1

نذر کامل

گاشہ زژن ہند پھوٚت اوسس اٹہ بارِ تہ گوٚو
سۅرملۍ کاکد موٚرنم ہیرہ بۅن دارِ تہ گوٚو

کھسہ وُن شہہ گوٚو رٔے, پھوٚلۍ زخمن کم سزہ پوش
اسہ ونہِ ہۅنجہ ییلہ وچھنم یتھ بیمارِ تہ گوٚو

ژہہ دتھ نیونم یاون گمرٮن وہوُن تاپھ
اشۍ پھیرۍ زلونہِ دۅژھہِ منز دِتنم ہارِ تہ گوٚو

اکھ اکھ پھرٮکہ وُن پونپر زولن ژٲنگس پھروو
رخ کوٚرنم بنجارۍ تہِ پتمے پیارِ تہ گوٚو

یَو دیت، آمُن پننے دامنہِ لٲرتھ اوس
ژُکھ دیُن اوسس دیتنس یمہِ برٮسوارِ تہ گوٚو

ییتہ چھکرٲوِتھ شیدا تھٔونے تارکھ مال
تمۍ نیو پانس سریہ ؤٹتھ تلۍ ٹارِ تہ گوٚو
__

2

اتھہِ چھم نہ یواں نال زچن ہو تہ اللہ ہو
روٚٹنس بہ پننۍ گیرۍ بچن ہو تہ اللہ ہو

کھُر اوٚن میہ پانے ستھرہ اچن دٔترِ لدے دراس
کھرۍ دار ستھرس کیا چھہ بچن ہو تہ اللہ ہو

تیتھ کانپھ ژونم گامہ کچن پامہ ووٚتر گوم
تروٚدِ پان ترووم سۅرمہ لچن ہو تہ اللہ ہو

ژھیپہِ ژھارِ گندُن خاصہ پچن مانزِ گُلٮن واس
سے زول کوٚرم پھرایہ ہچن ہو تہ اللہ ہو

کن دیت میہ کتھن بیرہ کھچن وارِ دۅسن تل
سوٚتۍ پٍرۍ تمۍ سندۍ ببرِ پچن ہو تہ اللہ ہو

تم شام ڈلتھ وعدہ وچن درے تہ قسم چانۍ
ازتام ولۍتھے جامہ وچن ہو تہ اللہ ہو

داں مشکہ بدج کرالہ مچن چانہِ پھِریک ساتھ
پھکروو گگرو تاپہ پھۅچن ہو تہ اللہ ہو
کمہِ رایہ بیہ سۅکھ ژھایہ گچن از تہِ وپھاں پٲز
نم از تہِ تچھاں لانۍ پچن ہو تہ اللہ ہو

تیلہ ٲسۍ لولکۍ ژانگۍ بچن براندہ ہوا کالۍ
زنہ گاشہ ہٮواں از چھہ زچن ہو تہ اللہ ہو

تتھ مرگہِ شیدا میول پناہ خانہ بدوشن
یتھ وارِ نہ پھلۍ درایہ وچن ہو تہ اللہ ہو