شاعری

ٲٹھ غزل — رفیق راز


1

لجم چھگ کوترس پے چھا بہ کوٚت لاریوس اسمٲنی
یہ ما از بے مکانس لا مکانچ میج دربٲنی

پھلتھ آمتۍ چمن برجستہ جلون ہندۍ برے گژھۍ تن
میہ کیا میانین اچھن ازلے چھیہ آمژ لیکھنہ حیرٲنی

خزانن کھول یا فتاح بر دامانہ دٲرتھ چھی
ژہ چھکھ قٲدر ہیککھ بخشتھ ژہ درویشن تہِ سلطٲنی

اچھن ہندۍ ژانگۍ روشن چھم تہ سینکۍ داغ تاباں چھم
چھہِ پراواں خال کانہہ اکھ ملک ظلماتچ یہ سلطٲنی

شبس ما نیرِ گشتس باغ رضوانک ہوا ناگاہ
پھلتھ ما ین دلکۍ دٔدون کمالس پیٹھ چھیہ ویرٲنی

تہہ و بالا جہانس گوٚو تہ ڈج ترتیب سیارن
قیامت عشقہ والین زلف پیچانچ پریشٲنی

پلن چھاواں پننۍ سیمابۍ تن آب رواں آرک
یواں وجدس کراں رقصس اندر کمۍ سنز ثنا خوٲنی
__

2

یتھ زمینس پیٹھ کھسن عرشکۍ نظارہ
باغ تے بستاں گژھن گۅڈنیتھ وجارہ

منظرا ہیو بود سپدکھ نا ژہ یارہ
چشمہ چھس تھاواں وژھے چانے امارہ

خواب وچھنک ما طمع چھے دل ہشارہ
نندرِ منز روزکھ رُحس واتی ددارہ

سانہ شہرچ خاک نا روزاں قرارہ
گوٚو کٔرتھ واوس قلندر کس اشارہ

وچھ أنس شہرس اندر میۍ دیدمانہ
اہل نظرن ونۍ دواں ژھیونمت نظارہ

آب دریاوک پکاں گوٚو کھۅکھشہ کھۅکھشہ
رودۍ پتھ کن تریشہ ہتۍ دۅشوے کنارہ

چھس زمینس پیٹھ بہ پریزلاں نب کہ آیہ
چھم سکوتس کس جراں روشن ستارہ

ژھٹھ پتو لاکن کڈتھ  گوٚو گامہ گامہ
نار دیت کژتاں زنیو گۅڈنیتھ شہارہ

گوٚو تہ گوٚو بنجر زمینے آبہ دادِ
گوٚو تہ گوٚو پاتالہ بزۍ ہلکارۍ آرہ

پیوس زن حیران سپدتھ آسمانہ
یتھ زمینس پھیورمت نیجر دوبارہ

بے سبب رح کِس سیکستانس بہ پھیرہ
روومت کیاہ تام چھم کیاہ تام ژھارہ

سون سوچن سون لیکھن گوٚو نہ ضایع
آیہ تبدیلی زمانس وارہ وارہ

از تہ دیدن تل میہ چھم اوبرک سہ ٹکرہ
روٹہ گوٚو گۅڈنیتھ پتو گوٚو پارہ پارہ
__

3

یس شولہ ناوِ چشمہ سہ نارے چھہ گم تہ غیب
چشمن گمژ چھیہ لاے خمارے چھہ گم تہ غیب

میلیس پنچ ذکات تہ رٹنس چھیہ پام کیا
وہرتھ چھہ لنجہِ کل تہ بہارے چھہ گم تہ غیب

درایوو کاروان تہ ووتے نہ منزلس
وونٹو تجاو یس سہ غبارے چھہ گم تہ غیب

یس وحشتکۍ چراغ اچھن منز دزان ٲسۍ
وۅنۍ جنگلن اندر سہ شکارے چھہ گم تہ غیب

درایوو کرنہِ طے سہ بیابان کوہ تہ ون
یم کۅہ تہ ون اتی چھہِ سوارے چھہ گم تہ غیب
__

4

زندہ وٲرث چھہِ وراثت نہ کنی
ییژ مشہور عمارت نہ کنی

لکھ وتن پیٹھ چھہِ اچانک تہِ مراں
صور بوزاں چھہِ قیامت نہ کنی

یۅس پراں چھکھ سۅ کہانی چھیہ اپز
یۅس پرنۍ گژھ سۅ عبارت نہ کنی

صاف تحریر مگر بے معنی
استعارا تہ علامت نہ کنی

کیا کراں چھس بہ گۅپھن غارن منز
چھس ولی ہیو تہ ویلایت نہ کنی

خونہ سیتٮن یہ زمیں گوٚو نہ سۅرخ
ٲخرس لج یہ شہادت نہ کنی
__

5

اچھن منز سہ منظر گرفتار کوٚر
شبس زونہ گاشس سیہ کار کوٚر

ضمیرا شۅنگتھ خوفتہ چھم در بدن
یہ ما کٲنسہ پیرن تہِ بیدار کوٚر

پتو کوٚر میہ وعدس خلافے خلاف
میہ گۅڈنیتھ بلا ووٚن تہ یقرار کوٚر

رنے متۍ اچھر ٲسۍ در دست من
خدایا گواہ چھکھ میہ اظہار کوٚر

سلاما پھرم کیا یہ بعد از نماز
یمین ویسارک میہ دیدار کوٚر

سلاما کٔرتھ پیوٚو میہ نیرُن پوٚتے
نہ تمۍ معذرت کٔر نہ اقرار کوٚر

خزانا تہِ میولم نہ یوتاہ کھنتھ
مگر قوبووس منز یہ شہمار کوٚر
__

6

باساں چھہ ٲنتھہ روٚس یہ بیاباں میہ تنگ ہیو
ژھاران چھس جہات نوی از ملنگ ہیو

روشن یہ کیتھ الاو دلس منز چھہ کیا پتاہ
یتھ شینہ رٲژ منز تہِ وہاں چھس بہ کنگ ہیو

بتراتھ زنتہ اتھرِ کھیمژ پرانۍ ژادرا
اسمان زنتہ روٹہ گوٚمت اوٚبرہ لنگ ہیو

فوجس وۅں گوٚژھ نہ فوج کشی ہند حکم یہ دین
فوجک کمان دار چھہ تیمور لنگ ہیو

پانس نیبر تہِ اوس نہ امن و امان کینہہ
پانس اندر اژتھ تہِ لڑُن پیوم جنگ ہیو

ییتنس ہیکو اپور تٔرتھ گرۍ تہ وونٹ ہیتھ
وسوُن یہ آرہ یارہ ییتی نس چھہ تنگ ہیو
__

7

دلبرو شمشاد ژے چھکھ ژے قداور ژے سرس
تاپہ کراین منز خبر چھا باگہِ یی شہجار کس

چھس شہنشاہ پانہ سے پیٹھ چھم حکومت چھس رعیت
پانہ چھس فریادۍ پانے چھس مگر فریاد رس

طاقچن پیٹھ کر سنا یژۍ کالۍ پریزلن نوۍ شمع
کرسنا دستک سہ دی نوزک اتھو پرٲنس برس

یُس ہما شنیا تہِ گژھۍ تھے رزقہ دانو سیر کوٚر
تس ہما سنز ژھاے ما پیمژ فقیرو یتھ گرس

ونہِ تہِ چھا آثار شہرس منز جنونکۍ عاشقن
ون تہ جنگل چھا جٔرتھ پلوس پوشاکس یس و تس
__

8

بٲژو ورٲے ہایہِ چھہِ کھے متۍ مکانہ کٍتۍ
شہرس اندر تہِ وچھ میہ سکوتکۍ ٹھکانہ کٍتۍ

بس مسلہ خوفناک وتن ہند چھہ بییہ نہ کینہہ
گہلس ونس اندر چھہِ متٮن کتۍ خزانہ ‎ کٍتۍ

یتھ سر زمینہِ زلف خمن ہند شہل بدس
یتھ سر زمینہِ پیٹھ چھہِ گنڈتھ شٲمیانہِ کٍتۍ

یمنے وتن میہ آخ پدین ہندۍ تھوم جٔرتھ
تموے وتو وۅں قٲفلہ سپدن روانہ کٍتۍ

سے داغ از تہِ نور ژھٹاں آفتاب ہیو
موسم چھہ سے تہ درایہ پوٚتس پتھ زمانہ کٍتۍ

اچھ مچھ ٹوتھ مہ روز نبک زول وچھ تہ سن
خوابس اندر سہ یار چھہِ وچھنکۍ بہانہ کٍتۍ

سوزان چھکھ سراج منیرس ژہ کٔژ درود
ون آفتاب بود کراں چھکھ شبانہ کٍتۍ

زمرے:شاعری

جواب دیں

Fill in your details below or click an icon to log in:

WordPress.com Logo

آپ اپنے WordPress.com اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Google+ photo

آپ اپنے Google+ اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Twitter picture

آپ اپنے Twitter اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Facebook photo

آپ اپنے Facebook اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Connecting to %s