فیاض دلبر
معروف فرانسیسی نقاد تہ لکھارۍ رونالڈ جیرارڈ بارتھس (Roland Gerard Barthes) سند دوٚپ چھہ زِ "ییلہ اکھ افسانہ نگار افسانہ لیکھنہِ چھہ بیہان دراصل چھیہ تمہِ افسانچ کہانی تمی وزِ تمس افسانہ نگارس تہِ لیکھان آسان”۔ وضاحتا گوٚو امیک مطلب یہ زِ افسانہ باپتھ کُس موضوع چھہ افسانہ نگار ژاران، کم تہ کتھۍ کردار چھہ تُلان، امی سٍتۍ چھیہ تسنز شخصیت تہ تہندِ لسنہ بسنک طریقہ تہِ سمجھ یوان تہ زندگی ہندین مختلف معاملن پیٹھ تہنز راے تراے تہِ معلوم سپدان۔ اتی چھہ یہ تہِ فکرِ تران زِ سۅکھس دۅکھس، غمس خوشی، کامیابی یا ناکامی پیٹھ کیاہ چھیہ لِکھارۍ سنز راے۔ یہ تہِ چھہ واضع گژھان زِ افسانہ نگارس چھا کانہہ ذاتی اخلاقی فلسفہ یا نقطہ نگاہ تہِ کنہ نہ۔ یہ چھا محض پننس ذاتی گدرنس پیٹھ ماتم کران روزان کِنہ امس چھیہ خارجی دنیاہس پیٹھ تہِ نظر تہ باطن تہِ چھس پرزناون تگان۔تخلیقی عملہِ دوران چھہ افسانہ نگارس ذہنی طور زبردست چاک و چوبند روزن پیوان۔ اتی چھہ اکھ جان، کامیاب تہ معیاری افسانہ تخلیق سپدان۔
میانۍ ذاتی راے چھیہ یہ زِ اکھ جان تہ کامیاب افسانہ چھہ سے یمیکۍ کردار شرین ہندین تماشن (کھلونن) ہیوۍ آسن نہ زِ افسانہ نگار دِیہ تمن کونز تہ کرناویکھ حرکت، پتہ ادہ تتھ حرکژ کا نہہ جواز آسہِ یا نہ آسہِ۔ نہ گژھہِ افسانہ نگار کردارن ہندس مرس منز پنن پان ژٲنتھ زبردستی لوکن پننۍ نظریات آپراونچ کوشش کرُن بلکہ گژھہِ کردارن پننۍ الگ پہچان، مزازہ، انفرادیت تہ شخصیت آسنۍ۔ اکہ جان افسانچ پہچان چھیہ یہ تہ زِ امہ کہ تحریر کس اندرمس تہ ظاہری ساختس منز چھہ اکھ مکمل نظم و ضبط آسان، امیک بنیادی خیال چھہ کُن مگر اتھ منز چھہِ معنیکۍ واریاہ تہہ موجود آسان۔ اکھ جان افسانہ نہ صرف چھہ ا فسانہ نگار سنز پختگی، سنیر تہ شخصیتچ نشاندہی کران بلکہ چھہ افسانے تسند مقام تہ درجہ مشخص ہیکان کٔرتھ۔
نیب فیس بک محفلِ افسانس منز شامل ژۅشو ے افسانہ چھہِ ازچہ شورہ شرارہ واجنہِ کشیرِ منز روزن وٲلس انسانس درپیش مسلن تہ معاملن، احساساتن، خوفس، غیر یقینیتس، غمس تہ خوشی بیترہ اندۍ پکۍ ووننہ آمتۍ ۔ معاشرتی تہ سماجی زندگی سٍتۍ افسانہ نگارن ہنز یہ ہم آہنگی چھیہ فطری طور لازمی تہ قابلِ تعریف۔ عصری آگہی آسنہ سٍتۍ لیکھنہ ینہ والۍ افسانہ ہیکن اکس سماجس ایکسرے تُلتھ مگر ادبس تہ صحافتس گژھہِ فرق روزنۍ تہ افسانہ نگار گژھِہ نہ کتھ ونان ونان موجودہ دورکین اخباری ایڈیٹرن ہندۍ پاٹھۍ پنن فتویٰ (editorial verdict) دین۔
برج ناتھ بیتاب سند افسانہ "مجاہد” پٔرتھ چھہِ یتھی کینہہ سوال ذہنس منز پیدہ گژھان۔ "کوچہ کہ اپارۍ مہ طرفہ ٲسۍ زہ لڑکہ اورۍ کن پکان۔ تمہ کرۍ تم پرزناونچ کوشش۔ تس ییلہ نہ کانہہ سانکت آو تس باسیوو یم گژھن مجاہد آسنۍ ۔ زیوٹھ کرہن ریش، نوۍ پھیرن، ہٹس گلو بند، ز نگن جینز پتلون، کھورن نوۍ گولا بوٹھ تہ اتھہ زہ بیبس منز ۔ زیبس گوٚو پورہ یقین زِ یم گژھن مجاہد آسنۍ ۔ ( افسانہ "مجاہد”)
سوال چھہ یہ زِ یم زہ عام کاشر ۍ نوجوان چھہِ زیبس مجاہد باسان۔ کیاہ افسانہ نگارس تہِ چھا یم مجاہدے بوزنہ یوان؟ تکیازِ افسانہ نگار ییلہ ییلہ افسانس منز یہند ذکر چھہ کران سہ چھہ یمن مجاہد ناوے دوان۔
"دروازس چھیہ ٹاسرارے گژھان۔
"زیبہ: ( دل دوٚر کٔرتھ) کُس حض چھوہ؟
اکھ مجاہد: یہ چھا حض محمد رمضانُن گرہ؟
۔۔۔
مجاہد: ہے دروازہ تراو حض، تہ ونوے۔ درواز تراو اسۍ کیاہ جن چھا زِ کھیموہ؟
۔۔۔
مجاہدس کھٔژ ژکھ، ۔۔۔مجاہدن دژ پوٚت نظر۔۔۔ ( افسانہ "مجاہد”)
برج ناتھ بیتاب چھہ زبر شاعر تہ ادیب گنزرنہ یوان، ہمعصر کاشرس ادبس چھہ یہند اکھ پنن دیت یتھ نہ کانہہ انکار ہیکہِ کٔرتھ مگر یہ افسانہ وونان وونان چھیہ یمو یا تہ سہل انگاری کٲم ہیژمژ نتہ چھہ مصلحتن ہند شکار گوٚمت۔ کُنہِ کُنہِ چھہ یمو Judgmental بٔنتھ فتویٰ تہِ دیتمت۔ زنانہ ( زیبہ) چھیہ مردس (محمد رمضانس ) دپان زِ ہرگاہ سہ شرابہ چییہ سۅ ژلہِ گرہ ترٲوتھ۔ ز یبہ نہِ اتھ دھمکی پیٹھ چھہ افسانہ نگارس باسان زِ محمد رمضانس منز چھہ "مردانگی ہند غیرت” پیدہ گژھان تہ سہ چھہ کردارس ( محمد رمضانس) اتھہِ دلہ منزۍ یہ سونچناوان زِ کرفیو وتھۍتھے کتھہ پاٹھۍ کرِ سہ شرابچ سبیل۔
"مردانگی ہندِ غیرتک احساس” اگر کردارس گژھہِ ، قابلِ قبول چھہ مگر یتین چھہ یہ صرف افسانہ نگارس باسان سہ تہِ کتھ پیٹھ تہ کہنزِ کتھہِ پیٹھ، تہِ چھہ غور طلب؟ ہرگاہ نہ بہ ذاتی طور بیتاب صابنۍ ذات تہ شخصیت زانان آسہ ہا بہ دپہ ہا male chauvinist چھہ۔ توے چھہ یژھان زِ زیبہ نہِ کتھہِ پیٹھ گوٚژھ محمد رمضان یُتھُ ردعمل ہاوُن۔ افسانہ پٔرتھ چھہِ ورایاہ تتھۍ سوال تہِ وۅتلان یمن ہند تعلق اتھ منز ورتاونہ آمژِ تیکنیکہِ سٍتۍتہِ چھہ تہ موضوعس سٍتۍ تہِ۔
غیر ضروری مکالماتی حصہ چھہِ امہ کس بہاوس کمزور کران ۔ کلایمکسس پیٹھ وٲتتھ چھیہ نہ یتھ کتھہِ تہِ کانہے وضاحت سپدان زِ یم نوجوان کیازِ چھہِ محمد رمضانس زبردستی گرِ نیبر کڈُن یژھان۔ شراب چہ زہ بوتلہ ہیکہ ہن تم ژھۅپہ دم کٔرتھ تمس اندرہ تہِ حوالہ کٔرتھ۔ ظاہر چھہ افسانہ نگار ڈرامایی انداز پاننٲوتھ سسپینس پیدہ کرنہ باپت محمد رمضانس گرِ نیبر کڈناوان مگر کانہہ جواز، کانہہ دلیل دنچ ضرورت چھیس نہ محسوس گژھان۔ سہ چھہ بس شرۍ سندس تماشس (کھلونس) کونزاہ نوان کٔرتھ۔
” کرالۍ” ۔ علی شیدا سند یہ علامتی افسانہ چھہ کاشرس افسانوی ادبس منز جدیدیت پانناونہ واجنہِ تتھ نہجہ کن حیس پھران یتھ منز سانیو افسانہ نگارو کینہہ کامیاب تہ قابل قبول تجربہ تہِ کرۍ، مگر سٍتی آیہ افسانہ یا کہانی ناوس پیٹھ بے معنی بلکہ
ژھرۍ تہ ژھۅژۍ تحریر تہِ برونہہ کُن۔ یہ نہج، یہ ٹرینڈ چھیہ سانین مصورن منز تہِ وچھنہ آمژ یمو وقتہ وقتہ تجرید ی آرٹ کس ناوس پیٹھ واریاہ واہیات تجربہ کرۍ۔ حقیقت چھیہ یہ زِ یتھین مصورن منز چھہِ زیادہ تر تتھۍ آرٹسٹ شامل یمن ڈراینگ بناونچ کانہہ بنیادی صلاحیتے چھیہ نہ، میانۍ کنۍ چھہِ سانین لکھارین منز تہِ ورایاہ تم حضرات شامل یمن سیوٚد سادہ پاٹھۍ کتھ یا کہانی وننۍ تگانے چھیہ نہ۔
علی شیدا سند "کرالۍ ” پران پران چھہ یہ باس سپدان زِ افسانہ نگار چھہ کہانی وننک فن زانان تہ افسانہ چہ بنیادی لوازماتو تہ ضررورتو نش تہِ چھہ باخبر مگر تمہ باوجود چھہ افسانس منز واریاہ غیر ضروری عنصر لبنہ یوان۔ پیٹھہ چھیہ تژھہ تہ تیژاہ علامتہ وۅتلاونہ آمژہ زِ ا مہ کین کردارن تہ تمن سٍتۍ سپدنہ ینہ والین واقعاتن چھہ نہ علامتی سطحس پیٹھ خاص واٹھ یا مطابقت باسان۔ اوہ کنۍ چھہ یہ افسانہ مغربی تہذیبک تیتھ ماڈر ن میوزیکل بینڈ ہیوۍ باسان یم بیہ شمار تہ بیہ گنڈ ساز وٲیتھ اکھ مٔدر تہ متاثر کرن واجینۍ دھن پیش کرنچ ناکام کوشش چھہِ کران۔ افسانس چھیہ یہے رواں تبصرچ یعنی Running commentary ہنز ہش شکل، تہ یہ کمینٹری زن چھیہ کمہ تام ہزیانی Hallucination صورتحالچ عکاس۔ ہزیان چھیہ اکھ تژھ غیر فطری مگر عارضی ذہنی کیفیت یتھ منز انسانس کنن غابی آوازہ چھیہ گژھان تہ اچھن تل اؤٔچھہ شکلہ چھیہ یوان۔
"تتہ ٲس ژھۅپہ تہِ چھکرنہ آمژ تہ پھریکل راتہ کریل ٲسۍ تالوس الوندۍ پننہ پننہ وارِ پراران۔” یا "مارہ واتل اوس وُنہِ شوٚنگتھے۔ سہ کر وۅتھہِ تہِ ٲس نہ کٲنسہِ خبرے۔” افسانس منز درج یتھۍ ہیوۍ جملہ ییلہ ییلہ نظرِ چھہِ گژھان پرن وٲلس چھہ باسان زِ کیاہ تام گژھہِ وُنۍ یا کیاہ تام چھہ سپدن وول۔ مگر المیہ چھہ یہ زِ اتہِ چھہ نہ کنہی تہِ گژھان۔ نہ انزس نہ منزس تہ نہ نقطہ عروجس پیٹھ۔
شکیل ا لرحمان سند اکھ افسانہ، ظاہر گۅڈنیک، "تبخ نالن ییلہ رۅخ پھیُر” چھہ میہ از برونہہ الہ پلہ ؤری 30 مرہ اسلامیہ کالجہ کس میگزنس منز پوٚر مت۔ امہ پیٹھہ از تام چھیہ اہنز شخصیت میہ تہ میانین دوٚیمین ہمعصر ادیبن ہنزن نظرن منز محض اکس تتھس سنجیدہ تہ سرگرم ادبی کارکن سنز ہش روز مژ یس ما جہ زیوِ جایز تہ اہم مقام دیاونہ باپت ‘کاشر محاذ’ ناوچ تنظیم ہیتھ ؤری ہا پیٹھہ تنہ تہ منہ جکھان چھہ مگر پانہ ادب تخلیق کرنہ نش سیٹھا دور چھہ۔ یتھہ کنۍ چھہ یہ اسہِ بحثیت تخلیقکار تقریباً مشتھے گومت ۔ مگر اہند تازہ ترین افسانہ "بیہ قراری” پٔرتھ گوس بہ حیرتن زِ شکیل الرحمان نہ صرف چھہ ژورِ ژھیپہِ مطلب پبلسٹی کرنہ ورٲیی ونہِ تہِ افسانہ لیکھان بلکہ چھہ پختگی سان معیاری تہ دلچسپ افسانہ لیکھان۔
"بیہ قراری” چھہ تیکنیک، ہیت تہ موضوع کہ اعتبارہ کنۍ اکھ مکمل تہ کامیاب افسانہ۔ بلکہ چھہ یہ یمہ کتھہِ ہنز ژینہ ونۍ تہِ دوان زِ شکیل الرحمان سند شمار ہیکو تمن افسانہ نگارن منز کٔرتھ یم کہانی افسانس منز تبدیل کرنک فن زانان چھہِ۔
"بیہ قراری” چھہ کشیرِ ہنزِ ہمعصر زندگی تہ سماجک ٲنہ۔ افسانہ نگارن چھیہ بڈہ کامیابی سان عصری آگہی تہ زندگی درپیش مسلن تہ مشکلن ہنز نشاندہی کران کران انسانی خواہشاتن تہ فطری مزازچ تہِ بھرپور عکاسی کرمژ۔ اتھ اندر چھہ نہ کُنہِ قسمک ابہام یا پیچیدہ اندازِ بیان ورتاونہ آمت بلکہ چھہ کتھ وننک سیوٚد سادہ طریقہ پاننٲوتھ کشیرِ ہندس موجودہ ماحولس منز لسنہ بسنہ وٲلس انسان سنزِ داخلی کیو خارجی زندگی سام ہینہ آمژ۔
عاشق مزازہ نوجوان چھہ عملی طور کوشش کٔرتھ مسافر بسہِ منز تتھ سیٹس پیٹھ بیہان یتین اکھ نوجوان لڑکی بہتھ چھیہ آسان۔ امہ پتہ چھہ سہ گاڑِ سفرس دوران گرا نیبرۍ کِنۍ رونما سپدن ینہ والین واقعہن منز ہینہ یوان تہ گراہ چھِس وتہِ نظرِ گژھن والۍ منظر موجودہ صورتحالس سام ہیاوان۔ ملہ کھاہ وچھتھ چھس امیک تاریخی پسِ منظر ژیتس پیوان تہ تمہ پتے چھہ دلہ اندری تمن قبرستانن ونۍ دوان یم موجودہ حالاتن منز جایہ جایہ بارسس آیہ۔ اتھ دوران چھہ سہ پانس نکھہ بہتھ کورِ ہند س ظاہرس سام ہیتھ تس سٍتۍ منہ اندری کیاہ تام رشتہ تہِ قایم نوان کٔرتھ۔لڑکہ چھہ مختلف معاملن پیٹھ اندرۍ اندری تبصرہ کران کران کورِ متعلق متضاد رایہ تہِ دوان تہ تمی حسابہ تس سٍتۍ پنن رشتہ تہِ تھوان۔ افسانک اکوے حصہ چھہ ہنا پھۅہریرہ سان تہ خطیبانہ اندازک باسان۔ سہ گوٚو یتین لڑکہ اندرۍ اندریی موجودہ دورس منز زنانن سٍتۍ سپدن واجنین زیادتین ہند ذکر کران چھہ۔ اتین چھہ باسان زِ لڑکہ سندس کردارس منز چھہ رژھہِ کھنجہِ وۅنۍ افسانہ نگار بولان۔کل ملا کر چھہ "بیہ قراری” اکھ جان، کامیاب تہ فکر انگیز افسانہ۔
رحیم رہبر سند افسانہ ” کوچہ پھیرُ ” چھہ سرینگر شہرکس تاریخی سنگِ میل لالچوک کس بیک ڈراپس منز لیکھنہ آمت ۔ اتھ اوس یموو گوڈہ عنوان تہِ یی تھومت یعنی ‘لال چوک’۔ یہ افسانہ چھہ لالچوکس سٍتۍ وابستہ کشیرِ ہنزِ سیاسی تہ سماجی تاریخ کین تمن واقعاتن تہ شخصیژن کُن توجہہ پھران یم اہم تہ ناقابلِ فراموش چھہِ۔ افسانک اکھ اہم کردار بُڈہ افلاطون ہیکہِ تمس قد آور کاشرس سیاسی لیڈر سند گوٚٹ تصویر ٲستھ یمۍ کشیرِ ہندس سیاستس تہ ” لالچوک” کس پلیٹ فارمس پیٹھ پنژاہن ؤرین تہِ پیٹھی لیڈری کٔر مگر ٲخرس کوٚر عام لوکو ملہ مۅنجے رد تہ وۅنۍ چھہ نہ لالچوکس منز کانہہ تسند تصویر لاگنس تہِ بہران۔ افسانس منز چھیہ سیٹھہے کامیابی سان کینژن مقامی سیاسی نظرین تہ نظریاتی تضادن ہنز تِہِ وضاحت کرنہ آمژ۔ راوی یس یا ؤنتو افسانہ نگارس چھہ بٔڈہ افلاطون سندِ ژھینہ گژھنک سخ افسوس، سہ چھ تَس ژھانڈنہِ نیران مگر گۅڈہ چھہ بٔڈہ افلاطون سندِ شرطہ مطابق پننہِ کلہ ہیرِ چھۅکھ تہ نظرن اشۍ وانہِ گراے کڈان۔ تَس چھہ امہ پتہ یہ تہِ احساس گژھان زِ ییتی لالچوکس منز چھہ تس بٔڈہ افلاطونن کوچہ پھُیر تہِ کوٚرمت۔ یہ تذکرہ چھہ غالباسیاسی پوٚت منظرس منز کرنہ آمت یُس مسلہ کشمیر کین کینژن اہم تاریخی واقعہن ہنز ژینہ ون چھہ دوان۔ افسانک موضوع تہ مواد ؤچھتھ چھیہ مرحوم شفیع شیدا سنز "لالچوک” عنوان ناوچ نظم یاد پیوان یۅسہ تہنزِ سومبرنہِ "امار ” (چھاپ 1990) منز درج چھیہ۔امکۍ زہ تریہ بند وچھو۔
لال چوکن وچھ سیٹھا صبح تہ شام
لال چوکن تراوۍ تولتھ خاص و عام
کلۍ وچھِن کوتر بنان، کوتر کلان
انۍ وچھِن سودا کران گاشرۍ ہران
لنگۍ وچھِن دوران ، زنگن دب لگان
لال چوکن وچھ سیٹھا صبح تہ شام
وجدارن ہندۍ قدم کھۅنہِ منز رٹِن
کاشرین ہندۍ وچھ امارن ہندۍ ژٹِن
کریکہ بوزن دٲدۍ سینس منز کھٹِن
لال چوکن وچھ سیٹھا صبح تہ شام
لیڈرو گرہ کھالۍ وولکھ لال چوک
رہنما ترنیاے زولکھ لال چوک
پانہ زندے رودۍ گولکھ لال چوک
لال چوکن وچھ سیٹھا صبح تہ شام
لال چوکن تراوۍ تولتھ خاص و عام (شفیع شیدا )
زمرے:تبصرہ
کاشر ادبی رسالہ نیب 