امین کامل

گرچہ خوردیم نسبتی است بزرگ
ذرہ ای آفتاب تابانیم

اکہ لٹہِ وو٘ن میہ مہجورصابس زِ تہۍ چھوہ میہ رشتہ دار تہِ۔ میہ باسیوو سہ روو ہیو تہ وو٘ننم۔ خبر کمہِ وتہِ؟ میہ وو٘نس ظاہری وتہِ نہ حض، بلکہ روحانی وتہِ۔ تمۍ کو٘ر وٹھہ اسناہ تہ وو٘نن، سہ گو٘و ساروے کھۅتہ بو٘ڈ رشتہ، مگر تہِ تہِ ونو کپارۍ؟ میہ بوزنوو پننس مٲلس نشہِ بوزمت یہ واقعہ۔

میون مول اوس چکدار تہ تمن دۅہن اوس کم کاسہ ژونٹین سیتۍ تہِ کران۔ باغ ہیوان تہ راول پینجہ سوازان۔ یتھہ کنۍ اوس سہ فارسی خاندہ مگر اردو تہِ اوس زبر پاٹھۍ لیکھان اوہ کنۍ زِ کینژس کالس اوس پٹھوارۍ تہ گرداور تہِ رودمت۔ مگر پتہ ژھنن نوکری ترٲوتھ تہ لو٘گ ژونٹھۍ کارس کن۔

امس ٲسۍ زہ نیچوۍ تہ دۅشوے گذرییس کینژسے کالس منز اکھ اکس پتہ۔ یہ اندازہ کرن چھہ نہ مشکل زِ امس شخژس کوتاہ یچھ دب اوس یہ اسمانن کو٘ڈمت۔ نیراش تہ کمبر پھٹ انسان، پیٹھہ اوس وٲنسہِ تہِ آمت۔ زوون نیہ پۅترے آسہِ روزن۔

سٲنس گامس منز چھیہ اکھ بٔڈ مشید ۱؂ ۔تمن دۅہن اوس وہرِ ژتجہہ ہیو اکھ اوخن صابا اتھ امامت کران۔ رت تہ خدا ترس آسنہ کنۍ ٲسس ساری عزت کران، یمیک زن عام اوخن صابن طمہے چھہ روزان۔ أمی تروو ہنگہ تہ منگہ مشیدِ اژن تہ نمازہ ویمازہ پرنس کو٘رن لا۔ لوکو زون کیاہ تام ور گوس تہ سخ پھیورک۔

میانۍ مالۍ ییلہ امۍ سندۍ رۅہ رکانہ وچھ، امۍ ژرژ زِ معاملہ چھہ نہ دماغی فتورک۔ امۍ پرژھ خلوکھ پاٹھۍ سخ ڈاڈہ کرتھ امس امیک اصل وجہ۔ اوخن صابس اوس میانس مالۍسند سخ پاس۔ پیٹھہ اوسس امس زہ گبر گذرنک تہِ سخ افسوس سپدمت۔ کتھہِ ژاپھ ہیو دِتھ وو٘ننس۔’’وچھ حض، یو٘تام کانہہ ووریاں آسہِ تس چھیہ ستر عورت خاطرہ کینہہ نتہ کینہہ ژھرٹہ ژھرت کرنۍ پیوان۔ ییلہ پلو بدس ییس پتہ ما روز ناداری۲؂ ۔ میانۍ مالۍ پرژھس کانہہ مرشد چھیہ کنہ پننی گاشہ چھکھ پکان۔ اوخن صابن وو٘نس نہ حض پیر چھم ۔ تس چھہِ غیاث صاب ونان۔ سہ حض چھہ شہرۍ کنۍ یار کلان روزان۔

منزہ گیہ زہ تریہ ریتھ ہوۍ کیاہ تام زِ اوخن ساب آو شامنس باگۍ میانس مٲلس نشہِ تہ دو٘پنس زِ غیاث صاب حض چھہِ پگاہ فلانۍ گامس منز واتن والۍ، تہۍ تہِ یزیو ضرور۔ میانس مالۍ سند گف اوس زِ ییلہ سہ تتھ مجلسہِ منز ژاو، تتہِ وچھن باگہِ بو٘رت نفرا اکھ بٔڈس تکیس سیتۍ ڈو٘کھ دِتھ، الپاکک پھیرن لٲگتھ، ذالدار آیہ کلاہ پیٹھہ دستار گنڈتھ تہ دسہ پٹاہ نکھس پیٹھ باکوک بہت۔ برٲرکانی اندر، ییتہِ یہ بہت اوس، ٲسۍ لوکھ سالہ سبہِ ہندۍ پاٹھۍ ژیستھ بہت۔ مجلسہ منز اوس اکھ الف ننگہ مو٘تا منزۍ منزۍ کٲر تلتھ ’’بے چھس محمدؐ، بے چھس محمدؐ‘‘ تانتھ ہش لاگان تہ امہِ پتہ بییہ کٲر کۅٹھین منز تراوان ۳؂۔ اوخن صاب اوس ژھو٘رے قہوہ ژو٘کا پھران تہ یزمن تہ تسند نیچو ٲسۍ پیالہ تلان تہ تراوان۔ میانس مالس آیہ دروازہ سیو٘د ہش جاے۔ واریاہو ہیژایہ تس ہیو٘ر کن جاے تراونہ خاطرہ سۅسراے کرنۍ مگر مجلسہِ ہند ہوا نوا اوس تیوت گمبرۍ زِ کانسہ اکۍ تہِ ہیو٘ک نہ اچھو سیتۍ تہِ تس اشارہ کٔرتھ۔ میون مول بیوٹھ رسہ پاٹھۍ دروازہ سیو٘د۔ امۍ ٲس ژونٹھۍ ٹوکر ا سیتۍ انۍ مژ۔ سۅ پلنٲون اوخن صابس تہ تمۍ تھٲو کیاہ تام ونتھ غیاث صابس برونٹھہ کنہِ۔میانۍ مالۍ چیو٘و قہوہ ژو٘کا تہ لو٘گ غیاث صابس سام ہینہِ۔ تس ٲس نہ کانسہِ ہنز درویشل سہل سہل ہٹہِ وسان۔ غیاث صابنۍ یہ کمامہ داری وچھتھ ٲسس نہ بروبدی یوان۔ اتھۍ اندر وو٘تھس غیاث صاب ’’خواجہ صاب تہۍ کیا کوم چھوہ کران؟‘‘ میانۍ مالۍ وو٘نس زِ میہ حض چھہ چک وک نییہ چھس ژونٹین سیتۍ کران۔غیاث صابن دیت دم ہیو تہ امہ پتہ وو٘ننس۔ وچھو حض تۅہہ زن آسن ژۅنٹھۍ امبر کرۍ متۍ۔ اتھۍ منز ییہ کانہہ فقیرا تہ تلہِ امہِ امبرہ اندرہ بلا پرسان کینہہ ژونٹھۍ۔ تۅہہ گژھیا اتھ انبارس کانہہ کمی؟ میانۍ مالۍ دیتس نکارس منز جواب، غیاث صابن وو٘نس ’’خدا صابس تہِ چھہِ شرۍ امبار۔ تس کیاہ کمی گژھہِ ہرگاہ تہۍ شرۍ تارہ ہیتھ ژلیوس۔ یہ ونتھ پلنوونس اہنزی ٹوکرِ اندرہ اکھ ژونٹھ تہ وو٘ننس یہ گژھہِ گرِ کین دین۔ مویوس لگہِ نہ سپدن۔

امید ہست پرستندگان مخلص را
کہ نا امید نہ نگردد زِ آستان الہ

میون مول چھہ یوان ژونٹھ ہیتھ گرہ۔ زٹھہِ باگہِ چھس بہ زیوان۔ …. یہ غیاث صاب گو٘و سے یس مہجورس ہیہر بابہ اوس ۴؂۔
یہ بوزتھ لج مہجورس ژھۅپہ۔ سہ گو٘و خبر کمن غۅطن ۔ اورہ پھیرتھ وو٘تھ میہ کن۔ ’’پزۍ کنۍ چھیہ تۅہہِ میہ سیتۍ قرابت۔ خدا دینو زیٹھ عمر۔‘‘