انتخاب: منیب الرحمن
ماخذ: کلیات آزاد مرتب پدم ناتھ گنجو
میہ چھیہ عبد الاحد آزاد نہِ کلامک انتخاب پیش کرنس منز حدہ روٚس خوشی۔ سورے انتخاب ٹایپ کٔرتھ پیش کرنہ بجایہ روزہ بہ یتھ انتخابس ہُریر کران۔ انشااللہ ییہ ریتس کھنڈس تام سورے انتخاب پیش کرنہ۔ سیتی ییس لفظن ہند معنی تہ تمن ہند پھور تہِ دنہ۔ امہ علاوہ ییہ سورے انتخاب پیش کرنہ پتہ، کلامک جایزہ ہینہ۔ یتین یتین ضروری آسہِ کلامس ییہ تصحیح تہِ کرنہ۔
کلامک پروف چھہ نہ ونہ پرنہ آمت۔
دریاو
ژلان چھم شر حبابن اضطرابن ولولن اندر
یوان چھم زندگی ہند سوز سفرن منزلن اندر
کنین کھمبرین کھین کھراشن پکاں چھس منز گٹین گاشن
نہ چھس محتاج شاباشس نہ چھس مشتاق گِندہ باشن
یتھے چھس راتہ کریلن منز تتھے چھس بلبلن اندر
یوان چھم زندگی ہند سوز سفرن منزلن اندر
خۅش آمد کرۍ تنم کانژھا ملامت کرۍ تنم کانژھا
بہ یتھ کیت چھس گو٘مت پیدا کرن چھم تی ڈرن کس کیا
بہ نوکر چھس نہ کانہہ افسر لیکھیم ناقابلن اندر
یوان چھم زندگی ہند سوز سفرن منزلن اندر
میہ عادت چھے نہ پتھ پھیرن میہ نش گو٘و برونہہ کنے نیرن
نہ چھس گل پان چھم شیرن نہ بلبل اول چھم ییرن
بہ چھس خۅش پیچ و تابن انقلابن زلزلن اندر
یوان چھم زندگی ہند سوز سفرن منزلن اندر
نہ چھس شیشہ نہ چھم صیقل صفایی چھیم پننۍ جٲنی
حسینن برونٹھ کن یمہ سینہ دٲرتھ چھیم نہ حیرانی
تمن حیرت تہ حسرت کیا یمن غیرت کلن اندر
یوان چھم زندگی ہند سوز سفرن منزلن اندر
چھہِ کریشان زون تارکھ آفتابہ آسماں دورے
وچھان ٲینہ میانے قنز پنن بُتھ گاہ بیہ گاہ ژورے
سہ تے تمہِ ساعتہ ییلہ وچھنم سرن منز یا ڈلن اندر
یوان چھم زندگی ہند سوز سفرن منزلن اندر
بٹھین بیرن سنین وۅگنین ژٔٹتھ والان چھس بوشہ
درین تکرین ٹھرین سرۍ پیٹھۍ گژھتھ ڈالان چھس ہوشہ
نہ چھم تھارن نہ دل ہارن میہ نیاین گانگلن اندر
یوان چھم زندگی ہند سوز سفرن منزلن اندر
کمن سنگین قلاین تے بلاین پان چھاوان چھس
پنن چھکراونہ آمت کُنیر بییہ سو٘نبراوان چھس
ژٹاں سنگر تہ ٹھاسان بال پھیران جنگلن اندر
یوان چھم زندگی ہند سوز سفرن منزلن اندر
مہ وچھ لہرن ہندین قہرن تنازن لایہ لاین کن
گنیر ٲستھ کُنیر میون وچھ مہ وچھ جھگڑن تہ نیاین کن
کُنیر نے آسہِ یم جاہل ویپن کتہِ عاقلن اندر
یوان چھم زندگی ہند سوز سفرن منزلن اندر
نہ چھس رندا نہ مستانہ بہ چھس اکھ لولہ دیوانہ
گہے گرداب گاہ سہلاب گاہے تیز طوفانا
ڈلن ہنز شوب سدرک شان میانین ولولن اندر
یوان چھم زندگی ہند سوز سفرن منزلن اندر
دتم پرواز او٘برس راحتک تاثیر بارانس
ؤلم یم نیلۍ جامہ تہ لاجورۍ جامہ اسمانس
تلان چھس ہول گکراین تہ شولان وزہ ملن اندر
یوان چھم زندگی ہند سوز سفرن منزلن اندر
پنن سوزاہ پنن سازاہ پنن شوقا تہ آوازاہ
پنن چھم لولہ اندازہ سروداہ مستیاہ نازاہ
درن پانژادرن جوین سرن آرن کۅلن اندر
یوان چھم زندگی ہند سوز سفرن منزلن اندر
سنیر وۅگنیار سمسارک بہ وچھنے آس سمسارس
یمے ژھۅہ مارنس کیت چھس دۅہس راتس پۅہس ہارس
غلاما چھس نہ کانہہ تھاویم میہ پنجرن ہانکلن اندر
یوان چھم زندگی ہند سوز سفرن منزلن اندر
سنیر وۅگنیار سمسارک بہ وچھنس آس سمسارس
یمے ژھۅہ مارنس کیت چھس دۅہس راتس پۅہس ہارس
غلاما چھس نہ کانہہ تھاویم میہ پنجرن ہانکلن اندر
یوان چھم زندگی ہند سوز سفرن منزلن اندر
امیرا بادشاہا ٲسۍ تن ہیوندا مسلماناہ
بہ کتھ پرارس بِہِن چھٲونۍ چییِن ناوِن بٔرن باناہ
میہ نش راجاہ نواباہ سٲیلا اکھ سٲیلن اندر
یوان چھم زندگی ہند سوز سفرن منزلن اندر
پنن پان آیتن چھم تھوومت سٲرس جہانس کیت
پنن زو پیشکش تھووم زمینس تہ زمانس کیت
ولے پرارن تہ ٹھہرن چھے نہ میانین مشغلن اندر
یوان چھم زندگی ہند سوز سفرن منزلن اندر
جواہر مالہ ہاوان مال ورتاوان سودا گر
جران تاجن تہ تختن مۅختہ گاٹلۍ پۅختہ ووراور
چھہ سو٘مبران ہلۍ تہ ژاران پھلۍ یمن میانین کھلن اندر
یوان چھم زندگی ہند سوز سفرن منزلن اندر
سنیر وۅگنیار بٹھۍ نے بیرہ ڈیشتھ جیرہ چھم یوان
کُنیر یکسان چھس ژھاران لاران یوت ماران پان
توے چھس آب ٲستھ وارہ تلہ وین تیونگلن اندر
یوان چھم زندگی ہند سوز سفرن منزلن اندر
تھزر چھٲوتھ سنیر وچھنے یوان چھس یوت بے وایے
سہن ہندۍ پاٹھۍ ماران ڈالہ ہرننہ ژھالہ پریتھ جایے
شرزن پادر سہن شالن تہ ہرنن ہانگلن اندر
یوان چھم زندگی ہند سوز سفرن منزلن اندر
دوان چھس لہرہ گامہ تہ شہرہ گاہے ہو٘ل نہ گاہے سیو٘د
دہانس کف تہِ پانس زر سہ زر یُس چھم نہ پانس وی٘ود
ویپان چھہ نہ میون آتش نارہ بانن منقلن اندر
یوان چھم زندگی ہند سوز سفرن منزلن اندر
بہ چھس خۅش دورہ دورن زور و شورن ہند سیٹھا چھم ۔۔؟؟
پکن بے خوف تراون رو پھٹن کیا گو٘و ، تھکن کتھ ناو
پنن دل آزماون چھم پھساون مشکلن اندر
یوان چھم زندگی ہند سوز سفرن منزلن اندر
ینک، گژھنک، زینک، مرنک نہ چھم پروا نہ چھم کانہہ غم
نہ چھس حیران واتن کم نہ چھم پھیران گے کم کم
چھہِ یتھۍ یتھۍ وہمہ تے وسواس آسان بزدلن اندر
یوان چھم زندگی ہند سوز سفرن منزلن اندر
بہ روزا سوز دل ترٲوتھ سرن سنِرن تلاون منز
بہ وتھرا سینہ پھیرن عیشہ متۍ ڈونگن تہ ناون منز
یوان چھا کارہ وٲلس وار جاہل کٲہلن اندر
یوان چھم زندگی ہند سوز سفرن منزلن اندر
طبیعت میون آزادی چھہ عادت میون آزادی
کُنیر یکسان عمل شادی محبت محنت آبادی
توے چھس ٹوٹھ آزادن رتین صاحب دلن اندر
یوان چھم زندگی ہند سوز سفرن منزلن اندر
پننۍ نرمی تہ گرمی منزلن منز واتناوان چھیم
نوین منزلن تہ سفرن منز نو٘وے دنیا میہ ہاوان چھیم
گریزاں چھس جنگلن اندر وزان پوشن گلن اندر
یوان چھم زندگی ہند سوز سفرن منزلن اندر
جگر چھس سنگرن کتران رفتارس سۅ گرمی چھیم
مدنوارن بدن ناوان اطوارن سۅ نرمی چھیم
سیزر تے لول چھم برۍ برۍ ورن پیچن ولن اندر
یوان چھم زندگی ہند سوز سفرن منزلن اندر
چھلان چھس جامہ ناوان پان گل روین سیہ موین
ہوے چھس بٲگراواں لول خۅش خوین تہ بد خوین
چھیہ باقی پن پننۍ خصلت گلن تے ارکھلن اندر
یوان چھم زندگی ہند سوز سفرن منزلن اندر
گلن تہ بلبلن منز چھس بہ وایان میوٹھ سنطورا
— سنگین دلن منز انقلابک ڈول ڈنڈورا
یژھے نرمی تژھے گرمی چھیہ میانین غلغلن اندر
یوان چھم زندگی ہند سوز سفرن منزلن اندر
ڈران ییتہِ قہرہ میانے لہرہ مارن وقتہ بڈۍ ولہ ویر
تتے پوشے تھرین چھس روشہ چاوان دایہ ہندۍ پاٹھۍ شیر
زوک میٲنی چھیہ شمشادن تہ سرون رٲیلن اندر
یوان چھم زندگی ہند سوز سفرن منزلن اندر
بہ وتھران فرش مخمل پیٹھ کنارن تازہ یارن کیت
مزورن تھکۍ متین بییہ شوقہ والین دوستدارن کیت
بیہن راحت کرن دیو فرحتا واتیکھ دلن اندر
یوان چھم زندگی ہند سوز سفرن منزلن اندر
انان تریشہ ہتین آلو کٔرتھ چھس سالہ چاوان تریش
پھۅلیکھنا دل جگر شیہلیکھ ژلیکھ پکنک تہ تھکنک ویش
گہے جوین کۅلن گاہ سربندن نلکن نلن اندر
یوان چھم زندگی ہند سوز سفرن منزلن اندر
گنجیم پاں ژادرن ہندین دبابن سارنین تارہ
سہ شو٘د بوزتھ مشاں عیشہ متین سنطورہ سیتارہ
چھیہ سوزچ مستیا پیدا گژھان غمگین دلن اندر
یوان چھم زندگی ہند سوز سفرن منزلن اندر
سیٹھا نرمی تہ دلجویی کران چھس خوبروین منز
یوان چھس مسولن ہیتھ تریش خۅش رفتار جوین منز
تلان تصویر پمپوشن بہت پوشے ڈلن اندر
یوان چھم زندگی ہند سوز سفرن منزلن اندر
بہ چوونس زندگی ہند مے بہارن سیتۍ تھٲونم لے
وزان چھیم دردہ سوزچ نے چوان چھس پیلہ پے در پے
پیام کل شی حی چھا میانین ولولن اندر
یوان چھم زندگی ہند سوز سفرن منزلن اندر
زمرے:شاعری, عبدالاحد آزاد
کاشر ادبی رسالہ نیب 