محمد شفیع راتھر ( شبنم شفیع)
rathershafi121@gmail.com

کاشرس ادبس یس بجر تہ تھزر لل دیدِ ہندِ دسۍ لۆب سہ چھہ پتۍ میو الہ پلہ ستو ہتو ورۍ یو پیٹھہ منہ مونمت پزر۔ یہ تہِ چھیہ اکھ ٹاکارہ حقیقت ز لل دیدِ پتہ لگۍ ہتہ واد وری کاشرس منظوم ادبس سے وقار تہ سے بجر دبارہ حاصل کرنس ییلہ رسول میر آو۔ بہرحال وق بدلنس سیتۍ سیتۍ آیہ نوِ حقیقژ برونہہ کن تہ نوۍ تجربہ آیہ کرنہ یۆتام وہم صدی آیہ امہ صدی تُل زندگی ہندین کلہم جہتن اندر وترہ بنیل۔ جنگ عظیم اول سپدن تہ پتہ لیگ آف نیشنز بننۍ تہ ٲخرس تلہ کترکۍ پاٹھۍ پھٹنۍ تہ جنگ عظیم دۆیم تہ امہ سیتۍ انسانۍ علمک زاین لبن چھہِ کینہہ تتھۍ خارجی وٲردات یمو فردس دم کۆر تہ فراق گھورکھپوری سندین لفظن منز سہ بیمار پیۆو؎

اس دور میں زندگی بشر کی
بیمار کی رات ہوگئی ہے

اتیتھ کتہِ روزِہا ادب دور تہ متاثر سپدنہ رۆس؟ عالمی ادبس منز آیہ انقلابی نوعیت چہ تبدیلیہ، مشہور انگریزۍ نقاد اے سی وارڈ چھہ ونان۔

” پرانہِ ساریۍ یقین چہ کتھہ آسہ نہ وۄنۍ یقین چہ کتھہ کینہہ۔ پریتھ چیزس ٲس سوالس سیتۍ بتھۍ لاگے۔ پریتھ چیزس خداے سندِ نیچرہ پیٹھہ شعرہ صنفہ ہندس بناوٹس تام،  یمن حالاتن منز کتہِ بچہ ہا کاشر ادیب تہ شاعر۔ پزر چھہ یی ز یہ تبدیلی تہ طرح رۆٹ کاشرۍ ادبن نالہ متہ مگر کینہہ رٲوۍ تہ کینہہ گیہ منز سرہ ییرہ۔ یمو شاعرو تہ ادیبو اتھ تلاطمس منز ادب ادب تھۆو تمہ قبیلکۍ تہ کاروانکۍ اکھ سرخیل شاعر چھہ غلام رسول جوش۔ یہندس تحت الشعورس منز ٲس یہ وۄسہ درۄس تہ گہماگہمی مگر پنن سوچ، فکر تہ خیال باونہ وزِ چھنہ کانہہ نٔو فکر تہ خیال دوان البتہ تہند ابلاغ تہ اظہار چھہ منفرد تہ ممتاز۔

رنیمتۍ
یم اچھر ہیتھ چھس
بہ اکھ کاغذ ورق
وتہِ پیٹھ بیہ سۄکھ بیہ پژھ مسافیرن
اباوُت
بُتھ پنن ہاوان

ہندوستانۍ ادبس گیہ وہمہ صدی ہندس تریمس دٔہلس تہ پتہ جدیدیت کین دورن تام نعرہ بازی ہنز ووکھہ بیمارۍ اگادِ ۔ یمیک اثر الہ پلہ سارنے علاقایی ادبن پیۆو۔ مگر جوش چھہ تمن معتبر تہ زوردار آوازن منز اکھ ویز آواز یمو پننہ اعلٰی ادبی روایژ پننہ باپتھ رٲژ ہندۍ ژٲنگۍ بنٲوۍ ۔

لل دیدِ تامتھ واتیاہ جوش
دیہ وۄنۍ تتہ چھا میتہ دکھ تار

یہ اوس 1966ء ییلہ نہون کٲری (ڈی کنسٹرکشن)  تمام پرانین تصوراتن، فکرن، اعتقادن وترہ بنیل تل۔ ونۍ اوس ادبک دایرہ سماجیاتن، سیاسیاتن، لسانیاتن تہ ابلاغ ساینسن زیر کۆرمت۔ مانۍ تو ڈبلیو بی ییٹس سنز یہ تصویر ٲس پریتھ طرفہ بتھہِ یوان۔

Things fall apart, the center cannot hold

Mere anarchy is loosed upon the world

اتیتھ اکس شاعر سند شاعرے روزن اوس کمال، زنتہ لاکمہ رۆس گُرس سوارۍ کرنۍ۔ چنانچہ یۄسہ شاعری اعلٰی قدرن تہ تھدِ سونچک باس دوان چھیہ، جوشس نشہ چھیہ نہ سۄ عنقا۔

بڈۍ چھ دپان آثار چھہ تتھۍ ترقی وۄں کرو
شرۍ چھہ لماں ہگرس تہ دپاں ہے ریل وچھو

یا

نہ صحرا بنیومت نہ گلشن بنیومت
عجیبے تماشاہ چھہ ہوسن بنیومت

جوش چھہ پننۍ کلہم شعریات انسانس اندۍ اندۍ گنگراوان تہ یہنزِ شاعری ہند بۆڈ موضوع چھہ انسانے۔ جوشس چھہ بھرپور احساس تمہ سیاسی تہ سماجی افراتفری ہند یۄسہ تس اندۍ پکۍ چھیہ۔ مگر جوش چھہ اتھ انسان سندین ازلہ ابدہ کین نیاین ہنزِ کتابہ ہندۍ ورق زانان تہ یتھہ کنۍ اتھ پریتھ فرد سند غم بناوان تہ آفاقیت بخشان۔ تس چھہ للِ ہنزِ زیوِ:

نابدۍ بارس اٹہ گنڈ ڈیۆل گوم
دیہہ کاڈ ہۆل گوم ہیکہ کہہ یو
گورہ سند ونن راون تیۆل پیوم
پہلہ رۆس کھیۆل گوم زرہ کہہ یو

سہ چھہ ڈیکس اتھہ دتھ انسان یس مسجود ملایکہ تہ نایب یزدان چھہ، سندس ازۍ کس طالعس پیٹھ دندن تل اۆنگج ژھنان تہ ونان:

یہ نیتھہ ننۍ تن وُشن بستر تہ صبحچ تٟر باوان چھکھ
تلان چھکھ نندرِ اکھ کتھ بیاکھ کتھ بییہ پارۍ ساوان چھکھ
یہ کس پدۍ آکھ ڈیشتھ چھکھ سیہ منز وتہِ پیٹھ گۄتن گومت
ژہ کیاہ سونچان پکاں لۆت لۆت تہ کیاہ تاں یاد پاوان چھکھ
یمو سگریٹ دامو دٕہ ژہ چھکراوان فضہس منز
پتو لاکن ژہ بِٹ مۄکلتھ یہ ٹیٹھ کتھ جایہ تھاوان چھکھ

شاعری تہ فن کاری ہند بجر تہ عظمت چھہِ وچھنۍ لایق۔ غزلس اندر سگریٹ دام، ٹیٹھ، بِٹ ہی لفظ امہ کامیابی سان ورتاونۍ چھہ بہرحال ادبی ولہ ویرنے ہنز کٲم آسان تہ اتیتھ چھ پرن والس من وۄلسنس یوان تہ سۄے کیفیت گژھان یمیک تجربہ حافظ شیرازی پٔرتھ یتھہ کنۍ گژھان چھہ:

ز شعر حافظ شیرازی گویند ومی رقصند
سیہ چشمانِ کشمیری وترکان سمرقندی

یہ سورے چھہ جوش عام فہم، سلیس تہ وڑرن تہ کھہن ہنز زبان ورتٲوتھ حاصل کران۔ پزرے بوزو ادبس چھنہ کانہہ مخصوص زبان آسان۔ بقول پرفیسر محمد زماں آزردہ:

” تخلیقی زبان چھیہ نہ کانہہ الگ زبان۔ زبانۍ ہندِ تخلیقی ورتاوے چھیہ تخلیقی زبان وۄپزاو لبان”

جوش چھہ پنن موضوع یعنی انسان تہ تمۍ سنز تصویر کشی تمہ انمانہ بیان کران یتھہ پاٹھۍ یتھ شعرس اندر مرزا غالب دلہ ہند گدرن ہاوان چھہ

ہے اب اسی معمورہ میں قحطِ غم الفت اسد
ہم نے یہ مانا کہ دلی میں رہیں کھاویں گے کیا

جوش چھہ ونان

یتھ سڑکہ گردِ پیٹھ چھا اتۍ تھے نشانہ موجود
کرتام دب لجییوو کستام گرۍ سوارس

عام فہم کتھاہ چھیہ، لفظن تہ ووکھہ صنعژن ہند کانہہ برم چھنہ قایم کرنہ آمت۔ مگر شعر پران پران چھہ روح وۄلسنس یوان ، سیلبریٹ کران، تہ ژۄپاسے بہر سو رقصِ بسمل بودچ ژھٹہ ژھٹ کرونۍ ڈرامایی کیفیت اچھن تل یوان۔ جوش چھہ انسانس تمہ دب لگنچ یاد دہانی کران ییمہ سیتۍ تہندس ازلہ لٲنس کھر آو۔ ازلہ لانکۍ امۍ کھرۍ دیت انسانس ڈپرشن تہ ٹروما، وۄں گو جوش چھہ نہ امس اتھ نفسیاتی تلاطمس اندر دربدری تہ وارفتاری پشران تہ جسمک تہ روحک رشتہ ژٹتھ بے یارومددگار تراوان۔ جوش چھہ غم تہ دۄکھ باوان مگر اکس تجربہ کار طبیب سندۍ پاٹھۍ کلنکل اپروچ پانناوان۔ بیمارِ ہند تشخیص کران تہ چھیکرس علاج تہِ باوان مگر تم چھہ نہ اکھ ہارڈ ٹاسک ماسٹر بنتھ جبرا علاج تہ حل پشران

یہ چھیہ از کتھے مشیمژ، یہ چھہ شوق راسۍ گومت
نتہ ونتہ چھا یہ ممکن منصور کھسہِ نہ دارس

امیک علاج تہ حل چھہ سیلف ریلائزیشن یعنی معرفت نفس یس منصور بنتھ دارس کھسان چھہ تہ امام حسینؑ بنتھ کربلا کین سیکہ میدانن امرتکۍ کھاسۍ چوان

 از تہ چھہ پزرس لول بران
زو تہ دوان پۆز کتھ چھیہ یہ کتھ
قتل حسین چھہ مرگِ یزید
اسہِ لوکن بٔڈ ستھ چھیہ یہ کتھ

جوش چھہ یتھہ کنۍ غمو تہ دۄکھو منزہ نیبر کڈتھ انہ گٹہِ منز ننہِ کتھہ ونتھ زون گہناوان تہ ونان

جنگلۍ وتہِ منز
کوٹھہ برس پیٹھ گُہۍ لٲدس نش
ہہ کیاہ ہُتہِ نس
مٲلہ زچن منز
ٲس سۄ پرینۍ پرینۍ
دٕہۍ لمبکو منزۍ
نپہ نپہ کرونۍزون گہان