افسانہ

فار ایور ان لو ود یو (افسانہ) – شفیع شوق


شفیع شو‌ق

تھاوتن  تکونہ کِس ہیرۍ مس کونس پیٹھ ۔۔۔ آ۔ یہ بہن۔۔۔ چھہ سخ کٲکۍ، داہ ؤری چھِس گمتۍ مانکُن بٔنِتھ پیٹھہ کنہِ بہت۔ یڈ تہِ گٔیہ پوٚزے، پتھ چھہ حد تہِ کانہہ۔ یہ تُلیم گیور۔ امس چھہ ٹریڈ یونین والین سیتۍ لچہ واٹھ۔۔۔ تھاوتن پننی جایہ۔ تکون ییلہ ٹھیک ٹھاک روزِ ، چکور روزِ ڈنجہ۔ ادے گژھہِ دٲیرہ مکمل۔ دپان چھِم تلک پیٹھ کرتہ۔ بہ کیا چور چھہ سا! میہ چھہ پنن ترین ؤرین ہندٹینیور پورہ کرُن۔۔۔۔ ہیلو! آ، بہ چھس جی ایم۔ ؤنو کیاہ حکم چھہ؟ ۔۔۔ضرور۔ تہندس اخبارس نہ تہ ادہ کتھ۔ سٲری ایڈ میلن تۅہی۔ یہ کیا بہ سوزو وُنۍ ازکہِ تقریبک سورے رپورٹ۔ بس ای میل گژھیم کھلُن۔ گۅڈہ  چھا کشیرِ منز کُنہِ سیزر۔ ۔۔۔ والیو چھہ سٲرۍ سے پھکھ تلمت۔ پیٹھہ یہ ریڈِپھ! نار لٔگۍ نس۔ بہ کھولہ پگہے یاہو۔ میون تصویر چھوہ پرونے پہن۔ بٔڈِس فریمس منز ترٲوۍ زیون۔ یہ چھوہ میون نٲدر تصویر۔ فیس بکس پیٹھ تہِ چھِوہ میٲنۍ کینہہ تصویر۔۔۔ شکر۔ کھلیوو۔ رٹۍ تو اٹیچمنٹ۔ ر وٹوہ؟ بہ چھسو سخ آور۔ پیٹھہ چُھم یمن ازۍ نیرُن۔ یمن چھیہ وُنہِ سٲرے پیکنگ یتھے پٲٹھۍ۔ شامن کرو کتھ۔ اچھا۔ وعلیکم سلام۔ سٲرۍ سے تُلنم توس۔ کانہہ چیزِ چھہ نہ ڈنجہِ ۔۔۔ ہےہے، دکہ دیتتھم۔ لیپ ٹاپس گٔیووسور۔۔۔۔ دوٚپمے ژیہ کیا ییژ بامبر۔۔۔؟

جی ایم صٲبن کوٚر شٹ ڈاون تہ و وتھ تھوٚد۔

سٲرۍ سے کمرس اوس فرینچ عطرِ ہند نشہ پریتھ کُنہِ چیٖزس تیلیومت۔ صوفہ تکین تہِ تہ کاغذن تہِ۔ پردن تہِ تہ تمۍ سندین سویڈن تہِ ۔ مگر جی ایمس ٲس وۅنۍ  یمو زنانہ عطرو سیتۍ الرجی گژھان، مگر ووٚننس نہ کینہہ، کٔژن تام گٲنٹن ہند اوس مسلہ۔ ییتہِ پنداہ دۅہ ژولن ، تتہِ بییہ کینہہ گٲنٹہ۔سہ رود دارِ کُن گٔژھِتھ سرکٲرۍ مکانہ چہ دارِ کنۍ وچھان ، مگر تسنزن نظرن ہند زٲویہ اوس نہ کُنہِ پیٹھ ٹھہرتھ۔

«کیاہ چھِوہ وچھان؟ باسان چھہ تہند سہ پرون شٲعر گوٚژھ نہ بییہ جوان گژھُن۔ ییتہ کین منظرن منز چھُیی کیہتام ۔۔۔»

« آ۔۔۔ اگر فردوس بر۔۔۔»

« بس بس، اتھ شعرس چھیہ وۅنۍ تژھ گٔمژ۔ تٍر تہ شٹھنیار! کُنہِ نہ کانہہ سبزار۔ صرف ہُم کٔژتام دِودار کُلۍ۔ چھِوا وچھان۔ کٲتیاہ موٹۍ تہ زیٹھۍ چھہِ»

« بلاے ینۍ یمن دِودارن۔» جی ایم صٲبس اوس وۅنۍ مۅچر تہ زیچھر بوزۍتھے وۅش ژلان نیرتھ۔ تمۍ تروو زیوٹھ وۅش۔«اگر نہ یم سرکٲرۍ ملکیت آسہن بہ ژٹناوہکھ سٲری دودار۔ میہ چھہِ کشادہ لان خۅش کران۔»

«کیاہ کوٚروہ یمو سرسبز دِودارو؟ یہ چھُو تۅہہ پنن آلس۔ بہ نیرتھ گژھہِ دۅہے باغس منز مارننگ واک کرُن۔ أتی وچھتو زانہہ ما گژھہِ وہ ایزما اٹیک۔ بند کمرس منز بہت چھِو سگریٹس پیٹھ سگریٹ چیوان۔ پننس صحتس گژھہِ واتُن۔ ییتہِ کُس چھُو پنن۔ بہ ترٲوتھس دِلہِ ، شُرۍ سوزۍ تھکھ بورڈِنگ سکول۔ پانہ چھِو یمن دفترۍ ملازمن منزہور کاو ہوۍ۔ یتھنہ کانہہ لاپروٲیی کٔرِو۔ شیٹھہِ پتہ گژھہِ۔۔۔»

« پوسی، بس کر وۅنۍ۔۔۔ او۔۔۔ آے ایم سواری۔۔۔ آیی مین شگفتہ لدھیانوی۔ یی چھی نا ونان نیبرہ؟ »

«اوٚڈے ووٚنوہ۔۔۔ مس شگفتہ لدھیانوی!»  تمہِ تھٲو تس پھیکس پیٹھ نٔر۔ تہ جی ایم صٲبن تھاویاس پننۍ نٔر شانن پیٹھ، مگر سۅ گٔے کھٕرِ بۅن بۅن وسان۔ کمزوری کنۍ کِنہ تمہِ مۅکلوو وارہ وارہ پان۔ تس اوس تمۍ سند مشک کھران۔ پیٹھہ اوس وُنہِ تس سران کرنے۔

«خبر کوٚت گوٚو یہ اڈہ ژوٚٹ! ژیر گوٚژھ نہ گژھُن۔ گۅڈہ چھا کم بیرہ آسان وۅنۍ ایر پورٹس پیٹھ۔ اتھ بنیوو وۅنۍ ریلوے سٹیشن۔ بلاے ینۍ یمن پرایویٹ فلایٹن۔ وۅنۍ چھہِ یم بہٲرۍ مزور تہِ جہازن کیتھ تران۔»

« اڈہ ژوٚٹ۔۔۔!» جی ایم صٲبس ژوٚل اسُن نیرِتھ۔ سۅ ٲس داراب صٲبس اڈہ ژوٚٹ ونان۔

«اڈہ ژوٚٹ ونس نہ تہ ادہ کیا! مجید ہے ناو اوسُس تہ تھوونے تخلص داراب۔ وزن تام چھُس نہ سیدان۔ گوم وۅنۍ داراب صٲب۔ مجید وانی۔ ہٕنہہ!۔۔۔ اڈہ ژوٚٹ!»  تمہِ و ون ‹اڈہ ژوٚٹ› لفظ ٹاٹھنیارہ سان۔ ‹اڈہ› ونُن مگر ‹ژوٚٹ› وولُن سینس منز۔

«مہ آسُن پھوتہِ تُلان۔ بچور سٲرۍ سے چھُے یۅہے واتان۔ نتہ کُس پھیرِ ہی پتہ پتہ۔ میہ نہ چھیم فرصت تہ نہ شوبیم یتھ وٲنسہِ منز۔ چانی وٲنسہِ آسہِ شاید۔ تہ کار تہِ چھُو کُنُے۔»

«اڈہ ژوٚٹ۔ یہ اڈہ ژوٚٹ میہ تہِ زہ ژور ؤری کونس۔ یہ بننوو تھن ژیۍ سینیر منیجر ، نتہ أمۍ سنزِ وٲنسہِ چھہِ لُکھ نوکری ژھاران آسان ۔۔۔ گۅڈہ کم جوکر چھا یہ اڈہ ژوٚٹ! نان ویج جوک تہِ چھُے بوزناوان۔ یہ چھا کھوژان کٲنسہِ۔ جوان کورِ چھس پتے آسان۔ مشٲعرن منز چھس آٹو گراف ہیوان۔ یہ نے بہ أمس پیٹھہ آسہا، خبر کر آسہے پننہِ خاندارنہِ تہ دۅن شُرین ترٲوِتھ ژوٚلمت۔»

«نہ نہ تہِ دی زیس نہ کرنہ۔ میہ چھُے أمس ووٚنمت زِ تنخواہ ٲسۍ زِیمنے سوزان۔ أمس چھہ ٹی اے ڈی اے منزے پانس کیت واریاہ۔۔۔ وچھتہ ، ٹو ٹاک آف دِ ڈیوِل۔ ہُہ کیا چھے پکان اٹیچی ہیتھ۔»

مس شگفتہ لدھیانوی دِژ دارِ کنۍ نظر۔ بتھُس پھیورس زیادے رونق۔ داراب صٲب اوس گوٚب اٹیچی ہیتھ زیٹھہِ لانہ اپارِ گیٹہ اژان۔ سیکیورٹی والیو کوٚرس نہ مدد۔ تمۍ ترٲو اٹیچی ہنز ٹرالی یلہ تہ پکنٲون ٹایلہ ترٲوِتھ پاتھس پیٹھ کھکھرِ۔ ہوٲیی اڈک شور ہیو ووٚتھ، مکانہ کس د ویمس پورس منز تہِ گریزیوو ۔

«یہ ونتے ژیہ تھٲوۍتھا پننۍ چیٖز وارہ پٲٹھۍ؟ یتھنہ مشِتھ آسی کینہہ گوٚمت! میہ کڈنٲوی سارنے نظمن ہندۍ پرِنٹ آوٹ دفترہ ۔ تم چھی تتھ بلو فولڈرس منز ۔ پین ڈرایوِ منز  تہِ تھاوۍ مے تہ سی ڈی منز  تہِ ۔ »

«شکریہ۔ ویسے أمۍ اڈہ ژٔٹۍ تہِ چھینم نظمن ہنز اکھ سافٹ کاپی دِژمژ۔ »

«میہ تھٲوۍ مے‹ماہِ نو› ، ‹آجکل› تہ ‹بیسویں صدی› ہندۍ کینہہ پرٲنۍ شمارہ اٹیچی منز۔ خبر کُنہِ جایہ ما گژھکھ بند۔ غزل چھہِ پتھ وتھ ہوی۔ پیٹھہ تتہِ چھہ نہ کانہہ سنان کسند کیاچھہ۔یاد چھُیہ پرُس تتھ انڈیا انٹرنیشنل ہالہ کس مشٲعرس منز کٲتیاہ داد میلی! ژیہ پزی میون شکر گزار روزُن۔ تمہِ دۅہہ ما اوسے یہِ اڈہ ژوٚٹ سیتۍ!»

«بس کٔرِو وۅنۍ۔ آمتے چھہ بعضے، دۅہے ما چھس تھپھ دوان کٲنسہِ ۔ پتھ گوٚوانسپایریشن۔۔۔ »

دروازس نیبرہ کنہِ کٔر داراب صٲبن ژاس، حالانکہ دروازہ اوس یلے۔ سہ اوس اڈیڈاس جین، آسمٲنی رنگہ ہایی نیک تہ بلُو کوٹ لٲگتھ اڈہ ژوٚٹ گژھن لایق گوٚمت۔ وۅزل بُتھ تہ کاوہ پکھہ ہیو مس۔ بِلہ أچھن منز ٲسس بدلے شرارت۔ اتھس کیتھ اوسس آیی فون۔

جی اےم صٲبن ترٲوس ہیرہ بۅن نظراہ۔

« گُڈ مارننگ سر! »

« گُڈ مارننگ۔ داراب صٲب گرم پہن جیکیٹ لٲگۍ زِہے۔ تٍر چھے سخ۔»

«سر۔ میہ چھیہ نہ پوران تٍر۔ پیٹھہ یہ تٍر چھیہ صرف ایر پورٹس تام۔ پتہ چھہ وشنیرے وشنیر۔ سر، دپیومو تہۍ تہِ تٔرِو ہفتہ جوراہ ۔حیدر آباد  چھہ وندس خۅش کران۔»

«نا بہ ہا چھُس ییتی ٹھیک ۔ میہ چھہ ییتہِ وشنیرک جان انتظام ۔ میہ چھا پر گی کنِچ۔»

جی ایم صٲبن ترٲو دارابس نیجن أچھن منزسٔنِتھ نظر تہ دارابس پھوٚل وٹھن پیٹھ اسُن۔ جی ایم صٲبن لوگ زِٹھۍ آیہ ونُن۔ «دِلہِ وٲتۍتھے کوٚرتھ میہ فون۔ تہۍ وٲتِو ٲٹھہِ بجہ شام تام۔ میہ روزِ سخ فکر یوٚت تام تہۍ گُڈ گاوں فلیٹس پیٹھ وٲتِو۔ میہ چھوہ  تتہِ سورے سامان تھوومت۔ أمس ہا ٲسۍ زِ دۅہے خبر ہینہِ یوان۔ یمن میڈن پیٹھ چھا بروسہ۔»

« تھینک یو، ڈارلنگ۔ فار ایوری تھِنگ۔» شگفتن ووٚن ڈریسنگ ٹیبلس نش میک اپ درست کران کران۔ تمہِ تھوو کیہتام کیہتام بریف کیسس منز تہ پِلنووُن بریف کیس دارابس کُن۔ دارابن روٚٹ یہ نہایت ہوشہ سان زن کینہہ ٲویل زٲویل چیز اوس۔

«سر بہ کوتاہ دورے چھُس تتہِ پیٹھہ۔تتہِ پیٹھہ چھہِ آٹوہس منز صرف ہتھ رۅپیہ لگان۔ وۅنۍ چھہ میٹرو تہِ ۔ یہ کُس مسلے چھہ ۔ بہ آسہ شامن ژیرۍ پننس ڈیرس پیٹھ گژھان۔ بے بی جان ٲسم وُنۍ فون کران۔ دپان ٲس بہ واتہ أزۍ گڈگاوں۔»

« تس ہا چھہ چانہ میڈمہِ ہند سخ سریہہ۔ نتہ چھا کور وۅرہ ماجہِ زانہہ پننۍ مانان۔»  جی ایم صٲبن ووٚن چندہ منز ہ آیی پییڈ کڈان تہ سکرین نژناوان۔

« سۅ چھیہ  میہ ساروے کھۅتہ ٹٲٹھ ویس۔ ادہ ؤری ژور پانژھ زن چھیم کٲنسے۔ مگر سۅ چھیم ممی ونان۔»

«سر ۔ پلیز ڈونٹ ؤری۔ بہ گژھس جے این یو تام سیتۍ۔»  دارابن ووٚن نہایت اعتمادہ سان۔

شگفتن ترٲوس پر اسرار نظر بتھِس کُن۔ داراب دراو کُٹھہِ منزہ۔

«وۅنۍ بیہہ میہ نش تہِ برنزاہ۔ آیی لو یو پوسی۔ آیی شل مس یو۔ ژہ چھکھ پانس نیران تہ میہ چھکھ یاد للونۍ تھوان۔»

« آیی لو  یو ٹو ڈارلنگ! تہۍ ما کُنۍ زنۍ تنگ یوان؟»

«نو آیی لو مایی لونلی نیس۔ ۔۔ تہ بییہ چھا میہ فرصت۔ ؤنۍ آسنم کھیجو کھیجو ملٲزم پکان۔ یمن چھا کم مسلہ۔ میہ چھہِ پتمس جی ایم سندۍ سٲری کنڈۍ گالنۍ۔ سیٹھا کنڈۍ چھِن نوٚو رٲوۍ متۍ۔ سٲرۍ سے چھیم پننہِ آیہ ترتیب دِنۍ۔ ٲخر پنن پنن پرسیپشن۔ یمے لُکھ اوترہ تام اتھ وۅلہرشہِ ۂر ۂر پلناوان ٲسۍ ، تمے چھِہ فریٲدۍ یوان زِ تمن کوٹھن سپد سیٹھا ظلم۔ »

« انُکھ بلاے۔ شامن شامن کیا چھِو کران؟ » شگفتہ بیٖٹھ تس لرِ صوفس پیٹھ۔ مگر سۅ ٲس ٹینڈٮن پیٹھ۔ صحبن کوٚڈ مجبور ہیو گژھِتھ گرم گاونہ کہ چندہ منزہ دٔچھن اتھہ۔ مگر پتہ توٚگُس نہ کینہہ بوزُن امہِ اتھہ سیتۍ کیاہ کرہ۔ یتھہ تتھہ تھوونس پھیکس پیٹھ اتھہ۔ تس اوس پورہ خیال زِ أمس ما ڈلہِ میک اپچ ترتیب۔

«ڈونٹ وری۔ ماے ڈیر، آیی ایم فاین۔ اسہِ چھہ شامک سورے انتظام کوٚرمت۔ ہُتھ وارڈروبس لرِ المارِ منز وچھتھُے نہ میہ کیاہ کیاہ چھہ تھوومت۔ بییہ گژھہِ میہ میوزک آسُن۔»

«میہ توٚر نہ فکری یم ترواہ دۅہ کپٲرۍ ژٔلۍ۔ خٲر ۔۔۔ آیی ایم کمِنگ اگین۔ تورہ ما چھُو تارُن کینہہ؟»

« تۅہہ چھہِ میٲنۍ ٹیسٹ معلوم۔۔۔ یہ خۅش کری۔ توٚتام آسہِ وندہ تہِ مۅکلیومت۔ ۔۔ او کے!» صحب ووٚتھ تھوٚد۔  پتہ ؤژھ میڈم تہِ۔

«اِٹ از گیٹِنگ لیٹ۔ از کل ہے وۅنۍ ملاقات سہل چھہ۔ پلیز ہفتس منز ٲسۍ زِ اکہ لٹہِ سکایپس پیٹھ یوان۔»

« وۅنۍ مہ کر میہ نیران نیرا ن ایمبیرس۔»

«نیر وۅنۍ۔ یہ بچور کوتاہ پراری۔ یہ آسہِ بۅنہ کنہِ ہانیومت تٍرِ سیتۍ۔ تاپہ یاوہ! »

« پراہ گژھیس۔ یہ چھہ گُپن۔»

‹ گُپن› بوزِتھ گیہ جی ایمس عقلہ بکل۔ سہ گوٚو بدلے کمن غۅتن۔

یہ ؤنتھ پھیور صحب ہوم تھیٹرس کُن، تہ کوٚرن آن۔ میڈم ٲس کمرہ منزہ درامژتہ ٲس ہیرن وسان۔ صحب ووٚتھس پتہ پتہ۔

سہ زن اوس گرم پلوَن منز گۅبیومت ہیو۔

دارابن آسہ ساریۍ اٹیچیہ ٹیوٹا اِنووا چہ ڈِکی منز برِ مژہ۔ تہ پانہ اوس تنبلیومت ہیو اتھہ موران۔ شاید وشنیر باپتھ۔

میڈم بیٹھ منزۍمہِ سیٹہِ۔ داراب بیوٹھ فرنٹ سیٹہِ۔ سہ اوس ایر ٹکٹہِ چندہ منزہ کٔڈتھ وارہ پٲٹھۍ وچھان۔

بٲژو دِژ نیرہ وُن نیرہ وُن اکھ اکس کُن فلاینگ کِس۔

تہ گٲڈۍ دراے گۅڈہ وارہ وارہ تہ پتہ تھٲرڈ گیرس منز تہ پتہ فورتھ گیرس منز۔

کمرس منز ٲس وِٹنی ہیوسٹن زن چکہ دوان۔

« کنجرٲنۍ ! مٔرِتھ تہِ نہ تھپھ تُلان!» صحبن کوٚر میوزک بند۔

زیوٹھ سگریٹ زٲلتھ لوٚگ پننہِ کمرکۍ تم سٲری چیز پننہِ پننہِ جایہ تھونہِ یم پتمین دۅن ہفتن ژورِ ٲسِن تھٲوۍ متۍ۔ سہ اوس ژیر تام کنُے زوٚن پنن کمرہ شیران ۔ زن سہ اتھ دوبارہ شوژ کران اوس۔

زمرے:افسانہ

جواب دیں

Fill in your details below or click an icon to log in:

WordPress.com Logo

آپ اپنے WordPress.com اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Google+ photo

آپ اپنے Google+ اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Twitter picture

آپ اپنے Twitter اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Facebook photo

آپ اپنے Facebook اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Connecting to %s