منیب الرحمن

یہ چھہِ اسۍ مٲنتھ زِ عروضچ بنیاد چھیہ حروف ملفوظی ین پیٹھ۔ یمہ ساعتہ اسۍ یہ تسلیم کران چھہِ ، اسۍ چھہ یکدم صوتیات کس میدانس منز قدم تراوان۔ صوتیات چھہ زبانۍ ہنزن آوازن ہند اکھ باضابطہ علم۔

یہ ونن زِ خلیلس کیا ٲس نہ زبانۍ ہنزن آوازن ہنز زان چھیہ سراسر خلیل ناشناسی تہ لاعلمی۔ کلاسیکل عربی صوتیات چھہ دراصل حرف کس پیچیدہ، کثیر سطح تصورس منز پوشیدہ۔ اتہِ چھہ نہ ہیجلیک بلکہ ماتراہک (mora)تصور زیادہ کارگر۔ یہ تصور چھہ عربی عروضس منز تہِ بنیادی حیثیت تھاوان۔ شعری آہنگ چھہ زبانۍ ہنزن خصوصیژن ستۍ تعلق تھاوان، لہذا چھہِ وزن (وزنہ نظام یا عروض) تہِ یمن خصوصیژن مثلا تاکیدس، ہیجلس، ہیجلٮن ہند ژھۅچرس زیچھرس، ماتراہن بیترِ اندۍ پکھۍ کھڑا کرنہ آمتۍ۔ یعنی وزنچ چھیہ نہ کانہہ آفاقی بنیاد۔ ییتہ کینژن زبانن منز ہیجل چھہ، کینژن منز چھہ تاکید، کینژن منز دۅشوے، ییتہ کینژن زبانن منز ماترا چھہ، کینژن منز چھہ بدل کانہہ معیار۔ ضروری چھہ زِ عروض علاوہ گژھہِ زبانۍ ہنزن خصوصیژن ہنز تہِ زان آسنۍ۔ مثلا ہیجلۍ تشکیل، صوتیاتی عمل تہ صوتیاتی تبدیلی بیترِ ۔

ینہ والٮن صفحن منز کرو اسۍ کینژن اہم وزنہ نظامن ہنز زا ن صوتیات کٮن یمنے تصورن ہندِ ذریعہ پیش تاکہ عروضی بحثس میلہ اکھ نوٚو تہ صحیح انہار۔ تہ عروضس متعلق نیم حکیم خطرہ جان واجنۍ صورت حال گژھہِ دور ۔ امہ صورتحالچ اکھ مثال چھیہ پیش۔
محمد یوسف ٹینگ چھہ کلیات مہجورس منز ونان زِ مہجور چھہ "عام طور لۅژہ تہ ژھۅچہ بحرہ ورتاوان” (کلیات مہجور، صفحہ 59)۔ یہ چھیہ یا تہ مہجور ناشناسی نتہ عروض ناشناسی۔ اگر ٹینگ سند مراد وژن چھہ، تیلہ چھہ عرض زِ وژن چھہ پننہِ فارمہ کنۍ (لوٚت چھم نہ پتاہ کیا گوٚو مگر) ژھۅٹٮن وزنن ہند اکھ شعری صنف۔ کمۍ شاعرن چھہِ وژنن منز گوٚبۍ تہ زیٹھۍ وزن ورتاوۍ متۍ؟ حبہ خاتون، محمود گامی، رسول میر سارنی ہندۍ وژن چھہِ ژھۅٹٮن وزنن منز۔ اگر مراد غزل چھہ، تیلہ چھہ عرض زِ مہجور سندۍ اکثر غزل چھہِ مثمن (ٲٹھ رکنی ) وزنن منز یم زیٹھۍ وزن چھہِ۔ یمو کھۅتہ زیٹھۍ کم وزن چھہِ یم نہ مہجورن ورتاوۍ متۍ چھہ ؟ لاعلمی کنۍ چھہ اسۍ یژھنے "گٮلن” پیٹھ پژھ کران رودۍ متۍ۔ عروضس متعلق یہ پارۍ زان چھیہ امہ رنگہ تہِ ضروری۔

ہیجلۍ وزن

ہیجلۍ وزنن منز چھیہ آہنگچ بنیاد ہیجلٮن ہندس یکسان تعدادس پیٹھ آسان۔ ہیجلۍ وزن سمجنہ خاطرہ چھیہ ہیجلہِ کہ تصورچ زان ضروری۔یہ زان کرو اسۍ یتھہ پاٹھۍ حاصل:
زبانۍ ہنزہ آوازہ چھیہ موٚٹۍ پاٹھۍ دۅن قسمن منز باگرنہ یوان: مصمتہ تہ مصوتہ۔
مصمتہ چھیہ تمہ آوازہ یم ٲسس منز شہس بولن تانو ستۍ کنہِ قسمک روٚٹ، ٹھوٚر یا دباو تراونہ ستۍ بناونہ یوان چھیہ ۔مثلا /ب/، /ر/، /س/، /م/، /ی/، /ہ/ بیترِ۔

مصوتہ چھیہ تمہ آوازہ یمن ہندس پھورس منز شہس کانہہ ٹھوٚر یا دباو تراونہ چھہ نہ یوان بلکہ چھیہ ٲسہ وتھ بالکل یلہ حالژ منز آسان۔ کاشرس منز چھہِ 14 مصوتہ، یمن منز ستھ ژھوٚٹۍ تہ ستھ زیٹھۍ چھہِ۔ /اَ/، /اِ/، /اُ/، /أ/، /إ/، /وٚ/ تہ /ۅ/ چھہِ ژھوٚٹۍ مصوتہ۔ /آ/، /ای/، /اوٗ/، /ٲ/، /اٍ/، /او/ تہ /ۅا/ چھہِ زیٹھۍ مصوتہ۔

یموے مصمتہ تہ مصوتہ آوازو ستۍ چھہِ ہیجلۍ ترتیب لبان۔ یمنے آوازن ہنزن لۅکچٮن تنظیمن یم اکۍ سے شہہ ژٮلس منز بولنہ ین چھہِ ہیجلۍ ونان۔ اکھ ہیجل ہیکہِ خالص مصوتس پیٹھ مشتمل ٲستھ یا ہیکہِ اتھ منز مصوتس بتھہِ یا پتہ یا دۅشونی اندن مصمتہ ٲستھ۔ ہیجلیک منزیم حصہ یس اکثر اکھ مصوتہ چھہ آسان چھہ ہیجلیک تھوٚنگ بناوان۔
زبانن منز چھہ ہیجلٮن منز تھوٚنگ آسن عام طور ضروری۔ گۅڈہ آوازہ چھیہ زبانن منز سٮٹھا عام بلکہ چھیہ کینژن منز ضروری۔ پوٚت آوازہ چھیہ نہ ضروری۔ یمن ہیجلٮن منز پوٚت آوازہ چھیہ نہ آسان تمن چھہِ یلہ ہیجلۍ ونان تہ یمن منز پوٚت آوازہ آسان چھیہ تمن چھہِ بند ہیجلۍ ونان۔ ہیجلہِ چہ گۅڈہ تہ پوٚت آوازہ چھیہ عام طور مصمتہ آسان۔ مثالہِ پاٹھۍ نمون ہیجل "نور”۔ امچ گۅڈہ آواز چھیہ مصمتہ /ن/، امیک تھوٚنگ چھہ مصوتہ /و/ تہ امچ پوٚت آواز چھیہ مصمتہ /ر/۔ چونکہ اتھ ہیجلس منز چھیہ پوٚت آواز، لہذا چھہ یہ بند ہیجل۔ یلہ ہیجلچ مثال چھہِ لفظ "بہ” یا لفظ "ما”۔یمن پتہ کنہِ چھہ نہ کانہہ مصمتہ۔ یم چھہ مصوتس پیٹھ اند واتان، لہذا چھہِ یم یلہ ہیجلۍ۔ لفظ "بہ” چھہ مصمتہ /ب/ ستۍ شروع گژھان۔ امچ دوٚیم آواز چھیہ مصوتہ /إ/۔ لفظ "ما” چھہ /م/ مصمتہ ستۍ شروع گژھان تہ /آ/ مصوتس پیٹھ اند واتان۔

ہیجلۍ چھہِ اکثر لوٚتۍ تہ گوٚبۍ یا ژھوٚٹۍ تہ زیٹھۍ قسمن منز بٲگرنہ یوان۔ ژھوٚٹۍ ہیجلۍ چھہِ اکس مصمتس تہ اکس ژھوٚٹس مصوتس پیٹھ مشتمل آسان۔ مثلا یم لفظ چھہِ ژھوٚٹٮن ہیجلٮن ہنزہ مثالہ: [بہ]، [چھہ]، [زِ]، [تہِ]۔

زیٹھٮن ہیجلٮن منز چھہ ترییہ قسمکۍ لفظ یوان۔
(1)تم لفظ یہنز ترکیب( مصمتہ+ ژھوٚٹ مصوتہ + مصمتہ) چھیہ ۔ مثلا [بر]، [دب]، [کوٚر]، [زٕل]، [نٔر]، [کٔنۍ]، [کیُل]۔ (‘بر’ تہ ‘دب’ لفظن ہند ژھوٚٹ مصوتہ چھہ زبر یۅس اکثر لیکھنہ چھیہ نہ یوان۔)
(2)تم لفظ یہنز ترکیب ( مصمتہ+ زیوٹھ مصوتہ) چھیہ ۔ مثلا [ما]، [زو]، [تی]۔
(3)تم لفظ یہنز ترکیب ( مصمتہ+ زیوٹھ مصوتہ + مصمتہ) چھیہ ۔ مثلا [جار]، [زان]، [تیر]، [گور]، [چانۍ]، [پاوۍ]۔ (اوٚڈ /ۍ/ چھہ نہ الگ مصمتہ بلکہ امہِ برونہہ ینہ والہِ مصمتچ تالریت یعنی palatalization ظاہر کران۔) یم تریمہِ قسمکۍ لفظ چھہِ زیٹھۍ ہیجلۍ۔ فارسی عروض کنۍ چھہِ اسہِ یمن منز زہ ہیجلۍ بوزنہ یوان۔ مگر یم چھہِ لسانی طور اکۍسے ہیجلس پیٹھ مشتمل۔

ہیجلۍ چھہِ زبانۍ ہندٮن لفظن ہندۍ تعمیری ٹکرہ تصور کرنہ یوان۔ یا ونو دوٚیمٮن لفظن منز زِ ہیجلۍ چھہِ پھورکۍ بنیادی رکن۔ لفظن ہنزِ ہیجلۍ ژھٮنہ بندی ہند چھہ زبان بولن والٮن غیر شعوری علم آسان۔ وچھو کینژن لفظن ہنز ہیجلۍ ژھٮنہ بندی۔

ہیجلۍ تعداد
 1 2 3 کل تعداد
لفظ 
تن تن 1
وسۍ وسۍ 1
پیوٚو پیوٚو 1
پوٚت پوٚت 1
یاد یاد 1
دراس دراس 1
کاوۍ کاوۍ 1
ویسۍ ویسۍ 1
بییہ بیۍ (اِ) 1(2)٭
کۅنگہ کۅنگ (إ) 1 (2)٭
پتہ پت (إ) 1(2)٭
کوفورہ کو فور (ہ) 2(3)٭
دنیا دن یا 2
دادٮن دا دٮن 2
دنیادار دن یا دار 3
کمزور کم زور 2
کریمکھ ک رے مکھ 3
مارۍمندس مارۍ من دس 3
(نوٹ: /یاد/ تہ /دراس/، /کاوۍ/ تہ /دار/ چھہِ اکس اکس ہیجلس پیٹھ مشتمل۔ چونکہ فارسی عربی عروضس منز چھہِ یم دۅن حصن منز ژٹنہ یوان اوہ کنۍ گژھہِ نہ یمن پیٹھ دۅن ہیجلٮن ہند مغالتہ گژھُن۔* یتھٮن لفظن ہندۍ ٲخری مصوتہ چھہِ تقطیع اندر بشمول فارسی عروض تراونہ یوان۔ اگرچہ یمن منز تحریر کہ لحاظہ تریہ ہیجلۍ تصور کرنہ یوان چھہِ، یم چھہِ حقیقتا دوٚنۍ ہیجلٮن پیٹھ مشتمل۔)

وۅنۍ وچھوکھ بنم شعر تہ یہنز ہیجلۍ حصہ بندی:
کژتاں عاشق گامتۍ متۍ / دنیا سورے دنیا دار
ساسن دادٮن تن دتھ دراس/ اکۍ عشقن کوٚرنس کمزور
اتہِ کیا چھے کلۍ تہرس پیٹھ/ بۅن وس کٲر وٹھی ونۍ واو
تارکھ نب پیوٚو ٹھس ٹھس وسۍ/یاد کریمکھ پوٚت شامن
یمن شعرن منز چھہِ دۅشونی مصرعن منز ستھ (۷) ہیجلۍ ورتاونہ آمتۍ:

1 2 3 4 5 6 7
کژ تاں عا شق گٲ متۍ متۍ
دن یا سو رے دن یا دار
سا سن دا دٮن تن دِتھ دراس
اکۍ عش قن کوٚر نس کم زور
اتہ کیا چھے کلۍ تہۍ رس پیٹھ
بۅن وس کٲر وُ ٹھی ونۍ واو
تا رکھ نب پیوٚو ٹھس ٹھس وسۍ
یاد ک رے مکھ پوٚت شا من

بحر متقاربکۍ مزاحف وزن (مثلا پیٹھم اثلم: فعلن فعلن فعلن فع/فاع) وزن چھہِ ژکہِ ہیجلۍ وزن۔ امہِ وزنک آہنگ ورتوو امین کاملن یسلہ پاٹھۍ۔ یہ آو تسندس لۅتہ وٲے، بٮہ تکلف تہ طنزیہ اظہارس سٮٹھا براہ۔ کاشرِ زبانۍ ہندس گفتاری یا خۅد کلامی ہندس آہنگس تہِ نکھہ آسنہ کنۍ ورتوو یہ وزن کاملس ستۍ واریاہو شاعرو۔ مثلا یم غزل:
کھسوُن سریہِ تہ رامن راج
وسوُن سریہِ تہ راوُن دوٚد (نادم)
تارکھ وسۍ پییۍ لژھہِ گیہ لال
دِلہ یتھ گٹہِ منز ژے کینہہ زال (راہی)
واوس کمۍ ؤٹھ از تاں کٲر
بہتر گوٚو دِتھ تھاونۍ دٲر (فراق)

یمن سارنی غزلن ہند وزن چھہ دراصل ہیجلۍ وزن۔ وژنن منز چھہ یۅہے ہیجلۍ وزن ورتاونہ آمت۔ یعنی یتھ اسۍ پنن عروض ونان چھہِ، سہ چھہ دراصل یوٚہے ہیجلۍ وزن یس واریاہن مشرقی کیو مغربی زبانن منز ورتاونہ یوان چھہ۔ ہیجلۍ وزن چھہِ سادہ وزن تکیازِ یمن منز چھہ ژھوٚٹٮن زیٹھٮن ہیجلٮن کنے قیمت۔ ہیجلٮن تہ ہیجلٮن منز چھیہ نہ کانہہ فرق کرنہ یوان۔ امہِ خصوصیژ کنۍ چھہِ نہ ہیجلۍ وزنن منز پدۍ ۔ یعنی ہیجلۍ چھہِ نہ مزید پدٮن منز گنڈنچ ضرورت۔ پدۍ چھہِ تمن عروضن منز یمن منز ژھوٚٹٮن تہ زیٹھٮن ہیجلٮن الگ مۅل مقررچھہ، یمہِ کنۍ آہنگس منز دوٚگن امتیاز قایم گژھان چھہ۔ ہیجلۍ وزنن منز چھہ پدٮن بجایہ تھکھ اہم، یس آہنگک خاص نمونہ تہ تنوع قایم کران چھہ۔ یتھ شاعری منز سارنی ہیجلٮن کنے مۅل مقرر آسہِ تتھ منز چھیہ آہنگچ بنیاد یہند تعداد بنان یعنی تتھ شاعری منز چھیہ مصرعن ہنز تنظیم مقرر ہیجلۍ تعدادہ ستۍ ترتیب لبان۔
حبہ خاتونہِ ہندِ بنمہ بٲتچ تقطیع چھیہ ہیجلۍ وزنہ مطابق پیش:

1 2 3 4 5 6 7
کاوۍ وُیہہ نم أرۍ نِنۍ نے ہے
از یی یار بہ نا و سے
کۅنگ کو فور بیۍ عن ب رے
سندۍ زل تن بہ نا و سے
مارۍ من دس ترہ نہِ روٚس تس
پارۍ ل گس بہ نا و سے
سٲرۍ ترٲ وِتھ تس پت ل جس
کیا کر‎ ویسۍ بہ نا و سے

کاوۍ ویہنم ارۍ ننہِ نٮہے از ییہ یار بہ ناوسے
کۅنگہ کوفورہ بییہ عنبرے سندِ زلہ تن بہ ناوسے
مارۍ مندس ترہنہِ روٚستس پارۍ لگس بہ ناوسے
سارۍ ترٲوتھ تس پتہ لجس کیاہ کرہ ویسۍ بناوسے
(کلیات حبہ خاتون، ص 185)

ہیجلۍ وزنن منز چھہِ ہیجلٮن ہندِ تعدادہ علاوہ بندن یا مصرعن ہنز حصہ بندی تہ قافیہ بیترِ آہنگک نمونہ پیدہ کران یمہ کنۍ ہیجلۍ وزن شاعرن تہ پرن والٮن دۅشونی ہندِ خاطرہ ورتاوُن تہ پھِرُن آسان سپدان چھہ۔ ہیجلۍ وزنن منز چھہ نہ مصرعن منز ہیجلٮن ہندِ یکسان تعدادہ علاوہ کانہہ مخصوص التزام آسان۔ البتہ چھہ شعری فارمہِ منز یہند مخصوص التزام تنوع پیدہ کران۔ یہ التزام چھہ واکھن تہ وژنن منز ظاہر۔ مثلا واکھن ہند اکھ التزام مگر غالب التزام چھہ 8 ہیجلۍ، 7 ہیجلۍ، 8 ہیجلۍ، 7 ہیجلۍ۔ امہِ قسمک مصرعن ہند خاص التزام چھہ وژن فارمہِ منز تہِ ظاہر۔ چونکہ ہیجلۍ وزن چھہ نہ مزید پدٮن منز گنڈنہ یوان، لہذا چھہِ نہ اتھ وزنہ نظامس منز زیٹھۍ مصرعہ ممکن۔ اگر کُنہِ زبانۍ منز زیٹھۍ مصرعہ چھہِ تہِ (مثلا فرانسسی، اطالوی، اسپینی، بیترِ)، تم چھہِ یوان اکس مخصوص جایہ تھکھ ترٲوتھ دۅن حصن، اصطلاحی طور د‎ۅن hemistches منز پھٹراونہ، تہ یہ تقسیم چھہ مثلا گۅڈنکہ حصہ کس ٲخری لفظس پیٹھ تاکید تراونہ سیتۍ، یا قافیہ ورتاونہ سیتۍ نمایاں بناونہ یوان۔ سانۍ وژن فارم تہِ چھیہ نصف نصف مصرعن پیٹھ قافیہ ورتٲوتھ یہ ژھٮن نمایاں بناوان۔مثلا وچھو حبہ خاتونہ ہند وژن بییہ اکہ لٹہِ۔ گۅڈنکٮن گۅڈنکٮن مصرعن پتہ کنہِ چھہ قافیہ (نٮہے/ عنبرے؛ روٚستس/لجس) یمن زیٹھٮن مصرعن ژھٮن تراوان یمہ کنۍ وژنچ فارم شکل رٹان چھیہ۔

کاشرٮن ہیجلۍ وزنن منز چھہ ژھۅٹٮن ہیجلٮن ہند ورتاو کم یعنی تمن ہیجلٮن ہنز یم مصمتہ تہ ژھوٚٹس مصوتس پیٹھ مشتمل چھہِ۔ اتھ چھہِ زہ وجہ۔ اکھ یہ زِ ژھوٚٹۍ مصوتہ چھہِ اکثر لفظہ کس ٲخرس پیٹھ بول چال چہ صوتیاتی تبدیلی تحت حذف سپدان۔ دوٚیم وجہ چھہ وژن گٮونچ روایت۔ گٮونس منز چھہِ ژھوٚٹۍ مصوتہ ادا کرنۍ زیٹھیو مصوتو کھۅتہ مشکل۔ امہ خاطرہ گژھہِ پروفیشنل تربیت آسنۍ۔ یوٚہے وجہ چھہ زِ وژنس تہ باقی گٮون بٲتن منز چھہ ژھوٚٹۍ مصوتہ زیٹھراونہ یوان۔

تاکیدی وزن

تاکید چھہ کنہِ لفظس پیٹھ زور تراونہ خاطرہ ورتاونہ یوان۔مثلا: ‘راتھ ٲس سردی۔’
اتھ جملس منز چھہِ ترٮہ لفظ۔ اگر سون مراد یہ آسہِ زِ سردی چھیہ نہ از بلکہ ٲس راتھ، تیلہ تراوو اسۍ یہ جملہ ادا کرنہ وزِ ‘راتھ’ لفظس پیٹھ زور۔ اگر اسہِ یہ ونن آسہِ زِ اتھ منز چھہ نہ کانہہ شک زِ راتھ ٲس سردی، تیلہ تراوو اسۍ ‘ٲس’ لفظس پیٹھ زور۔ تہ اگر سردی ہنز شدت ہاونۍ مراد آسہِ، تیلہ تراوو اسۍ ‘سردی’ لفظس پیٹھ زور۔

جملہ کس کنہِ لفظس پیٹھ معنی کہ لحاظہ باقی لفظن مقابلہ زیادہ زور تراوُن چھہ واریاہن زبانن منز رایج۔ معنیس ستۍ واٹھ آسنہ کنۍ ونو اسۍ اتھ معنوی تاکید۔ معنوی تاکید چھہ نہ وزنن ہنز بنیاد بنتھ ہٮکان، تکیازِ امیک تعلق چھہ جملس سیتۍ تہ اکس جملس منز ہیکن نہ اکہ کھۅتہ زیادہ معنوی تاکیدہ ٲستھ۔ البتہ کینژن زبانن منز چھہ جملہ کٮن اڈٮن لفظن پیٹھ زیادہ زور یا تاکید پٮوان تہ اڈٮن کم یتھ معنی بجایہ زبانۍ ہندس آہنگس ستۍ تعلق چھہ۔ اتھ ونو اسۍ لسانی تاکید۔ مثالہِ پاٹھۍ نمون انگریزی زبان۔ مثلا یہ جملہ:

They will liberate me tomorrow.

اتھ جملس منز چھہِ صرف زہ لفظ یمن پیٹھ تاکید چھہ۔ تاکید کنۍ چھہِ انگریزی زبانۍ منز دۅیہ قسمکۍ لفظ۔ اکھ قسم گوٚو تم لفظ یم جملک بنیادی معنی پیش کران چھہِ یعنی پٮٹھمہِ جملکۍ liberate تہ tomorrow ، تہ بیاکھ قسم گوٚو تم لفظ یم جملک گرامر پیش کران چھہِ یعنی پٮٹھمہِ جملکۍ They, will تہ me۔ گۅڈنکہ قسمکۍ لفظ یعنی اسم تہ فعل (صفت بیترِ تہِ) چھہِ تاکید والۍ تہ دوٚیمہِ قسمکۍ لفظ یعنی اسم ضمیر تہ حروف جار بیترِ چھہِ عام طور غیر تاکیدی۔

تاکیدی وزنن اندر چھہ شعرن منز لفظن ہند تاکید گنزرنہ یوان۔ یہ چھہ ہیجلۍ وزنکۍ پاٹھۍ سادہ وزن۔ ییتہِ ہیجلۍ وزنن منز ہیجلٮن ہند یکسان تعداد آہنگک اصول بنان چھہ، تاکیدی وزنس منز چھہ تاکیدن ہند یکسان تعداد آہنگ پیدہ کران۔

آرل سٹاین تہ جارج گریرسن ہویو یورپی محققو چھہ یہ خیال پیش کوٚرمت زِ کاشرِ شاعری منز واکھ ہیتھ چھہ تاکیدی وزن ورتاونہ آمت، حالانکہ سانۍ زبان چھیہ نہ تاکیدی زبان۔ اتھ منز چھہ نہ لسانی تاکید یعنی جملن منز چھہ نہ اڈٮن لفظن پیٹھ زیادہ تہ اڈٮن پیٹھ کم زور تراونہ یوان۔ مگر گریرسن سندِ خیالہ چھہِ لل واکھن منز فی مصرعہ ژور تاکید برابر وقفن پیٹھ ورتاونہ آمتۍ۔ مثلا

آمہِ پنہ سدرس ناوِ چھٮس لمان
کتہِ بوزِ دے میون مٮہ تہِ دی تاٰر
آمٮن ٹاٰکٮن پونۍ زن شمٰان
زو چھم برٮمان گرہ گژھہ ہٰا

پیٹھہ کنہِ ہیجلس تلہ ( -) رکھ تراونہ سیتۍ چھہ پرٮتھ مصرعس منز ژورن جاین تاکید ہاونہ آمت۔ یمن لفظن یا لفظن ہندٮن حصن پیٹھ تاکید چھہ، تم چھہِ مقابلتہ زورہ سان یعنی پھورہ کہ تھزرہ سان پرنہ یوان۔ مگر تاکید چھہ نہ واکھن ہندِ وزنچ بنیاد۔ یعنی واکھن ہند تاکید چھہ نہ لسانی یا عروضی حقیقت تھاوان بلکہ چھہ یہ بقول امین کامل پرنک اکھ خاص طرز۔ حقیقت چھیہ یہ زِ واکھن منز تہِ چھہ بنیادی طور ہیجلۍ وزنے ورتاونہ آمت۔ مثلاوچھو امہ واکھچ ہیجلۍ تقطیع ۔

گۅڈنکس تہ تریمس مصرعس منز چھہِ 8 ہیجلۍ تہ دوٚیمس تہ ژورمس مصرعس منز چھہ7 ہیجلۍ ورتاونہ آمتۍ، یوس اکثر واکھن ہنز وزنی ترتیب چھیہ ۔ سادہ تاکیدی وزنن منز چھہ نہ مصرعن منز ہیجلٮن ہند تعداد یکسان آسان، بلکہ چھہ ہیجلۍ تعداد کُنہِ ضابطہ ورٲے ہران/کم گژھان۔ مثالہ پاٹھۍ وچھون برونہہ کن کمنگس سنز مختصر نظم۔مگر واکھن منز چھہ ہیجلۍ تعداد یکسان۔ یہ چھہ تتھۍ وزنس منز ممکن یتھ منز ہیجلۍ گرٮند ورتاونہ آسہِ آمژ۔

کاشرس بول چالس منز چھہ لفظن پتہ کنہِ ینہ والۍ ژھوٚٹۍ ہیجلۍ (یعنی ژھوٚٹۍ مصوتہ : زیر تہ عینہ زیر) دباونک رحجان۔ اتھ دجحانس تحت چھہِ اکثر لوکھ یتھٮن لفظن مثلا "زبانہِ” بدل زبانۍ”، "شاعرییہ” بدلہ "شاعری”، "زندگیہ” بدلہ "زندگی” ، "نِشہ” بدلہ "نِش” تہ "بدلہ” بدل "بدل” بولان تہ لیکھان۔ یہ رحجان چھہ سانہِ شاعری تہ وزنس پیٹھ تہِ اثرانداز۔ پٮٹھمس واکھس منز وچھو بنمٮن لفظن منز کتھہ پاٹھۍ چھہِ ٲخری ہیجلۍ دبان۔
1 2 3 4 5 6 7 8
آمۍ پن سد رس ناوۍ چھس ل مان
کتۍ بوزۍ دے میون میتۍ دی تار
آ مٮن ٹا کٮن پونۍ زن ش مان
زو چھم برے مان گر گژھ ہا

آمہِ = آ+مہِ < آمۍ پنہ = پ+نہ < پنّ
ناوِ = نا+وِ < ناوۍ کتہِ = ک+تہِ < کتۍ
بوزِ = بو+زِ < بوزۍ مٮہ تہِ = مٮہ+تہِ < میتۍ
گرہ = گ+رہ < گرّ گژھ = گ+ژھ < گژھّ
دِیہِ = دِ+یہِ < دی
یمن لفظن منز چھہِ زیرِ یعنیِ[اِ] مصوتس پیٹھ مشتمل اند ہ ہیجلۍ ہلکہ تالرۍ تہ عینہ زیرِ یعنی [إ] مصوتس پیٹھ مشتمل اند ہ ہیجلۍ ہلکہ مشدد حالت پیدہ کران۔ وچھو یہ صوتی عمل بنمٮن مصرعن منز تہِ یم فارسی عروض مطابق وننہ چھہِ آمتۍ۔

– قدم تہ سوٚدرہ طلاطم سمے تہ وتہ وٲناکھ (کامل)
و+تہ< وتّ
– حسن نہ کنہِ تہِ ژۅاپارۍ حے تہ سین تہ نون (کامل)
ک+نہِ < کنۍ
– اگر گرہست دیی موقعہ کانہہ تہ اسہِ کن آکھ (کامل)
ا+سہِ < اسۍ
– یا پزِ نہ وۅں پشرُن یہ پنن زۅہرقہ واوس (راہی)
پ+زِ < پزۍ
– یا لول تہ رتہ زول نتے د ٕے تہ اماوس (راہی)
ر+تہ < رتّ
– بییہِ کیا چھہ مدعا حسنک بییہِ کیا چھہ ندا عشقک (راہی)
ب+یہِ < بیۍ
– پے آم دہلۍ گاشہِ ژندر کڈِ نہ بمن واش (عازم)
ک+ڑِ < کڈۍ
– اچھہِ دارِ مثرر اوس اچھر ڈولہِ بٔرم راتھ (عازم)
ا+چھہِ < اچھۍ
– تژھ تٍر یوان ٲس زِ رتھ شٹھہِ ہے رگن منز (عازم)
ش+ٹھہِ < شٹھۍ
– وُنہِ اوس مٮہ حیرت تہِ رژھا خوف تہِ اتھۍ منز (راز)
وُ+نہِ < ونۍ
– اتھۍ منز مٮہ کھژم کیف تہ پییہِ نندرِ زۅلا ہش (راز)
پ+یہِ < پیۍ
– رژھرتھ چھیہ اگر تھونہِ تہ لگہِ نار حریرس (راز)
ل+گہِ < لگۍ

یہ گژھہِ یاد تھاون زِ خط کشیدہ لفظن ہندۍ ٲخری مصوتہ دباونۍ چھیہ نہ کانہہ عروضی مجبوری بلکہ یتھ پاٹھۍ میہ پیٹھہ کنہِ ووٚن کاشرِ بول چالک اکھ مخصوص صوتی عمل یس سٲنس پرٮتھ وزنہ نظامس منز تہِ نوٚن چھہ۔ اتھ صوتی عملس چھہ سانہِ زبانۍ ہندس بدلونس صوتی مزازس ستۍ رشتہ یتھ کن امین کاملن یہ ؤنتھ اشارہ کوٚرمت چھہ زِ کاشرس آہنگس منز چھیہ نہ زہ ژھۅچہ آوازہ (یعنی زہ ژھۅٹۍ ہیجلۍ) اکس اکھ پتہ یوان تکیازِ یہ چھہ سٲنس مزازس خلاف۔یہ صوتی عمل چھہ زیادہ تر تمن لفظن منز سپدان یم دۅن ژھۅٹٮن ہیجلٮن پیٹھ مشتمل چھہِ۔

خالص تاکیدی وزنچ مثال دمو اسۍ E. E. Cummings سنزِ یمہِ نظمہِ ستۍ۔
what if a much of a which of a wind (10)
gives the truth to summer's lie; (7)
bloodies with dizzying leaves the sun (8)
and yanks immortal stars awry? (7)
Blow king to beggar and queen to seem (9)
(blow friend to fiend: blow space to time) (8)
— when skies are hanged and oceans drowned, (8)
the single secret will still be man… (9)

اتھ منز چھہِ فی مصرعہ ژور تاکید یم بولڈ یعنی مۅٹیو حرفو سٔتۍ تہ تلہ رٕکھہ ترٲوتھ ہاونہ چھہِ آمتۍ۔ سٍتی چھہ پریتھ مصرعہ کٮن ہیجلٮن ہند تعداد بریکٹن منز دنہ آمت۔ ظاہر چھہ زِ (واکھن برعکس)ہیجلٮن ہند تعداد چھہ نہ یمن مصرعن منز یکسان۔ البتہ چھہ تاکید یمن مصرعن منز یکسان طور بٲگرتھ یمہ کنۍ آہنگ پیدہ چھہ گوٚمت۔ یہ آہنگ چھہ تسندِ خاطرہ ژینن مشکل یمۍ سنز زبان تاکیدی آسہِ نہ۔

تاکیدی وزنن منز تہِ چھہ نہ ہیجلۍ وزنکی پاٹھۍ پدٮن یا ارکانن ہند عمل دخل۔ اتھ منز چھہ نہ لفظن یا ہیجلٮن ہند تعداد اہم بلکہ برابر وقفن پیٹھ ینہ وول تاکید یمہِ ستۍ آہنگ پیدہ گژھان چھہ۔

یورپی محققن پتہ چھہ امین کاملن کاشرِ شاعری ہنزِ تاکیدی عروضی خصوصیژ کن یتھہ پاٹھۍ اشارہ کوٚرمت۔

’’شاعر اوس کنہِ اصول تہ قاعدہ بدلہ محض پننیو کنو سیتۍ شعرن تقطیع (ژھٮنہ بندی) کران، یتھ منز سہ ساری کھۅتہ زیادہ اہمیت لفظن ہندِ تعدادہ بدلہ تہندس تلفظس پیٹھ دباو تراونس یا لمتھ لستھ ادا کرنس پیٹھ دوان اوس۔‘‘ (کۅنگ پوش، 1952)

اتھ اقتباسس منز چھیہ زہ کتھہ وننہ آمژہ۔
(1) کاشرِ شاعری ہند وزن چھہ نہ پیچیدہ۔ یعنی یہ چھہ کنہِ بیرونی اصول بندی بجایہ زبانۍ ہنزِ لفظن ہنزِ فطری ژھٮنہ بندی پیٹھ قایم۔
(2) اتھ منز چھہ نہ لفظن ہند تعداد بلکہ لفظن ہند دباو اہم۔

گۅڈنچہ کتھہِ پیٹھ شک کرُن چھہ مشکل تکیازِ یہ وزن چھہ لل دیدِ پٮٹھہ احد زرگرس تام بلکہ نادمن، کاملن تہ راہی ین تہِ کنہِ اصول بندی ہند علم آسنہ ورٲے وجدانی طور ورتوومت۔ البتہ دوٚیم کتھ چھیہ بحث طلب۔ رحمن راہی ین چھیہ عروضس پیٹھ پننہ کتابہِ منز کاملنۍ یہے دوٚیم کتھ، یتھ پتہ کنہِ یورپی محققن ہندۍ بیان تہِ چھہِ، پنن مقالہ بنٲوتھ ورتاومژ۔ مگر تمۍ چھیہ اتھ سیتۍ سیتۍ کاملنہِ گۅڈنچہ کتھہِ برعکس یہ ہاونچ کوشش کرمژ زِ یہ وزن چھہ پیچیدہ اصول بندی ہند مظہر۔ اتھ سلسلس منز چھہ تمۍ یورپی محققن تہ شفیع شوق نہِ یتھ کتھہِ پیٹھ اعتبار کٔرتھ انگریزی زبانۍ ہند پیچیدہ وزنہ نظام اتھ پیٹھ منطبق کرنچ کوشش کرمژ۔

’’کاشرٮن واکھن منز (چھہ) عروضک دارمدار انگریزی شاعری ہندۍ پاٹھۍ سۅرن ہندس زورس یا دباوس پٮٹھ۔‘‘ (شفیع شوق، شیخ العالم تہ تمۍ سند زمانہ، ص ۲۳)
اسۍ ہیکو یہ ؤنتھ زِ واکھن ہند بنیادی وزن چھہ ہیجلس پیٹھ تہ یمن ہند مخصوص طرزِ ادا چھہ تاکیدی تکیازِ واکھ تہ شروکۍ چھہِ نہ گٮونہ یوان بلکہ پند، نصیحت تہ دانایی ہندِ شعری اظہار کہ طور تحت الفظ وننہ یوان۔ لہذا اوس یہند طرزِ ادا خصوصی طور تاکیدی آسُن ضروری۔ واکھس برعکس چھہ وژُن خالص گٮونک چیز تہ اتھ منزٲس نہ اتھ تاکیدی طرز اداہس کانہہ جاے۔ مگر دۅشونی فارمن ہند وزن چھہ ہیجلۍ وزن۔ واکھ چہ تہ وژنہ چہ اتھ فرقہِ کُن چھہ امین کاملن جوابن چھہ عرض پننہِ کتابہِ منز اشارہ کوٚرمت تہ یہ چھیہ اکھ اہم فرق۔

تاکیدی ہیجلۍ وزن

کینژن زبانن منز چھہ وزن اکی آنہ تاکیدی تہ ہیجلۍ۔ ہیجلۍ، تکیازِ اتھ منز چھہِ ہیجلۍ گنزراونہ یوان۔ تاکیدی، تکیازِ اتھ منز چھہ تاکید تہِ گنزراونہ یوان۔ ہیجلٮن ہند تعداد چھہ مختلف وزن (یعنی مصرعن ہند زیچھر) تہ تاکید چھہ پدٮن ہنزہ مختلف ترتیبہ مشخص کران۔ امہِ دوٚگن معیارہ کنۍ چھہ یہ وزنہ نظام پیچیدہ۔

انگریزی زبان چھیہ امہ قسمک وزن ورتاوان۔
مثالہِ پاٹھۍ نمون الیکزانڈر پوپ سنزِ نظمہِ Elegy to the Memory of an Unfortunate Lady ہند یہ بند۔
Foot 5 Foot 4 Foot 3 Foot 2 Foot 1
were clos’d ing eyes thy dy- reign hands By fo-
com-pos’d cent limbs thy de- reign hands By fo-
a-dorn’d ble grave thy hum- reign hands By fo-
gers mourn’d by stran- nou’d and gers ho- By stran-

اتھ بندس منز چھہ ایامبک پوٚد iambic foot ورتاونہ آمت یمیک مطلب یہ چھہ زِ یہ پوٚد چھہ دۅن ہیجلٮن پیٹھ مشتمل۔ گۅڈنیک ہیجل چھہ تاکیدہ روٚس تہ دوٚیم تاکیدہ وول۔ تاکید والۍ ہیجلۍ چھہِ تلہ رکھہِ علاوہ بولڈ یعنی مۅٹٮن حرفن منز دنہ آمتۍ۔

پدٮن ہندۍ چھہِ واریاہ قسم۔

دۅن ہیجلٮن پیٹھ مشتمل پدۍ چھہِ دۅن قسمن ہندۍ۔ ایامبiamb تہ ٹراکی trochee۔ ایامب چھہ گۅڈنیک ہیجل تاکید روٚس تہ دوٚیم تاکید وول۔ ٹراکی چھہ گۅڈنیک تاکید وول تہ دوٚیم تاکید روٚس۔

بیاکھ قسم چھہ ترٮن ہیجلٮن پیٹھ مشتمل۔ اتھ اندر چھہ اناپیسٹ anapaest پوٚد یوان یتھ منز گۅڈنکۍ زہ ہیجلۍ تاکید روٚس تہ تریم تاکید وول چھہ۔ بیاکھ پوٚد چھہ اتھ اندر یوان ایمپھیبراک amphibrach یتھ منز گۅڈنیک ہیجل تاکیدہ روٚس، دوٚیم تاکید وول تہ تریم تاکیدہ روٚس چھہ۔ تریم پوٚد چھہ اتھ منز ڈیکٹل dactyl یوان یتھ منز گۅڈنیک ہیجل تاکید وول تہ باقی زہ تاکید روٚس چھہِ۔

ایامبک پوٚد چھہ زیادہ مقبول۔

پوپ سندٮن پٮٹھمٮن مصرعن منز چھہِ پانژھ پدۍ، یمہ کنۍ پینٹامیٹر pentameter ناو پیوس۔

ایامبک پینٹامیٹرس منز چھیہ پانژن پدٮن منز پانژھ ہیجلۍ جورِ آسان یمن منز دوٚیم دوٚیم ہیجل تاکیدی چھہ۔ تاکیدی ہیجلۍ وزنن منز چھہِ پدۍ تہِ گنڈتھ تہ ہیجلۍ تہِ گنڈتھ۔
اتھ وزنس منز چھہ ہیجلۍ پدٮن منز گنڈنک جواز تکیازِ یم پدۍ چھہِ پانہ آہنگک اکھ نمونہ/ التزام پیدہ کران۔

پدٮن ہندی پاٹھۍ چھہِ وزن تہِ واریاہ قسمن ہندۍ۔ اسہِ چھہ پتاہ زِ پینٹامیٹر چھہ پانژن پدٮن ہند وزن۔

اکہ پدِ کس وزنس یس سٮٹھا نایاب چھہ چھہِ مانو میٹر monometer ونان۔
دۅن پدٮن ہندس وزنس چھہِ ڈای میٹر diameter ونان۔

ترٮن پدٮن ہندس وزنس ٹرای میٹر trimeterتہ ژۅن پدٮن ہندس وزنس ٹیٹرا میٹر tetrameter ونان۔

شٮہ، ستھ تہ ٲٹھ پدٮن ہندٮن وزنن چھہِ ہیکسا میٹرhexameter، ہیپٹا میٹر heptameterتہ اوکٹا میٹرoctameter ونان۔

پینٹا میٹر چھہ زیادہ مقبول۔
انگریزی زبانۍ ہند تاکیدی آہنگ اگرچہ امہِ کہ تاکیدی ہیجلۍ عروضچ بنیاد فراہم کران چھہ، تاہم چھہ یہ لفظن ہندِ عام بول چال کہ تاکید نش انحراف تہِ کران۔ یعنی عروضی تاکید چھہ نہ لسانی تاکیدس ستۍ ہمیشہ مطابقت تھاوان۔

وچھون ملٹن سند یہ مصرعہ۔

and night
sures day
that mea-
the space
Nine times

اتھ منز چھہ گۅڈنیکے لفظ nineتاکیدہ روٚس ییلہ زن عام بول چال مطابق اتھ پیٹھ تاکید گژھہِ آسن۔

وۅنۍ وچھون اسۍ کیٹس سنزِ نظمہِ The Fall of Hyperion منزہ بنم مصرعہ۔

dis- tinct
mer are
the drea-
et and
The po-

یہ نظم تہِ چھیہ ایامبک پینٹامیٹرس منز وننہ آمژ۔ اتھ مصرعس منز چھہِ زہ لفظ and تہ are تاکید سان ورتاونہ آمتۍ (یا پرنۍ پٮوان) ییلہ زن عام بول چالس منز یم غیر تاکیدی لفظ چھہِ۔ پوپ سندس ژورمس مصرعس منز تہِ چھہ تریمس پدس منز and لفظ تاکید سان پرن پٮوان۔

گویا اتھ وزنہ نظامس منز چھیہ زبانۍ ہندس فطری عام بول چال کس تاکیدس مقابلہ کنہِ حدس تام مصنوعیت۔ یہ انحراف چھہ نہ صرف یمن دۅن مصرعن منز بلکہ چھہ یہ انگریزی شاعری منز سٮٹھا عام۔

حقیقت چھیہ یہ زِ پرٮتھ کانہہ وزنہ نظام چھہ زبانۍ طرزاوان یعنی stylize کران۔ وزنہ نظامن ہند یہ طرزاون تہ یہ مصنوعیت چھیہ نہ کمزوری بلکہ یمن ہنز اکھ خاصیت یۅس پٮٹھے بانہ نثرس تہ شاعری منز روایتی طور ظاہری امتیاز قایم کران چھیہ، دویمٮن لفظن منز پرن والۍ تہ لکھن والۍ سندِخاطرہ اکھ شعری ماحول پیدہ کران چھیہ۔

تاکیدی ہیجلۍ عروضس منز چھہ آہنگک دوٚگن معیار ورتاونہ یوان یمہ کنۍ یہ پیچیدہ وزنہ نظامن منز شامل چھہ۔ یعنی اتھ عروضس منز چھہ اکہ طرفہ پدٮن ہند تعداد آہنگک معیار بنان تہ بییہ طرفہ یمن پدٮن منز ہیجلٮن ہنز تنظیم تہ تاکید۔ راہی تہِ چھہ روایتی کاشرِ شاعری پیٹھ تاکیدی ہیجلۍ عروض کہ آہنگک دوٚگن معیار منطبق کرنچ سفارش تہ کوشش کران۔ انگریزی زبانۍ ہندس بول چالس منز چھہ تاکیدی آہنگ ییلہ زن کاشرس منز یژھ کانہہ کتھ چھیہ نہ۔ یعنی اسۍ چھہِ نہ جملہ کٮن اڈٮن لفظن پیٹھ لسانی طور زیادہ زور تراوان تہ اڈٮن پیٹھ کم۔ لہذا چھہ امہ قسمک تاکید ژینن تہ اتھ پیٹھ دٔرتھ پدۍ بندی تہ تتھ پیٹھ اتفاق سانہ خاطرہ ناممکن۔ کاشرٮن بٲتن ہنزِ راہی سنزِ پدۍ بندی منز چھیہ نہ تاکیدی ہیجلۍ عروض کٮن پدٮن برعکس کانہہ تنظیم، ترتیب یا ہشر میلان۔راہی یس چھہ پدۍ بندی ہند خیال شاید شفیع شوق نہ یمہ بیانہ پٮٹھہ ووٚتھمت:

’’اکس زور دار آوازِ تہ بییس زوردار آوازِ درمیان ہٮکن اکہِ پٮٹھہ ژور لۅژہ آوازہ تہِ ٲستھ۔ یۅہے لِکھہ چھہ کاشرٮن واکھن منز تہِ باسان۔‘‘ (شفیع شوق، شیخ العالم تہ تمۍ سند زمانہ، ص ۲۳) وچھو بنمہِ واکھچ راہی ینۍ پدۍ بندی:
تلہ چھے زیس تے پٮٹھہ چھکھ نژان
ت ت تم تم تم ت ت تم ت تا م
ونتہ مالہِ وۅندہ کٮتھہ پژان چھے
تم ت تم ت ت ت ت ت ت تام تم
سورے سۅمبرتھ ییتۍ چھے مۅژان
تم تم تم تم تم تم ت تام
ونتہ مالہِ ان کٮتھہ رۅژان چھے
تم ت تم ت تم ت ت ت تام تم

یمن پدٮن ہند تجزیہ چھہِ بٮہ جوڑ۔ یعنی تجزیکۍ یم نمونہ چھہِ اکھ اکس نش مختلف۔)ت ت تم( چھہ )تم تم( یا )ت ت ت ت( یا) ت تام( نش آہنگہ کنۍ مختلف۔ یمن چھہ نہ پانہ وانۍ کانہہ ہشر یمہ کنۍ اصل واکھس منز آہنگ چہ بٮہ ربطی ہند دوکھہ لگتھ ہیکہِ۔ لہذا چھیہ نہ یمن پدٮن ہنز یہ تجزیاتی تنظیم امہ پدۍ بندی ہند معیار بنان۔ اگر فرض کرو زِ پریتھ مصرعس منز چھہِ ژور تاکید برابر وقفن پیٹھ ، یہ پدۍ بندی کیا چھیہ تمہ مزید ہاوان؟ پدۍ بندی ہند مقصد کیا چھہ؟ شاید چھہ یہ زانن ضروری زِ تاکید چھہ ہیجلس سیتۍ تعلق تھاوان۔ یعنی تاکید چھہ ہیجلچ ملکیت۔ مثلا "ونتہ مالہِ ” لفظن منز چھہ تاکید یمو منزہ کُنہِ اکہ لفظہ کس اکس ہیجلس پیٹھ فرض کرُن۔ تاکید ہیکہ نہ اکی ساتہ دۅشونی لفظن ہندٮن ژۅشونی ہیجلٮن پیٹھ ٲستھ۔ اگر اسۍ پریتھ مصرعس منز ژور تاکید چھہِ تصور کران تم گژھن برابر وقفن پیٹھ ژۅن ہیجلٮن پیٹھ آسنۍ۔ تاکیدس اندۍ پکھۍ باقی ہیجلۍ یا لفظ کتھ بنیادس پیٹھ کروکھ اسۍ پدٮن منز تقسیم؟ انگریزی شاعری منز چھیہ یہ تقسیم ہیجلۍ تعداد کس بنیادس پیٹھ کرنہ یوان۔ امی چھہِ اکس مصرعس منز اکی قسمکۍ پدۍ ورتاونہ یوان۔ مثلا ایامبک پوٚد یعنی دۅن ہیجلٮن پیٹھ مشتمل پوٚد۔ اگر اکس مصرعس منز پانژھ تاکید مانوکھ (پینٹامیٹر) ، اتھ منز گژھن تیلہ پانژھ ہیجلۍ جورِ آسنہِ (ایامبک ہیجل)۔ تہِ زن گوٚو پریتھ تاکید وٲلس ہیجلس سیتۍ بیاکھ اکھ غیر تاکیدی ہیجل۔ مگر راہی سنز پدۍ بندی منز چھہِ (تمۍ سندِ تجزیہ مطابق) اڈٮن پدٮن منز زہ ہیجلۍ، اڈٮن منز تریہ، اڈٮن منز ژور۔۔۔نثرس تہِ چھیہ امہ قسمچ پدۍ بندی ممکن۔ اگر نہ پدۍ تخلیقی generative آسن تمن ہند جواز کیا چھہ؟
میہ ٲس پیٹھمہ واکھچ پدۍ بندی اکس مضمونس منز فارسی عروضی ارکانو سیتۍ یتھہ پاٹھۍکرمژ، یہ ہاونہ خاطرہ زِ فارسی عروض چھہ ہیجلۍ وزنن تہِ کۅم کران۔

تلہ چھے زیس تے پیٹھہ چھکھ نژان
فعلن (2) فعلن (2) فعلن (2) فعول (2)
ونتہ مالہِ وۅندہ کٮتھہ پژان چھے
فعلن (2) فعلن (2) فعول (2) فع (1)
سورے سۅمبرتھ ییتۍ چھے مۅژان
فعلن (2) فعلن (2) فعلن (2) فعول (2)
ونتہ مالہِ ان کٮتھہ رۅژان چھے
فعلن (2) فعلن (2) فعول (2) فع (1)

راہی چھہ "تلہ چھے” لفظن منز تریہ(3) ہیجلۍ تصور کران ییلہ زن یمن منز حقیقی طور زے (2) ہیجلۍ چھہِ۔ یتھے پاٹھۍ چھہِ تس "وۅندہ کٮتھہ” لفظن منز ژور (4) ہیجلۍ باسان ییلہ زن یمن منز تہِ زے (2) ہیجلۍ چھہِ۔ امۍ سنزِ اتھ غلط ہیجلۍ تقسیمہ پتہ کنہِ چھہ تحریری لفظ تہ تحریری لفظہ کس بنیادس پیٹھ یمن نفظن ہنز تصوری (ذہنی) ہیجلۍ تقسیم۔ مگر ییلہ اسۍ زبانۍ ہند ملفوظی کردار نظرِ تل تھاوو (یہے چھہ پریتھ عروضچ بنیاد) یمن لفظن ہنز حقیقی تقسیم چھیہ دۅن (2) ہیجلٮن منز گژھان۔

پیٹھمہ ہیجلۍ تقسیمہِ سیتۍ چھیہ وۅنۍ امچ پدۍ بندی تہِ سمج یوان یعنی زہ ہیجلۍ فی پوٚد، صرف دویمس دویمس مصرعہ کس ٲخرس پیٹھ صرف اکھ ہیجل۔سوال چھہ وۅنۍ زِ یمن پدٮن منز چھا تاکید تہِ موجود۔ امیک ژھوٚٹ جواب چھہ ییلہ نہ زبانۍ منز لسانی تاکید اوس تہ شعری وزنس منز کپارۍ آو؟ کاشر زبان چھیہ ہیجلیو سیتۍ وقفہ مینان، تاکید سیتۍ نہ۔ دوٚیم کتھ چھیہ یہ زِ مصرعہ ژۅن ٹکرن منز تقسیم کرُن چھیہ تقطیع یۅس دراصل فارسی وزنس (فعلن فعلن فعلن فع) پیٹھ دٔرتھ چھیہ۔یہ چھہ نہ واکھ پرنک کانہہ طریقہ ۔یعنی اسۍ چھہِ نہ واکھ یتھہ پاٹھۍ تھکھ دی دی پران (تلہ چھے # زیس تے # پیٹھہ چھکھ # نژان)۔ یہ گوٚو ‘ونہ وُن’۔ یہ گوٚو گٮوُن۔ گٮونک اکھ طرز۔ واکھ چھہ نہ گٮون۔ وژنس تہ واکھس منز یۅس اکھ بٔڈ فرق چھیہ سۅ چھیہ یی زِ ییتہ وژن گٮونک چیز چھہ، واکھ چھہ تحت اللفظ پرنک چیز۔ نتہ چھہِ فارم کہ لحاظہ دۅشوے لگ بگ کُنے چیز۔ چونکہ گٮونہ خاطرہ گژھن اکہ کھۅتہ زیادہ بند آسنۍ، لہذا چھہ وژن واکھ چی توسیع۔واکھ پرنکۍ چھہِ حقیقتا زےطریقہ ممکن۔ اکھ گوٚو پورہ مصرعہ کُنہِ تھکہ ورٲے پرُن تہ بیاکھ گوٚو مصرعہ دۅن حصن منز باگ اکھ وقفہ ترٲوتھ پرُن۔ مثلا یتھہ پاٹھۍ:

تلہ چھے زیس تے # پیٹھہ چھکھ نژان
ونتہ مالہ و‎ندہ کٮتھہ # پژان چھے
یا (ونتہ مالہِ# وۅندہ کٮتھہ پژان چھے)
سورے سۅمبرتھ # ییتۍ چھے مۅژان
ونتہ مالہِ ان کٮتھہ # رۅژان چھے
یا (ونتہ مالہِ # ان کٮتھہ رۅژان چھے)

بہرحال، فارسی عروضک یہ وزن فعلن فعلن فعلن فعول / فع چھہ دراصل ہیجلۍ وزن یس تمام روایتی کاشرِ شاعری ہنز بنیاد چھہ۔

سادہ ماترا وزن

کینژن زبانن منز چھیہ وزنچ بنیاد نہ ہیجل تہ نہ تاکید بلکہ ماترا (mora)۔ یعنی یمن زبانن منز چھہ یکسان ماترا تعداد ورتٲوتھ شاعری منز آہنگ پیدہ کرنہ یوان۔ ماترا کہ تصورچ زانکاری کرون اسۍ تعریف کرنہ بجایہ یتھہ پاٹھۍ حاصل۔

(1)ہیجلٮن ہنزہ گۅڈہ آوازہ چھیہ نہ ماتراہن منز گنزرنہ یوان۔ یعنی مثالہِ پاٹھۍ ‘جر’ تہ ‘جار’ لفظن ہند جیم /ج/چھہ نہ ماترا ماننہ یوان۔

(2) ہیجلیک تھوٚنگ اگر ژھوٚٹس مصوتس پیٹھ مشتمل آسہِ، سہ چھہ اکس ماترا برابر تہ اگر زیٹھس مصوتس پیٹھ مشتمل آسہِ تیلہ چھہ دۅن ماتراہن برابر۔ یعنی ‘جر’ لفظک ژھوٚٹ مصوتہ زبر/اَ/ چھہ اکس ماتراہس برابر تہ ‘جار’ لفظک زیوٹھ مصوتہ یعنی الف مد/آ/ چھہ دۅن ماتراہن برابر۔

(3) ہیجلچ پوٚت آواز تہِ چھیہ اکس ماتراہس برابر۔ یعنی ‘جر’ تہ ‘جار’ لفظن ہند پتم /ر/ چھہ اکس ماترا برابر۔ یمن دۅن لفظن ہند ماترا تعداد چھہ یتھہ پاٹھۍ:

لفظ گۅڈہ آواز تھوٚنگ پوٚت آواز کل ماترا
جر  ج زبر ر
ماترا  X 1 1 2
جار  ج آ (ا +ا) ر
ماترا  x 2 1 3

یہ گژھہِ یاد تھاون زِ اکھ زیوٹھ مصوتہ چھہ دۅن ژھۅٹٮن مصوتن برابر تصور کرنہ یوان۔ مثلا ‘جار’ لفظک زیوٹھ مصوتہ /آ/ چھہ دۅن الفن یعنی دۅن زبرن برابر ماننہ یوان۔

(4)اگر ہیجلس منز اکہِ کھۅتہ زیادہ پوٚت آوازہ آسن (عموما مصمتن ہنز جورۍ)، تم چھیہ زہ ماترا گنزرنہ یوان۔ مثلا ‘مست’ لفظس منز چھہِ پتہ کنہِ زہ مصمتہ /س/ تہ /ت/ یکوٹہ ، یم دۅن ماتراہن برابر چھہِ۔ امہِ لفظک ماترا تعداد:

لفظ  گۅڈہ آواز تھوٚنگ پوٚت آواز پوٚت آواز کل ماترا
مست  م زبر س ت
ماترا x 1 1 1 3

ماترا وزن ہیکہِ سادہ تہِ ٲستھ تہ پیچیدہ تہِ۔ سادہ ماترا وزنن منز چھہ ہیجلۍ وزنکۍ پاٹھۍ خالص تعدادہ ستۍ آہنگ پیدہ کرنہ یوان۔ ہندی زبانۍ ہند مقبول وزن چوپایی چھہ سادہ ماترا وزنچ مثال۔ اتھ وزنس منز چھہ پرٮتھ پد (مصرعہ) شراہن (16) ماتراہن برابر۔ وچھو بنم پرٮژھ تہ امچ تقطیع:

ایک راگ سے رہتی گاتی
چلے رات دن کہیں نہ جاتی
ایک راگ سے رہتی گاتی = 16 ماترا
12 12 2 11 2 22
چلے رات دن کہیں نہ جاتی = 16 ماترا
1 2 12 11 1 2 1 22

دۅشونی مصرعن منز چھیہ ماترا تعداد برابر مگر ماتراہن ہنز چھیہ نہ مصرعن منز کانہہ خاص ترتیب یمہ کنۍ سادہ ماترا وزنن منز پدۍ قایم چھہ نہ گژھان۔

سادہ ماترا وزن چھہ ہندی علاوہ واریاہن ہندوستانۍ زبانن منز ورتاونہ یوان۔ یہ ورتاون واجینۍ بیاکھ زبان چھیہ جاپانۍ۔ اتھ زبانۍ منز چھہِ ماترا اصطلاح پاٹھۍ haku یا onji ونان۔ عام طور چھہ جاپان نٮبر یہ زاننہ آمت زِ امہِ زبانۍ ہنزِ شعرہ ذٲژ ہایکوہس منز چھیہ پانژھ ہیجلۍ، ستھ ہیجلۍ، پانژھ ہیجلۍ ترتیب۔ مگر حقیقتا چھیہ امچ ترتیب پانژھ ماترا، ستھ ماترا، پانژھ ماترا۔ ییتہِ نس روزِ نہ ماتراہو مطابق اکہ جاپانۍ ہایکوہچ تقطیع دلچسپی نش خالی۔اسۍ دمون ہایکو انگریزی اچھرن منز۔ ماتراہن ہند ژھٮن ییہِ ہایفن ستۍ ظاہر کرنہ۔
na-ra ma-na-e
shi-chi-do-o ga-ra-n
ya-e za-ku-ra
اتھ منز چھیہ خاص کر دوٚیم لٲن توجہس لایق۔ اتھ منز چھہِ ضرورتہ مطابق ستھ ماترا، مگر پانژے ہیجلۍ۔ ہایکوہچ دوٚیم لٲن گژھہِ ستن ماتراہن برابر آسنۍ۔ گۅڈنکہِ لفظک ٲخری ہیجل چھہ doo یس دۅن ماتراہن(do-o) برابر چھہ۔ یتھے پاٹھۍ چھہ دوٚیمہِ لفظک ٲخری ہیجل ran دۅن ماتراہن (ra-n) برابر۔

کاشرس منز سادہ ماترا وزنہ چہ مثالہِ خاطرہ وچھون کہن (11) ماتراہن ہند یہ لل واکھ:

کُس ڈنگہِ تہ کُس زاگہِ
2 12 1 2 12 11
کٚس سر وترِ تیلی
2 2 12 22 11
کُس ہرس پوزِ لاگہِ
2 21 12 12 11
کُس پرمہ پد میلی
2 12 2 22 11

پیٹھمہ پریژھہِ ہندس چوپایی وزنس پیٹھ وچھون یہ لل واکھ:
تلہ چھے زیس تے پٮٹھہ چھکھ نژان
ونتہ مالہِ وۅندہ کٮتھہ پژان چھے
سورے سۅمرتھ ییتۍ چھے مۅژان
ونتہ مالہِ ان کٮتھہ رۅژان چھے

تلہ چھے زیس تے پٮٹھہ چھکھ نژان 16 ماترا
11 2 2 2 11 2 1 2 1
ونتہ مالہِ وۅندہ کٮتھہ پژان چھے 16 ماترا
2 1 12 11 1 1 1 2 1 2
سورے سۅمرتھ ییتۍ چھے مۅژان 16 ماترا
2 2 22 2 2 1 2 1
ونتہ مالہِ ان کٮتھہ رۅژان چھے 16 ماترا
2 1 12 2 1 1 1 2 1 2

امہِ واکھہ کٮن کینژن لفظن ہنز ماترا تفصیل وچھو صفحہ 27ہس پیٹھ:

ماترا وزن سمجنہ خاطرہ کرۍ میہ یم واکھ پیش، حالانکہ یمن واکھن ہنز یہ ماترا برابری چھیہ اتفاقی تکیازِ یمن واکھن ہند بنیادی وزن چھہ ہیجلۍ وزنے۔ یتھے پاٹھۍ چھیہ کینژن واکھن ہنز تاکیدی برابری مدنظر کینژن واکھن منز تہ پورہ کاشرِ شاعری منز تاکیدی وزن آسنک دوکھہ لوٚگمت۔

اردو ہندی یس منز مستعمل بحر متقاربکۍ نام نہاد مزاحف وزن چھہِ دراصل ماترا وزنے یم اکہ خاص طریقہ ورتاونہ یوان چھہِ۔ یم خاص وزن یمن اردو والیو بحر میر تہِ ناو کوٚرمت چھہ، چھہ کاشرس منز رفیق رازن ورتاومتۍ۔ اکہ غزلک ماترا تجزیہ چھہ پیش:

سانہِ شہارہ چھہِ قبرستانکۍ ہی آثار
12 121 1 2222 2 122 23
شامہ پتے انہراے کراں چھہ نہ کانہہ بیمار
12 21 122 21 11 2 122 23
اندرہ چھِوا توٚہۍ بٲژ گرکۍ سٲری محفوظ
12 21 2 12 21 22 122 23
نیبرہ میہ وچھمو تۅہہ تہِ چھہ وسۍ پیومت دیوار
12 1 22 11 1 1 2 22 122 23
تاپھ چھہ شامس تام دوان انسانس برٮم
12 1 22 12 121 222 2 23
دورِ چھہ باساں سٮکھ تامتھ گاہے سبزار
12 1 22 2 22 22 122 23
اسۍ چھہِ مسافر یارب اسہِ تتھۍ وتہِ کُن لاگ
2 1 221 22 11 2 11 2 12 23
یتھ وتہِ ترٮن ترٮن دۅہن چھیہ روزاں مشکنۍ دار
2 11 2 2 21 1 22 22 12
یا گوٚو تاپھ عدالت وانن منز ہلکارۍ
2 2 12 221 22 2 122 23
یا تھووکھ سنگین قلاین منز شہجار
2 22 122 221 2 122 23
رفیق راز چھہ اتھ اردو والٮن ہنزِ پیروی منز 12 ماترا + 10 ماترا (کل 22 ماترا) مانان یس غلط چھہ۔ اردو والۍ چھہِ دراصل اتھ افاعیلن منز (عربی عروض کٮن پدٮن منز) گنڈنچ کوشش کران۔ رفیق رازن تہِ چھہِ امہ وزنکۍ شیہ رکن مانۍ متۍ، حالانکہ اتھ وزنس منز چھہ نہ رکنن ہند کانہہ خاص دخل۔ امہ وزنک آہنگ چھہ اتھ بے محل رکن بندی ییرہ والان۔ یہ چھہ بنیادی طور سادہ ماترا وزن یتھ نہ پدٮن منز گنڈنچ کانہہ خاص ضرورت یا جواز چھہ۔ پدۍ یا افاعیل یا رکن بندی چھہ آہنگ کہ دوٚگن معیارک جواز پیدہ کران مگر یمن وزنن منز چھہ نہ ٹاکارہ پاٹھۍ پدٮن ہند کانہہ مکرر نمونہ۔

امین کاملن چھیہ 1970 پیٹھے عربی وزنن ہندۍ افاعیل ژٹۍ ژٹۍ لیکھنچ سفارش کرمژ۔ واضح چھہ زِ اتھ سفارشہ پتہ کنہِ چھیہ یہ بصیرت زِ یم وزن چھہِ ژکہِ ماترا وزن تہ یہند یہ کردار چھہ افاعیل ژٹۍ ژٹۍ لیکھنہ سیتی نوٚن نیران۔ اتھ موقفس کٔر تمۍ "میون عروضی سوچ” مقالس منز مزید وضاحت آوازن ہندِ مقابلہ حرفن ہند تصور رٔٹتھ یتھ اسۍ زیادہ انزۍ منزۍ چھہِ۔ تمۍ کرۍ افاعیلن ہندۍ حرف یلہ، بند تہ نتھۍ قسمن منز تقسیم۔ یہ چھیہ دراصل افاعیلن ہنز ماترا تقسیم۔ سہ چھہ اکھ ماترا والٮن حرفن یلہ آواز ونان، زہ ماترا والٮن حرفن بند آواز ونان تہ نتھۍ حرفن (مثلا نار، اسمان، سوچ لفظن ہندۍ /ر/، /ن/ تہ /چ/) ہنزِ آوازِ تہِ اکھ ماترا گنزراوان۔ کامل سندٮن عروضی مقالن منز چھیہ آوازِ، آہنگس تہ لیہ زیادہ اہمیت۔ سہ چھہ نہ قطعا عروضس روایتی تصورن تہ اصطلاحن ہندِ ذریعہ پیش کران۔ حقیقت چھیہ یہ زِ تسندۍ عروضی تجربہ تہِ چھہِ روایتی عروضی ہنرمندی ہنزِ نمایشہ بدلہ مخصوص مقصدن تہ ضرورژن تحت امکاناتن ہندۍ بر کھولان۔ (بحوالہ میون مضمون "کاشرس منز عروضی تجربن ہنز اہمیت”)

سیدِ سیوٚد صفحس پیٹھ (صفحہ 27) چھہ صفحہ 25 ہس پیٹھ دنہ آمتہِ لل واکھہ کٮن کینژن لفظن ہنز ماترا تقسیم تہ تعداد دنہ آمت۔

لل دیدِ ہندِ واکھہ کٮن کینژن لفظن ہند ماترا تعداد
کل ماترا دوٚیم ہیجل گۅڈنیک ہیجل لفظ
پوٚت آواز تھوٚنگ گۅڈہ آواز پوٚت آواز تھوٚنگ گۅڈہ آواز
إ ل زبر ت تلہ
2 1 x 1 x
إ ٹھ ی پ پیٹھہ
2 1 x 1 x
إ د زبر وۅ وۅندہ
2 1 x 1 x
إ تھ 1 ی ک کٮتھہ
2 1 x 1 x
زیر ل آ (ا+ا) م مالہِ
3 1 x 2 x
پیش+زیر 2 چھ چھے
2 2 x
زبر+زیر 3 ت تے
2 2 x
إ ت ن زبر و ونتہ
3 1 x 1 1 x
س زیر+پیش ز زیس
3 1 2 x
کھ پیش چھ چھکھ
2 1 1 x
تۍ 4 زبر ی ییتۍ
2 1 1 x
ن زبر ان
2 1 1
ن آ(ا+ا) ژ زبر پ پژان
4 1 2 x 1 x
ن آ(ا+ا) ژ ۅ م مۅژان
4 1 2 x 1 x
ن آ(ا+ا) ژ ۅ ر رۅژان
4 1 2 x 1 x
تھ اِ ر م ۅ س سۅمبرتھ
4 1 1 x 1 1 x

(1) دوچشمی اچھر چھہِ اکۍ سے مصمتس پیٹھ مشتمل۔
(2) "چھے” لفظس منز چھہِ تھوٚنگس منز زہ مصوتہ یتھ ڈپتھانگ dipthong ونان چھہِ۔ پیش تہ زیر
(3)”تے”لفظس منز تہِ چھہِ تھوٚنگس منز زہ مصوتہ یعنی ڈپتھانگ۔ زبر تہ زیر۔ اتھ لفظس ہیکہِ نیم مصوتہ /ی/ سیتۍ تہِ یتھہ پاٹھۍ تقطیع سپدتھ: /ت+ زبر+ ی/۔ امہِ تقطیع کنۍ تہِ چھہ یہ دۅن ماتراہن برابر۔
(4) یہ پوٚت آواز چھیہ نہ دۅن مصمتن پیٹھ مشتمل، بلکہ اکس مصمتس پیٹھ یتھ منز اوٚڈ یے /ت/ صمتچ تالریت palatalizationہاوان چھہ۔ /تۍ/ چھہ مفرد تالرۍ مصمتہ۔

پیچیدہ ماترا وزن

پیچیدہ ماترا وزن ورتاون واجنٮن زبانن منز چھہِ سنسکرت، یونانۍ، لاطینی تہ کلاسیکل عربی شامل۔ کلاسیکل عربی یک عروض ووت اسہِ تام گوڈہ فارسی تہ پتہ ارود کنۍ۔ سانۍ شاعر یمن منز محمود گامی سندِ پٮٹھہ مہجورس تام ساری شاعر شامل چھہِ، ہیکۍ تہ کلاسیکل عربی عروضکۍ تم وزن بہتر پاٹھۍ ورتٲوتھ یم پیچیدہ ماتراہن پیٹھ مبنی چھہِ، کینژھا زبانۍ ہندِ مزازہ کنۍ تہ کینژھا ہیجلۍ عروض ورتاونہ کہ عادتہ کنۍ۔ مگر عربی فارسی عروضکۍ تم وزن، یم بنیادی طور ہیجلۍ وزن چھہِ، ورتاونس منز آیہ نہ یمن کانہہ مشکل پیش۔ مہجورنہِ پتہ کیو جدید شاعرو ورتاوۍ پیچیدہ ماترا وزن اکتسابی طور نسبتا کامیابی سان۔

کلاسیکل عربی عروضکۍ وزن چھہِ پیچیدہ ماترا وزن، امہِ کنۍ تکیازِ یمن منز چھیہ ماترا گنتی علاوہ، پدٮن اندر ماتراہن ہنز ترتیب تہ ترکیب تہِ آہنگ خاطرہ اہم۔ گوٚو یمن وزنن منز چھہ آہنگک دوٚگن معیار ورتاونہ یوان۔مثلا کلاسیکل عربی عروضس منز چھہ اکھ شراہ ماترا وزن یس یتھہ پاٹھۍ چھہ:

22121 22121 = 16 ماترا

یمہِ ترتیبہ یم ماترا اتھ وزنس منز یوان چھہِ، تمہ منزہ چھیہ یہنزاکھ خاص دہراونہ ینہ واجینۍ تنظیم ننۍ نیران۔ یوٚت تام نہ ماتراہن، یا ہیجلٮن یا تاکیدن ہنز اکھ خاص ترتیب قایم گژھہِ تہ سۅ وزنس منز دہراونہ یی، توٚت تام چھہ نہ پدٮن ہند کانہہ جواز۔ اسہِ وچھ پتمٮن صفحن پیٹھ اردو پرٮژھہِ تہ لل واکھس تہ رفیق رازنس کلامس منز چھیہ نہ ماتراہن ہنز کانہہ مخصوص ترتیب قایم گژھان تکیازِ پرٮتھ مصرعس منز چھیہ ماتراہن الگ ترتیب، لہذا چھہ نہ تمن منز پدٮن ہند کانہہ جواز۔ تمن منز چھہ ماتراہن ہند کل تعداد سادہ آہنگ پیدہ کران۔ مگر پٮٹھمس کلاسیکل عربی وزنس منز گژھن تعدادہ کنۍ16 ماترا آسنہ علاوہ تم ماترا پٮٹھمہِ مخصوص ترتیبہ منز واقع سپدنۍ۔

یم ماترا ہٮکن دۅن دہراونہ ینہ والٮن پدٮن منز تقسیم سپدتھ:
22121 /22121

یم پدۍ چھہِ عروضس منز مفاعلاتن مفاعلاتن کیو ارکانو (افاعیل) ستۍ ظاہر کرنہ یوان۔
مفاعلاتن پدکۍ ماترا ہیکوکھ اسۍ ِ یتھہ پاٹھۍ سمجتھ:

کل ماترا تن علا مفا
پٍنژم ہیجل ژورمٚ ہیجل تریم ہیجل دوٚیم ہیجل گۅڈنیک ہیجل
ن زبر ت لا ل زیر ع آ ف زبر م
8 1 1 x 2 x 1 x 2 x 1 x
نوٹ: یہ کتھ آیہ گۅڑے وننہ زِ ہیجلیک گۅڈنیک (یا گۅڈنکۍ) مصمتہ چھہ نہ ماترا گنزرنہ یوان۔

یتھ عربی بحرس منز یہ پوٚد ورتاونہ یوان چھہ تتھ چھہِ بحر جمیل ونان۔ یہ چھہ نہ کاشرس منز زیادہ ورتاونہ آمت، حالانکہ کاشرس آہنگس چھہ سٮٹھا براہ۔ اگر ورتاونہ تہِ آمت چھہ تہ ژۅن پدٮن ہنزِ شکلہِ منز۔ عبدالاحد آزادن چھہ یہ پوٚد خاص کر تمن نظمن منز ورتوومت یمن منز شکوہ تہ گراوہ چھیہ ۔ پٮٹھمس مخصوص وزنس پیٹھ (جمیل مربع سالم) چھن اکھ بٲتھ "نغمہ بیداری” ناوہ لیوٚکھمت یمکۍ کینہہ بند یم چھہِ:

حقیقتک رنگ دواں حبابس
مشک ملاں کاغذی گلابس
کران بدنام انقلابس
ہٮواں تھوُن پردہ آفتابس
یہ دلبری چھا ستمگری چھا
یہ رہزنی چھا یہ رہبری چھا
چھہ سور ملۍ ملۍ چھوان نورس
فریب غیبک دواں حضورس
خودی وناں نخوتس غرورس
تھٮکان فرعون کوہ طورس
یہ دلبری چھا ستمگری چھا
یہ رہزنی چھا یہ رہبری چھا
اسۍ کرو گۅڈنکہ بندچ تقطیع یتھہ پاٹھۍ:

کل ماترا حبابس دواں رنگ حقیقتک لفظ
16 221 21 2 2121 ماترا
گلابس کاغذی ملاں مشک لفظ
16 221 212 21 21 ماترا
انقلابس بدنام کران لفظ
16 2212 122 121 ماترا
آفتابس پردہ تھوُن ہٮواں لفظ
16 2212 12 21 21 ماترا
ستمگری چھا دلبری یہ لفظ
16 2121 2 212 1 ماترا
چھا رہبری یہ چھا رہزنی یہ لفظ
16 2 212 1 2 212 1 ماترا

(1)یمہ تقطیع منزہ چھہ یہ ظاہر زِ فارسی عربی چھہ آہنگک دوٚگن معیار ورتاوان: ماترا تہ تمن ہنز پدۍ بندی۔
(2) کاشرس منز چھہ نہ عام طور رنگ یا یتھے پاٹھۍ منز، بند، اند بیترِ لفظن ہند /ن/ مصمتہ گنزرنہ یوان، بلکہ چھہ یہ مصوتہ چہ کھونکھنیارچ نشانی ماننہ یوان۔ لہذا چھہ نہ یہ اکثر ماترا گنزراونہ یوان۔
(3) دوان، ملان، کران، ہٮوان، بیترِ لفظن ہند پتم نون چھہ اختیاری طور یا مصمتہ گنزرنہ یوان (اعلانیہ نون) یا صرف مصوتک کھونکھنیار، یتھ نون غنہ ونان چھہِ۔
محمود گامی سندِ پیٹھہ مہجورس تام چھہِ تمام شاعرن تم وزن پھٹان یمن منز زہ لۅکچہ ماترا اکس خاص جایہ پوٚتس پتھ یوان چھیہ۔ ماتراہن ہنز یہ مخصوص ترتیب چھیہ نہ کاشرس مزازس (لیہ) سیتۍ واٹھ کھیوان۔ یہ ٲس سۅ بصیرت یمیک اظہار امین کاملن مختلف جاین کوٚرمت چھہ، خاص کر "شعرن منز وزنہ پھیرہ” مضمونس منز۔ مثالہ پاٹھۍ نمون یہ وزن: مفعول مفاعیل مفاعیل مفاعیل فعولن۔ امیک ماترا تعداد تہ تمن ہنز ترتیب چھیہ یہ:

لن فعو عیلُ مفا عیلُ مفا لُ مفعو
2 21 12 21 12 21 1 22
221 1221 1221 122
پدٮن الگ، یمن ماتراہن ہند چھہ یہ نمونہ بنان:
22 11 22 11 22 11 22

اتھ وزنس منز چھہِ زہ ماترا، زہ ماترا پتہ اکھ ماترا، اکھ ماترا یوان۔ ییتہِ نس ییتہِ نس اکھ ماترا اکھ ماترا پوٚتس پتھ یوان چھیہ، تتہِ نس چھہ اکثر سانٮن شاعرن وزن پھٹان۔ تتہِ نس چھہ اکثر اکھ ماترا اکھ ماترا بجایہ زہ ماترا اکھ ماترا گژھان۔ یہ چھہ نہ صرف اکس شاعرس گوٚمت بلکہ محمود گامی سندِ پیٹھہ مہجورس تام تہ تس یور کن تہِ چھہ اکثر شاعرن ہند یۅہے حال یم نہ یہ وزن اکتسابی طورشعوری کوششہِ ورتاوان چھہِ۔ یہ زہ ماترا پتہ اکھ ماترا اکھ ماترا لے چھیہ نہ کاشرٮن شاعرن کاپہِ یوان۔ مگر ییلہ اسۍ یم شعر عروضی گز گتی لاگنہ ورٲے پران چھہِ، اسہِ کیازِ چھہِ نہ یم بیہ آہنگ باسان؟ تمیک وجہ چھہ زِ یوٚدوے یم پیچیدہ ماترا وزنہ حسابہ پھٹان چھہِ یعنی یہندس کل ماترا تعدادس ہرٮر یا چھۅنٮر گژھان چھہ تہ یہنز ماترا ترتیب درہم برہم گژھان چھیہ، یم چھہِ کاشرِ ہیجلۍ عروضہ مطابق برابر یوان۔ چونکہ سانۍ زبان چھیہ بنیادی طور ہیجلیو سیتۍ (ماترا سیتۍ نہ) وقفہ مینان، لہذا چھیہ نہ آہنگس سانہِ خاطرہ کانہہ فرق پیوان۔ وچھو رسول میرنہِ یمہ غزلچ ماترا تہ ہیجلۍ اکس اکھ مقابلہ تقطیع بییس صفحس پیٹھ (صفحہ 31)۔

امہِ وزنہ علاوہ بییہ زہ فارسی وزن یم اکثر کاشرٮن شاعرن پھٹان چھہِ، چھہِ یم:
مفتعلن مفاعلن مفتعلن مفاعلن
2112 2121 2112 2121
فاعلاتن فعلاتن فعلاتن فعلن
2212 2211 2211 211

یمن وزنن منز تہِ چھہ اکھ ماترا اکھ ماترا اکھ اکس پتہ یوان یس کاشرِ لیہ سیتۍ مطابقت چھہ نہ تھاوان۔ ظاہر چھہ پیچیدہ ماترا وزن چھہ نہ تتھہ پاٹھۍ لچکدار یتھہ پاٹھۍ ہیجلۍ وزن چھہ خاص کر کاشرِ کہ خاطرہ۔ یمن پیچیدہ ماترا وزنن منز گژھہِ برابر ماترا تعداد آسُن۔ ماتراہن ہند ہرٮر یا چھۅنٮر چھہ یمن ہند وزن ڈالان تہ یمن ہنز مخصوص ماترا ترتیب تہِ درہم برہم کران۔، یمن ہنز ماترا ترتیب تہِ گژھہِ کُنی آسنۍ۔ ہیجلۍ وزن چھہِ امہِ رنگہ لچکدار۔ کاشرس چھہ ہیجلۍ وزن اس لئے براہ آمت تکیازِ کاشرِ زبانۍ منز یۅس لچک تمن ہیجلٮن منز چھیہ یمن ہندس اندس پیٹھ ہلکہ مصوتہ چھہِ تتھ چھہ ہیجلۍ وزن بہتر پاٹھۍ ساتھ دوان۔

ہیجلۍ وزنن تہ ماترا وزنن، ماترا وزنن تہ پیچیدہ ماترا وزنن، ہیجلۍ وزنن تہ پیچیدہ ماترا وزنن درمیان چھیہ اتفاقی برابری ممکن تکیازِ ماترا تہ ہیجلۍ چھہ نزدیکی تصور۔ ییتہِ اکھ ہیجل اکہ کھۅتہ زیادہ ماتراہن برابر ہیکہ ٲستھ تتہِ ہیکہِ اکھ ہیجل اکس ماترا برابر تہِ ٲستھ۔ پیجیدہ ماترا عروضچ اکھ خاصیت چھیہ یہ زِ یہ چھہ ہیجلۍ تہ سادہ ماترا وزن تہِ شامل کران یمہِ کنۍ یہ "وۅپر” ٲستھ تہِ سانٮن زبانن ہندِ خاطرہ "لگہار” چھہ۔ ہیجلۍ وزنک تعلق اوس سانٮن واکھن تہ وژنن سیتۍ، اگر یم صنف زانہہ کالۍ سٲنس ادبس منز دوبارہ لیکھنہ آیہ تہ سانہ عصری شعرہ اظہارک وسیلہ بنییہ، ممکن چھہ پیچیدہ ماترا وزن یکسر مشرٲوتھ ما ییہ ہیجلۍ عروض دوبارہ بارسس۔ یوٚت تام نہ یہ سپدِ یمیک سیٹھا کم امکان چھہ، توٚت تام روزِ ہیجلۍ عروض کینزن مخصوص وزنن ہندس صورتس منز پیچیدہ ماترا عروضس تٲبیا۔

رسول میر نہ غزلچ ماترا تہ ہیجلۍ تقطیع کل ماترا
مصرعہ متہِ روز دما روزہ دریم چانہ لولرے
ماترا تعداد 2 12 21 12 21 12 212 22
ہیجلۍ تعداد 1 2 3 4 5 6 7 8 9 10 11 12 12
مصرعہ شرۅنہ دار سۅنہ سنزہ بنگرِ گریم چانہ لولرے
ماترا تعداد 2 12 2 12 12 21 12 212 25
ہیجلۍ تعداد 1 2 3 4 5 6 7 8 9 10 11 12 12
مصرعہ لب تشنہ چھس در باغ بہت سرو روانو
ماترا تعداد 2 12 2 2 12 21 12 221 23
ہیجلۍ تعداد 1 2 3 4 5 6 7 8 9 11 12 12
مصرعہ بو حال ونے بوز کنے یارہ مسا روش
ماترا تعداد 2 12 21 12 21 12 21 12 23
ہیجلۍ تعداد 1 2 3 4 5 6 7 8 9 10 11 12 12
مصرعہ میہ جویہ اشکنہِ آبہ بریم چانہ لولرے
ماترا تعداد 2 12 112 12 21 12 212 25
ہیجلۍ تعداد 1 2 3 4 5 6 7 8 9 10 11 12 12
مصرعہ میہ اچھہ پوشن مالہ کریم چانہ لولرے
ماترا تعداد 2 11 22 12 21 12 212 22
ہیجلۍ تعداد 1 2 3 4 5 6 7 8 9 10 11 12 12
مصرعہ تیتھ سوز عشقن باد صبا بوز رسولس
ماترا تعداد 2 12 22 12 21 12 221 23
ہیجلۍ تعداد 1 2 3 4 5 6 7 8 9 10 11 12 12
مصرعہ یتھ مشک روزیم گل میہ ہریم چانہ لولرے
ماترا تعداد 2 12 22 2 1 21 12 212 23
ہیجلۍ تعداد 1 2 3 4 5 6 7 8 9 11 12 12