منیب الرحمن

لل دیدِ تہ نندہ ریشۍ سنزِ شاعری متعلق چھیہ کتابا کتابا یوان یم بنیادی طور تہندس اعتقادی پہلووس سیتۍ واٹھ چھیہ تھاوان۔ یہندس کلامس متعلق چھیہ خالص ادبی لحاظہ کمے پہن کتھ سپدان۔ میہ ووت ہمیشہ سوچان زِ اونگجہ ٹینڈین پیٹھ گنزراونہ ینہ والیو واکھو تہ شروکیو علاوہ چھہ نہ کانہہ یہنزِ شاعری متعلق کینہہ لیکھتھ ہیکان۔ لل دیدِ ہندۍ چھہِ خالص ستھ ٲٹھ واکھ یمن تمام حضرات کیا رحمن راہی تہ کیا شفیع شوق پنین مضمونن منز پھران چھہِ۔ یمو کینژو واکھو علاوہ اگر بییہ کینہہ چکاونہ یوان چھہ سہ چھہ محمد یوسف ٹینگ سندِ آیہ یاتہ کانہہ کنے کنے مصرعہ نتہ کانہہ ژھور تہ چھون فقرہ۔ یۅہے حال چھہ نندہ ریشۍ سند۔

اکھ سوال چھہ یہ زِ واریاہ چیز چھہ تتھۍ یم اتی لل دیدِ ہندۍ باسان چھہِ تہ اتی نندہ ریشۍ سندۍ۔ امہ کھوتہ زیادہ کھرۍ لد یس معاملہ چھہ تہ یس میہ ہمیشہ تنگ کران چھہ زِ یہندس متنس پیٹھ چھیہ نہ لسانیات کہ اعتبارہ کانہہ کٲم سپزمژ، نہ تقابلی، تہ نہ تاریخی لحاظہ۔ نہ بیرونی تہ نہ اندرونی شواہدن مدنظر۔

اکھ واکھ یا اکھ شروک چھہ زبانۍ ہندِ لحاظہ ازچہ زبانۍ منز تہ بیاکھ واکھ یا شروک چھہ تژھہِ زبانۍ منز یمیکۍ لفظ پرانۍ چھہِ تہ کینژن ہندس معاملس منز پورہ ترجمچ ضرورت چھیہ پیوان۔ کتھ چھیہ صاف زِ یا تہ چھہ یمن ہندۍ لفظ بدلیمتی، نتہ چھہ خۅد ساختہ واکھ تہ شروکۍ یمن کن منسوب کرنہ آمتی۔ یمے خود ساختہ واکھ تہ شروکۍ چھہ دراصل تم چیز یمو کنۍ اسۍ لل دید تہ نندہ ریوش زانان چھن۔

یہ سوال چھہ نہ یمن دۅن گۅنماتن ہندس وجودس یا یمن ہندس موجود کلامس پیٹھ کانہہ اعتراض بلکہ یمن ہندِ مطالعہ خاطرہ سیٹھا اہم۔

اتھ سلسلس منز چھہ کینژو عالمو قدم تلمتۍ مگر تم چھہِ زیادہ تر اعتقادی کونہ متنس سیزر کران مثلا بملا رینہ سنز کتاب۔ یہ کتاب چھیہ نہ ناکارہ۔ سوال چھہِ اہم تلنہ آمتۍ مگر حل چھہ اعتقادی نظریکۍ۔ میہ چھیہ وۅمید نوۍ ادیب تہ ماہر لسانیات تہ عالم کرن اتھ مطالعہس کن توجہ۔