نذیر آزاد

پنن شاعرانہ بجر بیان کرُن، یتھ فارسی تہ اردوہس منز تعلی ونان چھہِ، چھہ سانہ شعری روایتک اکھ اہم حصہ۔ امہ ستٍۍ چھہ نہ صرف شاعرہ سندِ تصّورِ شعرک پے لگان بلکہ چھہ سہ امہ کہ ذریعہ پننہ ادبی روایژ ہندس کُنہِ لہجس یا طرزس سٍتۍ پنن تعلق تہِ ظاہر کران۔ میر تقی میرس سٍتۍ چھہ کٲتہو شاعرو تہندِ طرزہ کہ حوالہ تعلق ظاہر کوٚرمت تہ یتھہ کنۍ چھکھ میرہ سند بجر بیان کرنس سٍتۍ پنن پان تہِ مۅلہ نوومت۔ یۅہے حال چھہ رسول میرس سٍتۍ تہِ کاشریو شاعرو روا تھوومت۔مثالہ دنچ ضرورت چھیہ نہ تکیازِ رسول میرس پیٹھ لیکھنہ آمتین مضمونن منز چھہِ مہجورہ سندِ پیٹھہ رسا جاودانی یس تام یتھۍ شعر یسلہ پاٹھۍ دنہ آمتۍ ۔ حالانکہ تنقیدک تقاضہ چھہ یہ زِ مہجور تہ باقی شاعر ن ہنزِ شاعری منز گژھۍ رسول میرنہِ شاعری ہندۍ عناصر تلاش کرنہ ینۍ ۔ مگر تمہِ برونہہ چھہ یہ ضروری زِ رسول میرنۍ تم شعری خواص گژھن وچھنہ ینۍ یمو سہ سانہ شعری روایتک اہم پڑاو بنوومت چھہ۔چنانچہ اردو زبانۍ منز پنن پان میرہ سند وارث ثابت کرنہ خاطرہ کرۍ شاعرو کبھو ،کسو تہ ٹک ہوۍ الفاظ استعمال یا زیادہ کھۅتہ زیادہ ووٹُکھ پننس تخلصس سٍتۍ میر جی یک "جی” لاحقہ۔ یا اگر زیادے نزدیک گژھنچ کوشش کٔرکھ تیلہ گنڈِکھ ودنکۍ تہ رونکۍ مضمون۔ رسول میرسند وارث بننہ خاطرہ تہِ کٔر نہ سانیو شاعروکانہہ سنجیدہ کوشش۔ زیادہ کھۅتہ زیادہ رلووکھ میرہ سنزِ شاعری ہندین دوپستانن سٍتۍ پننہ شاعری ہند سپستان تہ دراے یۅہے ہوسناکی ہند شربت مۅلہ ناونہِ وانہ پتہ وانہ۔ نہ ہیکۍ تم رسول میرن شاعرانہ مقام بدِ کٔڈتھ تہ نہ ہیکۍ تمہِ طرزِ اظہارہ نِشہ کانہہ فایدہ تُلِتھ یمیک آگر سۅ فارسی تہ اردو روایت چھیہ ، یمیک رسول میر اہم پڑاو چھہ۔

خیر یہ آیہ مطلعہ ہسے منز سخن گسترانہ کتھ۔مدعا چھہ یہ زِ نٔوس شاعرہ سند کانسہِ پرٲنس شاعرس خراج عقیدت پیش کرُن چھہ دراصل تتھ طرزس سٍتۍ پنن شاعرانہ اظہار لرِ تھاوُن یُس امس پرٲنس شاعرہ سند مخصوص طرزچھہ ۔شہناز رشید ن تہِ چھہ پننس اکس شعرس منز یژھی تعلی سٍتۍ پنن شعری تعلق غالبس سٍتۍ ظاہر کوٚرمت۔شعر چھہ ۔ ” جی خوش ہوا ہے راہ کو پُر خار دیکھ کر ”

بس غالبن یہ مصر ہ پٔرتھ پرۍ زِ میانۍ شعر

یمہ برونہہ زِ اسۍ وچھو زِ غالبس تہ شہنازس درمیان کُس شعری رشتہ تہ ہم آہنگی چھیہ یہ وچھن چھہ ضروری زِ شہنازن کتھ بنیادس پیٹھ چھیہ پننۍ شاعری غالبہ سنزِ روایژ سٍتۍ رلٲومژ۔غالبہ سندس شعرس منز چھیہ مشکل پسندی بجرک وجہ ماننہ آمژ تہ شہنازنہِ مطابق چھیہ تہنز شاعری مشکل پسندی ہندس زمرس منز یوان۔ چناچہ پرٲنس تہ نٔوس شاعرس درمیان چھہ اتباع برونہہ، شاعرتہ پرن والۍ سند رشتہ آسان۔ ییلہ نوۍ شاعرن کانسہِ پرٲنس شاعرہ سند کلامہ تنقیدی نظرو وچھمت آسہِ ادہ ہیکہ سہ تمہ تصورِ شعرچ نشاندہی کٔرتھ یُس تہندِخاطرہ راہبر تہ رہنما بنہِ۔چونکہ شاعرہ سند تہ قاری سندرشتہ چھہ محمد حسن عسکری ین یونگہ (Yung) سند حوالہ دِتھ ویژھنوومت۔یونگ چھہ ونان زِ دۅن بٲژن (میاں بیوی) منز چھہ اکھ (container)تہ بیاکھ (contained) ۔ گۅڈنکۍ سنز شخصیت چھیہ تیژ پیچیدہ آسان زِ اتھ منز دوٚیمس شخصہ سند مدغم گژھنہ باوجود چھہِ اتھ کینہہ خانہ توتہِ خالی روزان۔مکمل آسودگی چھہ یمن خانن ہند پُرنہ یُن ضروری ۔اوہ مۅکھہ چھہ اکس پھٲلُن تہ اکس مۅژن پیوان۔ یۅہے تعلق چھہ شاعرس تہ پرن وٲلس درمیان۔مگر میانہ خیالہ چھیہ نہ شاعرس بذاتِ خۅد مۅژنچ ضرورت بلکہ چھیہ ضرورت یمہ کتھہِ ہنز زِ قاری پھٲلاوِ پننس ذہنس تتھ حدس تام یُتھ سہ شاعرہ سندین پیچیدہ تجربن تہ تہندس اسلوبس کۅم ہیکہِ کٔرتھ۔ ییلہِ دۅن شاعرن درمیان گۅڈہ یہ رشتہ پیدہ سپدِتہ دوٚیم کرِ گۅڈنکس ذہنی طور احاطہ، ادہ ہیکہِ دوٚیم گۅڈنکۍ سندس اسلوبس یا طرزس پاننٲوتھ۔ وۅنۍ اگر دوٚیمہِ سند ذہنی آب و ہوا اتھ غیر موافق آسہِ تیلہ روزِ یہ تقلید یا اتباع کینژن لفظن ہندس استعمالس تامے محدود ۔سوال چھہ یہ پیدہ سپدان زِ شہناز رشید چھا گۅڈہ بہ حثیت قاری غالبہ سندس طرزس نکھہ ووتمت تہ پتہ کتھ حدس تام چھ امۍ یہ طرز پننس ذہنی آب و ہواہس سٍتۍ ہم آہنگ کوٚرمت۔یمن دۅنونۍ سوالن ہندجواب ہیکہ شہناز رشیدنۍ شاعری یٲژ فراہم کٔرتھ۔

عام پاٹھۍ چھیہ غالبہ سنز مشکل پسندی تہنزِ فارسی دانی تہ اسلوبس منز امی فارسی آمیزی ہندِس پوٚت منظرس منز وچھنہ یوان۔غالبہ سندِ امہ طرزِ بیانک (اضافتہ وول)نقل آو یسلہ پاٹھۍ کرنہ مگر غالبس تہ تہندین خوشہ چینن درمیان رود توتہِ اکھ حدِ فاصل۔غالبہ سنز مشکل پسندی آیہ تہندین یتھین شعرن ہندس تناظرس منز وچھنہ۔

شمار سبحہ مرغوبِ بتِ مشکل پسند آیا
تماشاے بہ یک کف بُردنِ صد دل پسند آیا

یتھۍ ہوۍ شعر چھہِ اسہِ دیوانِ غالبس منز نظرِ گژھان ۔ یم چھہِ اضافتہ واجنین ترکیبن پیٹھ مشتمل یا چھہِ یمن منز نم نمتھ (۹۹)فیصد فارسی الفاظ استعمال کرنہ آمتۍ ۔یتھۍ شعر وچھتھ آس مبہم گو تہ بعضے مہمل گو شاعر تہِ وننہ ۔ حالانکہ یتھین شعرن منز چھہ نہ ابہام (یمچ وضاحت برونہہ کُن کر نہ ییہ) تہ نہ چھہ اہمال(مہمل گو یی۔بے معنی کلامہ ونُن)بلکہ چھہ اتھ منز اشکال۔یعنی یتھۍ شعر چھہِ سمجنۍ مشکل ییتس کالس نہ قاری لفظن ہندۍ معنی زانان آسہِ یا شعرک پوٚت منظر پتاہ آسیس مثلا کاغذی ہے پیرہن۔۔۔ اتھ مقابلہ مثلا یم مصرعہ چھہِ بظاہر سہل:

دلِ ناداں تُجھے ہوا کیا ہے
ابنِ مریم ہوا کرے کوئی

یہ تہِ آو وننہ زِ یم چھہِ غالبہ سنزِ عمرِ ہندِ ٲخری حصک کلامہ ییلہ تمۍ گنجلک، دقیق تہ فارسی آمیز "گوٚب بیان” ترک کوٚر تہ لوگُن میر سندس طرزس منز کلامہ ونُن۔حالانکہ مالک رام سند ونن چھہ زِ غالبہ سنز ہ اکثر غزلہ یمو غالب پزی غالب بنوو چھیہ تہنزِ جوانی ہنزہ، نہ زِ تمہِ زمانہ چہ ییلہ تم "مشکل پسندی” ترک ٲس کرمژ۔

چناچہ شہنازرشیدنس کلامس منز چھیہ نہ اسہِ امہ لحاظہ مشکل پسندی نظرِ گژھان زِ نہ چھہ یہ فارسی آ میز تہ نہ چھیہ اتھ منز زبانۍ ہنز کانہہ پیچیدگی۔حد چھہ یہ زِ شہنازنس کلامس منز چھیہ اضافتہ واجنہِ کژتام ترکیبے نظرِ گژھان۔اتھ سلسلس منز چھیہ محمدیوسف ٹینگ سنز یہ کتھ بر حق زِ شہناز رشیدنۍ زبان چھیہ "تتھ حدس تام دۅہ دِشچ خصلتھ تہ پرزنتھ تھاوان زنتہِ چھہِ اسۍ یہ زٲنہ کدل وۅکھلۍ تران تران بوزان "۔گویا کہ شہنازنۍ زبان چھیہ روز مرہ ہچ زبان تہ امہ لحاظہ چھہ شہناز رشید میرس پتہ پتہ پکان تہ فارسی آمیز زبان نہ ورتاونہ کنۍ چھہ نہ شہناز رشید غالبنہ مشکل پسندی ہنز وتھ اپناوان۔مگر میانہ خیالہ چھیہ یہے ‘زٲنہ کدلۍ زبان’غالبس تہ شہنازس درمیان اشتراکک سبب۔

سارنی بڈین شاعرن ہندۍ پاٹھۍ چھیہ غالبس تہِ یہ خصوصیت زِ تہند کلامہ بار بار پرنہ باوجود چھیہ امچ تازگی برقرار روزان۔وجہ چھہ یہ زِ پریتھ نوٚو زمانہ چھہ پرانین شاعرن پننیو میعارو مطابق وچھان ۔مثلاً غالبہ سند یہ شعر ۔

آگے آتی تھی حالِ دل پہ ہنسی
اب کسی بات پر نہیں آتی

یہ ا وس اکہ وقتہ مایوسی تہ قنوطیتک شعر ماننہ یوان۔وننہ اوس یوان زِ اتھ منز نہ چھہ کانہہ استعارہ تہ نہ کانہہ پیکر بلکہ چھہ لۅتین لفظن منز پامال مضمون گنڈنہ آمت۔مگر اچانک باسیوو زِ برونہہ (آگے) اوس اسنُک و جہ دلک حال، تہ امہ لحاظہ چھہ اتھ منز طنز تہِ موجود تہ وۅنۍ (اب) چھہ نہ اسنہ خاطرہ کُنہِ وجہک ضرورت تکیازِ وۅنۍ چھہ ہنگہ منگہ تہِ اسن یوان تہ امہ لحاظہ چھہ یہ ذہنی فتورک مضمون۔امہ ہر یمانہ چھہ نہ یہ تہِ شعرہ منزہ ننان زِ یہ حالتھ چھا متکلمہ یا شاعرہ سنز ، کِنہ کانسہِ تریمس شخصہ سنز، کِنہ پور ہ سماجچ یتھ متعلق شاعر کتھ چھہ کران۔ در اصل چھیہ یہ صورتِ حا ل شعر س منزموجود ابہامہ سٍتۍ پیدہ سپدتھ ہیچمژ زِ شعرس منز چھیہ غیر یقینیت، غیر قطعیت تہ اکھ پیچیدہ تناو، تہ یہ صورتِ حال پیدہ کرنہ خاطرہ چھیہ نہ غالبن ثقیل زبانۍ کٲم ہیژمژ تہ نہ استعارس تہ پیکرس بلکہ چھہ یتُھ صورت حال ظاہر کرنہ خاطر ہ ابہام بہترین تہ موثر طریقہ۔

یتھہ کنۍ ہیکوؤنتھ زِ غالبہ سند کلامہ چھہ نہ مشکل بلکہ چھہ مبہم۔تہ ابہام پیدہ کرنہ خاطرہ چھیہ تمۍ صورت حالہ موافق زبان استعمال کرمژ۔ یتنس نازک خیال باوان چھہ تہ تتنس چھہ بظاہرتجریدس تہ پیچیدہ زبانۍ کٲم ہیوٚان تہ یتنس شاعرانہ چالاکی (poetry of wit) ہند اظہار چھُس کرُن تتنس چھہ بظاہر لۅتین، سادہ تہ روز مرہ کین لفظن کٲم ہیوان۔تہ یم سٲری ژھل تہ ول چھہِ پریتھ قراتس پیٹھ پرن وٲلس نوین انکشافن ہنز زان فراہم کران۔ امہ لحاظہ چھہ ٹینگ سند یہ ونُن صحیح زِ "گۅبہِ بیانک دولہ بور” نہ تلنہ باوجود ہیکہ تازہ شعر پرن وٲلس پانس کُن پھرتھ۔ مگر ٹینگ سند یہ ونُن زِ شہنازرشیدن یہ کلامہ چھہ غیر مبہم تہ ابہامس "کاژہ وُنل” ونُن چھہ نہ حقیقت۔ وجہ چھہ یہ زِ سہل ممتنع ہک شعر تہِ ہیکہ مبہم تہ لطیف ٲستھ تہ نہایت عربی ؍ فارسی آمیز (گۅبہِ بیانہ وول) شعر تہِ ہیکہ ابہامہ تہ لطفہ نشہ عاری ٲستھ یتھہ کنۍ اسۍ اکثر اردو قصیدن منز وچھان چھہِ زِ یمن منز چھیہ معنی ہچ یک رنگی۔ ابہام ونو نہ گوٚبس بیانہ وٲلس کلامس بلکہ ونو تتھ کلامس یُس پٔرتھ قاری سندس ذہنس منز سوالات وۅتلاوِ ۔ ابہام ونو شعرس منز موجود مختلف تہ متضاد معنین تہِ یم بہ یک وقت شعر کہ متنہ منزہ بر آمد ہیکن سپدتھ۔مثلاً غالبہ سند یہ شعر۔

کوئی دن گر زندگانی اور ہے
ہم نے اپنے جی میں ٹھانی اور ہے

شمس الرحمان فاروقی سند ونُن چھہ زِ امہ شعرچ تشریح کران چھہ پانہ غالب لیکھان زِ ‘اتھ منز چھہ نہ کانہہ اشکال۔یم لفظ چھہِ تمے چھہِ معنی تہِ ۔شاعر کیازِ ونہِ کٲنسہِ میہ کیاہ چھہ ارادہ۔شہر ہ نیبر بناوِ پینڈ (تکیہ) تہ بیہیہ فقیرن ہندۍ پاٹھۍ یا ژلہِ پردیس۔’ امہ شعرہ منزہ چھہِ یمو سوالو علاوہ بییہ تہِ کینہہ سوال وۅتھان ۔

متکلم کیازِ چھہ زندگی نشہِ نا امید؟ نا امیدی پتہ کمۍ چیزن کٔر اہندس دلس منز بییہ کینژس کالس زندہ روزنچ وۅمید پیدہ ؟ گر (اگر) لفظک شرط کیازِ ہ چھہ تھاونہ آمت؟ تہ ٲخرس پیٹھ کیاہ چھہ متکلم سند ارادہ۔

چناچہ شہنازرشید نہِ شاعری منز تہِ چھہ ابہام سیوٚد سادہ تہ بظاہر لۅتین لفظن ہندِ استعمالہ سٍتۍ پیدہ گوٚمت ۔اکہ طرفہ معنی آفرینی پیدہ گمژ یتھہ کنۍ پروفیسر راہی ین اشارہ کوٚرمت چھہ تہ دوٚیمہ طرفہ چھہِ متضاد تہ پیچیدہ صورتِ حال برونہہ کُن یوان۔مگر یہ تہِ چھہ پزر زِ شہنازرشیدن ذہن چھہ نہ اتھ سلسلس منز تیوت پھہلتھ ہیوٚکمت زِ سہ ہیکہِ پیچیدہ خیالن یا تجربن تکمیل شدہ لسانی اکائی بنٲوتھ۔ چناچہ ابہامچ ضد چھیہ وضاحت تہ تفصیل مگر غالب چھہ پننہِ شاعری خاطرہ تفصیلہ بجایہ ابہام پسند کران۔

میرے ابہام پہ ہوتی ہے تصدّق توضیح
میرے اجمال سے کرتی ہے تراوش تفصیل

مگر اتھ ونو غالبہ سنز بد قسمتی زِ تہندس ابہامس آو مہمل گویی وننہ تہ اتھۍ ناقدری کُن وچھتھ پیوٚو تس ونُن۔

گر نہیں میرے اشعار میں معنی نہ سہی

چناچہ ابہام چھہ یا تہ علامژ ہندِ استعمالہ سٍتۍ پیدہ سپدان نتہ سوالہ سٍتۍ ۔ مثلاشہنازنس یتھ شعرس منز چھہ نہ بظاہر سوال مگر "کوت” لفظکۍ استعمالن چھیہ اتھ منز استفہامی کیفیت پیدہ کٔرمژ۔

اکھ گداگر زِ رنیٲمت چھہ ہلم تام یمس
کوت مشکل چھہ تمس توٚملہ مۅچھین رٲچھ کرنۍ

بظاہر چھہ لفظ ‘کوت’ شعرس منز شدت پیدہ کرنہ خاطر ہ استعمال کرنہ آمت یعنی ہلمہ کہ رٕننہ کنۍ چھیہ توٚملہ مۅچھین رٲچھ کرنۍ سیٹھاہ مشکل۔ وۅنۍ اگر یۅہے لفظ استفہام انکاری کس معنیس منز نمون تیلہ چھہ سوال وۅتھان زِ تس چھا توٚملہ مۅچھین رٲچھ کرنۍ مشکل تہ سوالہ کہ متنہ منزے چھہ انکارن معنہِ تہِ نیران زِ ہلم رٕننہ باوجود تہِ چھیہ نہ تمس توٚملہ مۅچھین رٲچھ کرنۍ مشکل۔ ہلم تہ توٚملہ مۅٹھ چھیہ علامژ۔ تۅملہ مۅٹھ اگر سرمایچ علامت مانو تیلہ چھہ معنہِ زِ سرما یس رٲچھ کرنۍ چھیہ مشکل تہ گدا گر سندِ خاطرہ چھہ نہ یُتھ کانہہ مشکل تہ یتھہ کنۍ چھہ یہ توکلک مضمون بنان۔ وۅنۍ اگر ‘کوت’شدتہ کس معنیس منز نمون تیلہ چھہ یہ نارسایی ہند مضمون ۔وچھتو وۅنۍ یم کینہہ شعر یہند استفہام نوین نوین تہ مخالف معنین زایت چھہ دوان۔

چھہ کیاہ یہ راز سیاہ شب وچھتھ تہِ چھُکھ پرزلان
پرژھان آسہِ لۅتی گاشہ تارکس یہ زمین
ورۍ یہ وادن وجارہ براندس نش
روزِہے ما گلاب تھٕر موجود
کُس شُہل یارہ بل کٲج وقتس پھوٚرس
شہسوارس گوٚمت کیازِ ابلق مشتھ

یم شعر چھہِ نہ علمس منز کُنہِ قسمک ہریرکران تہ نہ چھہِ کانہہ انکشاف کران۔ بلکہ چھہِ یم بذاتِ خود سوال تہ یم چھہِ قاری یس پانس سٍتۍ آوراوان۔مثلاً اگر گۅڈنکس شعرس نحوی سطحس پیٹھ سنو تیلہ چھہِ امہ منزہ یم سوال وۅتھان۔

۱۔ اے تارکہ سہ کس راز چھہ ژ یہ منز یُس وُچھتھ ژہ پرزلان چھکھ؟
۲۔اے تارکہ ژہ کُس راز چھکھ وچھان یمہ سٍتۍ ژہ پرزلان چھکھ؟
۳۔ اے تارکہ سہ کس راز چھہ یُس وُچھنہ باوجود ژہ پرزلان چھکھ؟
۴۔ ژے کُس رازِ سیاہ شب وُچھتھ؟ ۔۔۔۔۔الخ۔۔۔۔۔۔۔۔۔

یتھے کنۍ چھہ دوٚیمس شعرس منز لفظ ‘ما’ واریاہ سوال تلان ۔ اکھ چھہ استفہام انکاری۔اتھ منز چھہ دعوی تہ دلیٖل۔یعنی یہ چھہ نہ ممکنے زِ وُجارہ براندس پیٹھ ہیکہِ گلابہ تھٕر موجود روزتھ۔ ونۍ اگر ‘ما’ شاید کس معنیس منز نمون تیلہ چھہ مفہوم یہ زِ یہ اوس ممکن زِ گلابہ تھٕر ما روزِہے براندہ وجارہ گژھنہ باوجود تہِ ورۍ یہ وادن موجود۔یتہِ چھِہ امہ سٍتۍ ذیلی سوال وۅتلان۔تیلہ کُس وکانہ گوٚو گلابہ تھرِ زِ براندہ وجارہ گژھنہ برونہے گیہ یہ پانہ وجارہ یا ہرییہ۔ممکن چھہ گلابہ تھرِ ہندس دلس (اگر اسۍ یہ دلچ علامت مانو)منز گوٚو موتُک خوف تہ ہرییہ۔ممکن چھہ یہ ژٔٹ کٲنسہِ ظالمن وغیرہ۔وجارہ براندہ تہ گلابہ تھٕر چھیہ پانہ علامتہ تہ یم تہِ چھیہ ابہامہ کین پردن ژھایہ تہ ضروری چھہ نہ زِ دۅن پرن والین آسہِ یمن ہندس معنیس پیٹھ اتفاق۔

شہناز رشیدن اگر ابہامک طرز غٲلبس نشہ ہیوٚچھمت چھہ تیلہ ہیکو یہ ؤنتھ زِ سہ چھہ غٲلبہ سندس تتھ ذہنی جغرافیاہس نزدیک وٲتتھ ہیٚوکمت یمۍ نہ مشکل پسندی کُن راغب کوٚر ۔چناچہ غٲلب اوس وہمہِ صدی ہند شاعر تہ وُہم صدی ٲس بذاتِ خۅد اکھ بوٚڈ بارہ سوا ل ‘ قدرن پیٹھ سوال، پژِھہِ پیٹھ سوال’۔ حد چھہ یہ زِ پننس پانس پیٹھ سوال وتھۍ اتھۍ صدی منز ۔یۅہے وجہ چھہ زِ غٲلب چھہ نقادن ہنزِ نظرِ (مثلاً فاروقی ،شمیم حنفی، وغیرہ) منز وُہمہِ صدی ہند استعارہ۔تس شاعرہ سندس استفہامی ذہنس کُس ہیکہ سوال تُلتھ یمۍ سندِ دیوانک گۅڈنیکے شعر چھہ بندس تہ خدایہ سندس رشتس متعلق سوال تلان۔ وُہمہِ صدی منز یم سوال تُلنہ آیہ تمن ہندۍ جواب چھہِ ونیک تام نہ صرف تشنہ بلکہ چھہ تمن منز مزید اضافہ تہ شدت یوان تہ یہے چھیہ جدید شاعری ہنز بٔڈ پہچان تہ شہناز چھہ کٲشرِ زبانۍ ہندیو جدید شاعرو منزہ اکھ تہ تس چھیہ پتاہ زِ وضاحتہ سٍتۍچھیہ شعرس منز یک رنگی پیدہ سپدان ییلہ زن ابہام چھہ شعرس تتھے کنۍ پیچیدہ بناوان یتھ کنۍ سون زمانہ پیچیدہ چھہ۔وضاحت کِتھہ کنۍ چھیہ شعرس بے لطف بناوان اتھ سلسلس منز چھیہ اکھ مثال پیش۔سودا سند شعر چھہ۔

سیہ چوری بدستِ آں نگارے نازنیں دیدم
بہ شاخِ سندلیں پیچیدہ مارے عنبریں دیدم

اتھ پیٹھ تُلۍ شیخ علی حزینن اعتراض زِ اتھ منز چھِہ ‘نازنیں دیدم’ تہ ‘عنبریں دیدم’ زاید الفاظ تہ یمو سٍتۍچھہ نہ معنیس منز کانہہ اضافہ گژھان۔یتے یوت نہ بلکہ چھہ ‘مارِ عنبریں’ عقلہِ لحاظہ نا ممکن تہ ‘دیدم’ لفظہ سٍتۍچھہ یہ شاعر سند ذاتی مشاہدہ یا فیصلہ بنان تہ یہ ژٹنہ سٍتۍ چھہ یہ اجتماعی تجربہ بنان۔حزینن بنوو یہ شعر یتھہ کنۍ۔

سیہ چوری بدستِ آں نگارے
بہ شاخِ سندلیں پیچیدہ مارے

اتھۍ صورتِ حالس چھہ غٲلب اجمال ونان تہ اتھ چھہ فاروقی لفظک جدلیاتی استعمال ناو دوان۔ سٲنس ادبی روایتس منز چھیہ مزکور تہ محذوفچ روایت۔مذکور گے شعرکۍ تِم لفظ یمو سٍتۍ کُنہِ تجربس/پیکرس/استعارس/سچویشنس کُن اشارہ کرنہ ییہ۔تہ مخدوف گے سۅ صورتِ حال یۅسہ نہ شاعرن آسہِ بیان کرمژ مگر یتھ تام پرن وول مذکورحصہ کہ مدتہ سٍتۍ واتہِ۔اتھ سلسلس منز چھہ اجمال اہم کردار ادا کران۔ مثلاً غٲلبہ سند یہ شعر۔

کو ئی ویرانی سی ویرانی ہے
دشت کو دیکھ کے گھر یاد آیا

ویرانی ظاہر کرنہ خاطرہ چھہ دشت بطور تشبیہہ استعمال کرنہ آمت تہ بظاہر چھہ گرس سٍتۍ تہِ یہے تشبیہہ دنہ آمژ ۔ تہ باسان چھہ زِ شعرس منز چھیہ رشتچ تہ گرچ ویرانی منز وجہہِ شُبہ۔مگر ویرانی ہنز چھیہ نہ دشتہ کہ حوالہ وضاحت میلان تہ نہ چھیہ گرہ کہ حوالہ یہ نظرِ گژھان۔امہ سٍتۍ میول یہ فایدہ زِ شعر بنیوو کثیر معنی وول۔دوٚیم معنی نیرِ یہ زِ دشتس منز چھیہ تژھ ویرانی زِ میہ پیوٚو گرہ یاد تکیازِ تتہِ چھہ آرام۔(یہ چھہ انسانی نفسیاتس منز زِ مصیبت وُچھتھ چھہ فرحتک زمانہ یاد پیوان) یتھہ کنۍ دراے مزکور تہ مخدوف کہ مدتہ سٍتۍ شعرس منز بہ یک وقت زہ معنی تہ تم تہِ متضاد۔وچھتو شہناز رشیدُن یہ شعر۔

وچھ زون یوکۍ پاٹھۍ دزان از تہِ کُنی زنۍ
شہنازہ میہ حیرتھ چھہ یمن خۅفتہ لرین پیٹھ

زونہِ ہند دزُن چھہ کنرکہِ وجہ سٍتۍ ۔یتھہ کنۍ چھہ یہ ہجرک مضمون۔مگر دوٚیمس مصرعس منز حیرتھ چھہ مذکور کٔرتھ پرن والۍ سندِ خاطر واریاہ کینہہ تراونہ آمت۔ خفتہ لٔر ہیکہِ سماجچ بے حسی تہِ ٲستھ یا یہ ہیکہِ شاعرہ سُند/پرن والۍ سند کانہہ ذاتی تجربہ تہِ ٲستھ۔امہ سٍتۍ ییہ خفتہ لرین ہنزعلامتی حثیت متعین کرنہ۔حیرتھ چھا زِ تم کیازِ چھہِ نہ زونہِ سٍتۍ دزان کنہ تم کیازِچھہِ نہ امہ کس نارس ژھیتہ کران۔ یہ چھیہ ابہامچ کار فرمایی تہ سوال وۅتلاونۍ چھِہ قاری سندس ذہنی استعدادس پیٹھ منحصر۔ وچھتو وۅنۍ ابہامہ کہ ڈیجرہ سٍتۍ کِتھہ کنۍ چھیہ شعرس منز یک رنگی پیدہ سپدیمژ۔

یام نیران چھہ نوٚن تاپہ ٹیوٚ کاہ کانہہ تہ تِتھُے
شینہ کۅہ تس، سہ وچھاں شینہ کۅہس براندس پیٹھ

‘یام’ استعمال کرنہ پتہ چھہ ‘تتھے’ غیر ضروری۔ ‘کانہہ’ تہِ چھہ زاید خاص کٔرتھ ییلہ ‘ تاپہ ٹیوٚکاہ’ وننہ آو۔ اگر صرف ‘تاپہ ٹیوٚک’ آسہِ ہے وننہ آمت تیلہ کرِ ہے ‘کانہہ’ تخصیسچ ضرورت پورہ۔ ‘ نوٚن’ تہِ چھہ کنہِ حدس تام غیر ضروری تکیازِ تاپھ چھہ تیلی تاپھ ییلہ سہ نوٚن آسہِ۔ ژھایہ منز چھہ سہ معدوم یعنی تمچ حثیت چھیہ نہ کہنۍ۔ ‘براندس پیٹھ ‘ چھہ نہ میانہِ خیالہ تُیتھ ردیف یمہِ سٍتۍ شعرکۍ لفظ کانہہ بھر پور استعارہ بنٲوتھ ہیکن۔ یعنی اتھ چھیہ نہ بظاہر کانہہ تِژھ خصوصیت یمہ سٍتۍ یہ شعرہ کین لفظن ہندِ خاطرہ ضروری چھہ۔’بالس پیٹھ’، ‘کوچس منز’، یا ‘گرس منز ‘ تہِ ہیکن امہِ بدلہ استعمال سپدتھ۔مدّعا چھہ یہ زِ تفصیلہ سٍتۍ ہیکہِ شعر کمزور بنتھ۔وۅنۍ اگر اسۍ یۅہے شعر یم غیر ضروری لفظ کٔڈتھ و چھون تیلہ چھہ امیک نثر یہ زِ ‘یتھے تاپہ ٹیوٚکانیران چھہ، سہ تہ شینہ کۅہ چھہِ اکھ اکس کُن وچھان۔’ شعر بنیوو مبہم تہ سوالات گیہ پیدہ ۔یہ چھا ہجر کنہِ، طنز کنہِ، خوشی، کنہِ کانہہ یار وغیرہ۔مثلاً یمن دۅن کردارن ہند اکھ اکس کُن وُچھن اگر خوشی ہنز علامت مانو زِ وندہ ژوٚل مگر سٍتی چھہِ اتھ سٍتۍ غمکۍ انسلاکات تہِ زِ شین گلہِ۔ شین گلن چھہ بظاہر خوشی مگر شینہ کوہہ خاطر چھہ یہ فناہک پیغام ۔اگر فناہک پیغام چھہ شعرس غمہ کس معنیس کُن نوان مگر قولِ محال نظرِ تل تھٲوتھ چھیہ یہ خوشی ہنز علامت زِ فنا سپدن چھہ عشقک معراج۔مثلاً فنا تہ بقا کتھہ کنۍ چھہ غٲلبن قولِ محالہ کہ ذریعہ ورتوومت۔

پرتوے خورسے ہے شبنم کو فنا کی تعلیم
میں بھی ہوں ایک عنایت کی نظر ہونے تک

وچھتو ابہامہ کس ڈیجرہ کس تناظرس منز شہنازن بیاکھ شعر۔

بلۍژیہ لۅکچارچہِ تم پرۍ یہ نِنے پانس سٍتۍ
کیازِ کُن زوٚن ژہ بہتھ زونہ شبس براندس پیٹھ

‘لۅکچارچہ’ لفظہ سٍتۍ اگرچہ شعرس منز ناسٹالجیاہک مضمون گنڈنہ آمت چھہ مگر تفصیلہ سٍتۍ چھہ معنیک دٲیرہ محدود گوٚمت۔اگر صرف ‘پرۍیہ’ وننہ آسہِ ہے آمت شعر بنہِ ہے نہ صرف غیر محدود تہ لا زمانی بلکہ گژھہِ ہے اتھ منز فلمی رنگ تہِ پیدہ۔امہ باوجود چھہ لفظ ‘تم’ استعمال کٔرتھ سوالن ہندِ خاطرہ گنجایش پیدہ سپزمژ۔شہناز رشیدن چھہ ابہام پیدہ کرنہ خاطر بییہ تہِ کینہہ ول استعمال کرۍمتۍ۔مثلاً مناسبت چھیہ اکھ اہم شعری صفت۔ اتھ زمرس منز چھِہ لفظ تمہِ آیہ استعمال سپدان زِ یمن پانہ وانۍ کانہہ نتہ کانہہ انسلاک (لفظی یا معنوی) آسہِ تہ یم آسن اکھ اکۍ سندِ خاطرہ وتھ ہموار کران۔مثلاً مرزا غٲلبہ سند یہ شعر۔

دل میرا سوزِ نہاں سے بے محابا جل گیا
آتش خاموش کے مانند گویا جل گیا

چناچہ گویا چھہ بمعنی جیسے تہ غٲلب ہیکہِ ہے ‘جیسے’ لفظ تہِ استعمال کرتھ مگر ‘گویا ہک’ بیاکھ معنی چھہ بولن وول تہ یہ چھہ خموش لفظس مقابلہ تھاونہ آمت تہ یتھ کنۍ چھہِ بظاہر کانہہ معنوی تعلق نہ تھاون والۍ لفظ اکس جایہ جمع کرنہ آمتۍ۔وچھتو شہناز رشیدن یہ شعر۔

ہُتھ وۅلرۍ واوس خبر کر یوسفس نیو تاج مۅغلو
یتھ چکس میانیو ستو پیریو چھیہ کرمژ تاجداری

مۅغلن ہند کشیرِ ہندس بادشاہ یوسف شاہس اقتدار نیُن چھہ بظاہر شعرک مضمون تہ امہ لحاظہ چھہ اکس تاریخی واقہس کُن اشارہ کرنہ آمت۔ مگر لفظ ‘چکس’ استعمال کرنہ سٍتۍ چھہ شعرس منز مناسبتک لطف پیدہ کرنہ آمت۔شعرس منز چھہ ‘چک’ بمعنی رقبہ زمین استعمال کرنہ آمت مگر اسہِ چھہ پتاہ زِ یوسف شاہس ٲس چک ذات۔یتھ کنۍ چھیہ مناسبت سٍتۍ اکس تاریخی واقہس منز شعریت پیدہ کرنہ آمژ۔چناچہ اتھ طریقہ کارس چھِہ شاعرانہ چالاکی( poetry of wit) تہِ وننہ یوان۔یتھے کنۍ چھِہ شہناز رشیدن محاورن ہندِ خلاقانہ استعمالہ سٍتۍ تہِ سوال وۅتلاوۍمتۍ تہ ابہامہ خاطرہ وتھ ہموار کرمژ۔

پریتھ گاٹھہ تہ پریتھ ناگہ یہے کتھ چھیہ نٹین پیٹھ
دیوانہ طبق نال گژھن فوتہ پھلین پیٹھ
یتھ ر اتھ پوٚرم لار وۅنۍ از تتھۍ چھہ دار لیکھتھ
روزے نہ کٲنسہِ پژھ وۅں یمن میٖلہ کنین پیٹھ

نٹین پیٹھ کتھ آسنۍ چھہ محاورہ بمعنی کُنہِ کتھِہ ہند مشہور سپدن۔ یعنی سۅ کتھ یمیک چرچہ پریتھ طرفہ آسہِ ۔اتھۍ سٍتۍ چھہ ‘گاٹھ’ تہ ‘ناگ’ استعمال کٔرتھ ‘نٹین’ سٍتۍ مناسبت پیدہ کرنہ آمژ۔ حالانکہ کتھہِ ہند چھہ چرچہ زِ ہوسہ کس حدس تام گژھہ کُس تام فوتہ پھلین پیٹھ دیوانہ (حالانکہ ‘مۅختہ’ چھہ اتھ بدلہ حذف کرنہ آمت)مگر دوٚیمس مصرعس منز چھہ ابہام زِ لوکھ گژھنا فوتہ فلین پیٹھ دیوانہ کنہ یم برونہی دیوانہ چھہِ تم لارن فوتہ پھلین تہ کرن ٹھٲسلہ۔دیوانگی ہند وجہ تہِ چھہ مبہم تہ یہ کتھ تہِ چھیہ سوال تلان زِ ییلہ یہ کتھ نٹین پیٹھ چھیہ تیلہ تہِ چھنا لوکن یا دیوانن اتھ کُن ظۅن ۔ ابہامن چھہ شعر طلسم خانہ بنوومت۔ شہناز رشیدن چھیہ ‘ براندہ’ ، ‘کمرہ’، ‘گرہ’ ہشہِ نوِ علامژ تہِ استعمال کرِ مژ مگر سٍتۍ چھہ سہ پرانین علامژن تہِ کٲم ہیوان ۔ یتھ کنۍ ہیرمس شعرس منز’گاٹھ ‘ ،’ناگ’، ‘نٹۍ’ بیترِ علامژن ہندمشاہدہ کرنہ آو۔ وچھتو یتھے بیاکھ شعر۔

کاون تہِ أنتھ ہیچ نہ خبر یارہ بلن ہنز
واوس تہِ خبر ٲس نہ یکبار پُھٹن نٹۍ

حالانکہ یم روایتی علامژہ چھیہ کامل صابن تہ راہی صابن امہ کھۅتہ تہِ کامیاب طریقس پیٹھ استعمال کرِمژہ۔ مگر شہناز رشید ن چھہ روایتی قاصدن ہند حوالہ دتھ یاربلن پیٹھ نٹین ہندِ پھٹنک ذکر کوٚرمت تہ سوالاتن ہنداکھ کاروان قاری یس پتہ تھومت۔ شہناز رشیدنۍبیاکھ اکھ خصوصیت چھیہ پیکر تراشی۔ مگر شہناز نۍ پیکر وچھتھ تہِ چھہِ سوالات پیدہ گژھان حالانکہ پیکر گژھۍ سوالن گنڈ مژرنۍ۔ قاری چھہ یتھۍ شعر پٔرتھ حیران گژھان زِ یمن شعرن منز چھا پیکرو ذریعہ ابہام پیدہ کرنہ آمت کنہِ ابہام سٍتۍ چھِہ یم متحرک پیکر برونہہ کُن آمتۍ۔منزۍ چھہِ یمن منز دعوی تہ دلیل تہِ وضاحتہ بدلہ سوال پیدہ کران۔

کسند مۅختہ چھہ چشمو ۂرتھ وتن ڈولان
یہ گوٚژھ نہ کٲنسہِ لگن پے توے چھہ روٗد پیوان
سۅے پھُٹجہ ہن وُچھس میہ دۅہے ییلہ تہِ گاٹھ ووٚتھ سوداگرس چھیہ وٲنس گمژناوِ تارہ بزۍ
اکھ جنگ سپدِ دوہلہِ تمن تاپہ ٹیکین پیٹھ
وۅنۍ گوٚژھ نہ گژھن بیاکھ یمن موم بتین پیٹھ

مختصر یہ زِ شہناز رشیدن اکثر کلام چھہ ابہامس منز ؤلتھ تہ امہ سٍتۍ چھہِ مختلف قسمکۍ سوال ووتلان تہ اکثر سوالن ہند جواب چھہ شعرہ کہ متنہ پیٹھے حاصل گژھان۔ مگر اکثر جاین چھِہ سوال تشنہ جواب روزان تہ یہ چھیہ امہ کتھِہ ہنز ضمانت زِ شہناز ن کلام ییہ ینہ وٲلس زمانس منز تہِ پرنہ تہ پرن والۍ دن یمن سوالن پنہ نیو معیارو مطابق جواب ۔یتھ کنۍ ہیکو ونتھ از اگر نہ شہنازن غالبنۍ ہش پیچ دار فارسی آمیز تہ اضافتہ واجنۍزبان استعمال کٔر، تو پتہ تہِ ہیژ تمۍ روز مرہ ہچہ زبانۍ ابہامچ کٲم تہ لفظن ہند یہ خلاقانہ استعمال چھہ غٲلبن دیت تہ شہنازن چھہ امہ وزہ ملہِ سٍتۍ پنُن ژونگ روشن کوٚرمت۔

غٲلبنۍ بیاکھ خصوصیت چھیہ تجریدیت یۅسہ کُنہِ کُنہِ جایہ شہناز نین شعرن منز نظرِ گژھان ۔

چناچہ پیچیدہ تہ گوٚب زبان چھیہ شاہ نضیرن تہ ناسخن تہِ استعمال کرمژ۔مگر یۅسہ تجریدیت غألبہ سندس کلامس منز نظرِ گژھان چھیہ تمۍ کٔر جدید شاعری (اردو کیہو کٲشر) واریاہس حدس تام متاثر ۔ تجریدیت چھیہ شمس الرحمان فاروقی سندین لفظن منز خیال بندی سٍتۍ تعلق تھاوان ۔ خیال بندی منز چھہِ اکثر نوۍ مضمون یوان گنڈنہ تہ دور از کار کتھن چھہِ شعرکۍ جامہ لاگنہ یوان۔ خیال بندی منز چھِہ معنی آفرینی ہندس مقابلس منز کثیر معنویتکۍ کم امکان آسان۔ مگر اتھ منز چھہ مضمون اکثر غیر مریی حتی کہ غیر محسوس چیزن پیٹھ قایم یوان کرنہ تہ امہ سٍتۍ چھہِ معنیکۍ امکان تہِ کُنہِ حدس تام ہران تہ تخیل کہ لطافتہ خاطرہ تہِ چھہِ سامانہ پیدہ سپدان۔تجریدس سٍتۍ سٍتۍ چھہ غالبن قول محال تہِ یسلہ پاٹھۍ استعمال کوٚرمت۔ چناچہ قول محالچ سیوٚد سادہ تعریف چھیہ یہ زِ زہ متضاد چیزسپدن اکس جایہ جمع تہ تمن منز ییہ اشتراک وچھنہ۔ مثلاً آتش گل یا میر سند یہ شعر۔

سیر کی رنگیں بیاض باغ کی ہم نے بہت
سرو کا مصرعہ کہاں وہ قامتِ موزوں کہاں

اتھ شعرس منز چھہ رنگیں تہ بیاض ( بمعنی سفید) زہ متضاد چیز محبوبہ سندۍ وصف ظاہر کرنہ خاطر ہ جمع کرنہ آمتۍ ۔ مگر غٲلبن کرۍ نہ یتھۍ روایتی قولِ محال استعمال بلکہ چھہِ تہندۍ اکثر شعر مکمل قولِ محالک درجہ تھاوان۔ مثلاً یہ شعر

ہر قدم دوری منزل ہے نمایاں مجھ سے
میری رفتار سے بھاگے ہے بیاباں مجھ سے

یتھین شعرن منز چھہ بقولِ فاروقی مروجہ رسومیاتن (conventions) تلُک پیٹھ یوان کرنہ مثلاً ہیرِ مس شعرس منز چھہ رفتار جمودس برابر تہ بیابانک آ سنے چھہ امہ کس نہ آسنس برابر ۔وچھو غٲلبہ سند یہ شعر۔

بزم سے وحشت کدہ ہے کس کی چشمِ مست کا
شیشے میں نبضِ پری پنہاں ہے موجِ بادہ سے

اتھ ونو تجریدک تہ قولِ محالک انتہا ۔ گۅڈہ چھیہ شیشس منز پری فرض کرنۍ پتہ چھہ تمۍسند نبض وۅتھُن فرض کرُن یمہ سٍتۍ شرابس منز لہر ہ وۅتھن تہ مے خانس منز گژھہِ وحشت پیدہ ۔بزم مے اگر کایناتک یا دنیاہک استعارہ چھہ مگر یہ چھہ کہنزِ تام چشمِ مست سٍتۍ ہنگامہ خیز۔شعر ک استفہامی لہجہ چھہ یہ سوال تہِ وۅتلاوان زِ یہ چشمِ مست کہنز چھیہ ؟ تجریدک انتہا کیاہ ہیکہِ امہ کھۅتہ زیادہ ٲستھ زِ شعرس منز چھیہ نہ سۅ ہستی موجود یمۍ سنز مست أچھہ ہند جود چھہ تلاطم پیدہ کران تہ نہ چھہ امہ منظرک وچھن وول یعنی پانہ شاعر /متکلم نظرِ گژھان۔ تجریدک تہ تقلیبک ( subversion) یہ چلن رود سانہِ جدید شاعری منز عام مگر یہ تہِ چھہ پزر زِ جدیدیت کس ابتدایی زمانس منز آے تجریدیت کس ناوس پیٹھ مہمل گویی تہِ کرنہ۔ حالانکہ ناسخن اوس اتھ مہمل گویی کُن تمہِ وقتہ اشارہ کوٚرمت ییلہ سہ سخن نا شناسن برونہہ کنہِ یتھۍ شعر تھوان اوس۔

ٹوٹی دریا کی کلائی زلف الجھی بام میں
مورچہ مخمل میں دیکھا آدمی بادام میں

مگر غٲلبن یۅسہ وتھ تجرید تہ قولِ محال چہ آمیزشہ سٍتۍ ہموار ٲس کرمژ سۅ بنییہِ جدید شاعری ہنز اہم شاہراہ تکیازِ جدید یتک زمانہ اوس چیزن ہند تلک پیٹھ گژھنک زمانہ۔ یتھہ کنۍ گۅڈے وننہ آو زِ اتھ زمانس منز آیہ قدرن سٍتۍ سٍتۍ پژھ تہِ شکہ کس زدس منز حالانکہ یہ کتھ ٲس گۅڈے صوفیو تہ فلسفیو ویژھناومژ زِ چیز چھِہ نہ تتھۍ یتھۍ تم بوزنہ یوان چھِ تہ یُہوے مضمون نظرِ تل تھٲوتھ تُل غٲلبن دنیاہس تہ اہلِ دنیاکس وجودس پیٹھ تہِ سوال۔یعنی

ہے غیب غیب جسکو سمجھتے ہیں ہم شہود
ہیں خواب میں ہنوز جو جاگے ہیں خواب میں

وچھتو تجرید تہ قولِ محال کتھہ کنۍ چھہ زیب غوری ین غٲلبہ سندِ مزاجہ مطابق گنڈمت۔

شش جہت صحراے بے آثار تھا
آسماں آئینے کی دیوار تھا

نشانک نہ آسُنے چھہ امیک آسن تہ صحراہک آسن چھہ نہ آسنس برابر۔ تہ اسمان ٲنک دیوار آسن چھہ تجریدک تہ قولِ محالک رُت سنگم ۔ وچھتو وۅنۍ اتھۍ تناظرس منز شہناز رشیدنۍ یم شعر۔

واوہ رنگ ٲس تمی ووٚن میہ شبس براندس پیٹھ
یس نہ زانہہ آسہِ یُنے پرارۍزِ تسۍ براندس پیٹھ
بر خزانن ستن حُسنہ کین ووٚتھ گژھان
یُس نہ نظرے یواں زانہہ تمس کُن وُچھتھ

یمن شعرن منز چھہ بظاہر غیر یقینیت تہ قنوطیتچ صورت حال۔تہ یم پٔرتھ چھہ فیض احمدفیضنۍ ”تنہائی” یاد پیوان۔ مگر یُس ابہام ، تجرید تہ قولِ محال یمن منز نظرِ گژھان سہ چھہ جدیدیتک دیت تہ یتھ پتہ کنہِ طرز غٲلب کار فرما چھہ۔تہ شہناز رشیدن یہ شعر۔

میونے وجہ چھہ طوطہ لگکھ گیونہِ وۅں یژکالۍ
میونے بِتُر چھہ لیوکھ میہ مضمون کلین پیٹھ

وچھتھ چھہ غٲلبہ سند یہ شعر یاد پیوان

آغشتہ ایم ہر سرِ خارے بہ خونِ دل
قانون باغبانی صحرا نوشتہ ایم

غٲلبہ سندس شعرس منز چھہ قولِ محال امہِ دعوہچ دلیل ۔ یعنی صحرا چہ باغبانی ہند قانون لیکھنہ سٍتۍ چھہِ کنڈۍ تام رتس منز بۅڈان یس عقلاً تہ عادتا ناممکن چھہ مگر تجریدک رنٚگ چھہ اتھ شعری پزر بناونس منز کامیاب گژھان تتھے کنۍ چھہ شہناز رشیدن کلین پیٹھ مضمون لیکھُن قولِ محالک درجہ تھاوان مگر اتھ منز چھہ نہ تجریدک رنگ۔وۅنۍ اگر یۅہے شعر اظہارچہ نارسا ئی ہند استعارہ مانون تیلہ چھہ یہ غٲلبہ سندس یتھ شعرس لرِ لوٚر تھاونس قابل۔

پاتا ہوں اس سے د اد کُچھ اپنے کلام کی
روح القدس اگرچہ میرا ہم زباں نہیں

ہم زبان نہ آسنہ باوجود یتھہ کنۍ روح القدس چھہ کلامس داد دوان تتھ منز چھہ قولِ محال ڈکھس تتھے کنۍ چھہ کلین پیٹھ مضمون لیکھنک قولِ محال شہنازنس شعرس ترسیلہ چہِ پیچیدگی ہند استعارہ بناوان۔ چناچہ طرزِ غٲلبس منز چھہ نہ ابہام تہ تجریدے یوت کُلہم رنٚگ بلکہ چھہ اتھ منز طنز ،نازک خیالی، بدون نظریہ کاینات تہ معنی آفرینی ہندۍباقی ول تہِ موجود مگر میانہ خیالہ چھہ نہ شہناز رشید تمن ولن ہیوٚکمت یا تہ سمجتھ یا پننہ شاعری اندر جذب کٔرتھ۔ غٲلبس کلہم پاٹھۍ کۅم کرنۍ چھیہ ناممکن۔ تکیازِ تمۍ سنز شاعری چھیہ تیژپیچ در پیچ زِ اکھ گنڈ مژراونہ سٍتۍ، بین ژورن گنڈن کُن ظۅن گژھان۔ چناچہ شہناز رشیدن چھہ مرزا غٲلب پنُن رہنما مو نمت یتھہ کنۍ غٲلبن طرز بیدلس سٍتۍ پنُن لۅے خۅے ظاہر چھہ کوٚرمت۔

مجھے راہِ سخن میں خوفِ گمراہی نہیں غالب
عصاے خضر صحراے سخن ہے خامہ بیدل کا

مگر امہ باوجود چھہ بیدل تہ غالبنۍ رنگ الگ الگ ۔ چونکہ بیدل سنزِ شاعری منز چھیہ تتھے کنۍ خیالچ پیچیدگی یتھہ کنۍ غٲلبس چھیہ مگر بیدل سندس کلامس منز چھیہ پر اسرا ر صوفیانہ لے ییلہ زن غٲلبس پیٹھ ثقیل گو یی ہاوی چھیہ۔ یتھے کنۍ اگرچہ شہناز رشید غٲلبس چھہ نہ کلہم پاٹھۍ کۅم کٔرتھ مگر یہ چھیہ اکھ حقیقت زِ یتھہ کنۍ غٲلبن بیدلس نِشہ لفظن ہند استعمال ہیوٚچھ ،تتھے کنۍ چھہ شہناز رشیدن غٲلبہ سنز ابہام پسندی نشہ لفظن ہند خلاقانہ استعمال ہیوٚچھمت تہ سارۍوے کھۅتہ بٔڈ کتھ چھیہ یہ زِ شہناز چھہ ابہامہ چہ وتہِ پانس تہ پانس اندۍ پکس تہ کایناتس متعلق سوال تُلنس منز کامیاب گژھان۔