1
انزانۍ وتو شام ڈلتھ راوِ خبر چھا
از بیاکھ ؤری آو تہ کیا ہاوِ خبر چھا
پوٚت کال وتن نال ؤلتھ شانکہِ یِتھے ما
کیا یاد کتٮتھ پاوِ تہ ودناوِ خبر چھا
یژکالۍ دپان نیرِ نبس رامہ بدرنۍ دونۍ
پٲراوِ ژہٮن چونہِ جٔرتھ ہاوِ خبر چھا
وردان کٔمس شراپھ دِیا پاس متِس چھا
نہناوِ ڈٮکن دامنن شروٚژراو خبر چھا
تعبیر سرُن چھا سہل استانۍ کتھن ہند
کر پھیرِ ؤری تراوِ قدم ناوِ خبر چھا
___
2
دیوانہ مرن کٲتیا بیمار بلن کٲتیا
اکھ شوخ نظر پوشِن آکار بنن کٲتیا
مشکاوِ بیابانن رنگناوِ سیہ شامن
وہراوِ اگر زلفن شہمار ژلن کٲتیا
وچھ سونتھ ہیوٚتن سورُن اکھ شام مۅلل کرتن
رتہ ژانگۍ وُہن راتس آمار دزن کٲتیا
دے آے دِین حسنس مجنونہ مژر عشقس
مس کھاسۍ بٔرتھ روزِن شہکار بنن کٲتیا
گوٚژھ روزِ حساب آسن میزان صراط آسن
جانانہ ننی پانے دلدار ترن کٲتیا
عظمت چھیہ جبینن منز نتہ آرہ پلن مۅل چھا
کوہ کن چھہ شرط آسن کہسار بنن کٲتیا
___
زمرے:شاعری
کاشر ادبی رسالہ نیب 