(محبوب گلزار (اننت ناگ
بہ چھس آبہ آگر ژہ پنہ داو ہش کۄل
ژٔجکھ میانہ کۄچھہ منز بنتھ واو ہش کۄل
گیکھ غیب تاپس لجکھ وارۍ داتس
وۄتھے تپھ بخارک رلییکھ ژہ آبس
ژھیۆنے پان پکۍ پکۍ مژی کایناتس
گہے جنگلن منز، گہے شہرِ خاصس
گہے قطرہ آبک پچکھ ناو ہش کۄل
بہ چھس آبہ آگر ژہ پنہ داو ہش کۄل
گہے ششرہ ماسو کۆرے تیرِ منز وٹھ
گہے گرشمہ سیتی ژیہ آیی کنی لٹھ
پییکھ تیرۍ کھیلۍ سے بنتھ ژٕے کنی ترٹھ
کۆرتھ عام و خاصن ژیہ گگرایہ ہند پھرٹھ
دژتھ ٹانگہ پکۍ پکۍ ژہ چھیکھ گاو ہش کۄل
بہ چھس آبہ آگر ژہ پنہ داو ہش کۄل
گژھاں غیب چھیکھ منزۍ یمن گریسۍ باین
پیواں بٲرشاہ چھیکھ تمن دور جاین
زمیندار ساری وچھم سینہ واین
تلاں چھیکھ لڑٲیا امے آبہ باین
کراں تریشہ کامن ژہ پتھراو ہش کۄل
بہ چھس آبہ آگر ژہ پنہ داو ہش کۄل
بخارات بنۍ بنۍ ژلاں چھیکھ میہ ترٲوتھ
کۄہن بالہ نے چھیکھ دواں شین دٲرتھ
یواں جنگلن چھیکھ پۄشاکھا ژہ لٲگتھ
مگر یورۍ واتکھ پلن پونۍ چھٲوتھ
رلکھ لہرہ نے سیتۍ ژہ ٹکراو ہش کۄل
بہ چھس آبہ آگر ژہ پنہ داو ہش کۄل
ژیہ کِژ کۄل چھیہ محبوبہ بٔڈ اکھ نصیحت
چھیہ کۄل چانہ سیتی، سمندر چھہ قدرت
کۆرکھ پیدہ ذاتن تہنز چھیے ژیہ منت
کراں گژھ محبت، یتُے چھے ضرورت
مۆکر پان پننے، ژہ کھرکھاو ہش کۄل
بہ چھس آبہ آگر ژہ پنہ داو ہش کۄل
زمرے:شاعری
کاشر ادبی رسالہ نیب 