مظفر عازم

واریاہ چھم نہ ونُن۔ اوترہ وۆتھس سلی پہن۔ غبار اوسم، مگر تتھ کیا کٔریوم تہۍ۔ ژٹۍ تو یہ اتۍنے۔ سلی پہن وۆتھس، کافی پیالا دبووم۔ فون رۆٹم اتھس کٮ۪تھ تہ ہیۆتم میل وچھن۔ نوو اوس نہ کینہہ۔ نیب رسالہ کس ایڈمن سند اوس ایمیلا، تہ اتھ سٍتۍ اوس نہج رسالک اکھ پی ڈی ایف نقل۔ یہ اوسم وچھمت تہ شاید ڈاونلوڈ تہِ کۆرمت مگر لۆگس اتھ سارۍ سے ورق پھرنہ۔ سورے کۆرم خۅش، یا بنان چھہ کانہہ چیز ما آسیم اومے پہن تہِ باسیومت، ژٹۍ تو یہ تہِ اتۍ نٕے۔ أکس صفس پٮ۪ٹھ وچھِم شعر جورا۔ یم ییلہ پٔرم، مزے آم۔ اکۍ شعر ن دژنم زورے پہں زیٖر۔ سُہ بوزناوو تۅہہ تہِ مگر پتہ پہن۔

دپاں شعر پرکھاونکۍ چھہِ زہ شرط، اکھ یہ زِ شعر کرِ پران پران یا بوزان بوزان خۅش۔ نقادس پٮ۪ٹھ چھا یہ جٲیز کنہ نہ، تہِ ونن تم پانے۔ بیاکھ یہ زِ پرن/بوزن وول آسہِ پزی نقاد۔ سہ لاگٮیس فیتہ، دِیس نم، تہ مانڈ دتھ ونہِ پننۍ راے۔ (میانہ گام ٲسۍ ونان اوخن صٲبس اگر سلام کرو، سہ چھہ اژاں اندرمِس کُٹھس منز، کتاب وچھان، تہ تورٕہ نیرتھ ونان: وعلیکم صلام۔ صۅاد چھہ ونان سین بدلہ یُتھ زن عٲلم ییہ بوزنہ۔ اکہ زمانہ اوسس بہ تہِ شٲعری پران، منزۍ منزۍ تنقید تہِ۔ مگر پننہ جایہ ییلہ بہ شعر پران/بوزان چھس، یہ پننۍ دۆیم لٔٹ چھیم روزاں پتھ کُن۔ شعرُک موٗڈ، مزازٕہ، لفظن ہند آوازِ تہ معنی حسابہ ستریر، تہ کلہم معنی سنیم تہ گژھہ خوش تہ شعر روزیم یاد، نقاد ونٮ۪م، ہے یۆہے ہا گو تنقید۔ دِیو پانس گۆش۔ کانہہ فنکار چھنہ تخلیق پوٗرٕ کران۔ سہ چھہ ہیۆچھمت منساوان، سۆرمت چھس گژھاں سرۍ پیٹھۍ تہ چھہ پھرُکان۔ عام پرن/بوززن وٲلۍ تہِ چُھہ آساں کیا تاں سۆرمت پننۍ پٲٹھۍ، اگر فن پارٕہ ستۍ تتھ زیٖر لگٮیس تیلہ گیہ تمۍ سندِ خٲطرٕہ تخلیق مکمل۔ مگر صرف تمۍ سندِ خاطرہ۔ دۆیمس کانسہ بوزن وٲلس چھہ پننۍ پٲٹھۍ یِموٕے ویتھو ییرہ وسُن ادہ گژھٮ۪س فن پارٕہ مکمل۔ میٲنۍ کنۍ چھہ فن پارٕہ پننہ سٲلم شکلہِ منز، بلکہ دپو پننین سٲلم شکلن منز فنکار تہٕ قٲری ین(یعنی پرن/وچھن/بوزن والین) ہند سرۆگ محشر آساں۔ اوے ما آسہِ اکے تخلیق اکِس باساں کیاہ تام تہ بییس کہیں نہ۔ جان گوو نا کتھ ژھۆٹراوو، تۅہہ بوزناوو شعر ۔ اگر کھریو تہ شٲعر بہ ہیتھ، اگر ویو تہ شٲعر بہ ہیتھ ۔ شعر چھہ:

ناوِ نمس پٮ۪ٹھ کُن زۆن اوسس
اسہٕ ونہ ہۆنجہ وچھنم درۍیاون

پۆت منظر چھس:

کمۍ سنز شیچھ ونۍ صبحکۍ واون
پوش پھلِم دلہ کین صحراون

بہ کیازِ ونو شعر کمۍ سند چھہ، ژھانڈِو رسالہ نہج، جلد 3، شمارہ 4 ۔ اتھ رسالس منز چھو واریاہ لال تہ مال۔