ڈاکٹر نثار ندیم     

ڈاکٹر شوکت شفا سنز کتاب’’ بچہ، بچہ ڈاکٹر تہ بچہ ڈاکٹری‘‘ چھیہ ۳۱۵ صفحن پیٹھ وہرتھ ۷۲ موضوعن پیٹھ مبنی اکھ خوبصورت کتاب۔ جلدک رنگ چھس اچھن ویہ ون تہ ظۄنس پریہ ون ۔ بڈِ پایہ چھس کاغذ تہِ جان کالٹی وول۔کتابہِ ہندس جلدہ کس بتھۍ پکھس پیٹھ چھس عنوانس نسبت اکھ تصویر تہ پوٚت پکھس پیٹھ لکھارۍ سند فوٹو تہ اکھ مختصر تعارف۔کتاب مژرتھ چھہ پیٹھے بانہ لکھارۍ سند کتابہِ منز شامل مختلف حوالجاتی تعداد و شمارک  صحیح آسنک دعوا  تہ ڈاکٹر سوہن لال کول سند کتابہِ حوالہ اکھ مدلل دیباچہ شامل یس کتابہِ ہنز خاص خاصیژ ہنز ژینہ ون دوان چھہ۔ کتاب چھیہ خط و کتاب  یا ونو چھاپ خانی ہندۍ تمام اصول ہیتھ چھاپ سپزمژ۔

کتابہِ ہند عنوان چھہ گۄڈے شعوری طور ترین چیزن پیٹھ یکدم زور دوان۔یعنی بچہِ کیا گۆو، بچہِ داکٹر کس ونو تہ بچہِ ڈاکٹری کیا چھیہ؟ اتھ شعوری عنوانس چھہ اولین سبقن منز دل دنہ آمت تہ ویٹھ پوٹھ وضاحت کرنہ آمژ۔ کتاب چھیہ نثرس منز تہ ویٹھۍ پۄٹٰھۍ پاٹھۍ چھہ یہ انفارمیٹو نثر۔مگر پزر چھہ یہ ز  یہ کتاب چھیہ اکھ مخلوط فنی مواد ہیتھ برونہہ کن  یوان۔ مخلوط امہ لحاظہ ز  اتھ کتابہِ منز چھہ بیک وقت ڈرامہ، افسانہ، انشاییہ، کہانی ہنز کھیژر یا ونو وازہ وانکۍ پاٹھۍچھہ سارۍ مزہ پرن وول ژھہان۔امہ لحاظہ چھیہ یہ کتاب کاشرس ادبس منز اکھ نٔو تہ سادروار فنکاری تہ یہ عمل چھیہ شاید گۄڈنچہ لٹہِ کاشرس منز سپدان۔میانۍ کنۍ چھیہ فنی طور یہ کتاب نثرک اکھ نۆو دور تہ نوِ اندازچ وتھ گاشراوان۔یہ کتاب چھیہ واریاہو پہلوو کنۍ اکھ تواریخ رقم کران۔سنسکرت دورہ پتہ چھہ طبی ساینس گۄدنچہ لٹہِ  کاشرِ زبانۍ منز بارسس یوان۔کتاب چھیہ نہ محض ساینسی مضمون، بلکہ میڈیکل ساینسک فنی تہ ادبی ورتاو، یعنی ساینسس تہ ادبس چھہ گۄدنچہ لٹہِ کاشرس منز میل سپدان۔ میہ چھہ نہ پتاہ ز بدل کنہِ زبانۍ منز چھا یتھ ہیو کانہہ کارنامہ انجام اومت دنہِ، مگر کاشرِ زبانۍ باپتھ آسہِ یہ اکھ یاد گار قدم۔یہ چھہ پزر ز باقی زبانن منز چھہ ساینسی نثر سیدِ سیود تہ ساینس فکشن بیترِ۔ مگر یہ کتاب نہ چھیہ نثری طور ساینس فکشن تہ نہ خالص ساینسی مضمون،بلکہ مخلوط ادبی صنفن منز تحقیقی ساینسک اظہار یس پانس منز اکھ بۆڈ کارنامہ چھہ۔ یعنی یہ کتاب ییژاہ ساینسی طور یا علاج معالج مثلاً نینوٹالجی لحاظہ اہم چھیہ تیژے چھیہ ادبی طور تہِ۔ پرن وول ییا گۄڈہ امہ کس ادبی جمالیاتس منز ہینہ کنہ ساینسی پزرس، یہ ژارن چھہ یہے مانچھ کھیتھ میچھر یا فایدہ ژارنچ ہش عمل بنان۔ سیدِ سیود ونہ بہ ز کتابہِ منز چھہِ بیک وقت تیتۍ پہلو اٹ کرتھ ز یس انہ تہِ لاگہوس،انسانی عقلہِ تہ شعورکۍ ساری حیس چھہ فیضیاب  سپدان۔ تبصر کرن وول چھہ اکس تتھس کاردارد معاملس منز ہینہ یوان ز سہ کتھ ہِوس پہلوس پیٹھ کرِ گۄڈہ کتھ۔

بچہ گی زچہ گی چھہ سانہِ سماجی زندگی ہنز بنیاد تہِ تہ اتھۍ اندۍ اندۍ چھہ سانہِ سماجک سورے عالم تہِ گتہ گیور کران۔ یہ یوتاہ ڈنجہِ آسہِ تہ تیژے چھیہ سانہِ سماج چہِ تعمیرچ ترقی تہِ ممکِن۔یۄہے موضوع ییلہ کتابہِ ہند مرکزی موضوع آسہِ تہ امچ افادیت چھیہ پانے ولمنین کھسان۔سہ تہِ ییلہ بچہِ سندس بنیادی صحت تہ نشو نماہس متعلق ناگزیر موضوعن پیٹھ مبنی آسہِ ،تیلہِ چھیہ کتاب پرنۍلامحال تہ ناگزیر بنان۔

کتاب چھیہ موضوعی طور گۄڈہ انوارِ زا بچہ سندس بنیادی نشو نماہس متعلق یمۍ سنز بنیادی ضرورت برسٹ فیڈنگ چھیہ تہ امہ حوالہ چھیہ ماجہِ ہندِ دۄدچ جزوی طور افادیت ویژھناونہ آمژ ۔ ماجہِ ہندِ دۄدچ آگر وزنۍ، ماجہِ ہند امہ حوالہ برتاو، امچ بچس باپتھ ضرورت، تہ یہ دۄد وزنکۍمرحلہ، تہ اتھ سٟتۍ مختلف لاحق لاپرواہی تہ امکۍ فوری نتیجہ۔ باقی آلٹرنیٹو غذاہس سیتۍ امیک موازنہ۔تہ ماجہِ دۄدچ اکھ ساینسی زان بیترِ چیزن پیٹھ چھہِ الگ الگ ستھ سبق درج ۔یم پٔرتھ چھہِ ماجہِ دۄدس حوالہ ساری چیز پرن والس آسان پاٹھۍ سمج یوان۔یہ زن میہ گۄڈہ تہِ وۆن،کتابہِ منز چھہ تمن تمام شک و شبہاتن تہ مختلف توہماتن یم اکھ صاب بیاکھ صاب مختلف علاجہِ معالجس متعلق یاتہ پانے تھران چھہِ یا  پھہلاوان چھہِ، تہند علمی تدارک چھہ لکھارس گۄڈے ذہنس منز شدتہ سان اوسمت۔مۄمہ دامس متعلق تہِ چھہ مختلف شک و شبہاتن ورن آمت تلنہ۔ زابچس یم بیمارِ اچھہ مژراونہ پتہ لاحق سپدان چھیہ یا سپدنک خطرہ روزان چھہ،کتابہِ منز چھہِ تمن سارنے حوالہ سبق درج۔نیو نیٹل جانڈس،تھایرایڈ،معدکۍ مسایل،اندرمن ہندۍ مسایل،تہ بچہِ سندۍ مختلف جسمانۍ دادۍ تہ تہنز کنسلٹیشن۔ دوا، پرہیز ویکسنیشن بیترِ چھہِ آسان پاٹھۍ سمجھاونہ آمتۍ۔

چونکہ بچہِ چھہِ جسمانۍ بیمارین ہنز لاپرواہی سیتۍ سیتۍ ذہنی تہ نفسیاتی بیمارین منز تہِ وارہ وارہ ہینہ یوان تہ یہند رد عمل پتہ ہنا بۆڈ گژھتھ نۆن چھہ نیران۔ تہ یمن بچن ہنزن نفسیاتی بیمارین متعلق چھہ سانس سماجس منز اکھ بدلے رجحان تہ نا ہنجارۍ والدین تہ شرس اندۍ پکھۍ باقی لکھ چھہِ یمن بیمارین حوالہ سہ عجیب برتاو ورتاوان ز بچہِ سندس ذہنی نشو نماہس چھیہ خبر کیا ادرہ کھل گژھان تہ نتیجاً چھہ امس شرۍ سند سورے مستقبل داوس لگان تہ سون سماج چھہ چھۄکہ لد گژھان۔ گامن گٹھن منز چھہ یہ روۍ یہ عام۔ یم حادثات چھہِ اکثر بیشتر گرن منز سپدان۔ ڈاکٹر شوکت شفاہن چھہ پانہ گامچ زندگی زومژ، سہ تہِ اکس حساس فرد سندۍ پاٹھۍ،اۄ مۄکھہ چھہِ تس یتھۍ کردار تجرباتی طور ویدۍ۔ تہ ڈاکٹری تہ نفسیات پٔرتھ چھہ یمن نفسیاتی بیمارن ہند تجزیہ تمۍ تمہِ آیہ سۆرمت تہ ژیونمت تہ کتابہِ منز بوومت ز صاف پاٹھۍ چھہ عیان سپدان ز طرز کیا چھہ تہ مرض کیا چھہ۔ امہ لحاظہ چھیہ کتاب نہ صرف باقی طبی ماہرن خاطرہ اہم بلکہِ چھیہ والدینن سیتۍ سیتۍ ہٹہ مٹہ اکھ صاب بیاکھ صابس تہ بتہِ ٹیں ٹیں گامہ ڈاکٹرن تہ سانین وۄستان باپت پرنۍ سیٹھہے ضروری۔ وۄستادن ؤنتھ پیوم یاد ز کتابہِ ہندۍ واراہ سبق چھہِ تدریسی نصابہ باپتھ سیٹھہے موزون، تہ وۄستادن چھیہ سارے کتاب پرنچ اشد ضرورت۔سرۄٹل،چسکہ،پراہ،نہ بوزن،ٹیندۍ کھاو،گراے،مانتھر دِتھ۔طرز عمل،نفسیاتی بیمار تہ جنس، ڈایالیکٹل بہیویرل تھراپی، لسانی نفسیات،زبان ہیچھنۍ،چور کول تہ پھۆپھ،کجر،پھپھیر بیترِ چھہِ تم سبق کتابہِ منز یم بطور خاص وۄستادن پرنۍ سیٹھہے ضروری چھہِ۔لہذا چھیہ گۄڈہ انوارِ ترین ادارن باپتھ یہ کتاب لازم ملزوم۔اکھ میڈیکل ساینسک پیڈیارٹک شعبہ، دویم گۆو محکمہ تعلیم تہ تریم گۆو نفسیاتی ماہر۔

وچھوے تہ کتابہِ چھہِ زہ حصہ۔ اکھ چھہ زاشرین ہندین جسمانۍ دادین ہندِ حوالہ تہ بیاکھ چھہ نفسیاتی بیمارن ہندِ حوالہ۔ڈاکٹر شفا شوکتس چھہ امہ کتھہِ ہند سرون مطالعہ ز اکثر دادین ہند آگر چھہ نفسیاتی ادرکھل یتھ  یتھ پیتھلاجکل ڈس آڈر ونان چھہِ ۔یہ ڈس آڈر  یوتاہ ذاتی طور انسانہ سندس ذہنس منز پلان چھہ تیوتے چھہ اتھ منز سماجی ویوہار تہِ گۄڈہ زمہ دار تہ پتہ امہ کہ مناسب تدارک بجایہ بعضے وتہ راوک تہِ بنان۔ لہذا چھہِ لکھارۍ یم دۄشوے چیز اکھ اکس سیتۍ تمہِ آیہ لازم ملزوم بناوتھ پیش کرۍ متۍ ز اکھ مکمل صورتحال، نتیجہ تہ حل چھہِ آسان پاٹھۍ برۄنہہ کن یوان۔کتابہِ منز ام طریقک ورتاو چھہ آبزرویشنل ساینٹفک ٹریٹمینٹ رنگۍ برۄنہہ کن یوان۔یہ پہلو چھہ کتابہِ پرتاثر تہ کارگر بناونک اکھ کارگر جز۔ ویٹھۍ پوٹھۍ پاٹھۍ ونو ز کتاب چھیہ میڈیکل ساینس رنگۍ کاشرِ زبانۍ اکھ مۄلل گلہِ میوٹھ۔

کتاب چھیہ نثری مۄاد تہ یہ مواد پرتاثر تہ دلچسب بناونہ باپتھ چھہ لکھارۍ کینژن اہم ولن تہ ہۄنرن ہند وسیلہ پاننومت۔ڈاکٹر شفا شوکت چھہ وادی تہ سانہِ ملکک اکھ قابل ترین نینوٹالجسٹ۔ امس چھہ امہ  رنگۍ اکھ زبردست ریسرچ یس عالمی سطحس پیٹھ ماننہ تہ زاننہ چھہ یوان۔کتابہِ منز امیک باس دنہ علاوہ چھہ شفا اکھ معتبر کاشر ادیب،شاعر تہ کاشرس ادبس پیٹھ چھکھ دسترس حاصل تہ اسلیے چھکھ شعوری ادب بناوتھ کتاب لیچھمژ۔ چونکہ شعوری ادب چھہ ہمیشہ مقصدیتس تابع آسان مگر ادبک پنن جمالیاتی حض چھہ اتھ منز لازما رژھرن جایز۔امہ رنگۍ تہِ چھیہ کتاب دلچسپ۔امہ کتابہِ ہند لبہِ لباب چھہ سانس سماجس اندۍ پکھۍ نژان۔کاشرِ سماجک اکھ داتھر، اجتماعی سوچن تراے،تمدن،کتابہِ منز پنن کلہم مزاج ہیتھ ورتاوتھ چھہ  مواد آپراونہ آمت۔ادبس سیتۍ چھیہ تخیلی پژھ وابستہ آسان،مگر حقیقت کس تجربس تخلیقی آکار دین چھہ فن۔ یہ چھہ کتابہِ ہند بیاکھ دلچسپ رنگ۔

کتاب چھیہ اکھ مخلوط صنف تہ فنی طور چھہِ اتھ منز واریاہ اہم پہلو۔ کتابہِ منز چھہ گۄڈہ سبق کہانی،افسانہ، ڈرامہ یا انشاییہ ہندۍ پاٹھۍ وۄتلان، پرن والس چھہ نہ پے لگان ز سہ کپارۍ چھہ ساینس کس طبعی علمس منز وارد سپدان۔کردار چھہ  زندہ جاوید تہ  بیہ شونکۍ پاٹھۍ پرن والس مکالماتی ہانکلہِ تہ واقعاتی پزرکہِ سدرہ منزۍ تارتھ ساینس کس جزیرس واقف کرناوان۔اتھ کتابہِ منز چھہ بیشتر پاٹھۍ مزاحک پہلو غالب۔ سماج کین اکثر طایفن تہ کارندن چھہ تتھہ پاتھۍ طنزک خنجر اومت لاینہ ز گونژھہِ تلۍ چھہ اسن پھٹان تہ اتھ روۍ یس منز چھہ ڈاکٹر شفاشوکت بے باک  تہ غیرجانبدار  تہِ ز پانۍ پانس تہِ چھن نہ بخشمت۔

کتابہِ منز چھہ پرتھ شایہ بیمار تہ بیمارس متعلق عام سماجک عمل دخل بطور  ایرن  پیش آمت کرنہ۔ امہ علاوہ چھہ تمن سماجی رسمن تہ بدعتن ہند تہِ صورتحال پیش آمت کرنہ یم اکثر جسمانی تہ نفسیاتی بیمارن ہندِ باعث چھہ بنان۔اتھ چھہ اکس ڈرامایی منظر کشی تحت ورن آمت تلنہ۔امہ سیتۍ چھہ  سانہِ سماجی نفسیاتک تہِ تعین سپدان۔ سانس نفسیاتس پتۍ کِنۍ یس سماجی وجہ  چھہ سہ تہِ چھہ کتابہِ منز شدتہ سان پیش کرنہ آمت۔کتاب پٔرتھ چھہ یہ احساس  پرن والس وسہِ گنان ز ڈاکٹر شفاہس چھیہ واریاہن علومن پیٹھ نظر تہ بچہِ ڈاکٹری علاوہ سایکالجی تہ سایکیٹری ہند اصل مطالعہ۔

زبانۍ ہندِ لحاظہ تہِ چھیہ کتاب بے حد دلچسپ۔ شفاہن چھہ مرازۍ لہجہ ورتومت۔ یم کردار وۄتلاونہ آمتۍ چھہ، تہنز زبان چھیہ فطری۔ تم چھہِ پننہِ زیوِ بولان نہ کہ ڈاکٹر شفا سنزِ۔مکالمہ نگارۍ ہند فن چھہ کتابہِ منز پھٹۍ پھٹۍ نیران۔ واقعہن،کردارن ہنز زبان چھیہ خۄد زاو۔ کتابہِ منز چھہ کاشرین محاورن تہ لسانی ٹرمنلاجی ہند خاص تہ موزون ورتاو آمت کرنہ۔لسانی اعتبارہ چھیہ کتاب کاشرِ زبانۍ ہندِ خاطرہ امہ لحاظہ تہِ اہم تکیاز میڈیکل ٹرمنالجی چھیہ کاشرین اصطلاحن منز پھرنچ برپور کوشش کتابہِ منز درینٹھۍ گژھان۔اکثر چھہ لفظہ ترکیبہ  وچھتھ شفا سنزِ زبان دانۍ ہند اندازہ لگان۔سبقن ہندۍ دلچسپ عنوان چھہِ پرن والس گۄڈے مہتھ نوان۔ مثلاً منس پژھل گنس ٹینٹھ،پننین پییہ لاش تہ لکو کرۍ عیش، طمع تہ تموک،ٹھسہ کاکھ،سرۄٹل،کرکچ مہل،گراے، داندہ کلہ، شکہ پراہ،گلہ فورجی،وچھہ پھہہ،اتھہ زہر،چھۆت کیوم۔۔ہوۍ محاورہ تہ لفظہ ترکیبہ چھیہ نہ صرف مقامی معنی مزاجہ رنگۍ استعمال سپزمژہ بلکہِ چھیہ یم ساینسی تہ طبعی مناسبت کس معنی یس منز تہِ فٹ کرنہ آمژہ یس لکھارۍ سند زبانۍہندِ ورتاوک کمال چھہ ہاوان۔کتابہِ منز چھیہ کلہم زبان پرتاثر تہ فنکارانہ۔کہانی ین منز ڈرامایی لہجہ تہ باقی ساینسی مضمونن منز تاثراتی تہ سخت پسندی رۆس سلیس تہ عام زبان چھیہ پننۍ چاشنی ہیتھ ورتاونہ آمژ۔ پیٹھہ اختصارس  تہ فوری کلایمکسس کن دو،یہے گیہ نثرچ زبان۔ڈاکٹر شوکتس چھہ سمعی لسانیاتس سیتۍ سیتۍ باقی لسانیاتک تہ امہ کہ تواریخک تہِ مطالعہ۔

کتابہِ ہندین سارنے پہلوون پیٹھ کتھ کرنۍ چھیہ نہ یتھ مختصر وقتس منز ممکن، مگر بہ بانگہ دۄہل ونہ بہ ز یہ کتاب چھیہ والدینن، وۄستادن، ڈاکٹرن علاوہ پریتھ کاشرۍ سندِ باپتھ مشعل راہ تہ شاندس پیتھ تھاونس لایق۔