اعظم فاروق

(1)
قندہ قارۍ نظم   

گیہِ بانگ مشیدن
ژاے گۄپھن منز شال وُنگتھ
ژیپراے کٔرتھ
ہونیو وُٹھ  کٲر تہ شۆنگۍ صبحے
ؤژھ سدرہ ژکس تل ہانگنۍ واپس فیض رٔٹتھ
بییہ تُلہ پن کھیتھ پیۆو پاٹۍ کیمس تہِ  امانتھ دیُن
کرچ گۆو، پیۆو زون کھینے برخاک سہ ژینگل شرز
لۄتہِ پٲٹھین سُرہ بنہِ منز کھژ نارہ زژا ہیۆر کن
پنہ وتھرن پیٹھ لج گندنہِ حبابچ خاموشی
بییہ ویتھہِ بٹھۍ بٹھۍ تۆرلٹ گلناواں پادر سہہ
کریژھ نالہ کڈتھ وژھ پھریکہ ہژ ناگنۍ ناگس کُن
دۄدہ ہیڈرس اندۍ اندۍ لوسہِ تیتھے نیو پان ؤلتھ
ہُتھ بالہ تینتألس پیٹھ  ییلہ سرین تروو قدم
ہندِ فونسس پیٹھ وہیکک لوہ ٹیۆک چمکنہِ لۆگ
مٔژ واوہ رنگا وژھ دۆدمت سینہ میہ شہلوون
اسمانس پیٹھ گیہِ میانہ گمانچ سۄنزل ننۍ
ییلہ لنجہِ پتہ لنجہِ پھیرتھ
لج گیونہِ سۄ رنگہ کتج
لج زیر میہ منہ کس سدرس
شوقک ساز گریزیو
لگۍ بولنہِ یاہو کوتر لوگکھ رقص کرن
بییہ وۄٹھ تج گاڈِ  شکٲرس اندری دل تنبلیوو
ژۆل آرہ پلن نیجار تہ ڈیکہ پھۆل رنبۍ آرس
گرِ درایہ سۄ مٔژ تہ میہ گوشن گۆو پازیبک شرۄنۍ
وژھ یارہ بلس کُن ترٲوِن ییلہ مدماتۍ قدم
کٔلۍ طوطہ سپدۍ بییہ ژھۄپہ گیہِ شورش انگیزن
تھۆد وانس پھالو تل کھارن، شرنز گرموون
رٔٹ تُور اتھس کیتھ چھانن لٲگن طاق گرنۍ
دژ جوشہ ونِس تندورس کاندرۍ آبہ لوا
میہ تہِ لٲج گرنۍ طاقس پیٹھ اکھ قندہ قارۍ نظم

(2)
گراو

یہ کژھ عجیب خامشی
تچھتھ نوان چھیم وچھس
یہ کیتھ پھریکل سمے چھہ ون
کراں میہ شانشہِ ہتۍ سوال
یہ کیا سیاہ خواب زن رقص کران
اچھن اندر
وجودہ کس انگس انگس دِواں چھہ کیاز ژپۍ ہوس
وساں چھہِ سونچہ سدرہ کس ژٔکس وۄں خوفہ ہتۍ خیال
گمانہ کس مسافرس کراں سفر چھہِ ٹسنہ ہی
دٕیان  کیاز آسماں
ودان کیاز اۆبرہ لنگۍ
بریہان کیاز آرہ پل
اسان کیاز پوشہ پھتۍ وچھتھ  چھہ از ژینگل ہوا
رٕڈتھ  گمتۍ چھہ کیاز تاپہ ٹیکۍ  میہ ون
گۆمت چھہ کیاز زونہِ از سیاه رنگ
تہ شاپھ ہیو چھہ کیاز تارکن بہتھ
یہ ویتھ وۄزج چھیہ کیاز گراڑ ہی کران شامن
مشالۍ ہیتھ بیہ وایہ سانہِ کوچہ کنۍ
ؤلتھ سیاه پوشاک کُس سنا نژاں چھہ راتھ کیت
یہ پأز بونہِ پیٹھ کمچ دواں چھہ ژینہ ون
میہ ون
یہ کُس سنا
ننگے سیاہ رأژ منز
کنگے کران کونکلن
یہ کیاہ دزاں تہ دُہہ یہ کیُتھ وۄتھاں چھہ آنگنس اندر
قلم کہنز سنا لیکھاں وجارہ ہژ یہ داستان
لفظ لفظ کران کیاز گراو از چھہ راقمس
ورق پھرتھ چھہِ کیاز کربلکۍ صدا گژھاں کنن
وچھس اندر تینگل میہ کیاز چھم وہان
وراگ کیاز چھم تلاں یہ رازہ بل
ژۄپاسہ کیاز بس سیکلۍ سراب نظر چھم گژھان
یوان کونہ اند کانہہ میہ اتھۍ چھہِ دایرس متیا

(3)
میہ چھہ یاد سہ دۄہہ

نۆن اۆبرہ لنگیو منزۍ سری یہ سپد
لوہ ٹیکۍ  باسان ٲسۍ لعل و گہر
قمریو، کستوریو، رنگہ کتجیو
ہیتۍ  پوشہ تھرین پیٹھ نغمہ گیونۍ
کستاں مۆت، مست ملنگاہ ہیو
چانین پدۍ آکھن اوس سنتھ
کستام سخنور اوس دوان
آلو ویتھہِ بٹھۍ بٹھۍ پاک روحس
گامکۍ اڈۍ شرۍ ٲسۍ  ژھیپلہِ گندان
اڈۍ سران کران
اچھہِ دارِ تہِ وژھہ مژہ  یارہ بلس پیٹھ آسہ نٹین منز پونۍ بران
شوبان سیٹھاہ بییہ ٲس شہج ببہ گٲمۍ وُڈر
تتھ ٲس پھلتھ آمژ
چانین رخسارن ہش
بادام پھلے
بمبورس آلو ٲس کراں
امہ کُکلہ مزارچ یمبزل
ٹنگ پوشن پیٹھ
تُلرین ہند گئں گئں اوس متس ستہ زاوۍ خیالن نندرِ تلان
ھو پرناواں
روح وزناوان
تتھہ پٲٹھین ٲس
ہرمۄکھ بالس پیٹھ ماگچ سۆژ شنہ ژادر
وۄلرس عکساوان
اچھ ناٹہ کران
زن صحراوس اندۍ اندۍ طمہکۍ گل ٲسۍ پھۄلان
تژھ سونتہ ہواون خوشبو ژٔھٹ
گۆو سونچ معطر میون
تہ بییہ
یمہ آنگنۍ نیرتھ رٲسے میانہ منچ ٹکہ واوج وپھنٲون
باوژبل منزہ کھتۍ تازہ سخن
دلہ کس دروازس دستک گۆو
کھرۍ دار خیالن تمہِ ساتن گنڈ مژرنہ آو
ییلہ براندس پیٹھ مژۍ مستہ لٔٹھس سوژ گراے دژتھ
میہ چھہ یاد سہ دۄہہ