی جائے۔ دوسرا یہ کہ پہلے کسی کردار کا تخیل ذہن میں قائم کرلیا جائے اور اس کے بعد اس کی سیرت کے مطابق واقعات کا انتخاب عمل میں لایا جائے۔ اور تیسرا طریقہ یہ ہے کہ پہلے کسی خاص فضا کا تخیل ذہن میں قائم کر لیا جائے اور پھر اس کے مطابق کردار۔» (مختصر افسانے کا فنی تجزیہ، ص 148-149)

یم افسانہ نظرِ تل تھٲوتھ چھہ صاف باسان ز صوفی غلام محمدن چھہ دویم طریقہ استعمال کۆرمت۔ چناچہ کردار ذہنس منز روزنہ سببے چھہ صوفی غلام محمد کردار سند خولہ خط تہ تسنز صحیح تصویر بیان کرنس منز دلچسپی نوان ییمہ سیتۍ تسندین یتھین افسانن منز خاکہ نگاری ہنز خصوصیت آمژ چھیہ۔ صوفی غلام محمد چھہ پانہ تہِ یمن کریکٹر سکیچ مانان۔ ونان چھہ:

«یم چھہِ بجاے خۄد کریکٹر سکیچ تہِ۔ افسانہ ونہ بہ یمن امہ کنۍ تکیاز یمن منز چھہِ تم سٲری لوازمات یم ا فسانن منز آسنۍ گژھن۔ ممکن چھہ کینہہ افسانہ آسن افسانہ کم تہ کریکٹر سکیچ زیادہ مگر کریکٹر سکیچ چھہ ادبس منز سۄے اہمیت تھاوان یۄسہ بہ ہیکہ ؤنتھ ز کریکٹر سیکچ چھہ افسانچ اکھ لنڈ۔» (لوسمتۍ تارکھ، ص 11-12)

اسۍ ہیکون ‹رمضان بٕڈہ› افسانہ تہِ یتھ زمرس منز تھٲوتھ، حالانکہ افسانس منز چھیہ واقعہ دٔسۍ حرکت تہِ وۄتلاونہ آمژ۔ مگر تمہ باوجود چھہ افسانہ نگار سند مقصد رمضان بٕڈہ سند داستان گویی تہ دلیلہ گری ہند فن نیشہ ناون۔ افسانہ نگارس چھیہ بنیادی طور یہ پریشانی ز کشیرِ منز یُس داستان گویی ہند فن وۄنۍ مران چھہ تمچ رٲچھ راوٹ کتھہ پاٹھۍ سپدِ۔ تمی ییلہ واریاہ وری پتہ رمضان بٕڈس قبرِ بٹھس پیٹھ ووتمت وچھان چھہ، سہ چھہ ونان:

«تۄہند یہ حال ؤچھتھ گوس بہ پننہ جایہ پریشان۔ دوپم رمضان بٕڈہ چھہ درلحد ووتمت۔ رمضان بٕڈہ آو میہ ونۍ کینس اکھ دنیائے عجایباہ بوزنہ۔ اکھ طلسم خانہ، اکھ خزانہ۔ اکھ سہ خزانہ یُس نایاب اوس۔ یتھ منز تم لال ٲسۍ یمن نہ جورے آسہِ۔ میہ باسیوو زن اکھ خزانہ اتھہ گژھان۔» (لوسمتۍ تارکھ، ص 33-34)

کردار محرک مگر انکشافی پلاٹ
صوفی غلام محمد سندۍ کینہہ افسانہ چھہِ پلاٹ بند افسانہ تہ یمن ہندس پلاٹس منز چھیہ پلاٹ سازی ہنزِ ہۄنرِ ہنز کمی باوجود انکشافی تراے وۄتلیمژ۔ امہ ترایہ ہندین افسانن منز چھہِ خاص پاٹھۍ زہ افسانہ قابل ذکر۔ ‹سلطان تولہ› تہ صوفی سندیو نمایندہ افسانو منزہ ‹مال دید›، حالانکہ دۄشوے افسانہ چھہِ کردارس اندۍ اندۍ نژان تہ دۄشوے ہیکوکھ کردارۍ افسانن ہندس زمرس منز شامل کرتھ۔ ‹سلطان تولہ› افسانک انکشاف چھہ زیادہ متاثر کرن وول۔ افسانہ یۆدوے کردارۍ افسانہ چھہ اماپۆز افسانوی عملہِ منز چھہ سلطان تولہ افسانہ کِس ٲخرس منز یوان۔ افسانس منز چھہ انکشاف راوی یس سپدان ییمس اکہ دور گامکۍ دوستن پننس بچہ سنزِ ختن حٲج ہندس موقعس پیٹھ پرژھمت آسان چھہ۔ راوی چھہ اوسمت پلیسس منز نوکری کران ییمۍ برونہہ اکہ دۄہہ سلطان تولہ ناوہ کِس اکس شخصس بلا وجہ تفتیش کران سخ زدہ کوب کۆرمت آسان چھہ۔ پلیس چہ نوکری دوران چھہ اوسمت راوی سیٹھاہ ظالم۔ سہ چھہ پانہ ونان:

«میہ اوس تھانہ داری ہند سخ نشہ۔ بہ اوسس معمولی کتھن پیٹھ مظلومن تختہ مشق کران ۔» (لوسمتۍ تارکھ، ص 99)

سلطان تولن اوس امس وعدہ امی کۆرمت زِ سہ ہورِ امس امہ ظلمک آنچ۔ راوی یتھ گامہ گرس منز سالس گۆمت آسان چھہ تتہِ چھہ شامن امس برونہہ کنہِ اکھ پٲتھر گندنہ یوان یتھ منز اکھ تھاندار اکس گریسۍ تِس کورِ ہند خاندر اکس نفرس سیتۍ نہ کرنس پیٹھ نہ صرف بێہ واری کران چھہ بلکہ چھہ تمس کورِ سیتۍ بد حرکت تہِ کران۔ چناچہ یہ چھہ پٲتھر مگر حساس راوی یس چھہ احساس گژھان زِ یہ سورے چھیہ سلطان تولہ سنز شیطانی یُس تس ٲنہ ہاون یژھان اوس۔ ٲخرس چھہ سہ سلطان تولس سمکھان یُس امس آنچہ ہورنک اعتراف کران چھہ۔ یتھہ پاٹھۍ چھہ راوی یس پٲتھر وچھتھ احساس گژھان زِ بحثیت تھاندار کم کار کرتوت چھہِ تمۍ سر انجام دتمتۍ۔ سہ چھہ اعتراف کران افسانہ کِس ٲخرس پیٹھ ونان:

«از ییلہ میہ یہ پٲتھر وچھ، میہ آو پنن سورے سہ سیاہ کارنامہ برونٹھ کُن یس میانہ دستہ از واریاہ وری برونٹھ سرزد اوس سپدیومت۔ یۆدوے بہ وۄنۍ اکھ نیک انسان اوسس بنیوومت تہ شیطانۍ کار ٲسۍ میہ تراوۍ متۍ، مگر سلطان تولن اوس میون سہ سیاہ کارنامہ جایہ جایہ واتنوومت۔» (لوسمتۍ تارکھ، ص 100)

راوی یس چھہ احساس گژھان زِ تسنز سۄ بدنامی چھیہ سلطان تولن، یُس اکھ بانڈ اوس، پننہ بٲنڈلہِ دوران گامہ گوم واتنٲومژ۔ تس آسہِ ہے یہ راے ز یہ نادار بانڈ کیاہ زن ہیکہِ تس کٔرتھ۔ تس چھہ امس بظاہر معمولی بانڈہ سندِ طاقتک ٲخرس اندازہ سپدان۔ یۄہے انکشاف چھہ افسانہ تلہ سپدان۔ وضاحتی انداز والین افسانہ پلاٹن برعکس چھہ یتھ افسانس منز اکھ عملہِ ہند ارتقا تہ زمانی لحاظہ چھیہ عمل برونہہ کُن پکان۔ دویم کتھ یہ ز افسانہ کِس درمیانس تام چھہ نہ یہ اندازہ نہ قاری یس تہ نہ راوی یس سپدان ز ٲخرس کیاہ ہیو انکشاف سپدِ۔ یہ چھیہ افسانچ خوبی۔ اتھ افسانس چھہ امہ سیتۍ بیاکھ وصف تہِ پیدہ سپدمت۔ سہ گۆو یہ ز افسانس یۆدوے ‹سلطان تولہ› ناوہ تلہ چھہ باسان ز یۄہے آسہِ افسانک اہم کردار تہِ مگر شاید ہیکون نہ یہ افسانک اہم کردار مٲنتھ، تکیاز افسانوی عملہِ منز چھہ لازمی زِ اہم کردار گژھہِ کُنہِ نتہ کُنہِ رنگہ تبدیل سپدن۔ یتھ افسانس منز چھیہ یہ تبدیلی راوی یس منز واقعہ سپدان، تہ سلطان تولہ چھہ یہ تبدیلی اننک محض اکھ ایجنٹ یا مدد گار کردار۔ امہ لحاظہ چھہ افسانک اہم کردار تہِ راوی۔ دویم کتھ چھیہ یہ تہِ ز راوی چھہ نہ صرف راوی بلکہ چھہ سہ کردار تہِ۔ سہ چھہ عملہِ منز شامل تہ پلاٹہ کس ارتقاہس دوران چھہ عملہِ سیتۍ متاثر تہِ سپدان۔ یہ زن اہم کردار سنز خوبی چھیہ۔

‹سلطان تولہ› افسانہ کس پلاٹس چھیہ اکھ اہم خوبی یہ ز افسانکۍ واقعہ یم پلاٹس منز شامل چھہِ، تم چھہِ از کالس منز سپدان۔ مگر اتھ پلاٹس زیر سطح چھہ بیاکھ پلاٹ۔ مثلا ظاہری پلاٹس منز چھیہ عمل راوی سندِ سالس گژھنہ پیٹھہ بییہ دۄہ تتہِ نیرتھ واہتھور سلطان بانڈس نش واتنس تام مکمل سپدان۔ مگر اتھ سیتۍ سیتۍ چھہ تمن واقعہن ہند واشگاف تہِ سپدان یم راوی سندِ دستہ پتھ کالس منز سپدۍ متۍ چھہِ۔ افسانس منز چھیہ تفصیلی طور ذکر کرنہ وراے راوی سنز برونہہ کالچ کار گزاری تہِ برونہہ کُن یوان۔ عام پاٹھۍ گۆژھ امہ افسانہ چہ عملہِ ہند آغاز پتھ کالس منز تھاندار راوی سندیو سلطانس پیٹھ ظلمو سیتۍ سپدن۔ اکھ کٕٹہ افسانہ نگار کرِ ہے تتی پیٹھہ شروع، مگر صوفی ین چھیہ اتھ طویل دلیلہ منز اختصار کٔرتھ کم بیانی منز واریاہ زمانہ ویپروومت۔ امی ہیکو ؤنتھ زِ یمہِ افسانک پلاٹ چھہ مہارتہ سان تعمیر کرنہ آمت تہ افسانہ نگارن چھہ پنن تھیم کُنہِ پیچیدگی وراے سطحس پیٹھ اۆنمت۔

‹مال دید› چھہ صوفی سند اکھ نمایندہ افسانہ ماننہ آمت۔ یہ افسانہ چھہ کردارۍ افسانے تکیاز افسانچ اہم کردار چھیہ مال دید یۄس اکھ سبزی کٕنن واجینۍ چھیہ۔ امہ افسانک پلاٹ چھہ انکشافی مگر ‹سلطان تولہ› افسانس برعکس چھہ امہ افسانکہ انکشافک ہدف قاری نزِ کانہہ کردار۔ افسانک بنیادی مسلہ چھہ مال دید چھیہ از ریتۍ کھنڈۍ شہر سبزی کٕننہ وژھمژ۔ باقی سبزی کٕنن واجنین کیو دکاندارن چھیہ پتاہ ز امس کیاہ دلیل چھیہ ٲسمژ۔ مال دیدِ چھہ پانس تہِ پتاہ۔ البتہ افسانہ پران پران چھہ قاری ٲخرس اتھ رازس انزۍ منزۍ گژھان۔ دلیل چھیہ یہ آسان ز مال دید چھیہ باقی سبزی کٕنن واجنین ہندِ باپتھ اچھہ منز کیُٹر بنیمژ۔ تکیاز بازرس منز چھہِ ساری خریدار تسۍ نش سبزی نوان ییلہ زن باقی سبزی واجنین ہنز سبزی پڑا پیوان ٲس۔ تس ٲس سبزی کٕننچ جاے تہِ گوَس پیٹھ یۆتن خریدار زیادہ واتان ٲسۍ۔ باقی زنانو کٔر پننۍ کنۍ تس یہ جاے نیاونچ کوشش تہِ مگر کامیاب سپز ہ نہ۔ ٲخرس کٔرہس خاندارس نش چال چلنچ شکایت تہ یتھہ پاٹھۍ آو امس سبزی کٕننہِ شہر وسنس ٹھاکھ کرنہ تہ تسند خاندار آو پانے سبزی کٕننہِ۔ مگر تس ؤژھ نہ سبزی۔ سہ چھہ مال دیدِ ونان «میون ہاکھ زن چھہ خریدارن دٔتر لگان»۔ ٲخرس چھیہ مال دید تس زنانہ کتھن کن نہ تھاونہ باپتھ ونان۔ سۄ چھیہ تس ونان:

«بہ چھیس پنن کارہ بار چلاونہ خاطرہ لچھس منز پکان مگر وچھس چھیس کلف تھاوان۔ کارہ بارہ کرُن چھہ نہ ٹھٹھہ کتھ۔ یہ چھہ نہ شرۍ گیندن۔ یۄسہ زنانہ کارہ بارہ کرنہ خاطرہ نیرِ تمس چھہ دزونہِ نارہ پیٹھۍ پیوان پکن۔» (لوسمتۍ تارکھ، ص 114)

یتھہ پاٹھۍ چھیہ مال دید سبزی دبارہ کٕننہِ شہر یوان تہ اتھ بازرس چھیہ سۄ رٲومژ رونق واپس یوان۔ یتھہ پاٹھۍ چھیہ قاری ین تہِ پتاہ لگان ز مال دیدِ کیاز چھہِ از بازرکۍ ساری دکاندار تہ سبزی والۍ یہ سوال پرژھان ز یمن دۄہن کتہِ ٲس۔ افسانس منز چھیہ پلاٹچ زمانی ترتیب ہنا الگ۔ افسانچ عمل چھیہ ازکالہ پیٹھہ شروع سپدتھ پتھ کالس کُن گژھان پتہ بییہ از کالس منز اختتامس واتان۔ یتھہ پاٹھۍ چھیہ اتھ منز فلش بیک ٹیکنیک ورتاونہ آمژ۔ افسانہ کِس آغازس منز چھیہ مال دید ریتۍ کھنڈۍ ہاکھ کٕننہِ، بازر یوان تہ درس بازرس چھیہ خوشی ہنز لہر ژھٹھ کڈان۔ اتی پیٹھہ چھیہ دراصل افسانچ عمل شروع سپدان۔ انکشافی پلاٹ آسنہ باوجود چھہ اتھ افسانس منز صوفی غلام محمد سند پنن رنگ زیادہ نمایاں تہ سہ گۆو تسند خاکہ نگاری ہند انداز۔ مثلا:

«مال دید ٲس ونہِ تہِ شکیل۔ بدنہ کنۍ تہِ ٲس سۄ سیٹھاہ وستوار۔ بتھ بۆرت آسنہ کنۍ تہ نرین تہ زنگن منز ویچھر آسنہ کنۍ آسہ تمس پننہِ آرمینہِ مالہ سرنڈنۍ ونان۔ مال دیدِ اوس نہ یتے یوت صفت ز سۄ ٲس بتھہِ برژ تہ پرینۍ تہ جسمہ کنۍ وستوار بلکہ اوس تمۍ سند بۆڈ صفت تہنز زبان تہ امی زبانۍ سیتۍ ٲس سۄ پنن شیہ تروکھ ہاکہ پھۆت برنزس منز کنان۔» (لوسمتۍ تارکھ، ص 104)

افسانس منز چھہِ طوالتہ سان مال دیدِ ہنزِ ظاہری شخصیتچ تصویر پیش کرنہ علاوہ تسندِ وطیرچ تہ خریدارن کیو باقی بازرس منز مقبول آسنہ کین وجوہاتن ہندۍ تفصیل دنہ آمتۍ، ییمِہ سیتۍ افسانس پیٹھ خاکہ نگاری ہند رنگ کھۆتمت چھہ۔

تھیم محرک پلاٹ
صوفی غلام محمد سندۍ یتھۍ افسانہ پٔرتھ چھہ باسان ز افسانہ نگارس چھہ کیاہ تام باوُن تہ تتھ اظہار دنہ خاطرہ چھہ سہ واقعات تہ کردار تخلیق کران۔ یعنی یتھین افسانن ہند پلاٹ مدنظر تھٲوتھ چھہ باسان ز افسانوی عملہِ تہ واقعہن چھہ ژٲر کرنس پس پردہ صوفی سند زندگی متعلق اکھ پزر یتھ سہ زیو دنۍ یژھان چھہ۔ امہ قسمہ کین افسانن منز چھہ بیشتر پاٹھۍ تسند خاکہ نگاری ہند انداز ہنا کم۔ یمن افسانن منز چھہ صوفی غلام محمد سند نمایندہ افسانہ ‹ژنہِ ژور› خاص پاٹھۍ شامل۔ چناچہ اکھ کامیاب افسانہ آسنہ کنۍ چھہ یہ افسانہ ونس تام شایع سپزمژن کاشرِ زبانۍ ہنزن نمایندہ افسانہ سۄمبرنن منز شامل سپدمت۔ ‹ژنہِ ژور› افسانہ یۆدوے ترقی پسند دور اند وٲتتھ تحریر کرنہ آمت چھہ مگر امہ تحریکہِ ہند پۆت گرز چھہ اتھ منز ٹاکارہ۔ امہ افسانہ کِس پس منظرس منز چھیہ ترقی پسند تحریکہِ ہنز سماجی انصافچ تہ سماجی حقیقت پسندی ہنز چھاپ۔ رتن لال شانت چھہ امہ دورہ کین یتھین افسانن متعلق ونان :

«یمن سارنی افسانن ہند کنواس چھہ اکہ سماجی اوند بریک حیس (Milieu) اسہ برونٹھہ کنہِ وۄتلاوان یتھ اندر سیاسی آزادی میلتھ تہِ آزادی کُنہِ چھیہ نہ۔ شخصی یا فرہنگۍ استحصال ختم گژھتھ نوین مۄقدمن ہند ظلم تہ جبر عام گۆمت چھ۔» (رتن لال شانت: کاشر افسانہ از تہ پگاہ، ص 37-38)

زیر بحث افسانس منز چھہ غنی تہ عبداللہ سلطان صوفۍ سندس کاندرۍ وانس پیٹھ کٲم کران۔ سلطان صوفۍ چھہ یمن خرہ سندۍ پاٹھۍ کٲم کرناوان مگر تنخواہ چھکھ بہہ بہہ رۄپیہ دوان۔ تہ یم تہِ چھِس اڈم زڈ کران۔ اتھ وانس پیٹھ چھہ محمد تہِ کٲم کرنہِ یوان یُس غنی تہ عبداللہ ہس محمد صوفۍ سندس وطیرس خلاف متحد کرنچ کوشش کران چھہ۔ مگر سلطان صوفس چھہ فکرِ تران ز محمد چھہ یمن دۄن ڈالان تہ ہرگاہ یمو اتھ وانس منز کٲم کرنۍ ترٲو سلطان صوفس گژھہِ نقصان۔ امہ سببہ چھہ سہ محمدس کٔڈتھ ژھنان تہ غنی تہ عبداللہ یمن محمدنہِ سیتۍ سلطان صوفس خلاف وۄتھنچ ہمت سپزمژ ٲس چھہِ پرانۍ پاٹھۍ اتھ دکانس منز کٲم کران۔ یعنی افسانہ نگارس چھہ ہاون ز آسن وول سلطان چھہ نہ پننہ ژۄیہ تہ چالاکی سیتۍ نہ آسن والین تہ مظلومن یمن ترین مۄہنوین یکہ وٹہ گژھنہ دوان۔ تم چھہ گۄڈہ سلطان صوفس خلاف متحد سپدن ہیوان ییمہ سیتۍ سلطان صوفۍ متفکر سپدان چھہ۔ پٲنسہ وول چھہ سماجس منز غریبن باہم پھاس ترٲوتھ یا تمن درمیان نااتفاقی پیدہ کٔرتھ پنن ظلم تہ استحصال جاری تھاوان۔یہ چھہ افسانک تھیم تہ اتھۍ تھیمس اظہار دنہ باپتھ چھہ صوفی غلام محمدن پلاٹ تعمیر کۆرمت۔ پلاٹس متعلق چھیہ یہ اکھ اہم تشریح ز پلاٹ چھہ تھیمچ مکانی صورت۔ افسانس منز چھہ پلاٹے تھیم پرن والین تام واتناونک وسیلہ۔ بقول رتن لال تلاشی:

«پلاٹ چھہ افسانہ نگارس نش سہ اکھ وسیلہ ییمہِ ذریعہ سہ تھیمس کُنہِ زمانہ مکانچ سکونت دتھ ہیکان چھہ۔ یتھے پاٹھۍ چھیہ کانہہ ادبی ساخت یا پلاٹ قاری سندِ باپتھ باونہ آمتس تھیمس تام واتنک وسیلہ۔ یتھہ پاٹھۍ تخلیق کارس ساخت یا پلاٹ زندگی ہندس کُنہِ نتہ کُنہِ پہلوہس متعلق پنن نقطہ نظر باونس منز اتھہ رۆٹ کران چھہ تتھے پاٹھۍ چھہ یہ قاری یس تہِ زندگی ہندس کُنہِ خاص پہلوہس متعلق آگاہی تہ ادراک حاصل کرنس اتھہ رۆٹ کران۔» (رتن لال تلاشی: پلاٹ: کینہہ نوینہ ویژھنیہ، انہار : تنقید، نظریہ تہ نظر، ص 149)

ییمہ افسانک یہ پلاٹ چھہ پلاٹچہ اتھ تشریح پیٹھ پورہ وتران۔ تم واقعات تہِ چھہِ پلاٹس منز شامل کرنہ آمتۍ یم غنی تہ عبداللہ سنز اتھ کاندرۍ وانس پیٹھ عرق ریزی ہاوان چھہِ۔ اتھ سیتۍ سیتۍ تہند مالکس خلاف آواز بلند کرنۍ تہ ٲخرس پننہ مجبوری کنۍ خاموش سپدن۔ یم ساری واقعہ چھہِ عقلہِ ویژونہِ اندازہ ہاونہ آمتۍ۔ افسانس منز چھیہ کردارن تہ واقعاتۍ ارتقاہس اکھ ہم آہنگی، یعنی کردار یتھ صورتحالس منز تراونہ آمتۍ چھہِ، تتھ صورتحالس منز چھیہ تہنز عمل فطری۔ امہ کنۍ چھہ پلاٹ لحاظہ یہ افسانہ صوفی سند ساروے کھۄتہ کامیاب افسانہ۔
صوفی غلام محمد سندس ‹یاون تہ تاون› افسانس منز تہِ چھہ باسان افسانہ نگارس چھہ پلاٹ تعمیر کرنس منز تھیم محرک۔ اتھ افسانس منز تہِ چھہ افسانہ نگارس یہ باون ز غربت تہ اتھہ تنگی چھیہ بُجرک باعث ییلہ آسن تہ امیری یاونس پوشناوان تہ نیشناوان چھہِ۔ یۆدوے تھیم چھیہ مہدہ صٲب تہ شیلہ نہ کردارہ سیتۍ افسانس منز باونہ آمژ۔ شمبھو ناتھ چھہ نیبر بسان تہ مہدہ چھہ کشیرِ تسندِ بنگلک چوکۍ در یس لۄکچارہ پیٹھے اتہِ رودمت چھہ۔ کینژِ وہرۍ چھہِ شمبھو ناتھنۍ کور تہ تسند خاندار اتھ بنگلس منز یوان۔ شیلہ یۄسہ ژتجی نکھہ آسنہ باوجود تہِ جوان باسان چھیہ، سۄ چھیہ دراصل مہدہ صٲبنۍ ہم عمر مگر غربتن چھہ تس برونہے بُجر اونمت۔ شیلہ چھیہ تس بب کٔرتھ آلو کران ییمہ سیتۍ مہدس وٲنج دزان چھیہ مگر کینژِ کالۍ چھہ شمبھو ناتھ تہِ واریاہ کالۍ کشیر تٔرتھ اور واتان یس وۄنۍ واریاہ مرۍ دیادم آسان چھہ۔ سہ تہِ چھہ مہدہ صٲبس بب ونان۔ یہ چھہ افسانک پلاٹ۔ ییمہ افسانکہ پلاٹچ خوبی چھیہ یہ ز اتھ منز چھہ وحدت مکان قایم رودمت۔ یعنی سارے عمل چھیہ شمبھو ناتھ نس بنگلس پیٹھ۔ زمانہ لحاظہ تہِ یودوے عمل مستقیمی اندازہ برونہہ پکان چھیہ تاہم چھہ افسانہ نگارن کردارن ہند پس منظر ہاونہ باپتھ یمن ہندس پتھ کالس تہِ کھۄلو دیتمت۔ وۄں گۆو اتھ چھیہ پلاٹس منز تفصیلن ہنز اہمیت تہ کردار نگاری باپتھ چھہ یہ ضروری، نتہ چھہ ییمہ افسانک پلاٹ مربوط۔ نہ چھیہ واقعہن ہنز ژیل ژیل تہ نہ خاکہ نگاری ہنز تراے۔ امہ افسانہ کین واقعاتن منز چھہ وجوہی رشتہ تہِ قایم رودمت۔ افسانک پریتھ کانہہ واقعہ چھہ پلاٹہ منزے زاین لبان۔ اکس دۄن جاین چھیہ واقعہن ہندِ دسۍ ایرنی(Irony) وۄتلاونچ جان کوشش۔ مثلا شیلہ تہ مہدہ صٲب چھہِ ہم عمر مگر شیلہ نہِ زیوِ ییلہ تس بب وننہ یوان چھہ مہدہ صٲب سند ردعمل چھہ اکھ ایرنی (Irony) پیدہ کران ۔ تہ تمہ پتہ ییلہ شمبھو ناتھ تہِ تس بب ونان چھہ امہ سیتۍ چھیہ ستم ظریفی منز شدت آمژ یہ زن مہدہ صٲبنہ ٲخری مکالمہ تلہ ٹاکارہ سپدان چھہ۔ مثلا :

«مہدہ صٲب وۆتھ ‹اہن مہرا وارے چھس› مگر یہ ونان ونان لگۍ زن تمس کنڈۍ۔ تمۍ دۆپ اندری ‹میون اکہ وقتک بب از میہ ونان بب›!» (شیشہ تہ سنگستان، ص 37)

قاری یس تہِ چھہ زہر خند وٹھن پیٹھ نمودار سپدان۔ ‹ژنہِ ژور› افسانس تہ یتھ افسانس چھیہ اکھ نمایاں فرق یہ زِ ‹ژنہِ ژور› افسانس منز چھہ تضاد ٹاکارہ تہ خارجی ییلہ زن یتھ افسانس منز تضاد کردارن ہندس ذہنی سوتھرس پیٹھ چھہ۔ یم دۄشوے افسانہ چھہِ صوفی سندِ کامیاب افسانہ فن چہ مثالہ۔ صوفی غلام محمد سند امہ قبیلک بیاکھ افسانہ چھہ ‹تنز کھۆر›۔ اکی قبیلکۍ افسانہ ہیکو یمن امہ سببہ تہِ ونتھ زِ یمن افسانن منز چھیہ سماج کین پتھ پسارۍ تہ بدحال لوکن ہنز عکاسی سپز مژ۔ حالانکہ یتھۍ کردار چھہِ صوفی غلام محمد سندین باقی افسانن منز تہِ مگر یمن تریشونۍ افسانن منز چھہِ سماج کہ مشراونہ آمتِہ طبقہ منزہ کردار ژٲر کٔرتھ تہ تمن انسانی ہمدردی ہندِ جذبک ؤلت کٔرتھ پیش کرنہ آمتۍ۔ پلاٹ حسابہ تہِ چھہ یہ ‹ژنہِ ژور› یا ‹یاون تہ تاون› افسانس سیتۍ رلان۔ سہ کھۆر ییمۍ سنزِ تالہِ کُن وچھتھ میمہِ درۄکہ یوان چھیہ تمۍ سے کھرۍ سندِ فنچ چھیہ سۄ ٲخرس پرستار بنان۔ افسانس منز چھہ ابتدا پیٹھے کھرۍ سنز سۄ تصویر پیش کرنہ آمژ ز یۄس نہ صرف فرہنگین ہندِ باپتھ قابل نفرت چھیہ بلکہ قاری تہِ چھہ اہنزِ شکلہ صورتس متعلق زٲنتھ امس کردارس نفرت کران۔ مگر ٲخرس چھہ نہ صرف میمہِ تہ صحبس سیتۍ سیتۍ قاری ین پیٹھ تہِ یہ حقیقت ظاہر سپدان ز امس قابل نفرت کٔھرس منز تہِ چھہ اکھ فنکار زوان۔ یتھہ پاٹھۍ چھہ صوفی غلام محمد یہ ہاونس منز کامیاب سپدمت ز جسمانی بدصورتی چھیہ نہ انسانس بدصورت بناوان بلکہ چھہِ تسندۍ وصف تہ خوبیہ فردس بدصورت یا خوبصورت بناوان۔ سیتی چھہ صوفی یہ کتھ تہِ سطحس پیٹھ انان زِ کاشرۍ ہنر مند تہ کارۍ گر یودوے بظاہر غربتہ تہ افلاسہ کنۍ پس پایہ تہ وسۍ پایہ بوزنہ یوان چھہِ مگر سژن تہ پن ہویو معمولی چیزو سیتۍ چھہِ پننین اونگجن ہند کمال ہاوان۔ افسانس منز چھہ پلاٹ کہ ارتقا باپتھ اکھ ماحول وۄتلاونہ آمت۔ حالانکہ ‹ژنہِ ژور› یا ‹یاون تہ تاون› ہوین افسانن ہندۍ پاٹھۍ چھیہ نہ پلاٹس منز تیز حرکت مگر واقعات سۆت سۆت پکنہ باوجود چھہ افسانہ اکس مخصوص تھیمس کُن پکان۔ تہ ہنا چھیہ اتھ منز انکشافی تراے تہِ۔ یہ انکشاف چھہ افسانہ کین میم تہ صحب ہوین کردارن کیو قاری ین ہندِ باپتھ تہِ۔ گۄڈنکین دۄن افسانن سیتۍ چھیہ امہ کِس پلاٹس یہ فرق تہ ز امہ افسانک اصل کردار یعنی تنز کھۆر چھہ نہ عملہِ منز آور۔ اسۍ چھہِ تنز کھٔرس متعلق راوی یا میم صحبہ سندِ دسۍ بوزان۔ پلاٹ چھہ نہ کھۆر برونہہ پکناوان، بلکہ راوی تہ باقی کردار یمن اسۍ کٔھرۍ سند کردار برونہہ کُن اننس منز مدگار مانان چھہِ۔ پلاٹچ رفتار چھیہ امی سببہ سۆژ۔

احساسۍ تبدیلی ہندۍ پلاٹ
اتھ زمرس منز ہیکوکھ ‹عجب ملک نوش لب› تہ ‹خبر کیازِ› ناوکۍ افسانہ تھٲوتھ۔ یمن دۄشونۍ افسانن منز چھیہ کردارن ذہنی سۆتھرس پیٹھ تبدیلی یوان۔ ‹عجب ملک نوش لب› افسانس منز ییتہ خارجی عنصر داخلی تبدیلی ہندۍ موجب بنان چھہِ تتہِ چھہِ ‹خبر کیازِ› افسانس منز تبدیلی ہندۍ محرکات کردارس اندرے۔ ‹عجب ملک تہ نوش لب› افسانک پلاٹ وچھتھ چھہ باسان ز یہ افسانہ گژھہ اختر سند ‹دند وزن› افسانہ پتہ لیکھنہ آمت آسن۔ پلاٹ چھہ تمی افسانک تقلید مگر پلاٹ ووننچ یۄسہ مہارت اخترس نش نظرِ گژھان چھیہ سۄ چھیہ نہ صوفی سندس افسانس منز۔ باسان چھہ صوفی چھہ واقعاتو تلہ زورہ نتیجہ کڈنچہ جلدی منز۔ واقعات چھہِ نہ اتھ افسانس منز فطری طور انجامس کُن پکان۔ افسانہ نگار چھہ تقلید کنۍ زورہ کردارن عمل کرناوان۔ تمی چھیہ مکالمن منز مصنوعیت باسان۔ مثلا نیتون یہ اقتباس:

«ون بی، بہ کُس چھُس؟» مۄمن کۆر خۄرشہ سوال۔
«کُس چھکھ، مرچہ بیگ۔»
«ناے۔ میانۍ دری ونی۔ مندچھییہ۔ میانۍ دری چھے ونی۔»
«مۄمہ» خۄرشہ وۆن محبتہ سان۔
«ناے ونی عجب ملک » مۄمہ وۆتھس بییہ۔
«عجب ملک» خۄرشہ ژۆل نیرتھ۔
«نوش لب» مۄمن کۆر خۄرشہ خطاب۔ اتھۍ سیتۍ ژۆل دۄنونۍ ٹھاہ ٹھاہ کٔرتھ اسُن نیرتھ۔
(لوسمتۍ تارکھ، ص 34-35)

‹خبر کیازِ› افسانک پلاٹ چھہ مختصر۔ زونہِ ییمس وری کھنڈ برونہہ کھاندر کۆرمت اوسکھ چھہ کنزس دانہِ منان منان باسان زنتہ نرین زنگن زو درامت۔ مگر پتہ چھیہ جانہ تس دانہِ منان منان کینہہ اشارہ دوان تہ تس چھہ پتہ تنہایی منز فکرِ تران زِ تس کیاہ دلیل چھیہ۔ زون چھیہ گۄبہِ کھۄرہ روزمژ۔ سۄ یہ گۄڈہ پانس متعلق سوچان ٲس درکاکنہِ ہنزو کتھو سیتۍ آیہ تسندس تتھ سونچس تبدیلی۔ ‹عجب ملک نوش لب› افسانس منز چھیہ مۄمس تہ خۄرشہ کُنی کانگر یتھ پیٹھ یمن جنگہ جنگ گژھان چھیہ۔ پتہ ییلہ مۄمہ دویم کانگر انان چھہ یمن چھہ اندرم لول وۄتلان تہ مس نیندرِ شۄنگان۔ مگر مس نیندرِ منز چھیہ کانگر پھیران تہ بستر چھکھ دزان۔ اتھ افسانس منز چھیہ احساسہ تبدیلی۔ دۄشونۍ افسانن ہنز یہ تبدیلی چھیہ اندرۍ سطحس پیٹھ ییمہ سببہ یم الگ زمرس منز تھٲوتھ ہیکوکھ۔