بے سر وجارہ ہستی بے پایہ نیب ڈیشِتھ
ژھاین چھہ گاش گراوُن عکسس چھہ ٲنہ روشِتھ

چھکرِتھ چھہ کایناتس مرکز چھہ پھانپھلاوُن
وٹنس چھُ واو کھوژان اَکھ لا مقام بوزِتھ

انہِ گوٚٹ چھہ گاشہ دوٚدمت ادہ چھس پیمژ ژٮتس کتھ
زژِ پیٹھ پرنن چھہ چھوٚت چھوٚت نوٚو آفتاب ڈیشِتھ

وہنوو شینہ پجہ تل یمۍ تیمبرِ نارہ گوگا
وشنیر تس سرُن پیوٚو ترنیارہ پان زٲلِتھ

ترسان چھہ دامہ باپت ساقی چھہ تشنہ لب از
چیامتۍ چھہِ کھاسۍ کٲتیاہ نتہ غم گسار زینِتھ

کتجٮن چھہِ ٲلۍ گاسو واوس چھہ نار لونچن
کاوس چھہ کٲف کھوٚتمت گریشمس غبار ڈیشِتھ

دمہ ہس بہ ناو بُتھِہ روٚس احساس چھم نہ ویوٚد میہ
گونجان چھہ منز خیالن سازک نقاب لٲگِتھ