نے نیب نشانا نے پتہا
نے وہم گمانا نے لفظا
وق سورے ییلہ شریپہ چشمن منز
رنگ ساری لوسن اتھہ ہاوان
رفتار سری گژھہِ تھامہِ، رٔہتھ
گژھہِ نار وُہتھ گفتار سورے
ژٹہِ پوشہ نین کس ہردچ ژھٹھ
گژھہِ لونچن ٲنس پھرٹھ اندری
ییلہ گریکہ ونۍ لیج ہییہ آب گژھن
ییلہ گرٮزونۍ کۅل وسہِ سیکلس منز
ہموار گژھن دیوانہ ملر
خاموشی کرپھ کرِ لفظہ جۅین
ییلہ جاناوارس مدرۍ مژھلۍ
سنطور ہٹس لگہِ گنڈ وقتک
مضرابس پییہ تیزاب رُمن
ٹکہ سور ششرۍ ژھٹھ کرِ پڈرن
شہ زور برق رفتار گرِس
ییلہ نقشن پوشس ووشلنۍ ژھٹھ
مسمار کٔرتھ گژھہِ رنگ اسہ ونۍ
بییہ ژانگس ریہہ ہییہ بڑکھ کرنۍ
ہنگہ منگہ لگہِ کرانکن چاکھ کُلس
ییلہ ژھانپھ سیکیل کرِ مس چشمن
ییلہ سبز ونس ولہِ ششر ونل
طوفانچ ریہہ ژٹہِ سینہ ترن
ترنیار کھۅرن پھر ِرمن رمن
ہنگہ منگہ زن خواب دنتھ ساری
مہتاب رنگن ہند پوشہ بدن
کملاوِ وٹھن ہند پنہ پونپر
بے ناو سرابن ہند سرگم
ٲنس گژھہِ چاکھ صفا رویس
میلہ وار ژھیتھ گژھہِ گرکھ اندری
بس آسہِ فقط اکھ خاموشی
زمرے:شاعری
کاشر ادبی رسالہ نیب 