علی محمد نشتر

چھیکرس گۆو تنہا صاب اکس فٹ پاتھس پیٹھ نندر تراونہ خاطرہ مجبور۔ نصف رٲژ ہیو ووت اکھ ژور امۍ سندس شاندس نش۔ اورہ یور شانکہ وال نظر ترٲوتھ دژ ژورن تسندس بیگس تھپھ، اتھ ہینڈ بیگس منز اوس فقط تنہا صابن آیی کارڈ۔ نظرن دُ ژیۆت کرنہ مۄکھہ ترٲو ژورن کنی دو۔ ہایی وے ہس ترنہ خاطرہ مگر تس آو اکہ تیز رفتار گاڑِ ہیند ٹاس۔

یہ اوس دسمبر 2021ء ۔ اۆتام ٲس کووڈن دُرس عالمس ژھٹھ کڈمژ۔ لوکھ ٲسۍ مالۍ کیو جانۍ گٲمتۍ ۔

تنہا صاب اوس اکس ملٹی نیشنل کمپنی منز جان عہدس پیٹھ کٲم کران۔ سہ ژھن پننہ کمپنی کڈتھ ۔ کرایہ دارس کالہ پگاہ کران کران گذریاو اکھ وری۔ اۆتام اوس تسند فیس بک، واٹس اپ، ٹویٹر بیترِ اکاونٹ خوش باش تہ خوش آیند کومنٹو سیتۍ برتھ تہ جرتھ آسان مگر چھیکرس مجبور گژھتھ کۆر تمۍ یہ درخواست پوسٹ:

“My dear friends — I — very desperately need twenty thousand for paying my rent …as I inform that COVID 19 has rendered me too unemployed. Please send the amount as loan.”

یہ مسیج سوز تمۍ تسندس فونس منز موجود دۄن ساسن یارن دوستن تہ رشتہ دارن — وارہ وارہ — ہفتہ وادن پیاران پیاران آو نہ تس کانہہ خاطر خواہ جواباہ۔ — پانژھ شیہ لایک تہ زیرو کمنٹس۔ دۄیو تریو تل فون۔—- فقط حیلہ بہانہ——

تنہا صابن کرایہ کمرہ ییلہ شامس مالکن قلف کۆر، سہ گۆو خجل تہ خوار— تمۍ کھٲج ماسک ہیۆر پہن یتھنہ کانہہ پریزناویس۔ اۆتام اوس تس فریند سرکل بۆڈ تہ فینز بے شمار، تکیازِ سہ اوس جان تنخواہ نوان۔ یکہ وٹہ سمنس تہ پارٹی مناونس اوسنہ تھکھے گژھان۔ مگر وۄنۍ اوس بیتاب ز جل جل گۆژھ انہ گۆٹ گژھن —- سخ ࣦتر لجس۔ سہ اوس فکرو تہ غمو کھیومت۔

بڈہ مول تہ موج اوسس کووڈن گۄڈے نیومت۔ سہ اوس اوہ مۄکھہ تہِ تنہا۔ زنتہ سرابس ژھانٹہِ وسان، تسنزن آشن تہ ارمانن اوس امۍ عالمی وباہن لُرہ پار کۆرمت۔ سہ اوس اندری اندری ژھریامت تہ ژھۄکیامت۔ تمۍ سندۍ تصور تام ٲسۍ ویسرنہ آمتۍ۔

ژیر گژھتھ ییلہ تمام لوکھ پنن پنن گرہ ژاے، تمۍ دژ اورہ یور نظراہ گذراہ —– فٹ پاتھس پیٹھ شۆنگتھ گدا گرن نکھے ترٲو تمۍ تہِ نندر ننۍ سے زمینس پیٹھ لر۔ ہینڈ بیگ تھوون شاند—- زیوٹھ وۄش تروون — اچھ مژرٲوۍ مژرٲوۍ باسیاو تس ز سہ چھہ ہر طرفہ انیک انہ گٔٹس منز گاسہ کۆزا ہیو—-ییرہ— لرِ پھرۍ دی دی پھچہ تس لرکانہ۔۔۔۔۔۔

یتھہ تتھہ ییلہ گاش آو، ہاے وے یس پیٹھ ٲس مسخ شدہ لاش پتھر۔ —- یہ لاش تہ ہیند بیگ تل پولیسن—–

تنہا صاب وۆتھ صبحس سلے—– ہینڈ بیگ آس نہ اتھہِ۔ ” گۄڈہ کتھ لگہِ میہ وۄں ہینڈ بیگ یا آیی کارڈ۔ — بہ کس چھس وۄں۔ ژھنس بلاے” سہ ژۆل ریور ویو پارکہِ کن۔ تتہ بیوٹھ بینچس پیٹھ أکتھ کن ۔ کلس پھش پھش دوان اوس پننس قسمتس پیٹھ پچھتاوان۔ تاپہ پروہ پینہ سیتۍ کھژ تس کیف ہش تہ ترٲون بینچس پیٹھ لر۔ تسندس موبایلس منز آسہ وۄنۍ ہیتھے مسیجہ یوان۔ ” اما  میہ کس ژھانڈِ وۄنۍ ۔ بہ کس چھس وۄں۔ میہ کیا یمن مسیجن کرن” تمۍ وچہ اچھ تہ تروون ڈاپھ ہیو۔ — مسیجہ آسہ لگاتار یوان ییمہ انمانہ:
Fast forward—- The great Tanha Sahab is no more —— hit by an unknown vehicle at highway.

امۍ سندس والس پیٹھ آسہ ہتہ واد مسیجہ آمژہ۔ بے شمار تعریف تہ بے مثال تعریف۔ "کوتاہ اصل اوس سہ۔

“How great he was…….”   “ He was my best friend”

فیس بک فرینڈ سرکلن بنٲو ہمدردن تہ دردلن ہنز اکھ فعال کمیٹی۔ کمیٹی نیو فی الفور فیصلہ ز تجہیزو تکفینس لگن وُہ ساس۔ پژھین رنزناونس لگن پنژاہ ساس، مقبرس پیٹھ پیور کھالنس لگن وہ ساس۔ وینیو آسہ ریور ویو پارک —- اکھ ایمرجنسی آن لاین فنڈ آو قایم کرنہ —- چندہ دنہ والۍ ٲسۍ پنن پنن ناو ہایی لائٹ کران۔ آنا فانا منز سمیوو جم غفیر۔ خاص رشتہ دار تہ چیرہ یار ٲسۍ نہ کٲنسی مایکہِ دوان تھپ کرنہ۔ بتھین آسہ ماسکہ لٲگتھ ۔ اوہ مۄکھہ ٲس نہ کانسہ ہنز اصلیت واضح سپدان۔ باسان اوس کہ تنہا صاب چھہ سارنے ہند ہیرو اوسمت۔

ییلہ پولیس گاڈِ منزہ توبوت کڈنہ آو ، یارن دوستن لگۍ ہٹۍ۔ ” جب تک جان میں جان ہے – تنہا تیرا سمان ہے” ۔ اڈۍ ٲسۍ کنہ پھسرارے کران ” دپان یہ جنتی چھہ پننیو ساتھیو منزہ کمۍ تام مارہ نوومت—— کۄسہ تام ایجنسی چھس زاگان ٲسمژ” ۔ اڈۍ ٲسۍ ونان ” امۍ ہا آسہے کافی مال وۆٹمت”

میڈیاہکۍ نمایندہ ٲسۍ شورشرس منز ہینہ تہ کھینہ آمتۍ۔ کانہہ اوس نہ کانسہ ہند بوزان۔ اکۍ جرنلسٹن دژ اورہ یور نظراہ —– دورِ وچھن اکھ نفراہ بینچس پیٹھ دراز شۆنگتھ، سہ گۆو تس کومنٹ ہینہ۔ ” ہے ہے —- جناب — تلہ حض تھۆد ؤتھو” تنہا صابن اوس سردی تہ گردِ نشہ بچنہ خاطرہ کلس اکھ لفافہ لوگمت۔ ماسک ٲسن کافی تھۆد تھٲومژ۔ ” یمہ سیاسی بازۍ گر چھنہ تھپ تلان۔ شورہ شر لوگکھ”

” ہے – ہے جناب” ” کیا حض جناب— کیاہ دلیل چھیہ؟ ” جناب تہۍ ما زٲنیون تنہا صاب؟

تنہا صاب وۆتھ تھۆد تہ وۆننس ” آ –آ تنہا صاب گوس بے”

جرنلسٹس ژج کھۄرہ تلہ میژ تہ کرنس نٹھ ” ہنہہ —- ژہ چھکھہ —- تنہا صابن بوت ہا ۔۔۔ بوت ہا —– ہا بوت ہیو۔۔۔۔ ژلۍ وو تنہا صابن بوت ہا۔ ژلۍ وو”

تنہا صابن بایوو اتھو تہ کھورو ز سہ چھنہ کانہہ بوت —– مگر تمام لوکو تل ہُے” ہا بوت ہو — تنہا صابن بوت ہا ہو ۔۔۔۔ ” اتھ پارکہِ منز موجود اکھ اکھ کنہِ پھۆل سیرِ پھۆل تہ زین زالن لویکھ تنہا صابس —- سنگسار کۆرکھ — رتہ دٲوۍ کۆرکھ ، سہ پیۆو بینچہ پیٹھہ پتھر —– رتہ گریچہ کھژس —– فاقہ ہتس کھژس نہ کریکھ تہِ — کانہہ آو نہ نکھہ —– اکۍ شرۍ نیو تس نشہ پیۆمت موبایل فون تھپہِ —– سہ لۆگ فونس کن تہ تامتھ آو مایکہ پیٹھ اعلان کرنہ” —- ونۍ ییہ مرحوم تنہا صاب قبرستانس کن ننہ —– لوکو منزہ کھۆت اکھ نفرا مایکہ پیٹھ معلوم کرنہ ” ہے —–  کیا حض تنہا صابن چھا مقبرہ ملۍ ہیۆتمت اوسمت؟ ” ساری گٔے ہے بنگہ —— ” جنازہ رود پکان۔