افسانہ

کرالۍ (افسانہ) – علی شیدا


اچھن منز آوسیمتۍ دبنۍ، وٹھن پیٹھ پرانہِ بے معنہِ پریژھہ ہلمس، نٲٹھیمتۍ دعایہ خیر تہ مۅچھہِ منز ژھٮپل پونپرۍ ہٮتھ گوٚو سہ اڈلیوٚک کاڈ کڈمتس ٲنس برونہہ کنہِ استادہ۔ گردِ بٔرتھ ہردہ تٮہہ سنییس ڈٮکہ چٮن رکھن تہ برزہ ونہ کہ اخبارک سہ اشتہار ژاس نظرِ پُنوو منزۍ شعور کس ویراں خانس یتھ پیٹھ تہنزِ ژھایہ ہنز زٲنۍ پتر چسپاں کٔرتھ ٲس۔ ٲنہ پٹہِ منزۍ ٲس وٲناکھ کٹھٚچ ژھۅکیمژ لب بیمار تۅژھہِ ہند شاپھ زواں۔ صلیبس ٲسۍ زہ کھیہ لد کلۍ دگہِ ہنزِ رگہِ ترس ترس دتھ رتھ ژہنہ چہ گانگلہِ منز آورۍ تکیازِ مارہ واتل اوس وُنہِ شوٚنگتھے۔ سہ کر وۅتھہ تہِ ٲس نہ کٲنسہِ خبرے۔ وۅتھیا کنہ نندرِ شنیہس منزے تُلہِ شراکھ تہ رتہ پھیرٮن دیہ سیاہ چھُکہ چھپہِ تہ پُژ لونچہ گنڈتھ تھاوِ ژوتس پیٹھ یتھ زن کلۍ اچھرن تہِ مالہ پھۅلہ ونے ژلن چخہ نیرتھ۔ اکس کلس اوس جین پینٹ اویزان یتھ یاں تہ اچھرہ روٚس گینہِ آسہ نہت دگہِ روٚس وُلۍ تہ ٹُکھ تہ بییس کلس ٲس زنتہ ژلہ لارِ ہندِ شہرہ ژلتھ آمتۍ ییتہ سہ برمندنٮن پننہ پزرک پھہہ کوٹ اچھن تل رژھرٲوتھ گیوو۔ پتلونکۍ نرۍ ٲسۍ یاونۍ بے گنڈ واوس پکھن پٮٹھ تہ کٹھچ بٮہ شونکۍ پتھر ٲس کھۅن آلوتھ تہندس وشفہ وسۍ پٮنس پراران۔ پوٚز قمیضہِ ہندۍ نرۍ ٲسۍ پھہہ کوٹس دچھنۍ کھورۍ لٲرتھ گمتۍ۔ دۅشوییو ووٚن اکۍ سے بولہِ منز اسۍ چھہِ ازیک پزر تہ سون پھرٮکن چھہ دہۍ لد ثبہ کھانٹٮن منز تروپرتھ۔

سۅ ٲس درامژ آنگنس منز اشۍ بکہ ہیتھ اندرمہِ وخنلہِ ہنز تچھنۍ تاپہ ناونہِ۔ نہت آنگنۍ پارکہ نیجہِ منز بے کس وۅپر گاسہ کڈنہِ۔ پوژ ٲسس یہ دپۍ زِ تہِ اڈہ ؤژھ دٲر ہش تہ رایہ آسس مالنۍ وتن لژھ ڈوان۔منزۍ منزۍ ٲس تاپہ ٹیکٮن زیر دوان تہ پنہ پونپرٮن تہ اٹہ زٍں زٍں ہن ہند بٮہ سۅکھ گتہ گیور تہِ سچھان۔ کیاہ تام پھسرارے تہِ ٲس کران پانس سیتۍ۔

اندرہ ٲسۍ شۅنگن کٹھس زنتہ لٲنٹۍ وتھمتۍ۔ رضاین ہند پھمب اوس روسۍ پھرستن پھمبکۍ پاٹھۍ ہٹس پھاسۍ تراوان۔ لبن ٲسۍ ہنہِ ہنہِ چاکھ زن گامتۍ تہ رٲژ پہرس آسہ ژانگۍ لٕیہ گینٮن تہہ کرنچ بس معنہ ژھمبہ کران۔ تتہِ ٲس ژھۅپہ تہِ چھکرنہ آمژ تہ پھرٮکل راتہ کریل ٲسۍ تالوس الاندۍ پننہِ وارِ پراران۔شاندس تل تعویزہ ٲسۍ چٹہ سفید گامتۍ تہ ملہِ پھیرۍ ٲسۍ وتھرنۍ پلوس شریپامتۍ۔ دارِ لٕیو تہِ اوس نہ خمارۍ ہوا اژان۔ تمن ٲسۍ زلرۍ زال تھپہِ بیٹھمتۍ۔ زون تہِ ٲس نہ شیرہ دارِ تل تھکھ کڈان۔ تمہِ اندہ ٲس بے مشک گۅلاب کُجہِ پنہ وتھرن تل کنڈۍ ژھر زنتہ تاپس ترٲومژ۔ کِلٮن اویزاں پھہہ کھتۍ مٹس پزرس اوسس سہ اچھو کھوریو ہاوان ز‏ میٲنس سۅسریمٹس بٮہہ کُٹھس منز چھہ دۅدریومت تہ کھییہ کھیوٚمت ٹرنک تہ تتھ منز تہ چھہ ٹکھۍ لد تہ ولۍ دار پتلون یس بہ کالجہ کٮن نٮتھہ ننۍ فرارۍ ژوٮن لاگان اوسس تہ سۅ قمیض یۅسہ میہ خاندرہ پتہ نکس دوٚیمہ زا دۅہہ بولہِ پٮٹھ انیاے۔ پسٚز تہندِ اچھ کھورہ ہاونک باس اوس نہ ٹنگٲمتس پتلونس لگان تہ نہ ٲس الٲنز قمیص تسندۍ اڈہ پرینۍ اشارہ سمجھان۔

سر اوس تھکتھ زنتہ دارِ الوند گومت۔ نظرہ آسس آنگنس چھکرنہ آمژہ۔ تمہِ ٲس وۅنۍ پژِ لونٹ تہِ اچھن متھۍ متھۍ ادرٲومژ۔ تاپہ ٹیکۍ ٲسس گمہ پھیرٮن ژہہ ژہہ دوان تہ نکہ دراو کالج۔ زنگن سے ٹکھ دار پتلون اویزاں تہ نالۍ سۅے زا قمیض یم میہ ٲدۍ کلٮن ہندس پھہہ کوٹس پٮٹھ نظرِ گیاے۔ فیس بکچ اچھ ٲس مژرنہ آمژ تہ سمیک نیٹ ورک اوس تھدیو ٹاورو پیٹھۍ کاوہ ینہ وول ہیو وپھان۔ تمۍ دژ دٲر تہ شریپیوو دم پھٹۍ گٲمتس کمپیوٹر کس ٲنتھہ روٚس صفرس منز۔

زمرے:افسانہ

جواب دیں

Fill in your details below or click an icon to log in:

WordPress.com Logo

آپ اپنے WordPress.com اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Google+ photo

آپ اپنے Google+ اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Twitter picture

آپ اپنے Twitter اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Facebook photo

آپ اپنے Facebook اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Connecting to %s