تحقیق

درویش مرد: مولوی عبداللہ وکیل


امین کامل

جناب جگن ناتھ آزادن چھہ از برونہہ واریاہ وری علامہ اقبال سندین ژۅن شعرن سانۍ سیاسی تحریک پو٘ت منظر بنٲوتھ معنہِ کو٘ڈمت۔ ہرجہ چھہ نہ ہرگاہ اتھ معنیس ہنا سام ہیمو، مگر تہِ کرنہ برونہہ چھہ مولوی عبداللہ وکیل مرحومس متعلق کتھ کرنۍ ضروری بنان۔

مولوی عبداللہ وکیل اوس کشیرِ ہنزِ سیاسی تحریکہِ ہند روح روان۔ مرحوم شیخ صاب (یمۍ نہ کانسہِ کینہہ مجرایی چھیہ دژمژ) چھہ پننہِ آتش چنار کتابہِ اندر امۍ سنز ذکر واریاہ کینہہ عزتہ سانے کران۔ مگر پزرہ دور تہِ چھن کینہہ کتھہ کرِ مژہ۔ شیخ صابس ہیچھناونس تہ برونہہ پکناونس اندر اوس امۍ سند زبردست اتھہ۔ یہ اوس مولوی صاب سے نشہِ اکثر وۅتھان بیہان۔ چناچہ امس سپد مولوی صابنہِ لۅکچہ کورِ مس محمودہ سیتۍ مس میل تہِ۔کھاندرک اوس سنز سپدانے زِ سیاسی مخالفو (یمن منز درپردہ شیخ صابنۍ کینہہ ساتھی تہِ ٲسۍ) کو٘ر شیخ صابس خلاف میرزٲے آسنک ہتھیار استعمال۔ یتھ کن عزیز بحرٲرین اشارہ چھہ کو٘رمت۔

یمو کٔر سخن دانایی
دپان تمنے چھہِ میرزایی
نہ چھی میرزٲے نہ گے قادیانۍ
یہ گو٘و بے بوج ناپرسان

تہ غلام محمد گنگو غلام مرحومن چھہ فارسی پاٹھۍ وو٘نمت۔

کردن اندر دار فانی کار شیطانی چہ سود
در جہان دایم نہ مانی میل نفسانی چہ سود
بہرہا چون قادیانی بدگمانی می کنی
خود عمل کردن ندانی وعظ می خوانی چہ سود

بہرحال، شیخ صابن کھیو٘و تراس تہ سہ دوریوو مولوی صابس تہ احمدی ین نش۔ تکیازِ تس باسیوو پنن سیاسی مستقبل خطرس اندر۔ مس محمودہ کو٘ر نہ پتہ کھاندر۔ سۅ گیہ واریاہہِ کالۍ پاکستان تہ تتہِ ٲس زنانہ کالج پشاورس پرنسپل۔ وۅنۍ چھن بڈتھ براے نام کھاندر کو٘رمت، محض کنیر ٹالنہ مۅکھہ اکس پانہ سے ہوس بڈس ستۍ۔ مولوی صابنۍ زِٹھ کور آمنہ بیگم ٲس قیامتچ شعلہ باز مقرر۔ سۅے ٲس زنانہ جلسن قیادت کران۔ سۅ مۅیہ دل بڈرنہ کنۍ۔ مولوی صابن زِیٹھ نیچو ایم اے صابر آو جلاوطن کرنہ۔ سہ تہ تسنددو٘یم بوے مولوی عبدالرحیم ٲسۍ مسلم کانفرنسک ترجمان اخبار صداقت چلاوان۔ ورایاہ واقعات چھہِ یم امہِ گرک تحریکہِ ہند روح آسن چھہِ ہاوان۔

احمدیو کمو کمو طریقو کو٘ر شیخ صاب بطور لیڈر پروجیکٹ، امیک یکطرفے سہی اظہار تہ ویژھنے ہیکہِ کانہہ تہِ شخص آزاد کشمیرکس جسٹس محمد یوسف صراف سنزِ انگریزی کتاب ’’آزادی خاطرہ کاشرین ہنز وۅٹھ ژھانٹھ‘‘ جلد اول صفحہ ۲۹۳ پیٹھہ وچھتھ۔ مولانا ظفر علی خانن لیو٘کھ شیخ صابس طنزیہ بٲتھ زِ ژہ بنیوکھ اخبار الفضل (قادیان) کیو کالمو سیتۍ شیر قالین پیٹھہ شیر کشمیر۔ بٲتکۍ قافیہ ٲسۍ ’’الفضل کے مقالوں سے‘‘ بیترِ۔مولوی صابنۍ بصیرت تہ علم وچھتھ ٲسۍ کم کم عالم فاضل ہے بنگہ سپدان۔ امۍ سے شخصیژ متعلق چھہ سون ادب شخصیات نمبرس (۲۸۹۱) اندر رشید تاثیر صابن پزرہ دور لیو٘کھمت۔’’ان کی وفات پر مسلمانوں نے ان کی نماز جنازہ پڑھنے سے انکار کیا، جس کی بنا پر ان کے بیٹے مولوی عبدالرحیم نے تحریری طور اعلان کیا کہ وکیل صاحب نے مرنے سے قبل باطل عقیدے سے توبہ کی تھی جس کی بنا پر قادیانیوں نے، مسلمانوں نے نہیں، ان کی نماز جنازہ پڑھی۔ (ص ۹۵۱)۔ مگر پزر چھہ اکہِ دۅہہ کلہ کڈان۔ چناچہ چھہ پانے لیکھان۔ ’’پزر چھہ یہ زِ مولوی عبداللہ وکیل یمۍ پو٘تس بہایی مذہب اختیار کو٘ر تہ اتھۍ سلسلس پیٹھ کو٘رن وفات تہِ‘‘ (ص۷۴۲)اصل حقیقت چھیہ یہ زِ مولوی صابنۍ گذرنچ خبر بوزۍتھے پیو٘و لوکہ ارساتھا تہندس مکانس پیٹھ وٲتتھ۔ مسلمانے یوت نہ ہیندۍ تہِ۔جنازہ آو باشان فتح کدلہ پیٹھہ ازۍ چہ اقبال پارکہ تام کڈنہ، ییتہِ تقریبن ژورو ساسو مسلمانو نمازِ جنازہ پو٘رس۔ امامت کٔر مولوی عبدالصمد مرحومن۔ چھرا پو٘رس نہ قادیانی احمدی حضراتو یمن منز پنن زیٹھ نیچو صابر صاب تہِ اوسس۔ باقے نیچویو پو٘رس مسلمانن سیتۍ جنازہ۔ مرحوم چودھری عبدالرحمن ریونیو اسسٹنٹ سندس امامتس اندر پو٘رس بہایی جمٲژ تہِ پننہِ آیہ جنازہ۔ (یمن ہندۍ فوٹو چھہِ میہ نش موجود)۔

یمہ ساتہ غلام احمد عشایی گذریوو ، اتھۍ اقبال پارکہِ اندر آس نماز جنازہ پرنہ۔ حالانکہ جنازچ قیادت ٲسۍ پانہ شیخ صاب کران۔ مشکلن آسہ ہن ستھ ٲٹھ شتھ لوکھ۔ بہ اوسس دۅشونی جنازن اندر شامل۔ بہایی ٲستھ تہِ کوتاہ اوس مولوی صابن احترام تہ عزت لوکن، شاید تمۍ سند نماز جنازہ اوس تمچ بہترین مثال۔

ڈاکٹر اقبالن تہِ چھہ جاوید نامس اندر امس کن (؟) اشارہ کو٘رمت۔ جاوید نامہ سپد ۹۲۹۱ اندر شروع تہ ا۲۳۹ ہس اندر چھپیوو۔ تمہِ وزِاوس تحریکہِ ہند روح رواں مولوی صاب۔ ڈاکٹر صابس ٲس مولوی صابنہِ سیاسی بصیرژ تہ علم و فضلچ زان سپز مژ۔ گۅڈہ گۅڈہ ٲسۍ تحریکہ تریہ اہم لیڈر۔ شیخ صاب، عبدالرحیم تہ غلام نبی گلکار۔ ٲخری زہ ٲسۍ احمدی۔ یمے آیہ قلعہ بند تہِ کرنہ۔مولوی عبدالرحیمن کٔر کشیرِ ہندِ طرفہ تتھ کانفرنسس اندر شرکت یۅسہ شملہس اندر جلے ۱۳۹۱اندربلاونہ آیہ۔ امکۍ باقے نمایندہ ٲسۍ امام جماعت احمدیہ بشیرالدین، علامہ اقبال، نواب سر ذوالفقار علی، خواجہ حسن نطامی بیترِ(پنجاب کی سیاسی تحریکیں، ص۵۶ پاکستان) یتھہ کنۍ ٲس ڈاکٹر صابس پورہ خبر زِ کشیرِ ہنزِ سیاسی تحریکہ کس ہیو دماغ تہ کۅسہ ہش جماتھ چھیہ چلاوان۔ چناچہ آو خلیفہ قادیان کشمیر کمیٹی ہند صدر بناونہ۔

جگن ناتھ آزادن چھہِ پننس اکس مختصر مضمونس اندر علامہ سندِ جاوید نامکۍ یم ژور شعر نقل کرۍ متۍ۔

آن جوان کو شہرودشت در گرفت
پرورش از شیر صد مادر گرفت
کاروان ہا از صداے تو درا
تو ز اہل خطہ نو میدی چرا
شہر با زیرسپہر لاجورد
سوخت از سوز دل درویش مرد
سلطنت نازک تر آمداز حباب
ازدمے او را توان کردن خراب

جگن ناتھ آزاد چھہ زنتہ چۅرتہ گو٘مت زِ ہرگاہ نوجوان شیخ صابس کن اشارہ چھہ، یہ مردیادم (مرددرویش) کس ہیو چھہ؟ حالانکہ مرد درویش گو٘و نہ بڈہ مۅہنیو۔ توتہِ اوس مولوی صاب امہِ وزِ ۳۶ وہر۔ کمۍ تام وو٘ن آزاد صابس زِ یہ گژھہِ میر واعظ مولوی احمد اللہ ہمدانی آسن۔ بے خبری ہندس عالمس منز لیو٘کھن تی۔ مولانا ہمدانی مرحوم ٲسۍ بے شک اکھ دینی پیشوا، مگر تمن ٲس نہ پننۍ کانہہ سیاسی نظر۔ نہ ٲسۍ تم اردو زانان نہ فارسی۔ چناچہ ۶۳۹۱ چہ جلاوطنی دوران ییلہ مولانا محمد سعید مسعودی مرحومس سیتۍ یم تہِ علامہ اقبالس لوہرہ سمکھۍ، ڈاکٹر صابن کریایہِ گۅڈہ اردو پاٹھۍ پتہ فارسی پاٹھۍ یمن سیتۍ کتھ کرنچ کوشش مگر مولانا مسعودی مرحومن وو٘نکھ زِ یم چھہِ یمو دۅشوے زبانو نشہِ ناواقف۔ اقبال گو٘و ہے بنگہ تکیازِ اکھ مسلمان پیشوا تہ واعظ مروجہ زبانو نشہِ ناواقف آسن باسیوکھ عجیب۔ ہرگاہ ’’مرد درویش‘‘ مولانا ہمدانی مراد آسہ ہن، تیلہِ آسہِ ہے تمن علامہ اقبال برونٹھے زانان۔ دوبدو نہ سہی، غایبانے سہی۔ اتھ مقابلہ ٲس مولوی عبداللہ مرحوم سنز قداواری یہ زِ عربی، فارسی، اردو اہل زبان تام ٲسۍ رٔہتھ گژھان۔ پیٹھہ ٲس اہنز ذاتی زندگی اکس مرد درویش سنزے زندگی۔ پننہِ بیٹھکہِ اندر اوس وگوس پیٹھ بہت آسان تہ یس تہِ ملکی یا غیر ملکی بڈِ کھۅتہ بو٘ڈ انسان تہِ سمکھنہِ ییہ ہس، اتھۍ وگوس پیٹھ بہن اوس پنن بو٘ڈ شرف زانان۔

یہ کو٘ر میہ جگن ناتھ آزادن سونچ تہ اظہار درست زِ مرد درویش ہیکہِ نہ مولوی ہمدانی بلکہ مولوی عبداللہ ٲستھ۔ نتہ نہ چھہ یمن شعرن منز نوجوان مراد شیخ محمد عبداللہ تہ نہ چھہ مرد درویش ہہ یا یہ۔ آزاد صابن چھہ خبر کمہِ مصلحژ کنۍ تمہِ وزِ اقبال سندین یمن شعرن سیتۍ گیند کو٘رمت۔

زمرے:تحقیق

جواب دیں

Fill in your details below or click an icon to log in:

WordPress.com Logo

آپ اپنے WordPress.com اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Google+ photo

آپ اپنے Google+ اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Twitter picture

آپ اپنے Twitter اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Facebook photo

آپ اپنے Facebook اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Connecting to %s