افسانہ

سنگر مالن پییہ پراگاش (افسانہ) – راجہ یوسف


راجہ یوسف

احساسس ییلہ ززُر چھہ اژان فکرِ تہ عملہِ ہنزہ وتہ چھیہ شُروکراونہ یوان۔ انسان چھہ گاہے دۅلابن منز وۅتلان بۅڈان تہ گاہے سیکلین منز آب ژھٲرِتھ پانس تسلی دوان۔ احساس چہ رزِ ہے کوتاہ تہِ فکرِ تہ دیانکۍ شُروکۍ تراوو مگر ییلہ اندۍ پکیک تاریک ماحول سوچس تہ سمجھس پیٹھ کریہنہ پرتہ تراوان چھہ، ساروے طرفو چھہ انہِ گوٚٹے انہِ گوٚٹ لبنہ یوان۔ انسانی سوچ چھہ منجمد گژھان ۔

یہے عمل چھیہ سٲنۍ تہِ۔ جاناوار چھہِ توتہِ شام بانگہِ پیٹھ آلین اژان، مگر اسہِ گوٚو یہندِ کھۅتہ بتر۔ ژور چھیہ بجنے آسان گرِ کین چھیہ فکر لگان۔ اکھ اکھ بٲژ یُتے ونان «شُرۍ کونہ آیہ سکولہ پیٹھہ؟ خاندار کونہ پھیور وانہ پیٹھہ واپس یا دفتر کونہ گے ونہِ بند؟» تم دۅہ کتہِ رودۍ ییلہ اسۍ نصف رٲژن تام اورہ یور پھیران تھوران ٲسۍ۔ ادیب تہ دٲنشور ہوٹلن تہ کافی ہاوسن منز بہت بلیک ٹی چیوان چیوان کُنہِ خۅشک موضوعس پیٹھ بلۍ لمہ لم کران۔ گاہے نوِ تنظیمہ بناوان تہِ گاہے نوین انجمنن ہنز داغ بیل تراوان۔ وندہ رٲژن تہِ کینہہ گامہ یاوہ چھکڑس کھستھ شہرہ ٹاکی، نایٹ شو وچھتھ یوان۔ اڈور تہ زز بٔڈہ ریتہ کالہِ کپر ژادرِ تھپھ دوان تہ کنہِ ہنا شاند دتھ بونہِ شہجارس نندراہ تراوان۔

سانہِ گامچہ ناگرش صٲبنہِ بونہِ تل ٲس لوکو کینہہ نشانہ تھٲوتھ پننۍ پننۍ جاے رٹمژ۔ ماہ کالس ٲسۍ اتھ بونہِ تل نصف رٲژ تام کتھا کتھا کران تہ پتہ اتھ بونہِ ہوہس لراہ ترٲوتھ مدرۍ تہ میٹھۍ خواب وچھان۔ کُس تہِ موسم ٲسۍ زِ ہے، چاہے وندہ ٲسۍ زِ ہے یا ریتہ کول، ہرد ٲسۍ زِ ہے یا سونتھ ،لُکھ کتہِ ٲسۍ گرن منز بیہان۔۔۔ منزی گوٚو پٲنژم موسم پیدہ، یمۍ باقی ژۅشوے موسم نینگلِتھ نی تہ رود کُنے ہنو مانن جن ہیو۔

صبح ہیوٚتن دۅہے کہہِ بجہ پھۅلن تہ شام ژورِ پانژِ بجہ گژھن۔ دپھ مندنینے گوٚو شام۔ باقی ۔۔۔ راتھ، سیاہ راتھ، خوفناک راتھ۔ جاناوارن برونہے انسان گرن منز أژتھ زنتہ قید گژھان۔ یمن گرن منز شرۍ چرۍگِشہ سیتۍآسمان ستے گز والان ٲسۍ تتہِ گوٚو دم۔ ہمسایہ گرس ہے کانہہ بیمار اوس آسان، راتۍ راتس اوس سورے محلہ اکۍ سے زنگہِ پیٹھ آسان۔ وۅنۍ ہے کُنہِ گرس ٹھس چھہ گژھان ہمسایہ بجلی بند کٔرتھ ژھۅپہ دم کران، صبحس کھوژ کھوژی معلوم کران زِ رات کیاہ دلیل ٲس۔ اکھ اکس پیٹھ یُس اعتماد تہ یقین اوس سہ گوٚو یکوٹہ چھلہِ چھانگرِ۔ ہر کانہہ بییس کُن تلۍ تلی وچھان۔ پریتھ کانہہ بُتھ زنتہ بدلے بدل باسان۔

کلنڈرن گے ورق ژھینان، تہذیبس، تمدنس گیہ ترہ پچِہ۔ بونہِ باغن گوٚو تہراج، نوِ نوِ بستی گے بسان، شہرن تہ گامن لوٚگ وسجار۔ ٹی وی چینلو سیتۍ گوٚو دنیا انٹۍ ژکس سُمب، دنیاہچ کۅس کتھ روز کھٹتھ۔ ہمسایہ گرس منز کیا گوٚو راتھ تہِ بوز تمی ساتہ بی بی سی پیٹھہ نتہ ہوو کُنہِ ٹی وی چنلہِ ویستارہ سان۔ گندنہ چین جاین بنیاے شاپنگ کمپلیکس، سینماہن تہ ہوٹلن شفاخانہ۔ شفاخانہ ٲسۍ ضروری تکیازِ دل راونچ تہ ٹینشن چہ بیمارِ گے عام، پریتھ بُتھس چھہ زردیر۔ وۅں ہے کانہہ بتھہِ وۅزل تہ بوٚرت چھہ باسان تس دلکۍ دٲدۍ اندری سۅسر کوٚرمت۔ بُڈن ہند حال سپد زیادے خراب، یمن اوس صبحٲے اورہ یور نیرنس عادت تہ شامن ٲسۍ ژیر تام کھہن تہ وارین نظرِ گژھان، نتہ بونہِ شیہجارس ترُف گندان۔ تمن لج زنگن یہ دپۍ زِ تہِ لورِ ژٔنڈ ہش۔ گرن منز کتہِ وۅنۍ آرام تہ سکون۔ تتہِ چھیہ وۅنۍ نۅشہ شُرین سیتۍ ٹریو ٹریو کران۔ اردو، انگریزۍ تہ کوشُر لوگُکھ یکوٹہ پاکس، سۅے نعمت چھہِ زا شُرین کھیاوان۔ تم نہ رودۍ کاشرۍ تہ نہ پٲرِم۔ پننۍ پہچان تہِ رٲوکھ۔

نوین مندورین آو فرشہ فروش کرنہ مگر سیتی آیہ دارین تہ دروازن سیخہ پنجرہ لاگنہ، زنتہ پریتھ کانہہ گرہ جیل خانہ۔۔ ۔خیر کتھ ٲس چلان بُڈہ سنز یُس اتھ گرس منز دم پھُٹ گوٚمت چھہ۔

سونتکۍ سنگر پھلۍ۔ ہوا ہیوٚتن خۅش یووُن ہیو باسُن، جاناوارن ہند چرۍگیش اوس صبحٲے زنتہ ماحولس نندرِ وزناوان۔ دۅہ ہیتِن بڈنۍ ہی۔ بستی زن کوٚڈ کاڑ ہیو۔ لوکو ہیوٚت گرو نیبر نیرُن۔ مگر۔۔۔ مگر امہِ برونہے گوٚو بٕڈہ غیب۔ سٲری چھہِ پریشان۔ دید چھیہ گُلۍ موران۔ ٹوٹھ گوٚو سٲرۍسے ژھانڈنہِ۔ نۅشہِ دوٚپ جانے گوٚو۔ تم سوزۍ رینکو تہ پنکی ماتامال۔ اصل اصل چیز تھٲوِن قلفس تل۔ بڈۍبڈۍ چیز تٲرِن سٹور کُٹھس منز۔ یوٚتام گٲمۍ گام دراو بُڈس ژھانڈنہِ توٚتام تھٲوۍ نۅشہِ سٲری چیز رژھرتھ۔ تس اوس یقین بُڈس آو خبر کتہِ نس ٹاس۔ یتھے لاش گرہ واتہِ لوکھ متھن سورے گرہ۔ پتہ روزِ نہ کانہہ چیز پننہ شایہ۔

ٹوٹھ تہ دید چھہِ گٲمۍ گامس ژھانڈان مگر بُڈہ لوٚبکھ نہ کُنِہ۔ ٹٲٹھس پیوٚو کیہتام خیال تہ سہ لاریوو گامہ نیبر ناگرش صٲبنس بونہِ باغس کن ییتہ سہ پتھ کالہِ اکثر بابس سیتۍ شیہجارس بیہان اوس۔ وۅنۍ ٲس بونہِ باغس منز صرف اکھ بونۍ روزمژ۔ ٹٲٹھس پتہ پتہ ٲس دید تہ دیدِ پتہ پتہ سورے گام۔ ٹوٹھ ییلہ گام ہیتھ بونہِ تل ووت بُڈہ اوس بونہِ سیتۍ لراہ ترٲوتھ مگر ٲس اوسس یلہ۔ ٲسس منز بچیمتۍ برونہم زہ دند ٲسس نیبر کنُے۔ سٲری گے دم پھٹۍ زِ بُڈہ چھہ شیہلیومت۔ کھوژۍ کھوژی گوس ٹوٹھ برونہہ کُن۔ دیدِ ہیژٲے زورہ ودن کریکھ دنۍ مگر ٹٲٹھۍ ہوونس اونگجہ سیتۍ ژھۅپہ۔ تمۍ اوس بُڈس دلس پیٹھ اتھہ تھوومت۔ ہیوٚر کُن دِژن نظراہ۔ بونہِ ہندۍ پنہِ ؤتھر ٲسۍ زنتہ ہوہچہ تالہِ پیٹھ شولہ ماران۔ لوکو ہیژاو برونہہ برونہہ پکُن مگر ٹٲٹھۍ پھیلایہ نرِ۔

«نہ نہ ۔۔۔ نسا ہے میٲنس بابس مسا کریو کینہہ۔ یہ ہسا شوٚنگ خبر کیتۍ کٲلۍ۔ امس دِیو سا شۅنگنہ۔ واے میون بابہ تہ بونہِ شیہجار۔ ہے شاید ہسا پھیور قرنہ۔ کنہ یگ بدلیوو۔ ٹٲٹھس اوس اوٚش زنتہ ٹارین پیٹھ۔ بُڈس ٲس مس نندر۔ وٹھن پیٹھ اوسس شُرۍ سندۍ پٲٹھۍ اسُن۔ زن اوس کمن تام یارن سیتۍ شُرۍ باشہِ کران۔

زمرے:افسانہ

جواب دیں

Fill in your details below or click an icon to log in:

WordPress.com Logo

آپ اپنے WordPress.com اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Google+ photo

آپ اپنے Google+ اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Twitter picture

آپ اپنے Twitter اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Facebook photo

آپ اپنے Facebook اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Connecting to %s