1
خبر ژیہ یاد چھیا، کُلۍ کنٮر تہ شام سفر
اکے برگ تہ ہوا، کُلۍ کنٮر تہ شام سفر

چھہ ژیر تام پکُن، بس پکُن پکاں روزُن
چھِہ دور تام خدا، کُلۍ کنٮر تہ شام سفر

یہ کُس چھہ بود اچانک گٔژھتھ سوال پرژھان
ژہ کیاہ بہ کیاہ تہ یہ کیاہ کُلۍ کنٮر تہ شام سفر

کراں وضو تہ پٮواں جایہ جایہ سجدن منز
پران حمد و ثنا، کُلۍ کنٮر تہ شام سفر

أچھو ژہ ما سا وُچھاں چُھکھ لبن کھساں سہلاب
کنن گژھان ژیہ ما کُلۍ کنٮر تہ شام سفر

وُچُھن پٮواں گرم شین، أچھن سرد باراں
کنن چھہ وتھرہ صدا کُلۍ کنٮر تہ شام سفر

دپان از تہِ تتھے پاٹھۍ دور تام وتن
چھہ میون خون سیاہ کُلۍ کنٮر تہ شام سفر

منگان اوس دعا کس شفقؔ میہ کور آمین
خدایہ کرتہ عطا، کُلۍ کنٮر تہ شام سفر
___

2
چھہ ازۍچہ رٲژ تمے آیہ، رود گردِ غبار
سۅ لٔر، ہوا تہ بہ، گگرایہ، رود گردِ غبار

رتن تہ کاڈ کڈن ییلہ ہیژاو سڑکن سیتۍ
تمام لوکھ گرن ژایہ، رود گردِ غبار

أسی بچایہ أسی بس سیاہ شہرس منز
اسی چھہ خونہ لٮکُھن، بایہ رود گردِ غبار

وتن کۅلن تہ لبن، آب، آب، آبے آب
پشن وسان چھہ بے وایہ، رود گردِ غبار

تمے مکانہ، تمے لوکھ، شیٖنہ رٲژ تمے
تمے بلایہ، تمے ژھایہ، رود گردِ غبار

دپاں چھہِ مار کرن نار دِن گرس میٲنس
دپاں چھہِ میانہ گرے درایہ، رود گردِ غبار

شفقؔ پران چھہ شہرن تہ سبزہ زارن منز
ہوا لٮکھان چھہ آیہ آیہ، رود گردِ غبار
___

3

عقل پجِس نہ گرفتار گوٚو بلاین منز
دپان اوس زِ محفوظ چُھس بہ باین منز

ؤلِو سیاہ جھنڈن ہند جلوسہ أسۍ تہِ کڈو
ؤلِو تلاش کرو ژھاے أسۍ تہِ ژھاین منز

یہ کُس پکان چھہ زولانہ ہیتھ تمام شبس
یہ کُس چھہ قید گوٚمت خواب ہیو قلاین منز

بہ دراس راتھ ہنا دور شہرہ نش تہ وُچھم
قدیٖم لوکھ وناں داستاں سراین منز

چھِہ تارکولہ لٮکھاں تِم پنُن مقدّر وۅنۍ
تہ راتھ تام گنداں ٲسۍ کاہچراین منز

اگر دِلن تہِ شہر أسۍ ونو تہ تیلہ چھہ یہ حال
کرایہ دار بساں وۅنۍ تمام جاین منز
___

4

ہٮنہ والہِ پزی پٲٹھۍ ژہ ون سٲنۍ کنِتھ آے
بازار دپاں راتھ پُرَن سٲنۍ کنِتھ آے

کُلۍ ٲسۍ تہ بلۍ ٲسۍ تہ زرۍ تہ ژھرۍ ٲسۍ
تمہ لُکھ تہ لفظ سٲنۍ، سُخن سٲنۍ کنِتھ آے

افسوس زِ دارٮن تہ برن ناو لیٚکھِتھ رودۍ
افسوس زِ دارٮن تہ برن سٲنۍ کنِتھ آے

یمہ خاب مژِھلۍ ٲسۍ، رسلۍ ٲسۍ، رچھنۍ ٲسۍ
پے اوس تمے خواب کنن سٲنۍ کنِتھ آے

گر ٲسۍ نہ حاجتھ تہ وتن آیہ خریدار
گر رودۍ تِتھے پٲٹھۍ وتن سٲنۍ کنِتھ آے

بازار یُتھے لوٚگ تہ یمن توٚگ تہ تمن توٚگ
تم لوکھ، تمے لوکھ، چمن سٲنۍ کنِتھ آے

___

5

ٹھس گوٚو برس تہ ژاو، دپاں واو اوس بس
انہار چانہِ کالہ پکاں واو اوس بس

یلغار برونہہ دپان خبر مخبرو یہ دِژ
تمہِ شہرہ جایہ جایہ وۅتھاں واو اوس بس

میہ تہِ گوٚو تِتھے گمانہ زِ شہمار وتھۍ مگر
دیوارہ ژھایہ ژھایہ کھماں واو اوس بس

اسہِ وچھ أچھو تمام شبس دور دور تام
موٚت ہیو پکاں تہ نار پھکاں واو اوس بس

درویش اسہِ تہِ اوس وناں کالہ چھو سا پے
اسمانہ ؤژھ بلایہ وچھاں واو اوس بس

دریاو سوٚن تہ ناو کُنی ناوِ منز پری
غٲبی یواں تہ ناوِ لماں واو اوس بس

اسہِ ژوٚٹ فصل کھہن تہ یتھے شین پیوٚو شفقؔ
کتہِ تام پرٲنۍ بٲتھ گٮواں واو اوس بس
___

6

سبز آبہ جۅیا پزی چھا سا نیران
تتٮن زونہ گاشس پری چھا سا نیران

ژہ تے چھکھ نٮصف رٲژ آواز بوزان
ژہ ون أسۍ گرو منزہ بلی چھا سا نیران

شبس چھا سا آساں تتُھے گرٮز مٔشیدن
تہ موجاہ بنیاہ کانہہ کُنی چھا سا نیران

سہ چھا کتھہ کران از تہِ کیاہ پانسے سیتۍ
سُہ پاگل تِتھے پٲٹھۍ أندی چھا سا نیران

یہ ونتم دلس منز ودُن ہیو گژھاں کیُتھ
مکیں ییمہِ گرُک ٲخری چھا سا نیران

دۅہس چھا سکولن گژھاں شرۍ تِتھے پٲٹھۍ
تہ گشتس شفق آرمی چھا سا نیران
___

7
وۅتھاں پکاں تہ وچھاں، دۅہ تہ راتھ، زون آفتاب
عذاب سٲنۍ لٮکھاں، دۅہ تہ راتھ، زون آفتاب

دپاں چھہ خوابہ سمندر، سیاہ جزیٖرہ اپٲرۍ
سمندرس چھہِ کھساں، دۅہ تہ راتھ، زون آفتاب

توے چھیہ خاک پیمژ ناگہ رادہ کٮن خیمن
تتٮن غبار تلان، دۅہ تہ راتھ، زون آفتاب

ورق ورق چھہ عیاں سانہ قسمتک احوال
اچھر اچھر پراں، دۅہ تہ راتھ، زون آفتاب

دپاں یپٲرۍ سیاہ سٮکھ چھرا وجارن منز
دپاں ہپٲرۍ وزاں، دۅہ تہ راتھ، زون آفتاب

ژۅپٲرۍ واو وۅتھاں لُکھ ژلاں تہ خواب دزاں
عجیب جایہ سماں، دۅہ تہ راتھ، زون آفتاب

پرژھاں چھہ بال زِ ییمہِ دردہ گامہ کنۍ نیرِتھ
وٹسۍ چھِہ کیازِ گژھاں، دۅہ تہ راتھ، زون آفتاب
___

8

خاک برسر یتھ زمینس آسماں بس اکھ غبار
کاروانس ہر طرف آلو دِواں بس اکھ غبار

داستانس منز سیکستاں، منز سیکستانس دپاں
اکھ الاوا یتھ الاوس منز وہاں بس اکھ غبار

واو ووٚتھ وحشی ونَس، آواز گٔے، گگراے گٔے
دراو گاراں میانہ شہرک پے پرژھاں بس اکھ غبار

یتھ بیابانس ہوٚکُن پرخواب ژھاین ہند شہر
شہرہ چن پرانٮن قلاین منز وۅتھاں بس اکھ غبار

رٲتۍ راتس پتھ عذابن میٲنۍ تن وٮتراں کُنی
اکھ لہر قدمن ژہاں چشمن شرپاں بس اکھ غبار

سٲرۍسے راتس کھساں سہلاب دیوارن شفقؔ
سٲرِۍسے راتس کنن میانٮن گژھاں بس اکھ غبار
___

9

شمشاد رادہ آبہ جوین ٲنہ خواب ٲسۍ
تم لوکھ بایہ زون تہ بییہِ آفتاب ٲسۍ

ناگہہ سۅ زون دراے، پری زاد ناگہ کھتۍ
اسہِ وُچھ أچھو زِ ٲنہ پٹٮن پیٹھ گلاب ٲسۍ

اسہِ وُچھ وتن غبار وۅتھاں دور دور تام
اسہِ وُچھ نبس کھساں ژٔندر بے حساب ٲسۍ

اسہِ تھپھ دِژکھ تہ غیب کٔرِکھ نٲگۍراے ہوۍ
أسۍ لوکھ ونتہ کمہِ سا نبکۍ ماہتاب ٲسۍ

تٔتھۍ بونہِ آسہِ یاد تہ تٔتھۍ بونہِ أسۍ پرژھو
کتہِ لُکھ ودان ٲسۍ، وزاں کتہِ رباب ٲسۍ

___

10

یہ کُس دِواں چھہ صدا تیز کارواں والیو
قدم تُلِو سَا ہنا تیز کارواں والیو

گناں چھیہ راتھ تِتھے پٲٹھۍ کُلۍ پران ہو ہو
خماں چھہ از تہِ ہوا تیز کارواں والیو

نندر پیمژ چھیہ کُلٮن تل کمن حدی خانن
رجز پراں چھہ صبا تیز کارواں والیو

اگر نہ بوز تہِ گوشو صدائے بانگ جرس
چھہ بوئے گُل تہِ ندا تیز کارواں والیو

سہن چھہ دورِ دواں پے مشک سوارٮن ہند
رکو تہ وار چھما تیز کارواں والیو

سفر چھہ خانہ بدوشن گمژ الاون ژنۍ
سمے فقیر خدا تیز کارواں والیو
___

11

تس ٲس نٲلۍ خابہ ردا، زیٹھ تے سیاہ
پے چُھم سۅ راتھ ٲس سیٹھا، زیٹھ تے سیاہ

یتھ سڑکہ کیازِ میٲنۍ ونن شامہ سے گمژ
ہے دور دور تام یہ کیا، زیٹھ تے سیاہ

اسہِ ٲسۍ ژھایہ سدرہ ملر، واو، بے صدا
امہِ کھۅتہ تہِ آسہِ راتھ پگاہ، زیٹھ تے سیاہ

پوٚز گوٚو زِ اسہِ تہِ اوس عیاں رٲژ ہند سہ حال
پوٚز گوٚو زِ اسہِ تہِ اوس پتا، زیٹھ تے سیاہ

یا گوٚو زِ تم تہِ کالہ وُچھن ژھاے سٲنۍ پٲٹھۍ
یا گوٚو زِ اسہِ تہِ ہایہ خدا، زیٹھ تے سیاہ

کُس تام شیشہ خواب جٔرِتھ اوس نیہہ گٹن
کمہِ تام طرفہ آیہِ صدا، زیٹھ تے سیاہ

دۅنوے قبیلہ ٲسۍ کراں راتھ سُے بحث
ونۍ تو قلایہ زانہہ تہِ وۅتھیا، زیٹھ تے سیاہ