شاعری

ستھ غزل


منظور یوسف

 

(1)

اچھ لوسہ تہ آوُے نہ وُنستام ونس کیاہ
پیاران دۅہا ووت سپد شا
م ونس کیاہ

 جنگ نامہ پٔرِن گاہ تہ گہے لولہ دلیلاہ
گاہ پریہ پرستانہ کرین رام ونس کیاہ

دامانہ جۆرن میون غمو سیتۍ دۅکھو سیتۍ
بے وایہ کٔرِن خواب تہِ نیلام ونس کیاہ

شہرک یہ ہوس اوس تمس مون نہ تمۍ کینہہ
ترٲون سۅ پننۍ پینڈ تہ پنن گام ونس کیاہ

قلمس نہ خطا کانہہ چھہ لیکھاں تی یہ پزر چھِی
لیوکھُن ہتا منظورہ ژہ چھکھ خام ونس کیاہ

 

(2)

ہے جوگہِ میہ ون جولہِ اندر کۆت ژہ بران خواب
ییتہ سینہ پھہان چاکھ دوان کتہِ چھہِ دران خواب

کٲژا یہ مژھج زون رٹان نالہ سیہ رات
اکثر چھہِ توے شام ڈٔلتھ لوکھ گران خواب

تس ٲس لیکھتھ از تہِ بُتھس پیٹھ سۅ عبارت
سٲری چھہِ پران پۆز چھہِ کٔمس فکرِ تران خواب

آبے چھہ سورے آبہ منزے دراو یہ آدم
شاید اوے سنگلاخ دلن آب کران خواب

آوارہ ہوا از تہِ نژان کوچہ گلیو منزۍ
ییتہ لولہ وچھس کالہ پگاہ کس نہ پھران خواب

افتاب یُتھے نۆن چھہ ہیوان اۆبرہ تلہ نیرُن
بیتاب عجب لوکھ تِتھُے نالہ جران خواب

 مرۍ مرۍ چھہِ زنم بییہ تہِ لبان خواب امارکۍ
انسان مران ساسہ لٹین پۆز نہ مران خواب

کمہِ شوقہ سجاوان چھہ منظور اچھن منز
ییلہ ڈولہِ اندر کٲنسہِ نوان کیتۍ یران خواب

 

(3)

ہردہ واوچ چھیہ بۅے گلن تامتھ
ییتہ ازروُن چھہ در دلن تامتھ

 قرنہ پھیُر بایہ میانہِ ییتہ گۆو کوت
وۅنۍ شہر ووت جنگلن تامتھ

 اکھ نفر اکھ مکانہ اکھ بستی
ایل او سی وۅنۍ چھیہ بنگلن تامتھ

 ماے محبت دپان چھہ گومت قید
شاہ ژھۅکیومت سمن بلن تامتھ

 یا تہ اسمانہ پیٹھۍ ژہ پکناو آب
نیت بد نتہ چھیہ ڈۅنگلن تامتھ

 ییتہ بسان أنۍ تہ اۆہ کران وچھنے
تاج پوشی چھیہ پاگلن تامتھ

حیرتن منز پیۆمت چھہ از منظور
شاپھ لۆگمت چھہ از کۅلن تامتھ

 

 

(4)

شینہ مانین چھہ دوان نار یہ کُس
وُچھ عجیبے چھہ کران کار یہ کُس

 ہور تمۍ پان پنن گاش ژھنڈان
راتۍ راتس چھہ گندان زار یہ کُس

 زارہ پارس تہِ کمی تھٲو نہ تمۍ
سنگ دلس وچھتہ انان عار یہ کُس

 کۆت گژھو ونتہ ژۆپاسے چھیہ وُنل
بے خبر پاٹھۍ کران لار یہ کُس

 اۆش تہِ سوریو کۅلن آب تہِ لوس
سانہِ بستی چھہ دوان نار یہ کُس

 گامہ پتہ گامہ ژھبڈان رود سکان
کیاہ طمع چھُس تہ چھہ بیکار یہ کُس

 

(5)

یہ کُس چھہ گلۍ پننۍ رنگان خونہ سیتۍ
پنن نصیب چھے لیکھان خونہ سیتۍ

 چھہ گُل ۂرتھ پیوان دزان چمن چمن
یہ کتھ سا چھکھ ژہ سگ دوان خونہ سیتۍ

 میہ اوس بوزمت زِ خون چھے حرام
ژیہ کتھ سا تریش چھے ہمان خونہ سیتۍ

 یہ موج وُنہِ وتن وچھان چھیہ آشہِ سان
ژہ کیازِ چھکھ یہ وتھ چھلان خونہ سیتۍ

 میہ دیت نہ خون پۆز وۅں گۆو دِتُم سکان
ہمن مگر گژھان چھہ سران خونہ سیتۍ

 اگر نہ زانہہ تُلتھ خنجر مگر یہ پۆز
حرف حرف ژہ چھکھ لیکھان خونہ سیتۍ

 خدایہ کرتہ وۅنۍ رحم وۅں آے تنگ
ژیہ کونہ کانہہ اثر گژھان خونہ سیتۍ

 

 (6)

وچھ کُورنِتھ زمانہ دان چھم دوا ژہ کر
رُم رُم میہ چھم عذاب سران تا دعا ژہ کر

ویژنتھ میہ حال دل تہِ وۆنم اۆش تہِ کوت ہور
اے سنگ دلا میہ کُن وۅں چھینی اکھ نگاہ ژہ کر

نارس اندر سہ وۅتھ تہ یہ کیاہ جاودان سپد
دۅہدش بہ چھُس دزان تہ یکسان روا ژہ کر

صحراو، رات، زیوٹھ سفر چھم کرُن میہ طے
یتھ مشکلس اندر بہ کُنے زۆن وفا ژہ کر

یوسف بہ چھس کنے تہ خریدار ساسہ بدۍ
منظورہ پانۍ پانہ پنن مۅل ادا ژہ کر

 

(7)

تمس کیاہ غم بہ زن راوس تہ راوس کیاہ
سہ پانس مس بہ ہے باوس تہ باوس کیاہ

 یہ سورے جان و تن چھم تمۍ سندے احسان
وۅں پادن تل بہ سر تراوس تہ تراوس کیاہ

 تمس سورے بنن گدرن اچھن تل میون
ژہ ونتم یاد ہے پاوس تہ پاوس کیاہ

 سہ چھنہ زانہہ تھۆد تلاں ٹاری ملالس منز
بہ چھۅکھ سینکۍ اگر ہاوس تہ ہاوس کیاہ

 تمس یُن از مگر چھم چھۆن ہلم کرہ کیاہ
دپان چھس برونٹھہ کنہِ تھاوس تہ تھاوس کیاہ

زمرے:شاعری

جواب دیں

Fill in your details below or click an icon to log in:

WordPress.com Logo

آپ اپنے WordPress.com اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Google+ photo

آپ اپنے Google+ اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Twitter picture

آپ اپنے Twitter اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Facebook photo

آپ اپنے Facebook اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Connecting to %s