شکیل الرحمان
زنگہِ کینہہ دۅہ برونہہ ٹاس ینہ تہ لگنہ پتہ اوس سہُ حبہ صٲب یُس آٹو وس تہِ ماتھ اوس دِوان سٮٹھاہ لوٚت لوٚت پکان۔ تسُند نیچو اوس خۅش زِ تس چھہ گۅڈنچہِ لٹہ ووٹ تراوُن۔ سیٲسی نظریہ اوٚک طرف ترٲوتھ اوس یہندِ نظریہ کنۍ ووٹ تراوُن ضروری تکیازِ نہ تراونہ سیتۍ چِھہِ غلط نفر بارسس یوان تہ لوکن مختلف کامٮو وقتہ نا جٲیز فٲیدہ تُلان تہ تمن ووٹ نہ تراونہ کس تلفس تل دباوان۔
یمو وچھ نہ کانہہ تہِ نفر پولنگ سٹیشنس کُن گژھان بلکہ ژۅپاسے کینژن جاین پولیس استادہ۔ یمن باسیوو سُنسان۔ یمن گوٚو اندازہ یم آسن کُنۍ زٔنۍ پولنگ سٹیشنس منز۔ پولنگ سٹیشنس نش واتانے گے یم ٲنتہ روٚس لٲن وچھتھ حٲرتن تہ لٔگۍ سارنے پتہ کنہِ لٲنہِ منزوۅدنہِ وارِ پیارنہِ۔
حبہ صٲب تہِ اوس نہ زیادہ وٲنسہِ شیٹھ، پانژہٲٹھ وُہُر۔ شرۍلہ منز خاندر سپدنہ کنۍ اوس بُڈۍ بب بنیومُت۔ دۅن کورٮن خاندر کٔرتھ اوسُس یۅہے کوٗنسہ کوٚٹ نیچو خاندر کرنے۔حبہ صٲب نٮن کتھن منز ٲس مُدبری صاف لبنہ یوان۔ حبہ صٲبن ٲسۍ اتھ وٲنسہِ منز واریاہ سیٲسی بدلاو وُچھ متۍ۔مثالے
“خون گوٚو جٲری۔۔۔۔۔”
” واپس کرو اے ظالمو۔۔۔۔”
” اصلی ملزم کو ۔۔۔۔۔”
” ۔۔۔۔۔۔۔۔فوراً کرو ۔”
” ہیرِ کیاہ بۅنہ کیاہ۔۔۔۔۔ ”
“۔۔۔۔۔۔ غٲزۍہےَ آو ۔”
بیترہ پیٹھ ازتام پرٮتھ بدلاو کۍ سٲری نعرہ ٲسۍ أمۍ سندس ذہنس منزپھرۍ پھرۍ پرٮتھ وِزِگتھ کران۔سہُ تہِ اوس وخ ییلہ پرٮتھ گرکۍ پٲٹھۍأمۍ سند گرہ تہِ سیٲسی بحثن ہُند اکھاڑہ بنیومُت اوس۔ پرٮتھ شامس ٲسۍ کینہہ ہمسایہ أمس اتھ منز پورِ پوٗر ساتھ دِوان۔ پنُن سیٲسی نظریہِ اوٚک طرف ترٲوتھ اوس حبہ صٲبس الیکٹرانک میڈیا عام نہ آسنہ کنۍ یمن دۅہن BBC سے اوت پیٹھ بھروسہ تہ با سان اوسُس یمے اوت زانن خبر وننۍ ۔ یہ اوس ونان ۔” بی بی سی بوزنس چھم مز یوان۔” تسندۍ واریاہ ہم خیال ٲسۍ نہ بی بی سی یس پیٹھ زیاد ہ بھروسہ کران۔ تہُند مانُن اوس بی بی سی چھہ خبرہ کیو تبصرہ سنسنی خیز بنٲوتھ پیش کرنُک مٲہر۔ تم چھِ گگرِ ہُند کن زیٹھراوان۔ یہِ حال اوس نہ ٲمۍ سُندے اوت۔ أمس ہی کتٍۍ حبہ صٲب ٲسۍ بی بی سی یکۍ فدوی۔ حال اوس یہ زِ واریاہن لوٗکن ٲس نہ بی بی سی بوزنہ وغیرنٮند ر یوان۔ تم تہِ ٲسۍ لُکھ یم بی بی سی یس پیٹھ اہم اعلانس پیٲرۍ پیٲرۍ قبرن ٲسۍ ژامتۍ۔
یوٚدوے وونۍ الیکٹرانک میڈیاہن وایس میڈیا پتھ دٲرتھ دتمُت اوس تہ FM ریڈیو کیو فلمی بٲتہ مجلسو سیتۍ اوس ریڈیو کیو ژھۅکہ وُنٮو شہو ہنا قرار لوٚبمُت۔ مگر حبہ صٲب اوس وُنہِ تہِ بی بی سی بوزان۔ ہرگاہ حبہ صٲبس بی بی سی بوزنُک وجہ پرژھہاو تس ٲس نہ پانس تہِ پے مگر بلا ناغہ اوس بوزان۔ تس اوس مارک ٹیلی، بی بی سی کارسپانڈنٹ شہر خاصک اکھ اہم بسکین باسان تہ تسندس برٹش آسنس پیٹھ اوسُس شکھے۔ مگر امہ پتہ تہِ اوس نہ مارک ٹیلی ین حبہ صٲبُن ’’ بجلی کوٗٹ ‘ ‘ بدلٲوتھ ہیوٚکمُت۔ سہُ اوس پرٮتھ تس أکس واو کران یُس پرٲنس پھیر دِتھ تتھ تعریف کرِِ ہا۔ نوِ پُیہِ ہنُد آسنہ کنۍ اوس حبہ صٲبنۍ نیچی پنُن سیٲسی نظریہ بدلومت تہ تس اوس حبہ صٲبنہِ نش الگ نظریہِ۔ حبہ صٲبس تہ تس اوس بی بی سی کس تبصُرس پیٹھ زچہِ ژٹوُن بحث گژھان تہ دۅشوے ٲسۍ اتھ پننہ پننہِ ہنہِ لمان۔
کینژِ کالہ پیٹھ اوس یمو بحثو حبہ صٲب کینہہ کتھہ سوچنس پیٹھ مجبوٗر کوٚرمُت تہ کینہہ وری برونہہ اوس حبہ صٲبُن سیٲسی نظریہ بدلیو مُت۔ سہُ اوس پتمٮن خیالا تن وۅنۍ فرسودہ سمجھان۔ تس اوس پتۍمہِ دَہلہِ پیٹھہ پنُن پان نوِ ” مر حم ” کرنکہِ نظریُک اہم جُز باسان۔ تسنزن کتھن اوس پرٮتھ اکھ دل کیو گوشو بوزان۔تمو اوس نوٚو درس پریتھ أکس دِتھ تہند نظریہ بدلومت۔ پرٮتھ اکھ اوس یہنز نوِ گیجہ گنڈنہ یوان۔
یم مٲلۍ پۅتر ٲسۍ لٲنہِ منز پیاران زِ اچانک پییہ کینژن نفرن یمن کُن نظر تہ لٲن ژٔٹتھ أنکھ یم لأنہ برونہہ کُن ووٹ تراونہِ۔ حبہ صٲب تہ تسُند نیچو ژاے پولنگ بوتھس منز بشایہ جم تہ ووٹ ترٲوتھ ییلہ واپس دراے یمن اوس بُتھس دُروے انہار۔سارنے ٲسۍ زن اپُز تسلی دوان۔
دۅشوے ٲسۍ پولنگ بوتھ پیٹھہ لگ بھگ گرہ تام ژھۅپہ دَم کٔرتھ پکان۔ نہ اوس حبہ صٲب نیچوس کُن أچھ تُلان تہ نے اوس نیچو حبہ صٲبس سیتۍ أچھ رلاوان۔ ٲخر ووچتھ أچھ بۅن کُن ترٲوتھے نیچو حبہ صٲبس کُن تہ پرُژھنس ووٹ کس ترووُتھ۔ حبہ صٲبن وونُس یہِ چھہ سِر ۔نہَ گژھِہ یہِ پرژھنُ تہ نے گژھِہ یہِ ونُن۔ نیچی کٔرس زیر زیر ۔حبہ صٲبن کوٚر اسُناہ تہ ووٚننس۔
“گوبریا بہ ہبا ژایوس کُس تام تیر مارنہِ ،ادہ اندر أژِتھ زن لۅتییم دگ تہ پانے گوم مرہم ۔ ”
یہ ونِتھ ترٲو حبہ صٲبن نیچوس کُن نظر ۔ نیچی وونُس۔
” بہ چھُس دپان میہ کوٚ ر ٹھیکھ۔”
” کیاہ؟”
یمن دۅشونی ژوٚل اسُن نیرِتھ تہ نیچی ووٚن مٲلس۔
” پزر چھہ یی زِ ووٹ کس تروو چھہ سِر۔ یہِ گژھِ نہ باوُن ۔۔ ۔۔۔۔۔ دَپھ ووٹ ترو۔ “
زمرے:افسانہ
کاشر ادبی رسالہ نیب 