مسرور مظفر

کُنہِ تہِ زبانۍ ہند تخلیقی ارتقا چھہ تمہِ زبانۍ ہنزِ علامتی تعمیر کاری پیٹھ درتھ آسان۔ علامتن ہند تنوع آسن چھہ اکہِ تخلیقی زبانۍ ہنز بہترین مثال۔ اکھ بہترین شاعر چھہ اتھۍ علامتی دنیاہس منز زوان وۄتھان بیہان تہ یموے ذریعہ پنن تخلیقی دنیا وونان تہ اظہار کران، چوں کہ تخلیقی زبان چھیہ لسانی اشارن پیٹھ مبنی آسان وۄں گۆو ادبی علامت نگاری  چھیہ ادبس منز بدل نوعیت آسان ییتہ چھہ شاعر  شعوری تہ غیر شعوری طور تمے علامژ ہیتھ برونہہ کن یوان یمہ تسندین جذباتن سیتۍ منسلک آسنس سیتۍ شعری جذبس شدت پیدہ کرنس منز مدد کرن۔ عام زبانۍ منز اشارن ہند دایرہ عمل چھہ فقط اشارن تامے محدود آسان لیکن ادبی علامت چھیہ اکس سادہ نشانہ نش بالا تر آسان۔ علامت چھیہ اکھ مخصوص تصور ہیتھ برونہہ کن یوان۔ علامتن ہنز ترتیب چھیہ عموما تری٘ن چیزن پیٹھ درتھ آسان۔ اکھ گۆو لفظ تہ معروض، دویم گۆو معروض تہ مشاہبت تہ تریم گۆو معروض تہ امیک تصور، یمن تری٘ن ہند سنگم چھہ علامت بارسس انان۔ کولرج نہِ مطابق چھہ اکھ عام تصور علامژن ہندِ ورتاوہ سیتۍ بلند ترین شکل رٹان۔ علامت سازی چھیہ نہ فقط شاعر سند کلام موثر تہ زور دار بناونس منز مدد کران بلکہ چھہ امہ سیتۍ تخلیقہِ ہند لسانی پہلو رنگ تہ آہنگ اختیار کران، سیتی چھہِ لفظن ہندۍ معنوی امکانات تہِ وسعت لبان۔ اکھ لفظ لغوی تہ روایتی معنی یس منز نیبر کڈن تہ اتھ معنوی سطحس پیٹھ وسعت دنۍ چھیہ علامت  سازی ہنز بنیادی کٲم، یہ کرنہ سیتۍ چھیہ اکھ زبان اظہار چہِ نوِ نوِ وتہ تلاش کران تہ تخلیقی عملہِ منز کامیابی پراوان۔ ادبس منز چھہ شاعر اکثر تمی وزِ علامتن ہند استعمال کران ییلہ تس نش بییہ کانہہ وتھ  آسہِ نہ، کانہہ نۆو تصور یا خیال پیش کرنس منز۔ یہ کرنہ سیتۍ چھہ تسند خیال شعری تجربہ شدت تہ ابہام رٹان۔ شعری ورتاوس منز یہے ابہام پیدہ کرن چھہ تس اعلی تخلیق کار بناوان۔                   

کاشرِ شاعری ہند دسلاب گﯙو ژۄداہمہ صدی منز ییلہ لل دیدِ واکھ تخلیق کرۍ۔ تخلیقی سوتھرس یتھ ہیو آغاز گژھنہ سیتۍ چھیہ یہ کتھ عیاں گژھان زِ کاشرِ شاعری ہند ینہ  وول کال آسہِ باگہِ بورت تہ اطمِنان بخش ۔ کاشرِ شاعری ہندس پرتھ دورس منز چھہِ جان شاعر پیدہ گمتۍ یمو نہ صرف مختلف نہجن ہنز ترجمانی کرتھ کاشرِ شاعری ہند دامن وسیع کﯙر بلکہ انفرادی سطحس پیٹھ پرووکھ جان مقام۔ موجودہ دورس منز تہِ چھہِ واریاہ کاشر شاعر پننۍ انفرادیت قایم کرنس منز کوشش کران، وۄں گﯙو واریاہ کم شاعر چھہِ تم یمہ تخلیقی سوتھرس پیٹھ پنن بدون اسلوب تہ طرزِ بیان پراونس منز کامیاب گے۔ یمن شاعرن منز چھہ شہناز رشید اکھ اہم ناو۔ شہناز رشیدنس عہد شبابس منز ٲسۍ یمن رحمان راہی ، امین کامل، رفیق راز، غلام نبی فراق وغیرہ شاعر برونہہ یمہ کاشرِ شاعری ہندۍ واریاہ تھدۍ ناو چھہِ۔ شہناز رشیدن کٔر نہ کانسہ تہِ شاعرس تقلید بلکہ  ژٲرکھ پننہ خاطرہ اکھ الگ وتھ۔ یﯙہے چھہ وجہہ زِ یہنزِ شاعری ہند موضوع چھہ بالکل نﯙو تہ تخلیقی سوتھرس پیٹھ سادر وار تہ نیرل۔ شہناز رشیدنِہ شاعری ہند بوڈ وصف چھہ یہ ز یم چھہِ آفاقی موضوعات مقامی رنگس منز پیش کران۔ یمن چھہ روایتی شاعری ہند علم مگر یہنزِ شاعری منز چھہِ نہ کنہِ جایہ روایتی لفظہ ترتیب، استعاراتی ورتاو درینٹھی گژھان۔ یہنز نظم کیو غزل چھہِ اندازِ بیان، استعارہ، بحرن تہ طرحن ہنز تازگی تہ موضوعاتو کنۍ بالکل نﯙو تہ وسیع۔  یہنز زبان چھیہ دوہہ دہچ زبان مگر معنہِ ساوۍ تہ ابہام برژ، یمن چھہِ نہ تجربہ باونہ خاطرہ لفظ پرہ پیوان بلکہ چھہِ یم تجربس شدت پیدہ کرنہ خاطرہ زور دار استعارن تہ علامژن ہند انتخاب کران بقول رحمان راہی:                            

"سہ چھہ اکھ تیتھ فنکار یس لفظن اندر تہ لفظنے ہندِ توسلہ پنن موضوع لبنچ تہ پاپرجا کرنچ کوشش کران چھہ۔  تمہ کے مطلب گﯙو ز تسندۍ لفظ کیو معنی چھہِ اکھ اکس اتھہِ انان، رنزناوان تہ رتھہِ کھالان باسان ”                   

﴿رحمان راہی  – دود کھٹتھ گلدانن منز﴾              

شہناز رشید چھہ اکھ مکمل علامت نگار یہنزِ شاعری منز وۄتلن واجنہِ علامژ چھیہ اکس سنجیدہ فنکار سند پے پتہ دوان۔  یہنزِ شاعری ہند فکری پہلو تہ علامت سازی چھہِ یمن باقی کاشرین شاعرن نش الگ کران۔ کاشرِ شاعری ہند روایتی علامتی نظام اکے ساتہ پھٹراون تہ تمہ منز نیبر نیرن چھیہ نہ سہل کٲم۔ اتھ چھہ واریاہ وق لگان تہ بییہ چھہِ اتھ پتہ کنہِ کینہہ محرکات کارفرما آسان۔  اکھ  کامیاب روایت ساز تہ سادروار علامت ساز شاعر بننہ خاطرہ چھہِ زہ اوصاف واریاہ اہم اکھ گﯙو یہ زِ امۍ سند خیال گژھہِ زوردار تہ نﯙو آسن۔ دویم اگر خیال پرون آسہِ مگر تخلیقی سوتھرس پیٹھ چھہ امۍ سند جدت طراز آسن واریاہ ضروری۔ تیلی ہیکہ یہ نٔو روایت قایم کرتھ ۔ شہناز رشیدن خیال آرایی تہ شعری محاورہ چھہِ بالکل نﯙو۔ ساروے کھوتہ اکھ اہم چیز چھہ یہ زِ موجودہ دورس منز تخلیقی دنیاہکی ساری تقاضہ پورہ کران۔  وۄں گﯙو یہ ونن چھہ ضروری زِ اکس شاعر سنز ساریۍ تخلیقہ ہیکن نہ شاہکار أستھ۔ کاشرِ شاعری ہندس موجودہ کاروانس منز چھہ شہناز رشید اکھ الگ تخلیقی ژونگ ہیتھ برونہہ کن پکان۔  پتمیو تریو دہلیو پیٹھہ چھہِ شہناز رشید پننۍ انفرادیت قایم کرنس منز کامیاب سپدۍ متۍ۔  شہناز رشیدنہِ شاعری ہند اکھ اہم گۄن چھہ یہنزِ شاعری ہنز سادروار علامت نگاری، ٹریٹمینٹ، شعری محاورہ تہ تخلیقی ورتاو۔ شہناز رشیدن تخلیقی ورتاو چھہ اکس خوبصورت تہ پراثر تخلیق کارس زنم دوان۔ یہندۍ ورتاونہ آمتۍ لفظ چھہِ بیک وقت استعارہ تہ علامتی صورتس منز برونہہ کن یوان۔ مثالے یم کینہہ شعر:                                                    

ودنہ ورأے اکھ گل نہ اتھ نیران
عجب زمین ز لوکن فقط  اچھن زاگان

میون شیشو یہ مکان برزہ ونس منز چون اول
سانۍ حالات بہر حال چھہ ہأری نوزک

یمہِ دوہہ چھاتس نار لجاو
رود پیوان اوس تمہ دوہہ سخ

میہ اوس یپارۍ دۄہے کھسان اسمان
سہ نوجوان نہ کنی یم چھہِ ہیر پاوۍ تمے

کُنہِ تہ زبانۍ ہند تخلیقی ورتاو چھہ پانے علامتی رنگ رٹان وۄں گﯙو شاعری منز چھہ علامژن ہنز تعمیر تہ انتخاب شاعر شعوری طور ورتاوس منز انان۔ شہناز رشیدنِہ علامت نگاری منز تِہ چھہ یہند ذاتی شعور کار فرما۔  یم چھہِ شعوری طور کاشرِ تہذیب کین مختلف انہارن علامتی رنگ دوان، یہنزِ شاعری منز وۄتلن واجنہِ علامت نگاری منز چھہِ نہ فقط یہنزِ انفرادی زندگی ہندۍ تلخ تہ خوشگوار تجربات شامل بلکہ چھہ یہنزِ شعری علامژن منز کشیرِ ہند ماحول، تہذیب، وۄتھن بہن، دود دگ وغیرہ تہِ شریک۔  شہناز رشید چھہ نہ کنہِ تہِ جایہ پننہ میژِ نش دور ژلان وۄں گﯙو یہندس تخلیقی ورتاوس منز چھیہ مقامی علامژ پانے آفاقی تہ پانے مقامی رنگ رٹان یس یہنزِ علامت سازی ہند اکھ اہم وصف چھہ۔  مثلا یم  شعر:     

کانہہ کُکلہ جورۍ صبح دم اسناوِ سرحدن
کانہہ گولی شام وقتہ تمن مار تھاوِ پام

نہ ششترے نہ کھہن اوس سمیٹھے وۄپدان
یہ گام اوس فقط فصلہ کین امبارن ہند

ژننۍ پھلے ییتہ چھاوان ٲسۍ
تتہ نے کھتمتی وان زہ ژور

کاشرِ شاعری ہندین مختلف دورن منز پیدہ سپدن واجنین  شعری نہجن ہند علامتی نظام چھہ اکھ اکس نش واریاہ مختلف۔  سانہ روایتی لولہ شاعری منز رودۍ سانۍ روایتی کاشرۍ شاعر(Conventional symbols)  گل و بلبل، بہار، نغمہ، شمع پونپر وغیرہ علامتن اویزان  لیکن جدید  شاعری منز آے تنہایی، واراگ، ہجوم، انہِ گوٹ، سیکل، صحراو، تاپھ،  سیکھ، وغیرہ ہوۍ نوِ علامژ برونہہ کن انان۔  حالاںکہ موجودہ دورس منز تہِ چھہِ  سانۍ کینہہ شاعر یمنے روایتی علامژن لارۍ وۄں گﯙو معنوی سطحس پیٹھ چھیہ یم علامژہ تخلیق پتہ تخلیق vary کران۔ کانسہ تہِ شاعر سند انفرادی اسلوب متعین کرنس منز چھہ تخلیق کار سند علامتی ورتاو symbolic treatment تہ تمۍ سند غالب کرنہ آمتہِ علامتی انتخابک تجزیہ کرن ضروری ییمہ تجزیہ سیتۍ چھہ تمس تخلیق کار سند انفرادی علامتی ورتاو تہ تسند علامتی ابہام نﯙن نیران۔ شہناز رشیدنِہ شاعری ہند  علامتی   landmark   چھہِ زون، پنجرہ، دریاو، قافلہ، پرۍ یہ، گل، کدل، خاک، تریش، رود، گلدان، کاغذ، خیمہ وغیرہ۔ یہند علامتی ورتاوک اکھ اہم کتھ چھیہ یمن علامتن ہند ابہام یمہ علامژ چھیہ نہ معنوی سطحس پیٹھ اکسے جایہ قرار کرتھ بلکہ چھیہ قاری سندس ذہنس تام واتان واتان واریاہ رنگ بدلاوان یا عام لفظن منز ونو یہ زِ شہناز رشیدنِہ شعری علامژ چھیہ dynamic نہ کہ constant  مثالے یم شعر ییتہ اکھ علامت واریاہ shades ہیتھ برونہہ کُن یوان چھ :

پستہ قد چھُس کینہہ وچھان کینہہ تھدۍ وچھان
کاروانن ہندی   یتھے   چھس پدۍ  وچھان

کمہ نغمہ پوشہ  نول چھہ یہندین وچھن اندر
میانین یمن گلن نہ   مگر   بولنے   تگان

نار دی تن یا سہ  شمع  زٲلن
اسۍ چھہِ پونپرۍ تہ اسۍ دزان روزو

پونپرۍ گلالہ کتجہ ژننۍ پوش نیول نب
رژھراو اچھن اندر ژہ  یہ  منظر چھہ لاجواب

یم  ناگ ما ودان دۄہے چانۍ میانۍ پاٹھۍ
لﯙت لﯙت یتھے تہِ ما چھہ آب کم گژھان

علامت نگاری چھیہ شہنازرشیدنِہ تخلیقی عملِہ ہند اکھ اہم تہ اژھین حصہ۔ یہند شعری ابہام چھہ یمنے علامژن اندۍ اندۍ نژان۔ شہناز رشیدنۍ شعرہ باوتھ چھیہ نہ خالص بیانیہ یمہ چھہِ سادہ شعری بیانن منز تہِ کانہہ نتہ کانہہ پیکر استعارہ یا علامت وۄتلاوان ۔ یۄہے تخلیقی رویہ چھہ یہنز علامژ تجریدی باوژ abstract expressionism  نشہ دور تھاوان۔ یہند یہ تخلیقی ورتاو چھ یمن اکھ موجودہ کاشرین شاعرن نش الگ کران، یتھہ پاٹھۍ جدید تجری مصور چھہ اسہ پیچدہ تہ گردِ ؤلتھ تجربن مختلف رنگو سیتۍ آکار دنچ کوشش کران تتھے پاٹھۍ چھہ شہناز رشید تہِ پنن شعری اظہار علامژو سان برونہہ کنہِ تھاوان۔ وۄں گﯙو دۄشونی فنن منز چھہ علامتن ہند پینڈولم اورہ یور نژان تہ قاری یس دۄلابن منز تراوان۔ مثالے یہ لۄکٹ نظم:                                                                               

لٔر پنی
آنگن پنن رووم
تہ رووم پان تام
ہر مۄکھس پیٹھ دونمژ کانہہ
ونلہِ ہنز ژادر خدایا  سوز ولۍ ولۍ
گاشہ طوفانس اندر چھہ نہ
نظرِ بالکل کینہہ یوان

پتمین ترین دہلین منز تخلیق سپدن واجنہ کاشرِ شاعری ہند علامتی انتخاب تہ ورتاو چھہ واریاہ مختلف۔ تجریدی فنہ کس سایس تل ییتہ جدید علامتی شاعری طیس پیٹھ چھیہ، تتہ چھہ نہ کاشر شاعر مقامی صورتحالس زیو دنس منز روایتی علامتی ورتاوس منز پتھ۔  اتھ عملہِ چھہِ سانۍ اکثر شاعر نعر باز کس صورتس منز برونہہ کن یوان وۄں گﯙو کینہہ شاعر چھہِ تمہ تہِ یمو یہ درد وکرب علامتی اندازس منز پیش کﯙر یمن شاعرن منز چھہ شہناز رشید تہِ اکھ اہم ناو۔  یہنزِ شاعرانہ شخصیژ ہند چھہ اکھ اہم پہلو یہ ز یہند لب ولہجہ چھہ پننین ہم عصرن نش مختلف۔  یہندس  تخلیقی ورتاوس منز نہ چھ کُنہِ بیانیہ انقلابی زور شور تہ نہ نعرہ بازی۔ یمہ تہِ چھہِ احتجاج کران مگر یہندس احتجاجس منز چھہ فکری ٹھہراو تہ علامتی ورتاو۔                                                                        

کانژھا کرِو سا زول گرن آنگنن وتن
نوزک چھہِ سانۍ خواب یمن کھوژناوِ  شام

پرژھمس لرِ ہنز خوشبو تھرِ ہندۍ گل کﯙت گے
دوپنم زانہہ بوزتھ نا سنۍ ژور آنگنن ژاو

  ۔۔۔