ناتھ جی تہ پیاری دۅشوے ٲسۍ ٹی وی یس پیٹھ چھکر وچھان– آ وچھانے ٲسۍ، بوزان نہ شاید کینہہ تکیازِ آواز آسہِ ہٲس سیٹھا لۅتہِ تھومژ۔ مگر ہنگہ منگہ گیہ اکی وزِ زہ بجہ آوازہ یمہِ سیتۍ دۅشویو وۅٹھ ہش کٔڈ۔ اکھ دژ اپارِ کچنس منز پریشر ککرن زورہ چکھ، بییہ گوٚو بنمس برس زورہ ٹھس۔ پیاری ؤژھ تھوٚد تہ کچنس منز کٔرن گیسچ ریہہ لوٚت۔ ناتھ جی پراریو کینژس کالس مگر ییلہ نہ کٲنسہِ ہند آلوے گوٚو نہ کھوٚتے کانہہ ہیرن سہ تہِ ووٚتھ رسے تھوٚد۔
"کوٚت گژھکھ؟” پیاری پرژھس۔ سۅ ٲس کچنہ پیٹھہ واپس ترمژ۔
"بۅنہ گوٚو دروازس ٹھس مگر نوٚنے زن دراو نہ کانہہ۔”
"اگر کانہہ آسہِ ہے پانے کھسہِ ہے۔ بیہہ پتھر۔”
مگر ناتھ جی بیوٹھ نہ پتھر۔ سہ گوٚو وارہ وارہ دارِ کن۔ پیاری کھژ زیادے ژکھ تہ سۅ لج پانس سیتۍ دور دور کرنہِ– روزۍتن اتی نس دارِ سیتۍ درہ لٔگتھ۔ لوکن چھا کانہہ کار زِ یور یِن امس سیتۍ سخن کرنہِ– تمہِ ہررٲو ٹی وی یس آواز۔ چھکرِ گٔر زن ٲس سازو بدلہ وچھ ژیٹان۔ کلہ گلناوان گلناوان ٲس بڈِ ہٹہِ گیوان۔ یا تلہِ خنجر تہ مارے نتہ سانہِ شباہ روزے۔
ناتھ جی ین مژرٲو دٲر۔ سندیا وق تہِ اوس ڈلُن ہیوٚتمت۔ تس گوٚو نہ کینہہ درینٹھۍ۔ مگر دروازس ہے اوسس وارہ کارہ ٹھس گوٚمت کِنہ یہ اوس محظ تسند برم؟ تس پھوٚش اکہِ لٹہِ بییہ گلہ چھانہ سنز یمۍ تور تہ سپرنگ صحیح پاٹھۍ لٲگمتۍ ٲسۍ نہ۔ نیبرۍ کنۍ اگر اتھے یوت لاگوس یہ دروازہ چھہ پانے مژراونہ یوان تہ پتہ ٹاس کٔرتھ واپس دنہ یوان۔ ممکن چھہ ونکٮس تہِ ما آسہِ کٲنسہِ وتہِ پکونۍ اتھ زٲنتھ مٲنتھ دکہ دیتمت زِ وۅلا توتہِ کرون ماسٹر جی پریشان۔
ناتھ جی ین ترٲو نیبرمہِ کچہِ وتہِ کن نظر۔ پتہ تتھ بجہِ تلہ سڑکہِ کن یتھ سیتۍ یہ کٔچ وتھ رلان ٲس۔ اتھ سڑکہِ اپارِ آسہ دور تام ویرے ویرِ۔ اجہِ خۅشکی پیٹھ تہ اجہِ آسہ آبس منز۔ پتہ بیاکھ سڑک تہ سوٚتھ تہ اپارِ ویتھ۔ ویتھہِ اپارِبٔڈ جرنیلی سڑک تہ تتھ سیتۍ کۅہ دامنس تل فوجی ہسپتال، کینٹین تہ افسرن ہندٮن کواٹرن ہنزہ تندلہ۔ مگر یمہ کچہِ وتہ، بجہ تلہ سڑکہ، یم ویرِ وار بیترِ چھہِ تیلی بیوٚن بیوٚن بدِ نیران ییلہ دہلۍ گاش آسہِ۔ ونکٮن چہ انہِ گٹہِ منز اوس سورے کینہہ یکسان گومت۔ صرف ٲسۍ تھزرس پیٹھ استادہ فوجی افسرن ہندۍ کواٹر بجلی گاشہِ کنۍ ننۍ نیران۔ یہے اوس انہِ گٹہِ کہ سٔدرہ اپارِ کیہتام زول ہیو باسان۔۔۔
"چھا کانہہ؟” پیاری پرژھس۔ ناتھ جی ین کوٚر کلہ گلنٲوتھ نکار۔
"ادہ تیلہِ کونہ چھکھ دٲر دوان؟ تٍر ہے چھیہ اژان۔”
مگر ناتھ جی ین کٔر نہ دٲر بند۔ سہ ووٚتھ پیاری کن۔”خبر ژیہ چھیہ پے۔ شامس چھہ یپارۍ وچھن لایق نظارہ آسان۔ دور ویتھہِ اپارِ چھہ آرمی ایریاہک بجلی گاش برابر بمبیہ ہند برم دوان۔”
"یہ کر چھکھ ژہ بمبیہ گوٚمت زِ یتیک نظارہ تہِ چھے تتیک برم دوان؟”
"میہ کر ووٚن بہ چھس بمبیہ گوٚمت۔ممکن چھہ کنہِ فلمہِ منزما آسٮم تتیک یتھے نظارہ وچھمت یا پانے ما آسٮم باسیومت زِ انہِ گٹس منز آسہِ سمندر بٹھس پیٹھ میرین ڈرایو ک بجلی گاش یتھے پاٹھۍ سجان۔”
"پرسکہِ تہ پرارۍ سکہِ وندہ ہے کریونے زارہ پارہ۔ گژھۍ زِ ہے۔” پیاری ووٚنس لۅتی۔
ناتھ جی ین کٔر دٲر بند۔ آو تہ بیوٹھ پننہِ جایہ۔ برنزس کھنڈس کٔرن ژھۅپہ تہ پتہ دیتُن سوالہ سیتۍ پیاری ہندس سوالس جواب۔ "کتھہ پاٹھۍ گژھہ ہا؟ پریتھ ریتہ چھہ مکانہ کے ساس ساس نکھہ آسان والُن۔ وندہ چٮن چھٹین منزے چھہ انسان دۅن ژۅن گروپن ٹیوشن ہیکان رٔٹتھ۔ بییہ ییتہِ کُس تھوہ ہون؟”
"خیر یہس آو بۅنہ کرایہ دار۔”
"آ۔ آو ہے۔مگر آونا یہس۔” ناتھ جی ین تروو وۅش۔ پیاری تہِ ووٚتھ اندرۍ کیہتام تچھن ہیو۔ سۅ تٔر اپور کچنس منز تہ کوٚرن گیس ژھیتہ۔
ناتھ جی ین اوس کتابو تلہ لۅتی اٹلس کوٚڈمت۔ تتھ منز شمالی امریکہک صفحہ کٔڈتھ ہیژون نقشہ وچھنُے زِ پیاری تٔر گیس ژھیتہ کٔرتھ واپس۔ ناتھ جی ین تھوو اٹلس رسے تخت پوشس نکھہ ریکس پیٹھ اکس رجسٹرس تل ژورِ۔
"بتہ کر باگۍ کھیکھ؟” پیاری پرژھنس۔
ناتھ جی ین دژ ٹی وی ہس کن نظر۔ کستام مٲہر اوس کھادِ ہندۍ قسم ویژھناوان۔ "ونہِ کیا گوٚو۔ ونہِ چھیہ نہ ستھ تہِ بجیمژہ۔”
"ادہ تیلہ کرہ پتہ پہن سیُن گرم۔”
"سیُن کیا چھہ؟”
"یہ صبحنس اوس۔ دۅہلہِ ہے ونیومے گژھ ان پاو کھنڈ۔ ما أنتھ۔”
ناتھ جی ین ترٲو پیاری کن دولہ نظر۔ یمہِ سیتۍ سۅ پزۍ پاٹھۍ کھوژ تہ کھوژان کھوژانے ووٚننس۔ ’’آہن سا۔ ژہ کھیزِ ہے۔ میہ چھہ نہ خۅش کران ۔ نتہ کیا کٲنسہِ چھمہ ٹھاک کوٚرمت؟”
"خۅش کیازِ چھے نہ کران۔ تمیک پاپھ تہِ ہے چھے میۍ۔ اگر نہ تمہِ دۅہہ نیرتھ آسہِ ہم ژوٚلمت زِ یپارۍ کنۍ چھہ پارۍ گامہ کاکہ پورہ تہ دوٚیمٮن جاین ننہِ وانن۔۔۔”
"تلسا مہ پاوتم بییہ یاد۔ میہ ہسا چھے خبر کیا گژھان۔”
ناتھ جی ین وچھ پیاری ٲس پزۍ پاٹھۍ د61نن ہش گامژ۔ بۅنہ گوٚو دروازس بییہ ٹھس۔ ناتھ جی گوٚو ہکہ تھوٚد ؤتھتھ۔
مگر پیاری بیہنوو پتھر۔ "یہ چھہ نہ سون دروازہ۔ یہ چھہ میر صابنٮن ہند دروازہ۔”
"ژیہ کتھہ پاٹھۍ توٚرے فکرِ؟”
"اچھن چھم گاش سوریومت، مگر کن چھی میہ تیز۔ دوٚہۍ دۅہس چھیس صرف یمنے ٹھسہ برن ہنز ٹاسہ راے بوزان آسان۔ وۅنۍ تگیم نا یوت تہِ پرزہ ناوُن زِ کس ٹھس کمہِ برک چھہ؟ چانۍ پاٹھۍ ما چھیس دوٚہۍ دۅہس سکولس منز آسان۔”
"اوہ سکولس چھس ترٹھ ژھنان۔ یہ چھیم ہیڈ ماسٹری اٹس کھژمژ۔ توتہِ چھس ڈاین ترٮن بجن تامے واپس یوان۔ خبر کر ییہِ کانہہ منسٹر یا افسر ڈایہ بجہِ پتہ انسپیکشنس تہ خبر کر کرن میہ نوکری منزہ جواب۔ یہ کیا نوِ ہفتہ چھہ کارتک پُنم۔ ساری ماسٹر چھہِ ونان زِ تمہِ دۅہہ روزو پانپرے تہ چھاوو زونہ گاشس منز کۅنگہ پھلے۔ مگر بے چھسکھ پھیش دوا”
"خبر کیازِ؟”
"ژہ کیا کرکھ ییتہِ کنی زنۍ؟”
پیاری ڈٲج کتھ۔ وژھس۔”وۅتھ نیبرمس برس تہ اندمس دروازس، دۅشونۍ تھو ہانکل۔ وۅنی ییہ نہ کانہہ۔”
ناتھ جی یس اوس پزۍ پاٹھۍ پننہِ جایہ بہت زِ از ییہ تمن نش کانہہ نتہ کانہہ۔ کانہہ ٲشناو، یار دوس یا پرانہِ محلک کانہہ زانۍ کار۔ از بٹہ وار دۅہ تہِ ٲس چھٹی۔ پگاہ چھیہ آتھوار۔ ینہ والۍ یِن ازۍ پگہک چھہ نہ سوالے۔ کس یژھہِ صبحس مہابھارت سیریل تہ دۅہلہِ فلم ترٲوتھ گرِ نیرُن تہ یور گارۍ گاٹھس یُن؟ مگر از تہِ زن آو نہ کہنے۔ خبر کیازِ؟
"دوٚپمے وۅتھ لۅتہِ دِ دروازن ہانک۔”
پیاری ہنز آواز بوزتھ زن گوٚو ناتھ جی ہشار۔”ناے خبر بنم گپتا جی ماییہ۔ تمۍ اوس میہ ووٚنمت زِ سہ ما ییہ ہفتس کھنڈس تامے واپس تہ جیمہِ پیٹھہ کیا واتہِ ٲٹھ نو بجے برونہہ۔”
پیاری بیٹھ ناتھ جی ینۍ یہ کتھ بارۍ تھپھ ہش۔ حالانکہ کتھ ٲس بالکل اپز۔ امرتسر نیرنہ برونہہ اوس گپتا جی ین ناتھ جی یس صاف ووٚنمت زِ سہ ییہ بلہ بیترِ وگراونہِ وۅنۍ مارچسے منز کشیرِ۔
"یہ تہِ گوٚو کرایہ دارے۔ کراے چھہ پورہ ؤریچ دوان مگر کل ؤریس منز آسہِ نہ پنژاہو شیٹھو دۅہو علاوہ ییتہِ روزان۔”
"سۅے تہِ چھیہ پریشانی۔” ناتھ جی ین اوٚن اخبار تہ سہ برونہہ کنہِ رٔٹتھ ووٚن پیاری۔ "کرایہ دار تھویو امہِ باپتھ زِ رٲچھ روزِ مگر وۅنۍ چھہِ اسی پننہِ گرِ گرویٹھ سیتۍ سیتۍ تسندس سامانس رٲچھ کران تہ بییہ سندس مکانس چوکۍ دری کران۔”
"بییہ سندس مکانس چوکۍ دری کران؟” ناتھ جی گوٚو حیران مگر ییلہ کتھ فکرِ تٔرس سہ روش پیاریہِ۔ "یتھہ پاٹھۍ گژھن نہ بیوقوفی ہنزہ کتھہ کرنہِ۔ عقلہِ گژھہِ کٲم ہینۍ۔”
ناتھ جی ین دیت اکہ طرفہ عقلہِ کٲم ہینک مشورہ۔ مگر بییہ طرفہ گٔیس پننہِ اچھ تہِ أدرِ۔ عینک تھوٚد تلتھ وۅتھرووُن لۅتی اوٚش ۔ پتہ لوگن بییہ عینک تہ ہیوٚتن اخبار پرُن۔ پیاری تہِ ؤژھ تہ کچنہ منزہ آیہ توٚملہ تھال ہیتھ ۔ سۅ بیچھییہ توٚمل ژارنہِ مگر ٹیوب لایٹہِ تل تہ آیس نہ کنہِ یا کنہ بوزنہ۔ ناتھ جی ین تل پننیو اچھو پیٹھہ عینک تھوٚد تہ پلنووُن زنانہِ۔ پیاری لج وۅنۍ عینک لٲگتھ توٚمل ژارنہِ۔ ناتھ جی ین تھوو اخبار ؤٹتھ تہ لوٚگ ٹی وی وچھنہِ۔ کستام ڈاکٹر اوس تمن بیمارٮن ہنز ویژھنے کران یہندۍ شکار زیادہ تر بڈی چھہِ سپدان۔ یمن علامژن کن ڈاکٹر اشارہ اوس کران، تم باسییہ ناتھ جی یس پانس تہِ۔ سہ ووٚتھ تھوٚد تہ کوٚرن ٹی وی بند۔
اخبار ؤٹتھ تہ ٹی وی بند کٔرتھ باسیوو ناتھ جی یس پنن پان بیکار تہ بیقرار۔ پیاری سیتۍ کرِہے کتھہ مگر سۅ ٲس توٚمل ژارنس سیتۍ آوٕر۔ لہذا لوٚگ پانہ سے سیتۍ سوچنہِ زِ یور شہرہ نش یوت دور مکانہ بنٲوتھ کوٚرا تمۍ جان کِنہ ناکارہ۔ پزر چھہ زِ تہنز پرانۍ لٔر ٲس نہ لٔر بلکہ آوسیمژن لبن پیٹھ استادہ میژِ کجابا یس دیہ سنزِ دیایہ کنۍ دٔرتھ اوس۔ اگر کنہِ کٹھس منز کانہہ بٲژ یتھے لرِ پھرُن دیہِ ہے سارۍ سے لرِ اوس الہ الہ گژھان۔ اوے تہ بہریوو نہ سہ نیتھرہ پتہ واریاہس کالس پیاری برونہہ کن گژھنسے۔ مگر تہِ کٔرتھ تہِ کڈۍ دۅشوے بٲژو تتھۍ کجابس منز پنژاہ دونزاہ ؤری۔ تتۍ زاو بِٹہ، تتۍ بڈیوو سہ۔ مگر ییلہ سہ ٹرینگ پورہ کٔرتھ نیبرے نوکری لوٚگ تمۍ ووٚننکھ صاف زِ یوٚتام تم تتھ پرانہِ لرِ منز چھہِ، توٚتام ییہ نہ سہ زانہہ تہِ کشیرِ۔ ناتھ جی ین تہِ سونچ پننہِ جایہ زِ وونۍ چھہ بِٹس نیتھرکرنُے۔ کٲنسہِ ہنز کور یتھ کجابس منز اننۍ گییہ پزۍ پاٹھۍ مندچھے۔ یہ داش نداش اوسس تہِ تہِ خرچ کٔرتھ بییہ دون لچھ رۅپیہ قرض ہیتھ کوٚرن اکھ دپور مکانہ استادہ تتھ جایہ یۅسہ برونٹھ گام ٲس یوان ماننہ مگر وۅنۍ چھیہ شہرسے منز شمار سپدان۔ تہ بِٹہ؟ نہ کوٚر تمۍ نیتھرے تہ نہ آو کشیرِ بسنہِ۔ پرٲرس آو ریتس کھنڈس۔ مگر پرُس رود کل سداہن دۅہن۔ تہ یہس؟ یہس گٲس وۅنۍ زہ رٮتھ کینڈا گٲمتس۔ زانہِ بھگوان تورہ کر ییہ واپس؟ ییا کِنہ کہنی نہ!
"وشناوا تیلہِ سیُن؟” پیاری ٲس توٚملہ تھال ژٲرتھ مۅکلیمژ۔ تمہِ تل اچھو پیٹھہ عینک تھوٚد تہ دتُن ناتھ جی یس واپس۔
"یہ کیا گۅڈہ بوزو خبر۔” ناتھ جی ین لوگ اچھن عینک۔ اخبار وہروون بروننہ کنہِ۔ بیک وقت لوٚگ ٹی وی پیٹھہ خبر بوزنہِ تہ اخبار پیٹھہ خبرن ہنزہ سرخی پرنہِ۔ ییتس کالس سہ کاشر تہ اردو خبر ہ بوزتھ تہ اخبارہ کس گۅڈنکس تریمس پٲنژمس، نوۍ مس تہ دہمس صفحس پیٹھۍ پیٹھۍ نظر دتھ مۅکلیوو تیتس کالس ٲس پیاری تہِ تخت پوشس پیٹھ تسندِ باپتھ تہ بۅنہ کنہِ پننہ خاطرہ بستر ترٲوتھ مۅکلیمژ۔
"بلۍ چھیکھ دوٚیم بستر تراوان۔” ناتھ جی ین ووٚننس کھوژۍ کھوژۍ۔ "ژہ تہِ آ ستہ میانۍ سے بسترس منز اژان۔”
"ژیہ چھے دوتھ وژھمژ۔‘‘ پیاری کھوٚت پزۍ پاٹھۍ شرارت۔
ناتھ جی ین دیت اتھہ سیتۍ ڈیکس ٹاس۔”یہے تہ رودم طمع۔ زانہہ آسہِ ہی میانۍ کتھ فکرِ ترمژ۔ میون مطلب اوس زِ دۅہے دۅہے زہ زہ بستر تراونۍ۔ ترییہ ترییہ ژورِ ژورِ دۅہہ زہ ز لیفہ وورِ زہ ز شاندہ گنڈۍ وورِ زہ ز ک کپرژادرِ چھلنۍ۔۔۔ژہ چھیکھہ وۅنۍ ییژ کٲم ہیکان؟ اگر ژہ تہِ آسہ ہکھ میانۍ سے بسترس منز اژان کامہِ گژھہِ ہی نصفا نصف فرق۔”
"کر، وۅنۍ بوٗز‘‘ پیاری دیت تتھہ پاٹھۍ یل زِ ناتھ جی یس پییہ وہ پن61ژہ ؤری برونٹھم پیاری یاد۔ سہ ووت خیالن منز خبر کوٚت۔
"دوٚپمے بہ وشناوے سیُن۔ پتہ کر کھیمو بتہ؟”
"وشناو۔ کھیتھے ژھنو۔” ناتھ جی ین دیت پیاری جواب تہ پتہ ووٚنن پانس سیتۍ لۅتہِ لۅتہِ۔ "سارے راتھ زن پییہ پیٹھہ۔ پیۍتن۔”
بتہ کھیتھ اوس ناتھ جی دلہِ ہنز خبر بوزانے زِ پیاری تٔر کچنہ منزہ بانہ مٲنجتھ۔ ’’ژہ چھکھہ ونہِ بہتے؟”
"ونۍ کیا کرہ بہ شوٚنگتھ؟”
"توتہِ اژۍزِ ہے بسترس منز۔ وشنیر گژھہِ ہی۔”
ناتھ جی ووٚتھ ٹی وی کوٚرن بند۔ بسترس منز ژاو مگر اتھس کیتھ تُجن اکھ رحسٹر۔
"کراہ بجلی ژھیتہ؟” پیاری پرژھس۔
"کر۔ بہ زالہ ٹیبل لمپ۔ میہ چھیہ سکول کٮن کاغذن نظر دنۍ۔”
پیاری کٔر ٹیوب لایٹ ژھیتہ۔ ناتھ جی ین زول ٹیبل لمپ تہ لوٚگ رجسٹر ورق پھرنہِ۔
"روز ژہ ہشارے۔ بہ چھیس ژھینتھ پیمژ۔” پیاری ووٚن تہ ژایہ پننہ نس بسترس منز شۅنگنہِ۔
"گٔژھکھ نا ژھیننۍ۔ زہ ز لیفہ وورِ زہ ز کپرژادرِ تہ باقی پلو ڈیر چھلنۍ چھا ٹھٹھہ کتھا! ”
پیاری دیت لرِ پھرُن تہ تھر کٔرن ناتھ جی یس کن۔ ناتھ جی یس توٚر نہ فکری زِ تسنز کتھ بوزۍ تھے دیتا امہِ لرِ پھرُن کِنہ پزی اوسس نندرِ وار آمت۔ تمۍ تھٔو لۅتی رجسٹر ؤٹتھ تہ بییہ اکہِ رجسٹر تلہ کوٚڈن سہ اٹلس یس ٲدۍ اوسن ژورِ تھوومت۔ شمالی امریکہک نقشہ کڈتھ لوٚگ تتھ وارہ پاٹھۍ سننہِ۔ یہ گوٚو کنیڈا، تہ یہ گیہ امچ رازدانۍ۔۔۔اوٹاوا۔۔۔۔تہ یہ گوٚو ہیلی فیکس ییتہِ ونکٮن بِٹہ آسہِ۔ اوٹاوا پیٹھہ چھہ نہ زیادہ دور۔ بییہ چھہہ سمندر بٹھس پیٹھ۔۔ یا سمندر بٹھس نکھے اکھ زوا ہیو۔ یمہِ کنۍ ہیوٚر شمالس منز آسنہ باوجود تتیک آب ہوا معتدل آسہِ بمبیہ ہیوے۔ ادہ سا جانے گوٚو۔ بِٹہ بچور چھہ تٍرِ کیت سیٹھا لیوٚژ۔ بییہ آسہِ بمبیہ ہندۍ پاٹھۍ تتہِ تہِ سمندر اپارِ زولے زول باسان۔ ہنگہ منگہ پیوٚو ناتھ جی یس حیس زِ تس چھہ خبر کیا گوٚمت۔ تسندس منس منز چھہ ہر وزِ سے اکھ منظر وۅتلان یتھ منز کرہنہِ سٔدرہ اپارِ زولے زول چھہ آسان۔ شاید ما چھہ امیک وجہ یہ زِ تس چھہ زول، بجلی گاش، نٔنس آکاشس تل سریہِ سند پراگاش، بترٲژ پیٹھ خۅشیوُن وشن وشن تاپھ۔۔۔ سورے کینہہ خۅش کران۔ شاید چھہ سہ یہ سورے کینہہ چھاوُن یژھان مگر چھاوے تہ چھاوہ کتھہ پاٹھۍ؟ یہ سورے کینہہ چھہ اپارِ۔ سہ چھہ پانہ یپارِ تہ منزچھہ انہِ گٹہِ ہند ٲنتھہ روٚستے سمندر۔۔۔
"پییہِ نندر؟ دپان ہے اوسکھ ونۍ کیا کرہ شوٚنگتھ؟” پیاری ہنز آواز بوزتھ گوٚو ناتھ جی ہشار۔ تس ٲس پزی زِپھ گٲمژ۔
"ووٚتھ کمۍ تام مژروو دروازہ۔ دہۍ دۅہس تہ راتۍ راتس چھکھ ہانکلہ وژھے ترٲوتھ خبر کمن دردلن پراران آسان۔ لوکن چھہ نہ کانہہ کار زِ ژیہ نش ینے یور مسایہ ژٹنہِ۔ ووٚتھ وۅتھان کونہ چھکھ؟ یوٚتام کانہہ لوٹھ کٔرتھ گژھہِ۔” پیاری ٲس بسترس منز نیبر نیرتھ دورہ دور کران۔
گپتا جی ما آو پزی پاٹھۍ؟ ناتھ جی ین تج ٹارچ تہ ووٚتھ بۅن۔ پیاری کٔر ہمت۔ دٲر مژرٲوتھ دژن ژٕرنہِ کنۍ بۅن کن نظر۔ کیہتام ژھایہ جوراہ گٔیس درینٹھۍ۔ اکھ ژھوٚٹ مگر وہرٲوتھ ہش۔ بیاکھ تھٔز مگر شرۅکیمژ زن۔ مگر ییلہ ناتھ جی نہِ زیوِ ہدِ ہدِ ۔ ہے ژیہ چراغ بیگ پیوٚن بوزُن تمہِ تروو پھرکھ تہ دٲر بند کٔرتھ ژایہ واپس بسترس منز۔
گاو کڈتھ نیبرمس برس تہ بنمس برس ہانکل دتھ ییلہ ناتھ جی واپس کھوٚت، پیاری پرژھنس۔ "یمن چھنا پرژھنَے؟ راتس تہِ چھیہ ہٹرِ ہٹرِ آسان پھیران۔ یس گور یمن صبحس دۅد چھہ ہیوان سہ چھنا شامنس وچھان زِ تلا یم ہے گیہ تہ کوٚت گیہ؟”
"تیلہِ کیا گٔیوو ییلہ یم دۅد آسہ ہن دوان۔ ” ناتھ جی یس ژوٚل وۅش نیرتھ۔ “یم چھیہ ہۅچھمژہ گٲو تہ توے چھیہ یتھہ پاٹھۍ حال حیران تہ پرژھینہِ۔”
پیاری تہِ تروو وۅش۔
"توتہِ پییہ یہس جان بارش۔” ناتھ جی ین تھوو پنن کلامہ جاری۔ "نتہ پرُس یۅسہ ہۅکھے ؤژھ تمہِ کنۍ درۅگیوو گاسہ تیوت زِ گوریو تہ گریستیو ژھنۍ یلہ ہۅچھمژہ گاوہ تہ بٔڈہ داند پجن کنتھ ۔ تنے کیا چھہِ پارۍ گامہ، کاکہ پورِ، کیلر ننہِ وانہ یہ بلاے آسان کننۍ۔”
ناتھ جی ین رٔٹ زیو دندس تل مگر کتھ ٲس تسندِ مۅکھہ منزہ نیرتھ ژجمژ۔ تمۍ دژ کھوژۍ کھوژۍ پیاری کن نظر مگر خبر کیازِ ٲس نہ ونکٮس تس دٕنن گامژ تہ موتن پھیورمت۔ تمہِ دیت تسنزِ کتھہِ شانتی سان جواب۔ "پجن حوالہ کٔرتھ چھکِھ کھش کرناوان۔ یہ چھہِ تمن پیٹھ وۅپکارے کران۔ بوٚڈ وۅپکار۔ پرژھیوٚن ٲستھ پتھ کن ڈولنہ کھۅتہ چھنا شراکہِ سیتۍ ہوٚٹ ژٹناونے جان۔”
ناتھ جی یس باسیوو زِ پیاری چھیہ لیفہِ تل اندرۍ اندرۍ ودان۔ سہ ژاو لۅتی بسترس منز۔ ٹیبل لمپ کوٚرن ژھیتہ تہ کلہ نلہ ہیژن لیف۔
زمرے:افسانہ
کاشر ادبی رسالہ نیب 