شاعری

شہنواز منتظر سنزہ نظمہ


(1)
بہ چھس پراران

ژندر تہِ پھۆل

پھۆلۍ سمن

ژہ آکھ نہ کینہہ

بسو تہِ کۆر

وۅں روخ اڈن کن

ژہ آکھ نہ کینہہ

وتن گۅبییہ اچھ

تہ وۅنۍ شہر تہِ شۆنگ

میہ وۆن دوان

سۅتییہ نظر

ژہ آکھ نہ کینہہ

گرد تہ شور

چیۆو گٹو

گنان گنان

ہمیوو سفرک چرگش

ژہ آکھ نہ کنہہ

سرایہِ بر دتِکھ

وۅں ہوٹلن

قلف کٔرکِھ

کٹھین کٹھین

ژہ آکھ نہ کینہہ

پییہ بازرن ہنز بۅے

سرۅنگن پھیرۍ پھیرۍ

پینجن پیٹھ

تٔھکتھ پتھر

ژہ آکھ نہ کینہہ

میہ ٹوِٹر تہ فیس بک

پھران پھران

موُس گۅبیوو

دۅن اتھن

ژہ آکھ نہ کینہہ

بہ چھس مدعٲے

سمن بلن

ژہ آکھ نہ کینہہ

______

(2)

خبر یاد چھیا

بہ ما اوسس ڈلس گنزران گینہِ زانہہ

میہ ما ٲس ہٲل زانہہ تارک شماری

میہ ییلہ تمہِ تاپہ ڈیکہ شہجار وچھایو

میہ رٲو شرۍ وٲنسہِ سٲرے شرۍ خیالی

ترُن وشنیر تتھ سۅنہرۍ رویس

سجان اوس شینہ دجہِ پیٹھ تاپہ بۆک ہیو

وٹھن اوسوے سجان کیاہ ناو گلریز

قدا اوسے قداور نوش لبہِ ہیو

ژیہ اوسے سونتہ تاپھ تتھ وٲنکۍ مستس

گہے رۅپہ لانک گہے سۅنہ لانک پٲران

یران اوس آفتاب منز وۅلرۍ وانکن

یمن بۆٹھ اوس بدلان واوہ دکہ سیتۍ

لٔٹس تم واوہ دشہ شوبان آسے

ۂٹس کیاہ مۅختہ مال زولان ٲسے

تمن کاری گرن ہند شوق پٲرتھ

یمو انہِ گٹہِ کٹھس منز ژٲنگۍ زٲلتھ

پنو سژنیو تم خواب وونیۍ

ژہ ییلہ شامس سہ سوزنۍ شال لٲگتھ

وسان ٲسکھ سراپا زون ہش زن

پھیکین پیٹھ بوٹہ ٲسی نار ژاپان

دزان رۅپہ گاشہ چانین وۅلرۍ ژھاین

بہ اوسس تارِکوٹس ژھایہ روزتھ

اجو نظرو ژیہ کُن گوران آسان

گہے اوسم دلس زن تھپھ دوان کانہہ

گہے اوسم شہن زن بار باسان

خبر چھا یاد چھِیہ وۅنۍ تم أدرۍ دۅہ

یمو بٔڑوِتھ بہ لاچار زولس

تمن کوچن یمن پھیران اوسکھ

تمو کوچو بہ بے زان ڈولس

ژہ از شرحک لباسا نٲلۍ ژھنمت

بہ وُنہِ سے طوق دنیا نٲلۍ ترٲوتھ

دلس ونہ پرانۍ ارمان تٲرۍ پراٹان

میہ ونہ تمہِ سوونتہ واوچ بے خیالی
______

(3)
ٲنہ تہ بہ

لاشعورچہ کھۅنہ منز

پرتھٲنۍ

دیُت شعورن آلو

بہ گوس کھڑا

ژھایہ ہنز اکایی وچھتھ

پرژھمس

بہ کُس چھس؟

تمہِ اسیم سینہ منزہ

وۅبرییس

قطار در قطار

دورِرن ہندۍ عمیق سلسلہ

یہنزِ ٹاکانہِ پیٹھ

پۆز تہ اپُز یکوٹہ

تانڈو ٲسۍ کران

غنودۍ اچھو وچھن

میہ کُن

افسانن ہندۍ کیتۍ باب وۅتلییس

وٹھن پیٹھ

مگر کہنۍ تۆگس نہ ونن

کیژن ترتیبن دتُن زۆل

کیژِ لٹہِ آس کۆن نیرتھ

کیژِ لٹہِ دتِن اندری دم

مگر کنُے ووت نہ

پانس سمکھن چھا سہل

لۆژ کتھا چھا

سرنیر مینُن تتھ سدرس

یتھ زاتک وونت آسہِ

بیہ کل پٲٹھین گنڈ تراون

یتھ بیہ گنڈ پانس

یہ گۆو شہمارن منز

کھۆر ٹھہراون

افسانن ہنزِ گہلہِ گۅپھہِ منز

یہ پرزلہِ

یہ تہہ در تہہ کھلہِ

پۆز گۆوا تی

یہ اچھن سمکھہِ

کنہ پۆز گۆو

بیہ ترتیب وشال انہِ گۆٹ

یمچ سیاہی

عدم وجودچ منصف چھیہ

کیژِ لٹہِ ژجس کریکہ نیرتھ

پنن ژھریر ژینتھ

______

(4)
اندہ کار

یہ چھیہ سۅ راتھ

یتھ رٲژ اندر

نابینا کۅڈر

کاوڑرہ کِس تھینس کل ڈالان

بٲیس کیرس منز دکہ دیاوان

یارس رۅپہ ٹینکین کنناوان

گت سمنی کِس باغس منز

یہ چھیہ تریشہ ہتین وچھ تچھونۍ راتھ

دشرتن کیکیی کنمژ

اروپیرس تھنہ پیمژ

ونواسچ راتھ

یتھ رٲژ اندر

بہ تہِ مظلوما

بہ تہِ رام ژندر

بہ تہِ پیغمبر

یہ چھیہ زنوانن ہنز راتھ زرێن

یتھ رٲژ یتُھے ترمپیت واین

بند آبہ سٔتم مۅہر مژرن

کہمس برس تل بہت پشاچ

کالہ کھوَن منز وۅٹہ لاین

______

(5)
ڈلس کن اوڈ

ڈلہ دم چکھ ٹھہرتھ درویشس

اکھ گینۍ ہے گژھی ستھ راگ وُزن

نوۍ ناگ پریتھن سیکہ شاٹھو کنۍ

پریتھ لہرِ رہیلۍ دریاو وسن

ژنژل زل پرۍ ین مندچھہِ بتھس

تارکھ مۅنہِ میٹھیو وۅشلاون

ہیٹہ پھٹۍ واوس مضراب لگی

گتہ گیں گیں پھوری زبر ونس

یِن وِگنہِ ونس مس مژرٲوتھ

پریتھ کریڈس رجز راگ گرزن

متۍ ہَرن پَلن ٹاپن پڈریو

مژہ گنسہ نژن پاتالن منز

ہے ڈلہ چھکھ یخہ ژادر ؤہرتھ

رۅپہ گُرنن ژھۅپہِ ہند پاٹھ پران

یا وندہ رٲژن خلوکھ لگہ ہکھ

شہمار وٹھی زن کریکہ دیاوی

ہے یخہ لد آبہ یہ دۅکھہ لد دل

آسی ہے خبر کیاہ گۆو نییہ ہکھ

سُمہ ساس ژٔٹتھ اتھۍ یختِس منز

اے کاش کہ اکہ لٹہ وۅتھی نظر

امہ دمہ پیٹھ میٲنس درچس کُن

یتھ درچہ دمس پیٹھ نرد گندان

جیون تہ سمے عرساتو پیٹھہ

یتھ درچہ دمس پریتھ بازِ اژھیۆن

زنماتن ہند وٲناک ویتُر

وچھہکھ ژہ وپھاں ڈبہِ شینس منز

لبہکھ ژہ پشن پیٹھ زون دزاں

ہے ڈلہ یا زالکھ اۆدر زیونا

وندہ کالس منز کیلاشس پیٹھ

یا پییہ ہی یووُن تٲنِس منز

پیری ہند پرگن پار کرن

یا ترۆپرتھ صندلۍ پان پنن

دۅہ کالۍ لگی کُنہِ کونس منز

زن ونہارِ کریژھہِ کالس منز

پییہ گاسہ کرٹین پیٹھ منساون

ہے ڈلہ دکھنا کانہہ وردانا

یُتھ شۆنجمژ ککل وٲلنج ہنز

تیُتھ بٲتھ پھریم تنہِ بیٲلس پین

تھنہ رنگ برنگۍ پمپوش پدم

وہۍ بدلتھ یم من منڈل چین

پراچین گۅپھن منز واس کرن

______

(6)
روپانتر

میٲنس نیچوس چھہِ پونپر  خۅش کران

وۅزلۍ، سبز تہ نیلۍ

پتہ چھکھ لاراں

مصری اِزبند  دانین تام

تہ ونان چھکھ

چھۅرہ  وڑو

بہ چھسکھ اکثروچھان

پننس گیسٹ ر ومس منز

پردار پردن پتۍ کنۍ

میہ چھ اکھ لبہِ پیٹھ تہِ بنوو مت

واپس پھیرکھا؟

یہ کُس چیز چھہ امس آلسۍ گۅژِ

پھٹوُن ،  پھریکہ وُن حسن بخشان

بہ چھس راوان

میہ چھہِ وچھس مہرۍ تچھان

اگر میہ ٲسہ پونپر دراے

ینہ باسی یہ مود

بہ  چھس تُلہ کل

زمرے:شاعری

Tagged as:

جواب دیں

Fill in your details below or click an icon to log in:

WordPress.com Logo

آپ اپنے WordPress.com اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Google+ photo

آپ اپنے Google+ اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Twitter picture

آپ اپنے Twitter اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Facebook photo

آپ اپنے Facebook اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Connecting to %s