پننہ جسمکۍ ناپاک انگ چھلان پییہ تس گِلہِ ہندس برونہہ پلوس پیٹھ نظر، یتھ رتہ سیتۍ چھِٹھ درامژ ٲس۔ تس آو ٲدیک سہ منظر بییہ اچھن تل۔۔۔تمۍ لوے گِلہِ بڈِ آلو ۔۔۔ پوٚز گِل ٲس کرتام شہلیامژ!
"سۅرملۍ چشمہ۔۔۔زٲیلۍ شانہ۔۔۔نستہِ خنجر۔۔۔سۅنہارۍ نرم ریشم ہیو مس”
پونم ہنزِ زونہِ منز اوس گاش تمۍ سنز دۅدہ کۅل دگان۔۔۔!
تس اوس نہ توتہِ افسوس۔ لاشہِ برونہہ کنہِ لوٚگ سہ پانسے سیتۍ وننہِ۔ "ماجہ سیتۍ چھا کانہہ سنگ کران!”
"چون قتل گژھن اوس ضروری۔ چانہِ شینہ کھۅنہِ منز اوس سہ دک دک کروُن دل وتل بجہِ گژھان۔۔۔تس حرام زادس اوس نایٹ کلبن تہ شراب خانن منز چانہِ حسنچ نمایش کرنۍ خوش گژھان۔ یہ اوسے ژیہ بعضے محفلن منز لوکن ہند دل رنزناونہ باپتھ محبور کران تہ بعضے ہوٹلن ہنز زینت بناوان۔۔۔ چٲنس شینہ صفحس پیٹھ یمہ رتہ ٹیچہ وچھتھ چھہ میہ سرود یوان۔ زو ووٚندمے چون قتل گژھن اوس ضروری!!”
تمۍ رٔٹ گِلۍ وچھس سیتۍ۔۔۔تمۍ سنزن رتہ داغۍ اچھن میٹھۍ وارا کران ژج تس کنی ودن باکھ نیرتھ۔ "موجٲے۔۔۔!!”
یہ کریکھ بوزتھ پییہ میہ پننۍ موج یاد۔
میانہ ماجہِ روٚچھ وچھس منز گندک امبار یوٚتام میہ واش کوٚڈ۔۔۔!
آزرن ترٲو پتہ گِلہِ ہنز رتہ سرۍ لاش وارہ وارہ ایزلس پیٹھ۔۔۔ تمۍ وول دچھنہِ اتھہ سیتۍ کنہ پیٹھہ برش۔ برشس زہ تریہ دننہ دوان لوٚگ فریمس کن مخاطب کٔرتھ وننہِ۔ "میانۍ تخلیق آسہِ وۅنۍ شاندار۔۔۔! بہ تھاوتھ ژہ مونولیزا پریتھ وچھس منز سجٲوتھ!”
زمرے:افسانہ
کاشر ادبی رسالہ نیب 