نذیر آزاد
پھٹمژ قلاے
دور اکس بالس پیٹھ دۅہدش وقت زوال
تھوٚکمت سرۍیہ چھہ ڈکھراں آسہ تہ لر تراواں
برمجہ کلٮن نزدیکھے پھٹمژ پختہ قلاے
ییتہ کینہہ روح چھہِ درۍ گنڈۍ گنڈۍ استادہ رواں
کانہہ سرگرمی یا شور نہ کانہہ نہ چھہ رنج والم
شی شی کروُن واو فقط کس تاں لاراں
کانہہ گگرایا منزۍ چھیہ دواں اسمانس ژنڈ
طرفاتن بے وایہ چھہِ لچھہِ بدۍ ڈول وزاں
(پھۅجہ پیٹھ بیٲر چھیہ پھیانگاں آنگنہ ہون ونگاں)
گتہ رینہِ کس تاں وُنہِ چھہ اچھن منز راتک زول
ریش سفید وزیرس منزۍ منزۍ کن کھوراں
(محلکۍ شرۍ ما برمجہ کلٮن کنۍ کنۍ لایاں)
وٲنسٹھ بام ڈۅکیومت صدین استادے
زنتہ مدے گنڈتھ کس تاں ؤنۍ چھہ دواں
رازہ چھہ درامت تازہ شکارس یوہ کنہ راتھ
لاو تہ لشکر ہٮتھ ییہ شاید از نہ پگاہ
ڈبہِ ڈالانس درۍچس پیٹھ بیہہِ کوتر جورۍ
بٲتھ یمن ہندۍ بوزنہ واتاں صبح وس
لگہِ دربار تہ ڈینجن بییہ ییہ کھُر نیرتھ
اسمانس تاں کاڈ کڈتھ ادہ واتہِ دعا
ریش سفید وزیرس نیرِ پدیو منزہ وُنۍ
تارکھ نب یا بونہِ شہل یا خاک شفا
کٹوالس پییہ نندر دۅہلہِ تہ خوابس منز
وچھہِ کانہہ زارۍ پینڈا یا قتلا نتہ کانہہ چکلا
راتھ چھیہ گۅبہِ کھۅرہ زاین دیہ شاید سرۍ یس
پۅتلٮن گژھہِ بیدار دلن منز یاد خدا
قرۍ مزۍ زال چھہ تارکھ نب، کمۍ تام شکارۍ
وہرٲوتھ کرۍ کٲتیا ماہ و سال شکار
پنہ وتھرن ہند چرۍگیش ہردک ماتم دار
شبنمۍ ٹاریو کرتامتھ ودِ فصل بہار
دۅژھہِ دۅژھہِ ہلمو ہلمو سٮکھ تیۍ سۅمبراوٕن
صحراوس چھا ناو ژلاں مفلس نادار
صحرا دریا جنگل سپدن آبے آب
پختہ قلاین ژھٹھ کڈِ ٲخر اندرم نار
ازل و ابد دنیا شنیا بنۍ بنۍ چھہِ مٹاں
چون مقدر میون مقدر فانے فان
___
یہ چھہ نہ وۅزم گاش
غمو کوٚر شانہ زلفن میانہ باپتھ
مٔلتھ زیتونہ پھلۍلا پیچ در پیچ
ژۅپاسے نژنہِ لج بے وایہ خۅشبو
تہ سٍتی ظلمتچ مہرینۍ تہِ سکھرے
سۅ مہرینۍ یس نہ پٲراوک چھہ حاجت
سۅ وردن پانۍ پانس پانہ زیور
تسنز سم دۅن جہانن منز چھیہ سرحد
وچھک دب دب وپھاں اسمانۍ زن پٲز
پدٮن تلہ کنہِ بپا چھس شور محشر
ہٹیک باوٹ چھہ کتراں دل ہمالس
تہ گۅڈہ کوٚر زنتہ چھٮس زنجیر موتچ
ژۅپاسے ہب تہ دب گوٚو جانور ژلۍ
رٔہتھ گے لوکھ بستی منز اچانک
خبر کمۍ تھوو برونہہ کنہِ ہاپتس اوٹ
تہ کوٚرنس عرض چھکھ دانا تہ بینا
یمن سانٮن گلالن ونتہ تعلیم
بٮہ کاری حض درایں دنیا خجالت
ہٮنر لگۍ گرزنہِ آگر وٹھ چھہِ پھیشاں
تہ واندر راج گوٚو قایم ژۅپاسے
زمینن بیول رٹنس کٔر بغاوت
دُرس ووٚتھ نرخ کترٮن باو تیزیوو
کنٮن تے ششترک وجہ واو تیزیوو
نداے غیب گوٚو لوکو ؤتھو تھوٚد
چھہ کوٚرمت سریہ کمۍ تاں سامری قید
ؤتھو تھوٚد یس وۅں سے چھو، ییتہ وۅں تتہ چھو
دٔوو، دورِو، کٔرو برپا قیامت
گماں الفس زِ بے ما سامری اوس
تہ بے جیمس چھہ زاگاں دولہ نظرو
مگر جیمس چھہ دالس پیٹھ یۅہے شک
یکایک پورہ بستی آیہ وۅتلتھ
گریباں ژھینۍ تہ دستارن بٔرکھ رب
شکن ہند فصل گوٚو استادہ بے شک
طلسمی شام پھٲلیوو شش جہاتس
مگر اتھۍ محشرس اندر بہ یکبار
ژٮہ ترٲوتھ کارِ پتۍ زلف سیہ فام
زمین و آسماں گوٚو نورہ سرۍ زن
مٮہ کن ترٲوتھ ژیہ نظرا گاش وۅپدیوو
___
سیہ نظم
یہ منظر کیتھ میہ رقصاں چھم اچھن تل
یہ گوٚژھ تبدیل سپدن کرۍ میہ کم ژھل
سیاہی منز سیاہی تژھ چھیہ آمیز
سیہ شراکن چھہ جوہر زنتہ اہریز
سیہ مہرینہِ چھہ وردن کالہ اوٚبرک
اچھن منز آب چھس پوٚز کریہنہِ سدرک
سیہ چھس روے تے خال سیہ فام
بہ طرف سنگ اسود زنتہ گھنشام
ہٹیک باوٹ کنن ہند دور ظلمت
سیہ پازیب شرۅنۍ شرۅنۍ چھس نحوست
سیہ چوری بدست آں نگارے
بہ شاخ اسودیں پیچیدہ مارے
سیہ چشمن سیہ سۅرمہ تہ سیہ گاش
سیہ سرۍ یس چھہ پریڈاں کالہ پراگاش
سیاہی منز غرق کٲتیا خیالات
سیہ اعمال کریہنیارک مکافات
سیہ مویس سیاہی ٲس مقدور
خضابن کٔر سفیدی پانہ مستور
سیہ کارن فقط تقدیر وچھ پریوٚن
سیہ شہرس چھہ شاید رٲچھدر اوٚن
سیاہی کرسا ییژاہ ٲس برپا
نہ سودا زلف و خالک اوس یوتا
اچھن لٲجم سیہ گاگل میہ پانے
نتو بجلی چھیہ گٲمژ کالہ کالے
___
تاپھ
تمۍ دوٚپ اسۍ ونۍ تاپس بالکل بُتھ نہوو
ماگس کاڈ کڈتھ پییہ واتن ہارس تام
چھٹہ پونپرۍ گوٚژرٮن منز تھاونۍ قید چھہِ ونۍ
سوسنہ زردی اسمانس تاں پھٲلاونۍ
مژۍ ژیہ تہِ آسن وُنہِ تم تاپلۍ دۅہ یادے
زلفن منز ییلہ گنگا ٲسے ژھالہ نوان
میہ تہِ چشمن منز اوس وۅلر زن گٕتہ ماران
ژیہ تہِ اوسے دامانس تارکھ نب الووٚند
میانۍ ہوس ٲسۍ برنزس منز اسمانۍ وپھان
ٲس سۅ کوتر جورۍ یۅہے پیغام انان
چٲنس باغس یسلہ چھیہ لجمژ ببرِ پھلے
کمۍ تامتھ شیچھ تھٲو میہ دلہ کٮن گوشن منز
پربتہ درامژ توپھ چھیہ تازہ وچھن ژھاران
وگنٮن ونہ واں ونہ واں باکہ گژھن سرۍ پیٹھۍ
گریشمچ مہرینۍ تُلہ کتریک وردن لٲگتھ
از نہ پگہ ییہ وٲریو موٚنڈت کڈنہِ ضرور
برنزس منز اسمانہ ؤستھ پیوٚو تارکھ نب
چٲنس رۅنہِ دامانس بخشتھ گوٚو شنیاہ
کوتر جورۍ تہِ بیٹھ پکھن منز کٲر تھوتھ
زلفن ہنز گنگایہ لگتھ گوٚو کورہ ژۅپارۍ
پوٚز میہ چھہ ونہِ تہ اچھن منز گٕتہ ماران وۅلر
تمۍ دوٚپ اسۍ ونۍ تاپس بالکل بُتھ نہوو
پوٚز میہ چھہ وُنہِ تہ دلس منز کٲتیا سرۍیہ وہان
___
دورِ ونچ پدمانۍ
دورِ ونچ پدمانۍ ژیہ آسی وُنہِ شاید
اسہ وُن تارکھ ڈل چشمن منز شولان
نتہ آسی کانہہ ناگہ بلچ سرتازہ وزنۍ
کلہ تھوٚد تلۍ تلۍ اسمانس کن دولہ وچھان
زلفن منز وُنہِ آسی سے سرتازہ گلاب
کوتر جورۍ یمچ خۅشبو ہر سو چھکراں
سر تا پا وُنہِ آسی لٲگتھ شینہ پۅشاک
رنگت، ٹھنڈک آسہِ یمچ ہرجایہ نژاں
زانہِ خۅداے میہ کیازِ گمانہ دلس کوراں
زانہِ خۅداے میہ کیازِ کران یقیں مرہم
باساں چھم زن کوتر جورۍ ٹھپس منز قید
زلفن ہند مہرازہ گلاب کراں ماتم
منزۍ چھم باساں ناگہ بلس لگہِ مانچھس دار
نتہ وستورۍ ونس پیٹھ وق ٹھہراوِ قدم
شام و سحر یتھ جایہ کڈان چھہِ منزۍ منزۍ تھکھ
تتھۍ دروازس پیٹھ اسمان تہِ کرِ سر خم
وُنہِ تہِ چھہِ پوش پھۅلاں تہ زردی چھیکھ پریڈاں
وُنہِ تہِ چھہِ چانۍ خیال کران دلس گانگل
وُنہِ تہِ چھیہ زون اسان تہ ماتم چھس پشپاں
ونۍ ونۍ لیچھم چانہِ مۅکھن اکھ تازہ غزل
وُنہِ تہِ چھیہ گہلٮن یارِ ونن منز راتھ وداں
وُنہِ تہ چھیہ جوگس بیبہِ منز زوتاں سورہ منقل
افتابس وُنہِ پژھ چھیہ نہ پننس گاشس پیٹھ
کوچو منزۍ چھا دۅہ پھیراں کِنہ کانہہ پاگل
دریاون وُنہِ تریش ہمانی چھیہ نہ شاید
صحراون وُنہِ سیکہ کوہ باساں مشت غبار
طرفاتن منز قید چھہ گومت کون و مکان
وقتس ماضی، حال تہ مستقبل دیوار
دورِ ونچ پدمانۍ اگر یکھ سون کُنتھ
دریا، صحرا کاڈ کڈتھ سپدن بیدار
کوتر جورِ سفید پکھن منز شولہِ گلاب
نوٚو اکھ طرفا، نوٚو اکھ ساتھا گژھہِ تیار
زمرے:شاعری
کاشر ادبی رسالہ نیب 