1
ژیہ چھے نارس اندر گلزار پھوٚلمت
بہارس منز میہ پوشن رنگ ڈوٚلمت
میہ کٔتۍ کٔتۍ ژیۍ پتھے آچھر محبت
خبر کمۍ چھے دلس گِلہِ پوٹ ووٚلمت
پرو در باغ وۅلہ لولچ نمازا
دپاں تتھ شبنمن دامن چھہ چھوٚلمت
یمن خوابن کراں چھس مالہ راتس
تمن صبحے چھہ آساں سور پھوٚلمت
ژٹاں گل جامہ بلبل خون ہاران
خبر کس ماجہ طمہک راجہ ژوٚلمت
اتھس منز تھاو تسبیح جان ہے گوٚو
چندس شراپچ زِ دشمن ما چھہ گوٚلمت
__
2
دپیاوم از دلس بییہ خواب وچھتھا
دوٚپن ون کیازِ کانہہ مہتاب وچھتھا
زمانے ژیہ تہِ وچھتھ ون پاس لیلی
اچھن منز کٲنسہِ شخژس آب وچھتھا
سکونک تاپھ چھاوُن کُس بجر گوٚو
دوپہرک ونتہ زانہہ اختاب وچھتھا
میہ نے وچھ چانہِ روٚس غمخوار ہرگز
میہ ہیو کانہہ در دلا نایاب وچھتھا
وچھکھ کتہِ میانہ ازلچ بے قراری
ژیہ نارس اندرہ زانہہ سیماب وچھتھا
ندامت زوروارس ٹوٹھ زیور
وناں کمزور وزِ وزِ داب وچھتھا
__
3
ساقی ٲستھ چھم نہ حقے کانہہ بانن پیٹھ
چینہ والین ہند ناو لیکھتھ پیمانن پیٹھ
بہ تہِ چھیس صبرک زیُن زالاں وۅنۍ وندہ کالس
نتہ کُس ہاکھ تہ بتہ بنہِ أدرین دانن پیٹھ
جان چھہ یی احسان کرو پتہ مشراوو
تاپس کتہِ درِ سریہہ زانہہ وۅگنین بانن پیٹھ
واے! اما کِتھہ راوۍ تہ واپس کونہ یوان
کیازِ سیاست میژ تراواں جانانن پیٹھ
یس کم ظرفس قلم تگاں چھہ نہ پریزناوُن
تس چھہ دواں سرکار انعام افسانن پیٹھ
کمۍ تاں آبک پے دیت ریگستانن منز
افتابچ زژہ پریزلایکھ سیکہِ دانن پیٹھ
__
زمرے:شاعری
کاشر ادبی رسالہ نیب 