1
ژھرین گرین چھہِ اکس اکھ وچھان ٲنہ تہ بہ
لبن الاندۍ گمتۍ بے زبان ٲنہ تہ بہ
یُسے دوان چھہ ووٚن تسۍ کراں دلس منز جاے
ڈلاں چھہ نظرِ تہ خالی گژھان ٲنہ تہ بہ
یہ کل جہان یہ ہنگامہ امہِ ورٲے چھہ کیا
عکس تہ ژھاے زمیں آسمان ٲنہ تہ بہ
دواں چھہِ باس اندرۍ کنۍ الگ الگ لیکن
کُنے سراب اندرۍ دٲیران ٲنہ تہ بہ
سہ انتخاب یسند کرِ تسند مگر رمضان
کراں چھہِ پانہ ونی مان مان ٲنہ تہ بہ
__
2
شبکۍ غم تارکن ہنزہ ڈفرِ ژانگچ ریہہ
یہ سورے پوٚز وۅں وۅتھ صبحک تہِ داما چیہہ
ووٚتھکھ تھوٚد جان گوٚو وۅگنیار کوتاہ چھے
پتاہ لوٚگ سارنے تلہ سا وۅں واپس بیہہ
پتھر پیمتۍ وتھر واون وڈٲوتھ نی
کُلس پیٹھ وۅنۍ چھکھا ژے اوت باقی، پیہہ
اوٚبر گلنار گوٚو بے شک مگر انہِ گٹۍ
ؤلتھ تس نال نیو پوشس نہ وۅزمچ تیہہ
دلک کانہہ دود، ذہنچ کانہہ گرہ، رمضان
کرکھ کیا دلملین لفظن اندر واضح
__
3
رنگ برگن چھکہِ، خۅشبو ژھٹہِ ، دل شاد تہِ کرِ
تیتھ تہِ کانہہ پوش یمس باد صبا یاد تہِ کرِ
دۅن پکھن کرپھ تہِ دواں چھس تہ تھواں پنجرس منز
زیو تہِ چھس مولہ کڈاں یتھہ نہ سہ فریاد تہِ کرِ
اکھ صفت چھس یہ سیٹھا رت، تہِ مگر مانن پییہ
یوت لہراوِ نہ، تمہِ زیادہ بییہ آباد تہِ کرِ
شور فل الحال کنن چھس نہ گژھاں، گوس اگر
غیرممکن چھہ نہ، زوٚر لاگہِ تہ آزاد تہِ کرِ
دگ تہِ للوان چھہ رمضان یسندۍ تیر رٔٹتھ
تس تعجب چھہ نہ، امہ خاطرہ دھنہِ واد تہِ کرِ
زمرے:شاعری
کاشر ادبی رسالہ نیب 