شیخ العالم ۔ نندہ ریوش

انتخاب کلام شیخ العالم (نندہ ریوش)


انتخاب: منیب الرحمن
ماخذ: نورنامہ مرتب امین کامل

میہ چھیہ نندہ ریشۍ سندِ کلامک انتخاب پیش کرنس منز حدہ روٚس خوشی۔ سورے انتخاب ٹایپ کٔرتھ پیش کرنہ بجایہ روزہ بہ یتھ انتخابس ہُریر کران۔ انشااللہ ییہ ریتس کھنڈس تام سورے انتخاب پیش کرنہ۔ سیتی ییس لفظن ہند معنی تہ تمن ہند پھور تہِ دنہ۔ امہ علاوہ ییہ سورے انتخاب پیش کرنہ پتہ، کلامک جایزہ ہینہ۔ یتین یتین ضروری آسہِ کلامس ییہ تصحیح تہِ کرنہ۔

1
کر بندن توشہِ خداے

شترن میانین وۅندن
بشرُن پیومو ہاے
تورے موٚٹھہم رندن
کر بندن توشہِ خداے

اکس مٲلس ماجہِ ہندین
تمن دٕے ترٲوٕتھ تہ کیاے
مسلمانن کیاو ہیندین
کر بندن توشہِ خداے

ڈنڈک ونکۍ زلکار ریشی
تمۍ کٔژھس کڈن ماے
ان کھینک تھوون نہ بندن
کر بندن توشہِ خداے

پرانہ ابیٲسۍ پلاس ریشی
تمۍ فرسس لون دراے
اکہ دمہ موٚٹھس نہ ۔۔۔
کر بندن توشہِ خداے

تمۍ حضرت رمہ ریشی
منز سۅرگس ارزن جاے
شوبہِ رحمت تمن ژندن
کر بندن توشہِ خداے

تمۍ حضرت میران ریشی
کریڈہ نفسس سیتۍ کوٚر نیاے
پونۍ آنژمُن قطرن دندن
کر بندن توشہِ خداے
___

2
بار خدایا پاپ نوار

کیولۍ کوٚت نیرکھ پاتھٲنی
ترٲوتھ شرۍ مرۍ تہ گیہہ بار
یم کس بار لدکھ پاپٲنی
بار خدایا پاپ نوار

کٔھٹتھ پردۍ ژیتھ رچھزے
کٔھٹتھ دزے سوٚدرس تار
ژیہ نتہ ژیہ کُس ؤنتھ گزے
بار خدایا پاپ نوار

گہلۍ ونہ زن گیم گٹے
بَوُت اپی سُہم تار
ژہ چھکھ اندہ یُد بہ کم رٹے
بار خدایا پاپ نوار

توٚت متے موذی لوگُم
کندِ ہونی گورم مردار
گیہہ ترٲوتھ پر گیہہ زوگم
بار خدایا پاپ نوار

شوگہ ژلہِ نیرتھ پنزر مٹھیم
لۅتہِ سۅتہِ تلنم ہا ہا کار
آرول پوش زن بدن شٹھیم
بار خدایا پاپ نوار

زو تہِ اوٚژھے پوَن تہِ اوٚژھے
ژیتھ تہِ اوٚژھے اوٚژھے سار
یمن پدن میہ ویژار گوٚژھے
بار خدایا پاپ نوار

زو نیرِ برونٹھہ لوب نیرِ پتہ
گژھن دۅن زہ وتہ شنۍ کار
یہ دِکھ برونٹھہ تی پھیرِ پتہ
بار خدایا پاپ نوار

ڈیٹھِس کلکۍ کالس منزی
ہنزی پٲٹھین لوٚبمس تار
ووٚن ونت نندہ سنزی
بار خدایا پاپ نوار
___

3
چھہم ژیتس ژہ مہربانہ

ژہ چھکھ سکلن کارن میہ
میہ ژہ پتھ ون دِتم ترانہ
بے ژیہ پانژن وقتن نیمہ
چھہم ژیتس ژہ مہربانہ

نِر گُنہ ژہ رویتہ دتم
چھس بہ چونے ناو سرانہ
بھگہ، کیلاس کھٲرتھ نتم
چھہم ژیتس ژہ مہربانہ

حض رسولس کامت ژٲجی
ژیہ تس سوزتھ سہزہ قرانہ
بھگہ، سہ یمۍ ریاضت پٲجی
چھہم ژیتس ژہ مہربانہ

سہ چھہ سکلن بوٚڈ پیغمبر
ژیہ تس بووتھ سر ادانہ
سہ ژیہ شۅدِ منہ نیووتھ اندر
چھہم ژیتس ژہ مہربانہ

چھم چونے میہ آدر تہ
میہ ژہ پتھ ون تجنم مانہ
میہ ژہ بکھتی کارن کرتہ
چھہم ژیتس ژہ مہربانہ

بوہ منزہ بیوم وشس
توہ گورم ون ادانہ
بھگہ، پرکٹ برتھم ریشس
چھہم ژیتس ژہ مہربانہ

پریتھ دشن تہ سنگاٹھن
ژیہ چھی سکلی لکھ نمانہ
میہ تہِ مدتھا کرتم ژاٹن
چھہم ژیتس ژہ مہربانہ

وُشہ دُر ییلہ گریزتھ ییم
ادہ من ژلیم سیندانہ
بھگہ، شۅدِ منہ لز کیژ گیم
چھہم ژیتس ژہ مہربانہ
___

4
پدمان پورچہ للے

پدمان پورچہ للے
تمہِ گلے امریت چیوٚو
ساننۍ اوتار لۅلے
تتھۍ میہ ور دتم دِوہ

لوکہ بونچی کجی
اکجی کوٚرن سِوہ
سیتۍ جاناوارن ژجی
تتھۍ میہ ور دتم دِوہ

تمۍ ڈنڈنکۍ زلکار ریشی
کژھہ پھلہ کوٚرن سِوہ
پۅختہ بکھت اوس مکھت سے
تتھۍ میہ ور دتم دِوہ

ریشۍ ونکۍ میران ریشی
ژندرہ ساسس ان جل چوہ
ادہ دیہ ہوٚت آکاش گوٚوے
تتھۍ میہ ور دتم دِوہ

زین میون اوس امریتہ گوٚرُے
تمۍ تہِ آدرک سمسارہ گوہ
گوٚو تہ گۅرس ژاٹھا ژوٚرُے
تتھۍ میہ ور دتم دِوہ

ٹوٹھیوک یشہ بر گۅسٲنس
تمۍ زٲنی نہ کٔرتھ سِوہ
ٹوٹھیوک رگہ زال پیہ وٲنس
تتھۍ میہ ور دتم دِوہ
___

5
سے ہے دپۍ زِ تہ مسلمان

پانس مۅل یُس تھوِ نہ ہارے
بییس سیتۍ کرِ نہ مان مان
درزن ترٲوتھ سرزن گارے
راتس دۅہس وارِ پان
پر تہ پان یُس سدرس تارے
سے ہے دپۍ زِ تہ مسلمان

سے پُرشا سۅرگس پراوے
یُس اۅہر ژوِ بیین سیتۍ
ریتن دۅہن یُس روزہ تھاوے
آسہِ بیہ روٚس نمہ وان
لوتب مہہ مد اہنکار تراوے
سے ہے دپۍ زِ تہ مسلمان

بییس نظر کرِ نہ ہنے
آسہِ نہ دھن ڈیشتھ برمان
بیین یُسے وۅپشن وکنے
پانس برونٹھ تتھ انہِ ایمان
شرع پالہِ تہ درع بنے
سے ہے دپۍ زِ تہ مسلمان

دہچہ کامہ یُس کرِ اودالے
نُنزِ روٚس آسہِ سکل کموان
ژیتھ کسرِ یوہ مدی والے
ژالہِ گوٚب وزن اومان
پرس پرہ تہ پانس پالے
سے ہے دپۍ زِ تہ مسلمان

اند کن رٔہتھ ہند یمۍ لٔژی
میژِ یمۍ ویندے پنن پان
یڈ یمۍ گنڈ تہ ژیڈ یمۍ ہیژی
سے ہے دپۍ زِ تہ مسلمان
___

6
کرود نو مسلمانس پزی

کرودے سود مالہِ راوی پانس
کرودے کرے تہ کارن دزی
کرودے ژور چھے دُرہ خزانس
کرود نو مسلمانس پزی

صاحب سیتۍ یی مہمانس
تی کر یوہ سیتۍ صاحب رزی
یہ دکھ پرس تہِ چھے پانس
کرود نو مسلمانس پزی

اچھ نو تلۍ زِ پردس زنانس
توہ سیتۍ الگ پلگ دزی
توہ سیتۍ چھِو لگہِ ایمانس
کرود نو مسلمانس پزی

ترٲوتھ ینے اند میدانس
ماز تہ وستخوان میژِ تل جزی
حساب منگنے دانس دانس
کرود نو مسلمانس پزی
___

7
ہو زوو پایس پیتہ

سے اوس تہ سے ہو آسی
سے سے کرۍ زے ییتہِ
سے سٲری اندیشہ کاسی
ہو زوو پایس پیتہ

کھیمہ کھیمے یڈ نو یی
وہۍ زوو یتے کھیتہ
بٲژ ٲسی تم کوٚت گیی
ہو زوو پایس پیتہ

کندِ کوٚرتھ میونے میونے
کینہہ دِتتھ نہ تہنزِ وتہِ
ژہ نہ کٲنسہ ہند کانہہ نو چونے
ہو زوو پایس پیتہ

کالۍ تراونے اند میدانس
توٚت سیتۍ کانہہ وسی نہ تہ
تتہِ پترُن چھے پانۍ پانس
ہو زوو پایس پیتہ
___

8
ہو ن چھوہ کران وو با وو

آنگنہ ناد کراں چھوہ ہونو
بایو میہ کن تہۍ شنۍ تو
یمۍ ییتہ ووٚو تہ تمۍ تتہِ لونو
ہو ن چھوہ کران وو با وو

قبر ٲدران سر کینہہ میوٚنو
یور کیُت کینژھا سیتۍ انۍ تو
ہٲبتہ کرنزس ماز میہ چھوٚنو
ہو ن چھوہ کران وو با وو

تتہِ ییلہ دفتر ہین ویژھہ نو
اسۍ اپز پنن کِتھہ کھٹو
شنۍ تو کنۍ سے چھوہ پیترنو
ہو ن چھوہ کران وو با وو

پاپ تہ پن ہین تتہِ تو لنو
بایو تتہِ کُے پاے کرۍ تو
لگہِ وہ ہُر کِنہ گژھہِ وہ چھوٚنو
ہو ن چھوہ کران وو با وو

جواب دیں

Fill in your details below or click an icon to log in:

WordPress.com Logo

آپ اپنے WordPress.com اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Google+ photo

آپ اپنے Google+ اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Twitter picture

آپ اپنے Twitter اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Facebook photo

آپ اپنے Facebook اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Connecting to %s