شوکت صوفی

یونانۍ اسطورن منز چھہ کتہ تاں لیکھتھ ز یمہ ساعتہ تھیسیس شہرِ کریٹ گژھتھ تہ مینوتار مٲرتھ ایتھنز واپس آو، تمۍ سند سمندری جہاز تھووکھ ایتھنز کس سمندری بٹھس پیٹھ بطورِ یادگار وری ودان۔  دوہ دوہ گۆو گژھان تہ امہ جہازکۍ حصہ رودۍ شکستہ سپدان۔  لوکھ ٲسۍ اتھ پرون خراب ہیو حصہ کڈان تہ تتھ جایہ نۆو حصہ لاگان۔  وقتس سیتۍ سیتۍ گے جہازکۍ تمام حصہ خراب تہ لوکو لاگۍ تمن جاین نوۍ حصہ۔  بقول یونانۍ فلسفی پلوتارک، یہ چھہ نہ واضح ز اصل جہازک کوتاہ حصہ رود باقی، یمۍ پتہ اکس فلسفیانہ سوالس زنم دیت ز آیا اصلی جہاز کتھ ونو۔  شناختچ نوعیت زاننس متعلق امہ قسمہ کین سوالن چھہ کنہ کنہ جایہ شپ آف تھیسیس پراڈاکس تہِ ونان۔  اتھ تناظرس منز چھہ زنانن ہندۍ دسۍ لیکھنہ آمت ادبی متن پرن میانہ باپتھ پریتھ وزِ مشکل بنان۔  پرن ونتھ یہ ز میہ چھہ اشکال گنان ز یہ کینژھا بہ پران چھس تہ کم فہمی آسنہ باوجود کنہ مفہومس تام واتن یژھان چھس سہ متن کمۍ چھہ تشکیل دیتمت؟ یہ متن چھا تمہ ناوک دستخط یس کتابہ ہندس سرورقس پیٹھ بحیثیت مصنف چھہ کِنہ اتھ ناوس سیتۍ چھیہ بیہ تہِ کانہہ شخصیت بدل کانہہ فکر ہیتھ وابستہ؟ بیاکھ سوال چھہ ذہنس منز وۄتلان ز بحیثیت جنسِ مخالف چھا میہ کانہہ منصب یا اختیار ز بہ پرن یہ متن تہ تتھ پیٹھ کرہ کتھ۔  نسایی احساس تہ تجربہ پیٹھہ زاین لبن وول متن یمہ ساعتہ میانیو چشمو میانس عصبی ذہنس تام واتان چھہ تمچ تفہیم چھا تتھ احساسس سیتۍ کانہہ واٹھ کھیوان یس اکہِ بدل عصبی ذہنہ منز زامت چھہ آسان؟ عصبیتن ہندس اتھ ٹکراوس منز کس صورتحال چھہ برونٹھ کن یوان؟ یم کینہہ سوال تہ اشکال ہیتھ کھوج میہ محترمہ نسیم شفایی سنز کتاب "بہ ونتھ زانہ کس”۔  

چونکہ نقد دین چھہ وۄستادن ہنز کٲم، میہ کٔر محض نظر دنچ کوشش، سہ امہ مۄکھہ ز میہ نش چھہ نہ سہ پورہ متن دستیاب یس اہندِ دسۍ ونیک تام کاغذس پشراونہ آمت چھہ۔  

بہرحال، اگر معلوم تاریخس معمولی پھیر دمو اسہ چھہ ننان ز پدرسری نظام قایم گژھنہ پتے چھہِ زنانن شدید مسلہ درپیش رودمتۍ۔  یم مسایل چھہ ساسہ واد وری ین پیٹھ پھہلتھ یمیک نتیجه یہ دراو ز باقی سماجی سوتھرین سیتۍ سیتۍ سپز نہ زنۍ ادبی متنن منز تہِ زانہہ بیان اگرچہ زنہِ متعلق واریاہ متن ترتیب تہِ آو دنہ۔  یہ چھیہ حقیقت ز از چھہ زنہ منز پننہ وجودک تصدیق تہ سہ مانراونک جذبہ برونٹھمہ کھوتہ زیادہ مگر یہ جذبہ کتھ صورتس منز چھہ اسہ برونٹھ کن یوان تتھ پیٹھ کتھ کرنک حق چھہ پریتھ قاری یس حاصل، چاہے سہ مرد ٲسن یا زنۍ۔  مثلاً اگر اسۍ یمہ وقتچہ نسایتچ کتھ کرو یہ چھہ زن مذہبی اعتقاد، جنگی سپرٹ، ہینگن میٚژ لدتھ ینک جذبہ، بییہ کِس حقارتچہ نظرِ وچھن تہ آزادی غیر انسانی بنٲوتھ تتھ پنن حق وننک وطیرہ ہیتھ نظرِ گژھان۔  امہ قسمچ نساییت چھیہ نہ کانہہ ذہنی تھیوری۔  یہ طریقہ یس اسۍ ازکالچہ شاعری(عالمی سطحس پیٹھ بلا لحاظ زبان) منز چھہ وچھان یا یس بازرن منز چھہ اظہار لبان یہ چھہ زن تہ اکھ تخریبی عمل یس پننس بیوسنٹرک آسنس پیٹھ بضد چھہ۔  یہ چھہ صنفی حد پھٹراونک جنگی اعلان ہیو باسان۔  صنف یعنی جنڈر چھہ یوان اکھ عنوان بناونہ تہ یہوے عنوان چھہ زن تہ انسانی وجودچہِ  رنگارنگی پیٹھ اکے طرفہ غالب یوان کرنہ۔  امہ صورتحالک اثر کیاہ چھہ معاشرس پیٹھ پیوان تتھ متعلق کرن کھوورِ درِکۍ ووستاد کتھ، بہ چھس ناخواندن منز خۄش۔  

بہرحال، یہ سورے ونتھ اگر کتابہِ کن واپس یمو تہ میہ سپد اکھ خوشگوار حیرتھ ز امہ کتابہ ہند متن تہ اظہار چھہ تمہ رویہ نش بالکل مختلف یمچ کتھ میہ امہ برونٹھ کٔر۔  یعنی یہ کینژھا میہ محسوس کۆر تمہ تلہ چھہ باسان ز نسیم شفایی ہندِ تخلیقک تانیثی جوہر چھہ اخلاقی، تہذیبی تہ جمالیاتی۔  امہ جوہر پیٹھہ یس متن تشکیل چھہ سپدان سہ  چھہ نہ کنہ خارجی عنصرکس اثرس تل یتھ پنن حد پھٹراونس پیٹھ مصر نہ چھہ پنن الگ کمرہ بناونس پیٹھ بضد۔  امہ علاوہ باسیوو میہ یہ متن فہمہ کھوتہ زیادہ احساس کس سطحس پیٹھ قاری یس آوران۔  یہ احساس چھہ ویۆد تہ صاف۔ امہ باپتھ چھہ نہ ذہن تفہیمی عملس منز آور سپدتھ عاجز سپدان۔  تخیلچ ساخت چھیہ سادہ مگر سرنۍ۔  اظہارس منز چھیہ نرمی تہ متانت۔  امیک وجہ ہیکہ شاید یہ ٲستھ ز نسیم شفایی چھہ نہ پنن تخلیقی بِتر تمن بحثن منز ضایع کۆرمت یم نسایی تجربن نیبرۍ کنۍ متاثر کرتھ آلودہ چھہِ کران۔  

برونٹھ کن کرو کینہہ مثالہ تہِ پیش مگر تمہیداً تجییہ اسہ کینہہ سوال یم کتھہِ کتھہِ منز اتی رودۍ۔  تمن سوالن کن پھیرو واپس۔  اکھ اوس مصنف سندِ شناختک مسلہ۔  بیاکھ اوس بحیثیت جنسِ مخالف قاری سند اختیار تہ بییہ اوس صنفی عصبیتن ہندِ ٹکراوک مسلہ۔  تبصرہ برائے تبصرک چھس نہ قایل امہ مۄکھہ اگر کتابِ پران پران یمن چیزن ہنز تہِ کتھ کرو شاید ما وۄتھن بیہ تہ کینہہ سوال۔  

بہرحال، شناختک مسلہ اگرچہ پریتھ فردس زندگی منز چھہ بتھہِ پیوان مگر یہ مسلہ چھہ سٲنس معاشرس منز زنانن زیادے پہن دامن گیر روزان۔  معاشرچ ساختے چھیہ تژھ ز اکس زنانہِ چھہ تمام زندگی  وز وز پنن وجود پیوان ژھانڈن۔  کنہ کنہ ساعتہ چھہ امس پنن اصل وجود مشتھ تہِ گژھان تہ کنہ نقلی وجودس منز چھس پیوان زوُن۔  تھیسیس سندِ سمندری جہازکۍ پاٹھۍ چھہ امۍ سند وجود شکست و ریخت کس عملس منز مسلسل روزان۔  اتھ صورتس منز کتھہ پاٹھۍ سپدِ زنۍ پننس اصل وجود کس تناظرس منز بیان۔  چونکہ وجودک تہ شناختک یہ مسلہ چھہ اکس زنہ درپیش اتھ صورتس منز کتھہ کنۍ ہیکون یہ تتھ ادبی دایرس منز پرزنٲوتھ یس دایرہ تمن فکری تہ فنی قدرن پابند چھہ یم زن اکھ پدری نظام پننس ادبس سیتۍ مخصوص چھہ تھاوان؟ اتھ معاملس منز چھہِ تانیثیتکۍ کینہہ اہم نظریہ ساز ونان ز زنۍ بیان کرنۍ تہ تمۍ سندۍ صفت تہ امتیاز متعین کرنۍ چھہ تقریباً ناممکن۔  اتھ چھہ وجہ یہ ز ساسہ واد وری یو پیٹھہ اکس مرد مرکزی معاشرس منز چھہ سہ ترجیحی نظام پھٹراون فی الحال محال یتھ اندر جنسن متعلق لفظیات تہ صفات صرف مرد سندین قیاسن نمایندگی چھہ کران۔  اتھ صورتس منز چھہِ تانیثی فکرِ ہنز وکالت کرن والیو پننۍ الگ تنقیدی نظریات قایم کرمتۍ یم زن انگریزی شبدن منز گاینو کرٹسزم رنگۍ برونٹھ کن آیہ۔  یہ چھہ واضح ز ادبچ تانیثۍ قرآت چھہ نہ احتجاج تہ عوامی نعرن ہنز تشریح بلکہ چھہ یہ تحلیل تہ تجزیک فن ، اتھ صورتس منز اگر أسۍ کوشش تہِ کرو أسۍ ہیکو نہ تتھ متنس سیتۍ تجزیہ کس سطحس پیٹھ انصاف کرتھ۔  یتھ جایہ وٲتتھ چھہ باسان ز  مرد قاری سند منصب تہ اختیار سپد ختم۔  سیتی یہ ز ادبی متنن متعلق یس نقطۂ نظر مختلف جنس پننۍ تمام عصبیت ہیتھ برونٹھ کن انن سہ آسہِ قدرتی طور اکھ اکس مخالف کیاز ادبی قرآتک تانیثی نقطۂ نظرے چھہ معنی یا قدر مرد مرکزی قیاسن تہ ترجیحاتن ہنز نشاندہی کرتھ ڈی کنسٹرکٹ کرن۔  

یہ سورے ونتھ چھہ تمن زنانہ قاری ین تہ نقادن پیٹھ یہ فرض عاید سپدان ز تم ین پنن نقطۂ نظر ہیتھ برونٹھ کن۔  نتہ چھس بہ تہِ خوش ز میہ لیوکھ کیاہ تام تہ یہوے چھہ پوز۔  

نسیم شفایی ہنز کتاب پر میہ سٲرے مگر کتھ کرن کیتھ پییہ کینہہ نظمہ الگ کرنہِ۔  امہ کتابہِ منز ترایہ میہ سہلاب نظمہ اتی کیاز مقدمہ اوس بدل قایم سپدمت۔  چونکہ حساس طبیعتن اندر اگر اظہارک بتر آسہِ تیلہ چھیہ یہ حساسیت جان تخلیقی وفور ہیتھ برونٹھ کن یوان۔  

نہ اۆش نہ وۄش کانہہ مگر اندرۍ دگ
یقین گمانس لمان لونچن
خیال حالس ونان کیاہ تاں
(منزلہ رۆس)

رژھہِ رژھہِ ہیۆت اکۍ نوۍ تلاشن مۄکھ ہاون تہ ونن
وۄتھ وۄنۍ ژھار ژہ وۆن دِ سفر کر
نیبر اندر اژ ژھارن ہیچھ
تریش تلاش ژے یوتاہ آسی تیوت پککھ
(روحک سفر)

یمہ چھیہ کینہہ سادہ نظمہ مگر یمن اندر چھیہ کینہہ پیچیده فکری جہژ تہ یم تمہ ذہنی کیفیتچ عکاسی چھیہ کران یتھ اندر انسان پننۍ اصل وجودی شناخت چھہ ژھاران۔   مگر چونکہ نسیم شفایی ہند اسلوب چھہ شفاف امہ موکھہ چھہ احساس تہِ شفاف باسان۔

شاہ پری ناز پری مست ناز پری یٲژ نہ
سورے سہ پرستان تہِ بے
حسنہ گنج حسنہ جانان تہِ بے
حسنہ قودرتچ کنی شان تہِ بے
(موسم موسم میون سفر)

یہ نظم چھیہ پنن وجود اکس جمالیاتی تناظرس منز منناونچ اہم مثال۔  

بیاکھ چیز یس میہ محسوس سپد سہ چھہ یہ ز نسیم شفایی چھیہ المیہ بیان کران مگر تتھ منز چھیہ شکایت واریاہ کم۔  بیان چھہ نہ اۆش ہاراں ہاران برونٹھ کن یوان بلکہ چھہ امہ نش پاک۔  اتھ تناظرس منز چھیہ اہم ترین نظم "بیچھہِ ونۍ”۔  یہ چھیہ طاقتور اظہارچ بہترین مثال، یتھ اندر المیہ متاع وجود تہ احساسک سرمایہ چھہ۔  

ازلنہِ زالہ لگکھ کٔج کوتر
ٹھپہ بزۍ کرنے بنہِ خیراتھ
اسہ ونہِ ہونجہ یۆد کتھ کرنے پننی بجر کرن خیراتھ
روشتھ توشتھ نفرژ نخوتہ
تہندین قدمن تل بیہہ پہراہ رٹھ خیراتھ
(بیچھہِ ونۍ)

قرآتس دوران چھہ باس لگان ز المیہ پیٹھہ زاین لبن وول غم چھہ یمن اطمینان فراہم کران۔  

تم غم چھم یتھ اندکارس منز
شمعک گاہ زن
تم چھہِ میہ رژھہِ رژھہِ
اتھہ تھپہِ رٹۍ رٹۍ
زندہ روزنۍ کتۍ
بخشان خواب
(غم چھم بخشان زندگی)

شاید چھہ یہوے اہند مزاج تہ امہ مزاجہ پیٹھہ یس متن صورت چھہ لبان تمیک نسایی عنصر چھہ پننۍ تمام تر انسانی معنویت ہیتھ اسہ پرن کیت میسر سپدان۔  امہ متنہ پتۍ کنۍ چھہ اہنزِ شخصیتک اظہار سپدان مگر عجیب کتھ چھیہ یہ ز شخصیتک یہ اظہار چھہ نہ راست پاٹھۍ درینٹھۍ گژھان۔  یہوے چھہ نسیم شفایی ہند فن۔  نسیم شفایی ہنز کرافٹس مینشپ چھیہ مخفی، اوے ہیکو نہ اسۍ تتھ کیمیا گری انزۍ منزۍ گژھتھ یس نسیم شفایی گدا صفت آسنہ باوجود زانان چھیہ۔  

غزلن متعلق کرو بییہ ساعتہ کتھ کیاز غزلہ چھیہ  کتابہ منز کمے پہن۔  بہ چھس یژھان نسیم شفایی ہنزن بییہ تہ کینژھن غزلن ہنز قرآت تۆت تام تھاوو پننۍ کتھ پانسے نش۔  

نوٹ: یہ کینژھا میہ لیوکھ تتھ سیتۍ اختلاف کرن چھہ پرن والۍ سند حق۔  نیت چھیہ یہ ز نسایی ادبس تہ فکرِ متعلق یم سوال وتھۍ تتھ پیٹھ گژھۍ بییہ تہِ کینہہ لوکھ کتھ کرنۍ تاکہ تنقیدی مباحثن گژھہن بر وتھۍ تہ طالب علمن واتہا فایدہ۔