1
تیلہ ٲسۍ آساں سٲری شرۍ یتھ کوچس منز
وۅنۍ چھہِ فقط لۅکچارکۍ کینہہ تصویر تہ بہ
یارِ ونس منز چھِٹہ پونپر ژھانڈن والیا
دارِ دمس پیٹھ پیاران چھی چھت گیر تہ بہ
میٲنس ناوس معنی ژھانڈن والیا بوز
اکۍ سے لرِ منز ٲسۍ بسان ریشۍ پیر تہ بہ
ماتا مالہِ کہِ براندہ تہ بییہ لل ماجہ نشن
کوتاہ رژھہِ رژھہِ دور گوٚمت کشمیر تہ بہ
سانٮن غزلن نظمن منز ہے بس چھکھ ژے
پرانٮن ورقن پیٹھ کتھ ؤہرتھ میر تہ بہ
__
2
اچھر والن پیٹھن زن پوشہ پھوٚتۍ چھم
میہ راتکۍ خواب سٲری نیندرِ ہتۍ چھم
بہ دمہ نا میٹھۍ قدمن ڈاکہ وٲلس
لفافن منز میہ واتان نالہ متۍ چھم
دلک سودا چھہ شاید طے سپدمت
مکانس سریہہ، مکینس نارہ تتۍ چھم
خبر یہسک وری کتھ پیٹھ چھہ آمت؟
میہ شہزادین تہِ باسان جامہ چھتۍ چھم
___
3
سۅ تہِ یواں وۅنۍ چھیہ کوچہ گلۍ سے تام
بہ تہِ کمے چھس وۅں گرِ نیبر نیران
یمۍ ووٚنم گژھتہ بیہتہ دِلہِ اسہِ کیاہ
چھُس بہ زٲنتھ تمس چھہ سخ پھیران
تاپہ دانس تہ چھٹہِ ہندس پھیرنس
کٍتۍ عاشق چھہِ از تہِ یینۍ ییران
میانہ سفرچ خبر یہ کمۍ دژنکھ
پرانہِ مندورِ تم چھہِ بر شیران
بازرن منز بہ کتہِ کٕنُن تھوٚوہس
وانہ پتہ وانہ چھکھ ژہ بلۍ پھیران
__
زمرے:شاعری
کاشر ادبی رسالہ نیب 