ریاض ربانی

(1)
اتی لیکھہ ہا بہ نعتچ اکھ رباعی

یمن فکرن خیالن دور ترٲوتھ
گۆژھم انمول اچھرن ہند انبار
تہ سنہرۍ میل گٔژھ آسنۍ بدس میہ
قلم گۆژھ نورہ بۆرتے ہیرِمیہ واتن
تہ کاغذ عطرِ ہند پیمانہ آسن
زبان گٔژھ میٹھ آسنۍ مانچھ ملوِتھ
لفظ بے معنہ گژھۍ بامعنہ سپدنۍ
شبس گۆژھ نورہ نبہ کُے گاش آسن
بہ نیرہا لۆب تہ گژھہا جایہ تنہا
اچھن گۆژھ اۆش بدن لرزیدہ آسن
میہ گۆژھ دیدن فقط نادیدہ آسن
بلالنی لے، اویسنی دگ بہ رٹہا
ذنونن جوش گۆژھ عشقس میہ آسن
میہ گژھۍ جامی تہ سعدی سیتی آسنۍ
خیالن نعت گۆژھ عنوان آسن
مگر لرِ لۆر میہ گۆژھ حسان آسن
اتی لیکھہا بہ نعتچ اکھ رباعی

(2)
واوس اتھہ رۆٹ

راتک تامتھ سأرے بستی
خواب گہن منزخواب سجٲوتھ
پننین ٹاٹھین سیتۍ گنداں ٲس
مہرینہ مٲنز اتھن پیٹھ
مہرازن دستار کلن رنگناواں
لۄکچین کورین بٲتھ وٹھن پیٹھ
شرۍ ٲسۍ آساں مانچھ گنن پتہ
میچھر سۄمبراواں ٲسۍ
تامتھ کلہ کۆڈ اۆبرہ درینٹھاکن
وزملہ بییہ گگرایہ تہ رودن
یمہ سیتۍ زندے دۆد اسمان
تمہ پتہ پیۆو ارمانن ڈوٹھ
واون پکھہ وہراوِ ژۄپاسے
دراو تہ وٲجن پہرین ژھیے
انہِ گٹہِ مظلومن گۆو کھش
معصومن پیۆو روتلہِ تاون
بسکینن روو ناو تہ ایڈرس
وجہ واون کۆر زٲنتھ مٲنتھ
شہرس گامس آلین ناش
کتجہ بچن تے جاناوارن
پژھ رٲو پگہچ
پۆز اتھ منز اوس سون قصور
اسہ کۆر پانے واوس اتھہ روٹ

(3)
بہ کیا ونے ژیہ بہ کیا وچھاں چھس

زمینہِ پیٹھ چھس نظر بہ تراواں
تہ آسمانن گزر کراں چھس
بہ تارکن سیتۍ گندِتھ یواں چھس
میہ زون باساں چھیہ رٲومژ ہش
تہ آفتابک تژر تہِ ژالاں
وڈو کراں چھس بہ سیتۍ  باجن
تہ سٲر کراں چھس بہ بالہ تھۄنگین 
بہ جانوارن زباں دواں چھس
بہ پونپرنۍ گتھ کران شمعہس
تہ لولہ رٲژن دزتھ پیواں چھس
ہرتھ پیواں چھس زرد پنکۍ پٲٹھۍ
میہ سوچہ سدرس تہِ کُھر یواں چھم
تہ کایناتس بہ گریند کراں چھس
گہے بہ پانس منزے شرپاں چھس
بہ راونس منز گژھان رٲوتھ
بہ شین سپدتھ گلتھ گژھاں چھس
تہ آب سپدتھ ششر بناں چھم
میہ تۆر نہ فکری مگر تمن ہند
یمن بہ آدم زاد وناں چھس
تمے چھہِ ابن الوقت زمانکۍ
بہ کیا ونے ژیہ بہ کیا وچھاں چھس

(4)
خونہ سرۍ خواب

کُلۍ لنجہ پیٹھ چھہ
پھرٹُل کوتر  پھرکان
کلس تہِ چھیہ شانشرارے
پنہ وتھرن چھیہ تھرہ تھرہ
واو چھہ دم پھٹۍ
کۄلہِ ہند آب چھہ نہ پۆت نظر تہِ دواں
تہ پوشہ ٹورین پھۄلن مشتھ گۆو
کُلۍ گۄڈس تل چھہ
کمۍ تام سند خواب
خونہ لِتھوتھ لاشہِ لیوان

(5)
خریدارے نہ کانہہ

وۄسہ درۄسہ چھیہ طییس پیٹھ
دکان دارو چھہِ دکان سجیامتۍ
ریڈِ والۍ چھہِ کریکہ دی دی
پننس مالس خریدار ژھانڈاں
لکھ چھہِ یواں، ہیواں تہ کناں
میہ تہِ وٲژ اکھ وٲنس
پنن کھنڈۍ پھٹ وجود ہیتھ
بازرس منز پراراں
پوز کانہہ چھہ نہ میہ کن نگاہ تہِ کراں