عبدالرحمن آزاد
ژیہ کُن میہ رکنہِ ژٔج نظر خبر چھیا خبر
نظر تہِ ڈٔج تہ لٔج سسر خبر چھیا خبر
مژھج سۅ لے چھُہ سونتہ پے رگن طراوتھا
رسیل، شہل، مۆدر، زبر خبر چھیا خبر
وُٹھن مژھج اسن رکھا ڈیکس تہِ گینۍ کھنڈ
بہ کیا ونے یہ گۆو قہر خبر چھیا خبر
شفق زہ تازہ رۅخ چھہِ زن میرہ سندۍ غزل
اچھن اندر پھۅلاں سحر خبر چھیا خبر
لۅکٹ مۅکٹ یہ میون دل اموب مایہ ہۆت
یہ زانہِ کیا پنن وۅپر خبر چھیا خبر
دۅہے میہ مۅختہ چھۅک وتن کتھن میہ گۆندۍ گنڈم
اما دژتھ نہ پۆت نظر خبر چھیا خبر
پتم پہر قیامتک ژہ زنتہ رٲومژ
پتو ژہ میۍ وچھس اندر خبر چھیا خبر
میہ چیۆو نہ زاہدا کہنی حرام صد حرام
مہ سن میہ چھُے بدل مژر خبر چھیا خبر
نہ راتھ ڈٔج نہ ژانگۍ ژھیوۍ شب بہار لۆگ
صبح تہِ پھۆل میہ کھیۆو زہر خبر چھیا خبر
نہ لوسہِ چانۍ مژ نظر نہ ژھۆکۍ میہ متۍ اچھر
متین چھہ ویۆد یہ مۆت سفر خبر چھیا خبر
زمرے:شاعری
کاشر ادبی رسالہ نیب 