جانانو ونۍ جٲنۍ غزل
شرٛانیو وتھۍ اسمٲنۍ غزل

وۅستس پۅستکہ سوریو سرٛیٚہہ
سگ دیُتنس وجہِ وٲنۍ غزل

دیوانو برۍ دیوانن
انۍ تھوٚپ دِتھ انمٲنۍ غزل

پھرستُک پھمب ییراں چھہ سۅخن
تنۍ گنۍ تازٕ تہٕ پرٛٲنۍ غزل

تل ملبس کینٛہہ مۅلہ ونۍ شعر
پیٹھہ ڈیرو ژھۅژکٲنۍ غزل

گۅنماتس گو٘و گوشن گٍں
پھِسروو فلسفہ دٲنۍ غزل

تکۍیس پھٹہٕ پھٹہٕ پُھٹمت نوٚٹ
مدرسہ فلمستٲنۍ غزل

واہ۔واہ رگ وۅکنیس تہ ۅوان
فیس بکس فِستٲنۍ غزل

راد ردیفس میناں رٲوۍ
ہونزس چھہِ نہ مازٲنۍ غزل

راجس گو٘و تختس تاراج
تاجس جرِ وۅنۍ رٲنۍ غزل

شہر دمشقس درٛاگ متیوو
گۅڈہ ژوپُن رومٲنۍ غزل

غضبکۍ گوٚبۍ گوٚبۍ چٲنۍ سۅخن
لولو لوٚتۍ لوٚتۍ میٲنۍ غزل

تس تگہِ پانس کس دِیہ کیا
اسہِ لیوکھ کھاتس لٲنۍ غزل

اسہِ کیا تھیٚکہِ عٲزم وپھوار
تس وُنہ پکھہ وہرٲنۍ غزل