ارشاد ملک

ہے وقتا تلہ سا لۆت لۆت پکھ
سۆت سۆت پکنس میہ عادت چھے
ونہِ شۆنگس نہ کنہِ ونہِ وچھم نہ خواب
ونہِ سیکہِ صحراون ژھارن آب

ونہِ راتک اخبار پرنے چھم
ونہِ پھٹمت پینسل گرنے چھم
اتھ پرٲنس دۄدرس نقشس منز
ونہِ رنگ خیالی برنے چھم
ہے وقتا تلہ سا لۆت لۆت پکھ
ونہِ شۆنگس نہ کنہِ ونہِ وچھم نہ خواب

ونہ کنڈۍ چھہِ اندۍ پکۍ پوشہ تھرین
ونہِ پٲز چھہِ زاگان رنگہ ژرین
ونہِ اند کن اولا ییرن چھم
ونہِ نار دنے چھم رنگہ لرین  

ونہِ کفن ولن چھم منصورن
ونہِ تریش دنے چھم مقہورن
مجنونن فاتح پرنے چھم
ونہِ ساتھ دنے چھم مجبورن

ونہ سر میہ سریک سرنے چھم
ونہِ روزہ میہ فرضچہ درنے چھم
چھم داغ وجودس گنہن  ہندۍ
پھٹمتہِ دِلہ توبہ میہ کرنے چھم

ونہِ دل چھم رچھنے رنجورن  
ونہِ چارنہِ تارہ چھم  سنطورن
ونہِ چمنس بیول میہ وۄونے چھم
ونہِ ٹھرۍ یلہ تراونۍ محصورن

ونہِ تبرریز ژھارنۍ طرفاتن
ونہِ مرثی لیکھنۍ سقراطنۍ  
کیازِ ترٲوکھ کاشرۍ طرح تہ لے
ونہِ گراو کرنۍ چھم گنماتن

شروکۍ شیخ العالمنۍ اتھہ موران
لل دیدِ ہندۍ واکھ چھم دل کوران
ونہِ کاشر  بے یار  تے  لاچار  
انہِ گۆٹ چھہ ییتہ، چھہ نہ کنہِ نوران

ونہِ سیتا ژھارنۍ جنگلن منز
رام ژندرنہِ مدتک کرن چھم سنز
ونہِ راون راکھس تختس پیٹھ
ونہِ انصافک ییتہ فقط چھہ کرنز

ونہِ   ژورم   کرنے  فریادس
ونہِ اۆش چھم وۄتھرن ناشادس
یس سونتے ہردہ واون کۆر غیب
ونہِ ناد چھم  دین تس ارشادس
ہے وقتا آکھ  گٔر مہلت دم
ونہِ شۆنگس نہ کنہِ ونہِ وچھم نہ خواب