افسانہ

شاٹہ ہون (افسانہ) – ہردے کول بھارتی


ہردے کول بھارتی

وچھنہ تلہ اوس نہ اتھ بونہِ تیتھ خاص کینہہ یتھ غیر معمولی ونہو۔ کلین منز یہ تہِ اکھ کُلا۔ وۅنۍ گوٚو باڈو اوسس بوٚڈ تہ شہجار واریاہ گوٚن تہ شریہل۔ اتھ تل اوس باسان زن ماجہ ہنزِ کۅچھہِ منز بہت چھس۔ خبر توے ما ٲسۍ بستی ہندۍ حاجتھ مند اتھ دشہ گنڈان تہ سندھیا وقتہ ژونگ تھوان۔ نتہ ما اوس بییہ کانہہ وجہ۔ تہِ ہیوٚک نہ ثیقہ پاٹھۍ کانہہ ؤنتھ۔ میہ تہ میہ سیتۍ واریاہو شریو چھہ اتھۍ بونہِ تل سورے لۅکچار چھوومت۔ گرا بلۍ ڈاپھ دتھ، گرا اتالۍ گندان۔ گاہے خربزۍ وارِ پھٔرتھ پھرکھ شہلاونہ خاطرہ تہ بعضے ژھیلہِ گندان ژھیپھ دنہ خاطرہ۔ گوٚن شہجار آسنہ مۅکھہ آسہ خالے کُنہِ کُنہِ گاسہ درمنۍ کانجہ نظرِ گژھان، تہ باقی زمین سریہہ لد، نرم تہ لٲو لۅکچار بۅنس لایق۔ کوچھہِ ہندۍ پاٹھۍ محفوظ۔ یہ چھیہ تیلچ کتھ ییلہ دریاو آگرے گریزان اوس، ییلہ سونتہ ونلہِ ہنزِ ململہِ منز نیم ؤلتھ تہ نیم نیتھہ نوٚن یہ دریاو دیہ سنز ننۍ کرامات اوس باسان۔ تیلہ دورِ بڈِ ہچہ کدلہ کہ منزمہِ ٹھٹھہِ تلۍ کھوٚر ہیتھ بوٚڈ کھوٚچ زن ہنگہ تہ منگہ پیدہ گژھتھ برابر وقتس پیٹھ گاٹھس لگان اوس تہ وچھان وچھان اوس گاٹھس پیٹھ زن وۅرُس لگان۔

امہ پتہ سپد خبر کیا۔ پوٚز یہ سپد تہِ سپد آگرے۔ بستی آیہ نہ وچھنہ تلہ کانہہ فرق۔ تتھی بٹھۍ، تژھے بیرہ، تمے بسکین، سے بازر۔ وچھنہ تلہ سودا گر تمے تہ ہینہ تلہ سودا تہِ سے۔ صرف لج بونہِ کُلس اندۍ اندۍ کنڈۍ تار تہ ڈاپھ دتھ لۅکچار گوٚو کنڈۍ تارِ اپاری بند۔ باقی یہ سپد تہِ سپد آگرے۔ آگرے زن مۅژیاو دریاوک آب تہ بٹھۍ گیہ بۅن تام ننگہ۔ جایہ جایہ ہریوو سیومب تہ گُرن گیہ لیمبہِ منز بند۔ وننہ کنۍ آو سونتھ تہِ مگر سونتہ ونلہِ ہنز ململ ٲس آگرے کتہِ تام کنڈین لجمژ۔ وۅنۍ اوس نہ دریاو دیہ سنز ننۍ کراماتھ باسان بلکہ اوس تس تہ تسنزن کراماتن پیٹھ شکھ ہیو گژھان۔ امیک کرٹیومت آکار وچھتھ اوس میہ امیک پتھ کال یہے پری داستان ہش باسان، یتھ نہ پزرس سیتۍ کانہہ واٹھ چھہ آسان۔ کُنہِ کُنہِ اوسس بہ اندرۍ اندری پننس یاداشتس پیٹھ تہِ شکھ کران زِ میہ ما اوس نہ تہِ وچھمت یہ میہ خیال چھہ زِ میہ اوس وچھمت تہ بعضے اوسس سوچان زِ یہ بہ وچھان چھس تہِ ما چھہ میہ پننے برم، بلۍ وہمہ۔ سورے چھہ بالکل تیتھے یُتھ اوس۔ بونہِ ما ٲس گۅڈے کنڈۍ تار اندۍ اندۍ دتھ۔ لۅکچار ما اوس گۅڈے کنڈۍ تارِ اپارِ پھسیامت، دریاو ما اوس گۅڈے کرٹیامت، سونتہ ونلہِ ہنز ململ ما ٲس گۅڈے کتہِ تام کنڈین لجمژ۔ سہ ما اوس میہ صرف طمع کوٚرمت زِ ہرگاہ یہ آسہِ، یہ سپدِ۔ کِنہ یہ اوس تہِ تہِ اوس اپز تہ یہ چھہ تہِ تہِ چھہ پوٚز۔ کٲژا پھِرِ آم زِ کانسہِ پرژھہ، مگر ییلہ تہِ کُنہِ بٹھس کن نظر تجم سہ باسیوم پانہ روومت ہیو، زن اندری پژھ تہ بے پژھی ہندس دؤتس پیٹھ آچھہِ گوٚمت۔

وۅنۍ اوس دریاو ژمتھ گرا یمہِ بٹھہِ تہ گرا ہمہ بٹھہِ کھوژۍ کھوژۍ ہیو پکان تہ یتھ یتھ جایہ یہ دۅشونۍ بٹھین تام پھہلتھ اوس تتھ تتھ جایہ اوس وونتھ تیوت کم زِ زمین ٲس آبہ پیٹھۍ بوزنہ یوان۔ یمن جاین ٲسۍ شاٹھ، وونٹہ قبرن ہوۍ تھدۍ تہ امہ سیتۍ اوس منظر زیادے آسیب زد تہ شاپہ لد ہیو باسان۔

یہ عالم رود واریاہس کالس تہ امہ پتہ یہ سپد تہِ تہِ سپد آگرے۔ دریاوس منز ہیتین مۅردہ جاناوار تہ چارواۍ ییرہ وسنۍ۔ شاٹھن پیٹھ گوٚو یژھن لاشن ڈھیر۔ کُنہِ گیہ کینہہ شاٹو نشہِ بچتھ سیوٚدے ییرہ۔ بونہِ کیا سپد تہِ زانن بنم بستی والۍ۔ بسکین درو دژہ بونہِ نظرا ، بونہِ اندۍ اندۍ کنڈۍ تارِ نظرا، ژمیمتس دریاوس نظرا، دریاوکین شاٹھن نظرا، شاٹھن لجمژن گپن لاشن نظرا تہ پھیرۍ پوٚت زن نہ کہنۍ اوس گوٚمت تہ نہ تمو کینہہ وچھمت اوس۔ میہ گوٚو بییہ شکھ زِ یہ بہ وچھان چھس تہِ ما چھہ نہ تہِ یہ میہ باسان چھہ زِ چھہ۔ کنہِ یہ چھہ پتھ وتھ یتُھے اوسمت تہ میہ اوس باسان زِ یہ چھہ تہِ یہ میہ باسان اوس۔ یہ خیال آم بییہ زِ کٲنسہِ پرژھہ مگر یتھۍ بتھس کن نظر تجم سے باسیام زن پژھہِ تہ بے پژھی ہندس دُ وتس پیٹھ پانہ لوٚب بہت خلقن مشورہ دنس منز مشغول، کِنہ پانۍ پانس گانگلہِ کرنچ ٲسۍ کوشش کران۔

یہ عالم تہِ رود خبر کٲتس کالس۔ صرف آیہ بونہِ ساریۍ دشہ مژرنہ، ژونگ آو تارہ سان تلنہ تہ کنڈۍ تارِ آو اکھ اکھ وار دتھ مزید دریر کرنہ تہ تارِ اپارِ گوٚو بونہِ تل چہ نرم تہ لاوِ زمینہِ منز ڈاپھ دتھ لۅکچار بے خبری منز پورہ پاٹھۍ قید۔ بس! ییتہِ سپد یوتے، باقی یہ سپد تہِ سپد آگرے تہ سپد یہ زِ کرٹیمتہِ دریاوکیو دۅشوے بٹھیو وژھہ ہونۍ چھۅکہ، نظرہ آسکھ صرف شاٹھن کن۔ ییتہِ نس تہِ شاٹھس موٚکر لوٚگمت اوس ادہ سہ کاو اوس یا گانٹھ، ووٚژھ اوس یا بییہ کانہہ گپُن، ہونۍ ٲسۍ دریاوہ ناوۍ آبہ رکھہِ ژھانٹہِ تران تہ لاشن کرینزے یوت باقی تراوان۔ دپان ہون ییلہ موٚکر کھییہِ تس چھیہ ژورس تہ سعدس، پننس تہ پردِس درمیان فرق کرنۍ بالکل مشتھ گژھان۔

وارہ وارہ گیہ شاٹھن پیٹھ اڈجہ امبار جمع تہ امہ امبارہ منزہ دورِ لاش ونہِ کڈنۍ اوس شاید وۅنۍ شاٹہ ہونین مشکل گژھان، اوے ٲسۍ تم وۅنۍ شاٹھس نکھہ روزنہ مۅکھہ کھسان تہِ آب مندان مندان تہ وسان تہِ آب مندان مندان۔

رسہ رسہ چھیہ وۅنۍ اتھ مۅژیمتس دریاوس لیمب بنیمژ۔ وۅنۍ چھہ یہ یہے لینبہِ دریاو یا ربہِ نالہ ہیو باسان تہ دۅہہ کھوتہ دوہ چھہ شاٹہ ہونین ہندس تعدادس منز تہِ ہریر سپدان۔ آگرے چھہِ ہونۍ تہِ یوان تہ آگرے لاشہِ تہِ۔

وۅنۍ چھہ نہ میہ کانہہ کھروو۔ میہ چھہ پورہ یقین زِ اکہ دۅہہ سپدِ کیاہ تام ولٹہ۔ پوٚز یہ سپدِ تہِ سپدِ آگرے۔ وری وادن ہند کتہِ تام رکیامت، کتہِ تام راسۍ گوٚمت آب ییہِ یپکۍ پاٹھۍ یکدم ؤستھ، سیمبہِ تہ شاٹھہ پیٹھۍ کڈِ بستی ژھٹھ۔ بستی سان نیہِ سورے پانس سیتۍ ییرہ ڈوتھ۔ دپان چھس بستی ترٲوتھ ژلہ۔ ژوٚلمت تہِ آسہ ہا کرتام مگر لۅکچار چھم تتھۍ بجہ باڈو دار بونہِ اندۍ اندۍ بے فکر پاٹھۍ ڈاپھ دتھ، یتھ وۅنۍ اندۍ اندۍ کنڈۍ تار چھیہ دتھ۔ دپان وۅنۍ چھہِ شاٹہ ہونۍ موٚکر کھیتھ اتھۍ بونہِ شہجارس تل ڈاپھ دتھ بیہان۔ کنڈۍ تار ژٹہ ہا مگر یمن نکھہ گژھنس چھس نہ بہران تکیازِ یم ما چھہِ صرف ہونۍ، یم چھہِ شاٹہ ہونۍ تہ شاٹھہ ہونس چھیہ ژورس تہ سعدس درمیان فرق کرنۍ مشتھ آسان گٲمژ۔

زمرے:افسانہ

جواب دیں

Fill in your details below or click an icon to log in:

WordPress.com Logo

آپ اپنے WordPress.com اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Google+ photo

آپ اپنے Google+ اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Twitter picture

آپ اپنے Twitter اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Facebook photo

آپ اپنے Facebook اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Connecting to %s