تمۍ کوٚڈ کلہ تیرِ چھۅکھ تہ اشہ وانہِ نطرن گراے کڈتھ کوٚڈن سۅچہ پچہ واش۔ یہ عجب منظر وچھتھ گوس بہ حیران۔
"پزر چھہ یی!” بٔڈہ افلاطونن دوٚپ میہ۔
"حضرت، کیا—کیا چھہ پزر؟” میہ پرژھ وتاولی سان بٔڈہ افلاطونس۔
تمۍ وٲج سۅچہ پچہ پیٹھ نظرن کنگنۍ۔ رُمہ رُمہ کٔڈن نظر تہ دوٚپن۔”پۅترا، یہ —یہ چھہ نہ کانہہ معجزہ نہ کانہہ کرامتھ۔
” تیلہ۔۔تیلہ کیا چھس بہ یمو چشمو وچھان؟” میہ پرژھ افلاطونس۔
"لال چوک یمۍ پنن اتہاس پانے لیوٚکھ—چوک—لوکہ سمندر — ژلہ لار —شور—فٹ پاتھ—گنٹہ گر—دچھنۍ کھورۍ رۅے—رۅین پیٹھ انسانیت پھیانگان—دٕہۍ—ٲنہ محل—آدمۍ پدٮن تل چھہِ اتہاسکۍ ناگ وزان—ژہ—ژہ کڈ اشہ وانہِ نظرن گراے۔ ژہ لبکھ ضرور تم آکار یمن پیٹھ سمیکۍ ضرب از تہِ تابان چھہِ۔ لال چوک—یہ چوک—!” تمۍ ژٔٹ کتھ۔
"ؤنیو، ؤنیو افلاطون—ژھۅپہ کازِ کٔروہ؟” میہ پرژھ تس عاجزی سان۔
خبر تس کیا گوٚو—تس پھُٹ وسوٲسۍ—عرقہ سران گوس۔ پتہ گٔیہ تس کُنی لارن۔
"یہ—یہ کیا سپد؟” میہ پرژھ بٔڈہ افلاطونس۔
"کوچہ پھیُر۔” تمۍ دیت ولۍ ولۍ جواب۔
"مطلب؟” میہ کوٚر بییہ افلاطونس سوال۔
پاژھہِ نرِ سٍتۍ ڈٮکس عیرق وتھران دوٚپن، "یتھ چوکس منز گوٚو کمن کمن سقراطن کوچہ پھیُر۔ یمۍ چوکن نٮنگلٲو تہنز ژھاے تام۔ یہ چوک چھہ کمن کمن انقلابن ہند چشم دید گواہ۔ گہے وچھن لکہ سمندر تہ گہے وچھِن قبرستانچ خاموشی۔ جنڈہ وتھۍ تہ جنڈہ کھتۍ۔ وۅزل، سبز،سفید،سیاہ جنڈہ—یمۍ چوکن وچھ پوشہ ورشن تہِ تہ رتہ سہلاب تہِ۔ قرار تہِ تہ انہراے تہِ—”
یی ونان تج تمۍ ٹٕکھ۔ وچھان وچھان کوٚر میہ تمۍ کوچہ پھیُر۔
میہ ژھونڈ افلاطون جایہ جایہ۔ پوٚز کُنہِ لوٚبم نہ تمۍ سند ریب نشان۔
میہ اوس وۅنۍ افلاطون سندِ ژھٮنہ گژھنک سخ افسوس۔ اوے اوسس چوکس منز کوچن اورہ یور ونۍ دوان۔ اتھۍ منز پیوٚو میہ اکہ دۅہہ افلاطون سند شرط یاد—میہ کوٚڈ کلہ ہیرِ چھۅکھ—اشہ وانہِ نظرن گراے کٔڈتھ دراس چوکس کُن تمۍ سند پے پتاہ ژھارنہِ۔ بہ ووتس لال چوکس منز تتھۍ جایہ ییتہِ نس بٔڈہ افلاطونن میہ کوچہ پھیُر کوٚر—
میہ ژٔج کھۅرو تلہ زمین ییلہ میہ تتھ جایہ تمۍ سنز چمرو چپنۍ —پیالہ تہ ڈایری لٔب۔
"مگر افلاطون؟” میہ پرژھ چوکس منز اکس بزرگس۔ تس گوٚو میون سوال بوزتھ اسن وٕکرِ تہ دوٚپن، "یتھ چوکس منز گوٚو ازتام کمن کمن افلاطونن کوچہ پھیُر۔ نیر لگے پانس۔”
زمرے:افسانہ
کاشر ادبی رسالہ نیب 