1

سنڈے اخبار

سنڈے اخبارس منز کیہہ تام وچھان وچھان
پھیر میہ اچانک مقامی کھاندرن کن ورق
تصویر پیٹھ پییم نہ نظرے یوٚت تام
میہ چون ناو سۅرخی ین منز وچھ۔

یہ ٲسکھ ژے، ہو بہو تژھے
سے زیوٹھ مس، زیوٹھ مگر وۅنۍ پرون فیشن
تہ بتھس پیٹھ سۅے سنجیدہ صورت
یتھ ژہ مسجار ونان ٲسکھ۔

میہ باسیوو زن اسۍ روبرو ٲسۍ
شرارتہ ہوٚت، پُر میہ سٲرے خبر
اتھ منز اوس دۅشونی خاندانن متعلق واریاہ کینہہ
ژیہ متعلق سیٹھا کم۔
مۅکلتھ، دیتم اخبار پتھر دٲرتھ
حسدن زولس، ذہنس وژھم بریہہ
یہ شخص کھوٚرم، یہ ازانۍ یس ژہ یژھان چھکھ
یہ چھپیومت ناو۔

توتہ ژٔٹ میہ یہ خبر تہ تھٲوم رژھرتھ
اکس کتابہ منز زن بکار ییم
اکھ ردی ٹکرہ یس پتاہ چھم پرن نہ دبارہ
مگر راورُن تہِ ہیوٚکس نہ ژٲلتھ۔
__

2

سنتا روزاہس منز آتھوار راتھ

میلہ مۅکلیوو، تھدۍ خیمہ
گاشکۍ عالیشان محل چھہِ تہہ کرنہ یوان
تہ ٹرکن منز واپس سوزنہ یوان۔ ترییہ لٹہِ ہورمت
ویل آف فارچون چھہ لبہِ پیٹھہ ہٕکہ ؤستھ یوان۔ گگر
چھہِ بربزۍ ریڈس نش ژھۅٹہ ڈیرس ژھٲنڈ دوان۔
مدہ مست پانڈو چھہ وسۍ پیتھ مدٲرس نش
لاینہ یوان۔ ہونۍ بتھ لٲگتھ کوٚٹ چھہ نظرہ بچٲوتھ
سۅرپھہ کچہِ سیتۍ رٔلتھ راتس پیٹھ ژلان۔
واو چھہ ٹکٹہ پرزہ وتہ پدیو پیٹھہ وڈٲوتھ نوان۔
مۅردہ چھہ پنن توبوت تلان تہ ٹرکہِ بران۔
دور پارکنگ لاٹس منز اکس ٹریللس منز چھہ
ریڈیو پگہ کہ موسمچ پیشن گویی کران۔
تہ اکھ جوکر چھہ ڈریسنگ ٲنس منز روٹہ وچھان
اکھ ڈبہ نیبر کڈان تہ پنن بتھ زٕلتھ نوان۔

___

انگریزی پیٹھہ ترجمہ: منیب الرحمن
Dana Gioia